1160
GOEDANG TJERITA
kaloe sadja oedjoengnja pedang sampe, tangannja Tam Swat Yong jang menjekel pedang, satelah ditoesoekin ka dalem lantas dibalikin sembari ditjongkelken ka loewar, tida ampoen lagi djiwanja See Tjong Pin aken melajang ka acherat.
Itoe waktoe Ngo-in-pang-djit See Tjong Pin djoestroe lagi memblakangin pada lawanannja, sinar mengkredepnja itoe pedang dari sang lawanan soeda deket sekali, koenjoeng-koenjoeng ia hantemken iapoenja song-thauw-so-tjoe-tjhio sembari membongkokin badan dan dipoeterken ka depan, ternjata itoe sendjata jang memake tali membentoer pada pedangnja Tam Swatt Yong, lantaran iapoenja tenaga koerang koewat, tangannja jang menjekel gagang pedang djadi kendor sedikit; tetapi Tjie-hiong-piao Tam Swat Yong pegang keras gagang pedangnja soepaja djangan terlepas, berbareng dengen itoe ia poeter badannja ka sabelah kanan, tetapi iapoenja pedang tida bisa ditarik poelang, kerna masi terhalang oleh lawanannja poenja sendjata song thauwso-tjoe-tjhio. Satelah kakinja, mengindjek boemi, ia bisa djoega tarik poelang pedangnja dan berlompat moendoer ka blakang.
See Tjong Pin djoega memboeroe sambil sarampangken iapoenja sendjata jang memake tali, tetapi tida memake tenaga penoeh, kerna ia tida bermaksoed binasaken pada Tam Swat Yong. Ia pikir maoe meloekaken sadja pada Tam Swat Yong, soepaja ia taoe maksoednja membales sakit hati soewaminja tida bisa kasampean, lantas moendoer dan tida menjerang padanja lebih djaoeh. Itoe waktoe dengen mendadak Tjie-hiong-piao Tam Swat Yong balikin badannja, kaliatan tangan kirinja digerakin, ternjata ia malepasken iapoenja sendjata resia tjie-hiong-piao, ini matjem sendjata resia berbeda djaoe sekali dengen piao jang kabanjakan, di waktoe dilepasken se-
