— 1154 —
Tjoen poelang ka Tin Kok Hoe, dengen pengharepan di sana bisa ilangken kadjengkelan hatinja, tapi ia poenja pengrasaän-pengrasaän jang soeda terpendem begitoe dalem tiada bisa disingkirken dengen tiada membikin ia bertindak kalaen haloean.
„Bermoela akoe ada taro harepan ia nanti bisa menjinta toeroet akoe poenja maoe sebagimana loemranja orang berlaki istri, tapi pengharepan itoe tiada berboekti sebagimana jang akoe ada harep," begitoe Hok Tjoen berpikir dalem hatinja. „Soenggoe, soenggoe akoe menjesel beriboe njesel soeda menika sama saorang prempoean jang tiada bisa hargaken swaminja sendiri! Akoe poenja Ko ada begitoe sajang padakoe sebagi sajang pada anaknja sendiri; akoe sanget menjesel soeda toeroet kemaoean hati sendiri! Toch blon tentoe orang toeakoe tiada sanggoep boeat dapetken satoe prempoean jang baek aken djadi istrikoe. Kenapa akoe dapetken saorang istri jang begitoe matjem!”
Menginget sampe di sitoe Hok Tjoen berbalik seselken dirinja sendiri, lebi lagi kaloe di'inget begimana lantaran ia poenja perboeatan Konja djadi toeroet bersoesa hati.
Sasoeda bengong berpikir sakoetika lamanjá, achir-achir ia dapet inget apa-apa dan kata lagi: „Di bilangan Kang-lam akoe dapet denger
