296
Saija bernama Goei Liat, apa Gwan Swee loepa, tempo lagi Gwan Swee dapet dakwa boenoeh Hoa Tjoe Lim dan saija poenja engko (soedara toewa) jang toeloeng ganti pada Gwan Swee di dalem boei, sebab saija kena tertipoe oleh bangsat Siauw Soe Ko, sampe saija terboenoeh mati, tetapi beroentoeng saija dapet pertoeloengannja Hwat Go Sian Soe dari sebab saija poenja goeroe Hwat Go Sian Soe dapet dengar Gwan Swee pergi poekoel brandal Song Boen Djaij maka soeroe saija dateng bantoe di sini.
Lioe Si Djoen amat girang dia poenja hati, lantas dia soeroe bikin festa besar akan membri slamat pada dia poenja balatantara sekaliannja.
Sasoedahnja itoe keloewarin plakat jang mana di bri taoe pada sekalian pendoedoek di sitoe, soedah djangan takoet lagi sebab brandal Song Boen Djaij soedah kena tertangkep adanja.
Pada itoe hari djendral Line Si Djoen lantas berangkat poelang ka Kota Radja bersama sekalian balatantaranja.
Sepandjang djalan sekalian pendoedoek negri bertoeroet-toeroetan, toea, moeda, besar dan ketjil pada membri hormat, dan pada sediain medja dengan pasang hio (doepa) adanja,
