— 1170 —
tjoema soeka denger perkata'an baek dan pantes!"
„Oh tiada, djangan kwatir Eng!" kata Ong Ma lebi djaoe: „Sebagimana kau taoe, sedari kau pinda ke mari boleh di bilang ampir setiap hari ada dateng orang-orang moeda jang ingin berkenalan padamoe, tapi sebaliknja kau tiada maoe ladenin pada marika itoe. Djika selamanja kau ada di sini dan selamanja djoega berlakoe begitoe, satoe tempo hal ini bisa menerbitken orang panas hati dan dengen paksa ia nanti ambil padamoe. Ini satoe perkara sekarang akoe baroe mendoesin dan merasa kwatir."
― „Abis iboe maoe bikin begimana?"
― „Sekarang akpe soeda dapet satoe tempat jang baek boeat kau toempangin diri. Lebi doeloe akoe soeda pikir: Bila kau pinda lagi ka roema kebon, itoe roema orang banjak soeda dapet taoe, hingga satoe tempo orang nanti dateng menjatron ka sana. Boekantah kau soeda taoe pergi brapa kali ka bio In Hoa Am, dan soeda kenal sama itoe Niko toea jang mendjaga di sitoe?"
― „Ja betoel."
― „Nah, di sitoe akoe rasa ada tempat jang baek boeat lindoengken diri; asal sadja kau tiada sering-sering djalan di loewar, orang tiada nanti dapet taoe. Djikaloe ku soeda ada di sana, doea tiga hari akoe nanti kirim bras, sajoeran sama: toekang praoe boeat kau poenja kaperloean.
