1156
naga manoesia. Satoe kali bertaroeng atawa lebih betoel Tam Swat Yong jang menjerang, See Tjong Pin tida maoe membales menjerang, ia melaenken angkat ka'atas tangan kanannja dan tangan kirinja digerakin ka lamboeng kiri, hingga iapoenja sendjata song-thouw-so-tjoe-tjhio melindoengin iapoenja dada, berbareng dengen itoe ia berlompat moendoer ka blakang boewat kasi liwat itoe toesoekan pedang; tetapi ia tida membales menjerang. Tjoema sadja Tjie-hiong-piao jang berniat membales sakit hati soewaminja, sama sekali tida maoe kasi hati padanja.
Tatkala Tam Swat Yong menoesoek angin, badannja lantas dipoeter, sedeng kaki kirinja dimadjoeken ka depan, berbareng dengen itoe, pedangnja soeda ditarik poelang; aken tetapi iapoenja kadoewa tangan terpisa dan itoe pedang soeda madjoe lagi ka depan, sekarang menjabet pada See Tjong Pin poenja iga kanan, sabetoelnja See Tjong Pin boleh membales menjerang sama iapoenja sendjata song-thauw-so-tjoe-tjhio, tetapi ia tida berboewat begitoe hanja kaki kirinja diserodotken ka depan sedeng badannja poeter ka kiri, hingga Seantero badannja berpoeter seperti angin poejoeh, hingga Tam Swat Yong poenja pedang kombali menjabet angin; tetapi di-ikoetin sama gerakan kaki kanannja diangkat ka depan dan madjoe satoe tindak ka sabelah kiri, dengen tipoekim-tjiam-tam-hay pedangnja ditoesoekin ka paha blakangnja See Tjong Pin. Beroentoen soeda tiga kali diserang See Tjong Pin tida menangkis dan djoega tida membales menjerang; tetapi ternjata serangannja Tam Swat Yong ada berbahaja hingga diam-diam ia djadi sanget kaget, maka dengen mendadak ia berlompat bebrapa belas kaki tingginja, kamoedian ia toeroen lagi ka moeka boemi di sabelah blakang. Itoe waktoe Tam Swat Yong soeda memboeroe sembari toesoekin pedangnja ka djoeroesan
