-56-
„bididadarimoe“, bila kaoe koekoeh tida maoe seboet namanja?“
Tjeng Giok dengen tida pikir doeloe soeda lantes djawab: „Boeat bandingken itoe „bidadari“ sasoenggoenja soeker, kerna dalem doenia ini melaenken ada satoe sadja jang sama betoel, dan ini bandingan tjoema ada kaoe sendiri, nona. Ma’aflah kaloe saja soeda berlakoe begitoe lantjang.“
Maski permoela Nora ada ingin dan harep sekali boeat denger itoe omongan jang merdoeh, toch kapan sekarang kadoea telinganja soeda denger dengen njata, ia djadi kemekmak dan separo merasa djengah, sabaliknja Tjeng Giok sendiri poen merasa maloe. Lantaran ini itoe kadoea pemoeda djadi sama-sama tinggal boengkem. Achirnja itoe djedjaka pamitan poelang, baroelah antara iaorang ada terdenger lagi bebrapa perkata’an jang dioetjapken.
VI
PENGAROEHNJA HARTA DOENIA
____________
Harta doenia ada benda jang sanget berkoeasa,
Kakedjian dan katjoerangan ada djadi iapoenja bisah,
Boekan heran kaloe satoe kali diroe-boehken oleh itoe kakoeasahan,
Orang djadi tida bisa kenal kabedjikan dan sifat kamanoesiaan.
Entjek Keng Sin sadjek gadisnja dilamar orang, moelai poenjaken perasa’an apa-apa, jaug mengantjem perhoeboengannja iapoenja poetri dengen Tjeng Giok.
-59-
Apa poela pelamarnja ada saorang jang hartawan, dan ia sendiri djoestroe gampang sekali dibikin „silo“ oleh goemilangnja barang permata.
Doea hari berselang sedari itoe hari ia kedatengan itoe tetamoe dari Soerabaja, entjek Keng Sin laloe bermoefaketan dengen istri dan soedara toewanja boeat berempoek dalem itoe oeroesan lamaran.
Sepandjang pembitjara‘an dilakoeken njonja Keng Sin melaenken tinggal boengkem, adalah Keng Tong jang bersama’an satoe kwaliteit dengen soedaranja, soeda kasi voorstel boeat trima baek itoe lamaran, dengen alesan bahoea dengen berbesan sama itoe millionnair dari Soerabaja, boekan sadja namanja Keng Sin kamoedian bisa djadi semingkin di’indahken, malah iapoenja anak di kamoedian hari bakal hadepken satoe penghidoepan jang serba tjoekoep dan serba senang.
Ini alesan jang dimadjoeken oleh itoe soedara toewa, entjek Keng Sin poen anggep bener, sebaliknja njonja Keng Sin koetika liat soeaminja maoe ambil tindakan terboeroe napsoe, soeda kasi peringetan dan njataken pikirannja, baek soepaja ini oeroesan ditoenda sabegitoe lama, sampe soeda ditimbang mateng, agar kamoedian tida terbitken kamenjeselan.
Kaloe entjim Keng Sin ambil ini sikep, sebagimana djoega soeda dioendjoek dalem bagian sabelah depan, itoelah ada disebabken kerna ini iboe koeatir kaloe itoe „harta doenia“ tida bisa dianggep satoe sebab boeat pernikahan bisa djadi beroentoeng, lebih lagi ia taoe kaloe poetrinja ada berbeda dengen laen-laen gadis kaoem hartawan, jang lebih oetamaken barang permata dari pada satoe soeami jang aseli.
Tetapi entjek Keng Sin, maski itoe koetika soeda njataken moefaket boeat timbang lebih djaoeh itoe
