— 1642 —
liat tjoetjoenja soeda dapet pangkat besar, dan mempoenjai djasa pada negri.
Antara Keng Hoa Siotjia dan Kou Kongtjoe djoega telah diketemoeken, begimana girang hatinja itoe doea soedara, ini poen kita tiada oesa seboetken lagi.
Djoega Kou Han Lim telah oendjoek ia poenja trima kasi pada Wie Siotjia, jang ia soeda hatoerken pertoeloengan waktoe ia ada di dalem bahaja. Sebaliknja Gak Kong kasi taoe tentang kedjadian apa atas dirinja itoe gadis, begimana ia soeda tinggal idoep sebatang karang, soedaranja, Wie Sioetjaij, soeda ditjari disana sini tapi pertjoema sadja tiada ketemoe, boleh djadi orang itoe soeda binasa dalem kariboetan atawa poen begimana.
Tjo Kongtjoe mengela napas, samentara Kou Kongtjoe njataken pikirannja seraja berkata: „Toeroet akoe poenja pengliatan, Wie Siotjia ada pantes sekali mendjadi istrinja saorang bangsawan agoeng. Song In sampe sekarang belon dipertoendangken, maka boeat itoe oeroesan akoe soeka djadi orang perantara'an dan bitjaraken pada Ko Kong, soepaja ka doea orang itoe didjadiken pasangan satoe dengen laen."
Gak Kong njataken soeka hatinja seraja membilang trima kasi.
Kombali di sitoe telah diadaken perdjamoean makan minoem, sasoedanja poeas marika itoe poelang ka masing masing tempatnja.
Pada hari esoknja, seperti djoega jang didjandji, ampir berbareng, Tjo Kongtjoe, di satoe fihak Gak Kong, Tjo Hoedjin bersama poetranja,
