Liauw Tjay.
21
sama Kong Tjoe, ia lihat Hiang No poenja roepa begitoe tjakap hingga timboel dia poenja birahi.
Tjerita Kong Tjoe ketemoe sama dia poenja orang toewa Pek Taij Kong, begitoe djoega Pek Taij Kong berkata sama itoe Kong Tjoe: Itoe malem anak bikin plesir sama itoe senseh, sekarang itoe senseh ada sedikit sakit, melainken anak poenja ade prampoean jang bisa obatin itoe senseh poenja sakit, anak boleh prenta orang pergi panggil di roemahnja anak poenja mah kiai djangan lama soepaja dia bisa lekas dateng di sini. Begitoe djoega Kong Tjoe prenta dia poenja boedak boeat panggil dia poenja ade prampoean, serta itoe boedak trima prentah lantas ia berangkat pergi panggil itoe Kong Tjoe poenja ade prampoean. Tiada antara lamanja itoe boedak adjak dia poenja Sio Tjiah dateng ketemoe sama Kong Tjoe begitoe djoega itoe Kong Tjoe lantas berkata: Ade dateng di sini saja toenggoeh soedah lama, saja harep ade bole kasi obat sama saja poenja senseh jang lagi dapet sakit.
Serta itoe anak prampoean denger, mendjadi maloe sembari berkata: Djikaloe di lihat itoe senseh poenja sakit lantaran terlaloe banjak dia poenja pikiran tiada boleh terbilang apa jang dia poenja pikiran sampe mendjadi sakit. Sekarang saja kasi obat jang dingin boleh hilangken itoe hati jang panas. Sasoedanja itoe anak prampoean abis bitjara lantas ia kloearin satoe obat pil boeat kasi senseh makan, serta itoe pil soedah di minoem oleh Kong Seng Seh maka ia poenja sakit lantas mendjadi baek dan ia membri trima kasi pada Kong Tjoe. Lantas itoe Kong Tjoe berkata: Nanti saja kasi inko barang jang heran boeat bikin plesiran.
Lantas Kong Seng Seh menanja: Ade maoe kasi barang apa?
Kong Tjoe berkata: Barang jang heran boeat inko poenja plesiran.
Serta Kong Seng Seh denger begitoe, ia mendjadi boeat pikiran, begitoe djoega Kong Tjoe lantas berkata: Saja poenja orang toewa telah melihat inko poenja kepinteran sampe begitoe pande, maka inko maoe di boeat mantoe sama saja poenja bapa, hendak di perdjodoken sama saja poenja ade prampoean bernama Ho Song Nio dia itoe baroe beroemoer toedjoe blas tahon.
Serta Kong Seng Seh denger mendjadi soeka hatinja sembari ia berkata: Hareplah Kong Tjoe bole bikin djadi itoe perkara kawin.
Serta itoe Kong Tjoe denger Kong Seng Seh poenja permintahan, ia lantas masoek ka dalem kasi tahoe pada dia poenja bapa, maka itoe orang toewa mendjadi soeka hati akan bikin berdjodohan anak prampoeannja dengan Kong Seng Seh itoe. Begitoe djoega Kong Tjoe balik kloear kasi tahoe pada Kong Seng Seh, dari itoe perkara kawin ini hari nanti di bikin tentoe.
Tjerita Kong Seng Seh di waktoe ia dapet kabar maoe kawin sama Song Nio, maka dia poenja sakit mendjadi baek.
Maka di waktoe itoe sore lantas di atoer barang-barang jang misti di pake boeat mengawinken dengan keramean, sasoedahnja
