8
Ada lagi orang lelaki moeda pada kata: kita orang tida poenja oewang, tetapi kaloe kita liat ini anak dara soengoehlah di doenia tida ada doewa, sandenja kita ada oewang tentoe ini prampoean kita beli, boeat toeroet kita, apalah tida amat senang.
Lioe Hin srenta dengar itoe perkataän lantas ia hoendjoek bertaoe pada Lioe Si Djoen, dan Lioe Hin kira itoe prampoean hendak djoeal badan.
Lioe Si Djoen srenta dengar kaloe itoe prampoean hendak djoewal badan, mendjadi dia timboel hati kasian, lantas adjak Lioe Hin toeroet dia pergi di tempat prampoean jang hendak djoewal badan itoe.
Srenta begitoe Lioe Hin berdjalan doeloean minta orang-orang berkeroemoen itoe akan boeka djalan, dan Lioe Hin bilang; Saija poenja Toa IJa datang di sini!
Lioe Si Djoen serta deketin dia poenja hati belon tetap, sebab belon dapet taoe apa sebabnja itoe maka dia menanja pada prampoean toewa: Njonja! Saija minta tanja ini prampoean moeda apa sebabnja akan roepanja soesah dan bertjoetjoeran aer mata, srenta doedoek di tanah? Saija minta njonja trangkan.
