Liauw Tjay.
99
soengei akan sambahjangin dia poenja soewami Song Kim Long, djadi Lauw Soen Tjoan bersama Tjie Sie tiada bisa bitjara satoe apa, hanja ia toeroet sadja Gie Tjoen poenja maoe sendiri. Sasoedahnja Gie Tjoen habis sambalijang maka ia lantas balik poelang di roemah bapanja.
Tempo itoe satoe hari boelan tahon baroe Lauw Soen Tjoan boedjoek pada Gie Tjoen, di soeroe lepas poeti, akan tetapi Gie Tjoen sendiri tiada maoe tahoe, hanja ia pake poeti itoe sampe tiga tahon lamanja.
Bahoewa di tjeritaken poela Song Kim Long ada di kota Lani Kiah mendjadi saorang jang kaja besar. Kebetoelan itoe satoe hari Song Kim Long poenja pikiran senang maka ia bawa tiga riboe tail oewang perak bersama ampat orang boedak laki-laki toeroen di satoe praoe berangkat pergi ka kota Soh Tjioe Koen San Kwan maoe pergi tjari roemah mertoewanja. Kira-kira tiada antara lamanja maka itoe praoe lantas sampe di soengei Koen San Kwang mana Song Kim Long lantas naek di darat pergi tjari tempat boeat memondok, maka Song Kim Long ketemoe satoe roemah jang di tinggalin oleh saorang bernama Ong Seng, tempo Song Kim Long sampe di roemahnja Ong Seng, begitoe djoega Ong Seng kloear samboet padanja serta di adjata masoek ka dalem roemah itoe sembari Ong Seng menanja: Sobat orang di mana?
Lantas Song Kim Long menjaroe, kata; Saja orang di kota Lam Kiah nama Tjie Kim, saja dateng di sini maoe tjari bini anak orang di kampoeng sini.
Maka Ong Seng berkata: Djikaloe Tjie Hoan Gwee maoe tjari orang di kampoeng sini, tjoemah ada anaknja djoeragan praoe Lauw Soen Tjoan, itoe prampoean poenja roepa terlaloe amat tjakapnja hingga tiada ada orang bisa bandingin dari dia poenja roepa. Itoe prampoean poenja soewami soedah mati lamanja baroe tiga tahon, djikaloe Tjie Hoan Gwee soeka nanti saja boleh pergi mintain sama Lauw Soen Tjoan.
Serta Song Kim Long dengar, ia poen mendjadi soeka hati lantas ia kloearin oewang perak sepoeloe tail kasi sama Ong Seng boeat ongkos, sembari berkata: Djikaloe boleh kedjadian saja dapet bakal bini Lauw Soen Tjoan poenja anak prampoean, kendatinja saja habis seriboe tail oewang mas djoega saja tiada sajang.
Setelah Ong Seng trima itoe oewang perak sepoeloe tail, mendjadi soeka hati lantas ja pergi di roemahnja Lauw Soen Tjoan, kebetoelan Ong Seng ketemoe Lauw Soea Tjoan di dalem dia poenja praoe lagi doedoek, lantas Ong Seng membri hormat pada Lauw Soen, Tjoan lantas Lauw Soen Tjoan menanja : Sobat datang di sini apa maoe moewat harang ataoe sobat maoe menoempang praoe?
Lantas Ong Seng berkata: Saja dateng di sini maoe minta sobat poenja anak prampoean djikaloe sobat soeka kasi sama Tjie Hoan Gwee orang di kota Lam Kiah, itoe Tjie Hoan Gwee soeka kasi oewang pandjer banjaknja seriboe tail oewang mas.
Lauw Soen Tjoan lantas berkata: Saja soeka sekali kasi berdja-
