— 1177 —
kerna akoe poen tiada berboeat apa-apa, katjoeali dengen perkataän boeat minta ia menika sama akoe. Dan itoe semoea kau djoega menjaksiken." saoet Hok Tjoen.
„Akoe kira biar begimana djoega Siotjia tiada nanti loeloesken Siangkong poenja permintaan," kata lagi Heng Hoa, „kaloe ia maoe manika tentoe poen soeda, tiada nanti sampe djadi begini?"
„Sebab apa maka djadi begitoe?"
Atas ini pertanjaän Heng Hoa lantas toetoerken sebab-sebabnja, jaitoe Joe Si soeda bertoendangan pada In Liong, dan tjoema maoe menika sadja pada itoe orang moeda. Djoega ia kasi taoe, boekan djarang nonanja sering ambil poetoesan nekat bila Ong Ma paksa ia aken samboet tetamoe, seperti djoega ini hari itoe orang moeda boedjoekin ia diadjak menika.
„Oh, kiranja begitoe!" kata Hok Tjoen dengen bikin tingkanja seperti kaget: „Kaloe Siotjia soeda ada poenja toendangan kenapa siang-siang tiada maoe bri taoe padakoe? Sadjek djadi menoesia akoe blon perna bikin poetoes orang poenja pertjintaän dan lagi akoe tiada brani melanggar sampe di sitoe. Sekarang akoe dapet kenjataän Siotjia ada gadis jang soetji, bisa hargaken perdjandjian lebi dari pada djiwa sendiri, panteslah nona ini akoe pandang inda dan taro hormat atas kamoeliannja!"
