-60-
oeroesan, toch soeda ambil poetoesan dalem hati boeat djadiken itoe perdjodoan, tjoema sekarang ia hendak tjari taoe bagimana pikirannja iapoenja anak sendiri.
Maka waktoe lohornja, koetika Nora baroe sadja abis dahar dan hendak mengaso, entjek Keng Sin lantes paranin padanja dan berkata:
„Nora, kaoe sekarang soeda masoek itoengan dewasa, lantaran apa papa rasa di boentoetnja examen penghabisan jang bakal dilakoeken pada bebrapa boelan lagi, kaoe tida perloe masoek sekola teroes, kerna lima taon di H.B.S. papa rasa soeda tjoekoep lama boeat kaoe teladjar. Selaennja itoe baroe ini papa ada trima lamarannja satoe hartawan dari Soerabaja berhoeboeng dengen ini papa minta dan wadjibken kaoe boeat lantes robah itoe tjara bergaoel, kerna sekarang soeda waktoenja aken kaoe diam di roemah, agar tida terbitken omongan djelek di loearan.“
Nora jang memang soeda taoe tentang itoe lamaran, tentoe sadja tida djadi kaget, maka dengen sabar ia menjaoet:
„Papa kaoe poenja pikiran ada kliroe sekali. Apatah jang berhoeboeng antara itoe lamaran dan saja poenja peladjaran? Apatah lantaran adanja itoe lamaran saja djadi tida oesah dapetken kapinteran?“
„Kaoe djangan terboeroe napsoe anak, apa jang papa bilang baroesan itoe dimaksoedken, bahoea itoe lamaran ada banjak koetika boeat ditrima, dan lantaran soeda oemoemnja gadis jang deket menikah moesti kaloear dari sekolahan, maka papa minta kaoe menoeroet.“
„Ada banjak kans boeat ditrima?“ mengoelangin Nora dengen soeara sedikit ketoes. „Dengen alesan apatah papa bisa njataken demikian? Apatah papa
-61-
soeda taoe bahoea saja sendiri ada banjak kans boeat tolak itoe lamaran?”
„Nora.....“ memotong itoe ajah dengen soeara sengit, kamoedian sasoedanja sakean lama tinggal boengkem, baroe ia berkata poela. „Dalem ini oeroesan boekan kaoe moesti oendjoek sikep begitoe. Sebagi satoe anak kaoe moesti selaloe denger kata, tetapi apa jang baroesan kaoe oetjapken, sasoenggoenja bikin papa djadi gegetoen sekali, lebih lagi koetika kaoe brani njataken bahoea kaoe ada banjak kans boeat tolak itoe lamaran.“
„Kaloe saja bilang begitoe, papa, itoelah kerna kaoe sendiri dateng-dateng lantes njataken banjak kans boeat ditrima, sedeng pada saja sama sekali belon ditanjaken bagimana saja poenja pikiran,“ djawab Nora dengen soeara lebih pelahan.
„Kaoe kliroe anak, papa bilang demikian, kerna papa soeda berempoek sama antero familie, dan semoeanja pada njataken moefaket, djadi dengen begini papa brani anggep kaloe itoe lamaran ada banjak kans boeat ditrima, sedeng sekarang papa hendak tanjaken pikiranmoe.“
„Tida papa, tida, sehingga ini meniet saja masih belon poenjaken itoe pikiran boeat menikah, apa poela saja taoe bahoea pernikahan boekan saroepa maenan. Boeat ini oeroesan ada baek papa tida tanjaken doeloe, sabelonnja saja merasa tjoekoep dengen saja poenja pengartian.“
„Tapi, Nora, kaoe toch belon taoe bahoea itoe lamaran ada dateng dari satoe hartawan besar, jang kapan kedjadian kaoe ada harepan boeat djadi nona mantoenja sala satoe millionnair di Soerabaja, Boekantah itoe matjem kadoedoekan ada tjoekoep tinggi boeat kaoe? Apa goenanja kaoe tjari kapinteran lagi,
