TJOE BO KIM SO
1157
blakang kepalanja See Tjong Pin.
„Kim Toa Naynay, ma'afken akoe berlakoe koerang adjar !” berseroeh See Tjong Pin sambil balikin badannja dengen tipoe yauw-tjoe-hwan-sin, sedeng iapoenja sendjata song-thauw-so-tjoe-tjhio jang masi teroes dipegangin seperti bermoela dengen tida berobah, dengen mendadak digerakin ka depan boewat menangkis, Tam Swat Yong dengen tjepet carik poelang pedangnja, See Tjong Pin berseroeh keras sambil hantemken iapoenja song-thauw-so-tjoe-tjhio dengen tangan kiri dan tangan kanannja, jang mamegang laen oedjoeng tali dari itoe sendjata, dilepasken, dengen maksoed dilibetken ka djoeroesan Tam Swat Yong poenja pinggang. Oleh kerna sekarang See Tjong Pin membales menjerang, Tam Swat Yong dengen berlompat kelit itoe serangan, tingginja kira-kira anem atawa toedjoe kaki, kamoedian koetika ia berdiri lagi di moeka boemi, iapoenja kaki kiri di depan dan kaki kanan di blakang, dalem sikep satengah balikin badan, aken tetapi iapoenja pedang disodorken ka blakang. Ini ada ilmoe silatnja Kimsie-souw Tam Tjoe Sian, sebab kaloe toeboe berlompat ka atas, kadoewa kaki tida mengindjek boemi, paling gampang diserang orang, maka itoe pedang jang ia pegang bikin pendjagahan terlebih doeloe.
Itoe waktoe Ngo-in-pang-djit See Tjong Pin soeda memboeroe, sedeng iapoenja sendjata so-tjoetjhio soeda digerakin ka atas ditimpaken ka djoeroesan poendaknja Tam Swat ong dengen tipoe ouw-liong-tjhoet-tong, sendjata „lembek” bisa digerakin dengen rata ka depan, itoelah ada sematjem ilmoe kapandean jang haroes dikagoemken. Tam Swat Yong biar poen pedangnja diangsoerken kablakang, tetapi sendjatanja See Tjong Pin soeda menjamber deket poendaknja jang sabelah kanan. Tam Swat Yong lantas bongkokin badannja ka depan, berba-