— 1644 —
katerangan soeda dapet tjari pada Soen Nio, Djim Po dan Hong Dji. Ini boedak doerhaka waktoe kena ketarik aer soeda terpoekoel ombak dan sampe di satoe tempat jang djaoe dari kota Gie Jang, di mana atas pertoeloengannja bebrapa pendoedoek negri ia soeda di angkat bersama-sama peti oewang jang ia doedoekin.
Itoe peti ternjata kosong, tiada ada isinja.
Poen itoe orang-orang doerhaka soeda dapet hoekoeman sebagimana pantes.
Katjoeali Lu Siotjia, poetrinja Lu Kok Tjaij, jang telah di bebasken dari hoekoeman mati, kerna Bong Loan telah mintaken ampoen di hadepan Baginda dengen kasi taoe, betoel Lu Kok Tjaij ada sanget djahat, tapi anaknja tiada taoe apa dalem hal jang di perboeat oleh ajahnja. Lagi itoe gadis soeda di pertoendangken padanja, maka Ko Siotjia moehoen Baginda ampoenja moerah hati soepaja pengharepannja itoe gadis djangan di bikin poetoes.
Perminta'annja Ko Siotjia telah di trima baek oleh Baginda.
Begitoelah itoe gadis soeda dapet terloepoet dari hoekoeman mati, djoega atas maoenja Bong Loan, dengen senang hati Lu Siotjia telah di pertoendangken pada Kou Kongtjoe.
Liwat tiada brapa hari poela, Baginda telah oendang itoe orang orang jang berdjasa di dalem peprangan berkoempoel di astananja, di mana marika itoe satoe persatoe berloetoet di hadepannja Sri Baginda Keizer.
Satoe Taijkam batjaken Baginda poenja soerat poedjian, jaitoe pada Bong Loan, jang sebagimana
