-62-
kaloe di hadepanmoe soeda berbajang itoe kekajahan jang begitoe besar? Tegesnja anak, papa tida bisa berboeat laen dari pada wadjibken boeat kaoe pikir dan timbang ini lamaran dalem tempo satoe minggoe, ini papa rasa kaoe sampe mengarti, dan ini pembitjarahan soeda berachir sampe disini.“
Sambil oetjapken itoe perkata‘an jang paling blakang, entjek Keng Sin bangoen dari korsinja, sebaliknja Nora masih sadja tida maoe tinggal boengkem, hanja menjaoet:
„Papa, djadi itoe kadoedoekan sebagi njonja mantoe millionnair, jang bikin kaoe ngiler, hingga tjoba perkosa kamerdika‘an anakmoe?“
Ini oetjapan kaloear dengen soeara sebagi tertahan, tetapi itoe ajah tida openin, hanja ngelojor, dengen zonder oetjapan barang satoe pata perkata‘an.
Ditinggal begitoe roepa hatinja Nora djadi semingkin tida enak, kerna sebagi orang jang taoe adat ajahnja, ia djadi koeatir sekali kaloe achirnja itoe ajah djadi goesar. Sebaliknja boeat trima sadja itoe tawaran ia sendiri merasa pasti tida bisa mendjadi istrinja itoe anak hartawan dari Soerabaja, kerna dari Nelly ia soeda dapet katerangan siapa sabetoelnja itoe penglamar. Lantaran ini achirnja ia paranin iboenja, sama siapa ia laloe bikin pembitjara‘an dalem hal jang berhoeboeng dengen itoe.
Sebab taoe iboenja ada sanget tjinta padanja, dan jakin bahoea ia ada satoe iboe jang bisa diadjak oeroesan, kendati poen tida seanteronja, toch itoe sa‘at Nora terangken sadjelasnja niatan apa jang ia sabetoelnja kandoeng dalem itoe oeroesan. Kamoedian sasoedanja madjoeken berbagi-bagi alesan jang berdasar, iboenja poen merasa setoedjoe.
Achirnja njonja Keng Sin njataken pada anaknja, bahoea ia nanti berdaja sebrapa bisa boeat oendoerken itoe pembitjara‘an, hingga kamoedian bisa dilinjapken kaloe perloe. Ini penjatahan soeda bikin Nora rasaken hatinja djadi legahan, tetapi tida oeroeng ia masih koeatir boeat apa-apa jang bakal dateng, maka ia ambil poetoesan boeat tjoba berdaja sendiri....
Di waktoe rebahken diri di pembaringan boeat mengaso, Nora poeter pikirannja prihal itoe lamaran jang sekarang mengganggoe betoel hatinja. Ia merasa bahoea satoe-satoenja hiboeran jang bisa lipoerken ia dari itoe kasoekeran melaenken itoe djedjaka sendiri, tetapi ia masih rasaken sangsi boeat toetoerken itoe hal padanja, kerna ia koeatir itoe anak moeda tida nanti bisa djadi satoe pembela sebagimana ia ada harep.
la tjoba bajangken pikirannja, apa jang nanti kedjadian kapan oepamanja ia membantah dengen koekoeh boeat itoe lamaran dengen madjoeken alesan atas iapoenja kainginan boeat landjoetken peladjarannja. Tetapi kapan ia inget bagimana entjek Keng Sin poenja adat jang aseran, ia djadi bergidik sendirinja. Lebih lagi ia rasaken boeloe badannja djadi pada berdiri kaloe ia tjoba bajangken apa nanti terdjadi kaloe oepamanja ia akoehin sadja teroes terang, bahoea Tjeng Giok ada satoe-satoenja lelaki jang ia bisa trima djadi soeaminja.
Tiga hari lagi telah liwat, tetapi Nora tinggal tetep dalem itoe kasoekeran, kerna dalem itoe tempo ia tida dapetken kasempetan boeat bitjara sama Tjeng Giok. Apa poela di hari katiganja ada djadi hari jang pengabisan aken Tjeng Giok beresken itoe boekoe di roemahnja. Di itoe malem pengabisan Nora melaenken bisa djabat tangannja itoe djedjaka dan kasi slamet djalan koetika Tjeng Giok hendak brangkat poelang.
-62-
