1158
GOEDANG TJERITA
reng” dengen itoe pedangnja ditoeroenken ka 'sabelah bawah dengen tjepet dibalikin lagi ka atas dengen tipoe pok-in-kian-djit, itoe pedang menahan See Tjong Pin poenja kepala toembak jang maoe menjamber iapoenja poendak. Kaloe goenaken ini tipoe boewat menangkis itoe sendjata „lembek”, paling takoet kaloe sendiri poenja sendjata kena terlibet, hingga sendiri poenja sendjata kena dirampas orang, kerna ini tipoe silat djalannja tjepet dan berobahnja poen lekas sekali. Pada waktoe itoe pedang bertemoe dengen sendjatanja See Tjong Pin. ternjata betoel sadja See Tjong Pin libet Tam Swat Yong poenja pedang dan dengen mendadak disentak ka blakang; tjoema sadja Tam Swat Yong tida maoe bikin dirinja tida bersendjata sabisanja ia pegang keras gagang pedangnja soepaja djangan terlepas.
Ngo-in-pang-djit See Tjong Pin itoe waktoe tida berhasil bikin Tam Swat Yong djadi tida bersendjata, tetapi iapoenja sendjata soeda balik lagi dihantemken pada Tam Swat Yong poenja poendak sabelah bawah berikoet lengen bagian jang sabelah atas, tjoema sadja Tam Swat Yong poen soeda bersedia dan laloe moendoer ka blakang boewat kasi liwat itoe sendjata jang menjamber.
Itoe waktoe bebrapa banjak penggawe fabriek soeda kaloewar dari masing-masing kamarnja boewat menjaksiken itoe pertandingan, di antaranja jang soeka sama kaonaran hatinja djadi girang, tetapi jang berpikiran pandjang, anggep ini oeroesan masi belon tamat dan banjak sekali boentoet-boentoetnja, biar poen See Tjong Pin poenja ilmoe silat djempolan, belon tentoe ia bisa ladenin satoe per satoe terhadep orang-orang jang membela di fihaknja Kim Boen Kiem ; seperti sekarang ini orang prampoewan (tetapi marika tida taoe istrinja Kim Boen Kiem almarhoem dan poetrinja Tjoe-bo-kim-so Tam Tjoe
