LIAUW TJAY.
73
Setelah Tjoe Hoei dengar iboenja poenja perkataän, sekoetika itoe djoega ia lantas naek koeda berangkat dari roemahnja dan tiba-tiba ia sampe di stengah djalan ia lihat ada satoe kreta, di dalem itoe kreta Tjoe Hoei lihat dia poenja bapa, lantas Tjoe Hoei toeroen dari koeda troes berloetoet di depan itoe kreta, lantas Tjoe Djie Tan dari dalem kreta ia kloearin satoe pedang kasi sama Tjoe Hoei, sembari Tjoe Djie Tan berkata: Angkae boleh simpen ini pedang dengan baek, soepaja di blakang hari angkaoe boleh dapet pangkat djadi orang besar djangan angkaoe loepa kami poenja pesenan.
Tjoe Hoei lantas trima itoe pedang, tetapi tempo Tjoe Hoei angkat dia poenja kepala maka di lihatnja dia poenja bapa soedah tiada ada disitoe, begitoe djoega Tjoe Hoei bawa itoe pedang naek koeda troes ia poelang koembali, serta Tjoe Hoei sampe di roemahnja lantas ia masoek kadalem dan doedoek di krosi sembari ia tjaboet itoe pedang maka di lihatnja itoe pedang ada tertoelis soerat boenjinja begini: Inget misti besar hati misti pake sabar, apa jang kita poenja kepinteran maoe boender tentoe mendjadi boender, maoe sikak dia mendjadi sikak seperti ini pedang poenja tadjem, menimbang perkara soepaja dengan adil. Sasoedahnja Tjoe Hoei libat itoe pedang troes ia simpen.
Kemoedian sampe di blakang hari Tjoe Hoei pegang pangkat djadi Soe Mah serta ada poenja lima anak laki-laki, ia itoe jang satoe bernama Tjoe Tin, jang ka doea nama Tjoe Tjam, jang ka tiga nama Tjoe Boet, jang ka ampat nama Tjoe Oei dan jang ka lima nama Tjoe Tjim.
Pada soewatoe malem Tjoe Hoei tidoer dapet mengimpi jang dia poenja bapa dateng kasi tahoe itoe pedang anak boleh kasi tjoetjoe Tjoe Oei, djangan loepa kami poenja pesenan. Sasoedahnja Tjoe Hoei mendoesin inget bapanja poenja pesenan, lantas itoe pedang Tjoe Hoei kasi sama dia poenja anak Tjoe Oei, sasoedahnja Tjoe Oei trima itoe pedang maka di blakang hari ia dapet pangkat djadi Tjong Hian Kwan sampe toeroen menoeroen Tjoe Djie Tan poenja toeroenan samoeanja djadi orang berpangkat besar membela negri poenja perkara.
XIX
TJERITA ONG HONG TOEKAR MANTOE, IA HAREP BOLEH
MENDJADI SENANG BAGI ANAKNJA PRAMPOEAN.
Bahoea di tjeritaken ada lah doea orang soedara di kota Tjiat Kang, ia itoe soedara jang toewa bernama Ong Tjoen dan jang moeda bernama Ong Hong, ada poen doea soedara itoe masing-masing ada poenja anak prampoean, maka Ong Tjoen poenja anak prampoean bernama Keng Eng jang mana ia soedah bertoendangan dengan saorang anak moeda bernama Phoa Hoa anak dari Phoa Pee Ban saorang hartawan di dalem kota Tjiat Kang. Dan Ong Hong poenja
