— 1159 —
paling banjak oewangnja kaloe sadja tiada berlakoe boros," kata Hong Dji jang toeroet tjampoer bitjara „kita orang blon liat Siangkong bli barang apa-apa jang ada harganja, tapi...... heran, oewang selaloe loedes dan sekarang grembengin Taij-Taij jang soeda begitoe kepaja'an dalem perkara!“
„Soeda kau djangan toeroet tjampoer dalem ini oeroesan, Hong!"kata Hok Tjoen pada itoe boedjang jang genit: „Kau taoe, akoe poenja niatan boeat berniaga ada begitoe keras, inilah ada satoe alamat aken dapet kaoentoengan bagoes. Pendek akoe bilang, kaloe laen taon Hok Siangkong tiada djadi saorang hartawan akoe soeka'an..."
„Pandjang oemoer!" kata Hong Dji jang potong orang poenja omongan, dan sembari djebirken bibirnja ia berdjalan pergi. Inilah asilnja boedjang jang terlaloe dikasi ati!
Aken tetapi biar begimana pande djoega Hok Tjoen poenja bitjara, Soen Nio tiada bisa kasi lebi dari djoembla jang ia bilang tadi, hingga maoe tiada maoe Hok Tjoen trima djoega.
Dengen itoe djoembla oewang ia pergi pada istrinja, sama siapa ia mengotje dan soepaja dapet gaet oewangnja. la bilang, mertoeanja maka soeda djadi hartawan lantaran soeda ditoeloeng dalem perdagangan tjita dan laen-laen obrolan lagi, achir-achir ia minta istrinja soeka briken sariboe tail perak boeat ia pertama berniaga.
