Liauw Tjay.
253
poetoesin begitoe, di mana nanti Tjie Ngé tiada toeroet kami poenja perentah, sekarang kaoe boleh moendoer doeloe, nanti kami prentah kami poenja opas boeat panggil pada Tjie Ngé sekalian biar dia bawa dateng dia poenja anak prampoean di depan kami. Begitoe djoega Pwe Kioe Lo trima prentah lantas ia moendoer dari kantornja Kiauw Taij Sioe. Pada tatkala itoe Kiauw Taij Sioe lantas prentah dia poenja opas boeat pergi panggil Tjie Ngé bersama dia poenja anak prampoean, sasoedahnja itoe opas trima prentah lantas ia berangkat pergi di roemahnja Tjie Ngé.
Maka terseboet lah tjerita Tjie Ngé lagi doedoek di dalem dia poenja roemah, kaget kedatengan opasnja Kiauw Taij Sioe panggil padanja, lantas Tjie Ngé mendjadi kaget, demikian djoega Tjie Ngé adjak dia poenja anak prampoean ikoet itoe opas pergi di kantornja Kiauw Taij Sioe.
Tjerita Kiauw Taij Sioe lagi doedoek dalem kantornja, maka semantara itoe dateng lah itoe opas bersama-sama Tjie Ngé dan anak prampoeannja, serta Kiauw Taij Sioe lihat lantas Kiauw Taij Sioe menanja pada Tjie Ngé: Sekarang kaoe poenja mantoe Soen Hian soedah bikin roesak anak prampoenja Lauw Peng Gie toendangannja Pwe Tjeng, sekarang kami poetoesin kaoe poenja anak di toekar boeat kasi Pwe Tjeng djadi laki bini, begimana kaoe poenja maoe apa kaoe soeka toeroet kami poenja poetoesan begitoe?
Serta Tjie Ngé dengar troes berkata: Begimana Toa Lo Ja poenja poetoesan saja toeroet.
Begitoe djoega Kiauw Taij Sioe lantas toelis satoe poetoesan di batja di depannja orang banjak demikian boenjinja: Sekarang Pwe Tjeng djadi laki biai dengan Tjie Ngé poenja anak prampoean, dan Soen Hian djadi laki bini sama anak prampoeannja Lauw Pang Gie, sekarang kaoe rame-rame boleh tahoe dari kami poenja poetoesan begitoe.
Serta orang-orang jang ada di dalem kantornja Kiauw Taij Sioe dengar itoe peratoeran marika itoe semoeanja djadi soeka hati dan Tjie Nge bersama Pwe Kioe Lo membri trima kasi lantas masing masing bawa dia poenja anak berangkat poelang ka roemahnja. Dan begitoe djoega Lauw Peng Gie bersama Soen Khoaij Hoe membri trima kasi, dan lantas ia adjak anaknja poelang di roemahnja. Itoe waktoe Soen Khoaij Hoe bersama Pwe Kioe Lo dan Lauw Peng Gie djadi akoer koembali begimana biasa.
Kemoedian sampe satoe tahon lamanja Kiauw Taij Sioe membikin eksaman, dan djoega Soen Hian bersama Lauw Pok bikin eksamen dapet pangkat djadi Sioe Taij. Itoe waktoe tempo Lie To Koan dapet tahoe jang Soen Hian bersama Lauw Pok dapet pangkat djadi Sioe Tjaij, maka Lie To Koan merasa maloe dan begitoe djoega Lie To Koan lantas pinda di lain kampoeng.
Hata di blakang hari Lauw Pok dan Soen Hian itoe poenja eksamen di kota radja di mana ia orang berdoea dapet pangkat pegang srie Baginda Keiser poenja pekerdjahan djadi mantri di astana
