1164
GOEDANG TJERITA
Tjong Pin, „agar djangan sampe mati akoe tida bisa merem.“
Tam Swat Yong rasaken poendaknja jang terkena liap-hoen-teng sanget sakit, tetapi ia kerasken hati berlaloe dari fabriek tenoen Hin-liong dengen memake djalan dari genteng roemah, satelah meliwatin Phoa-kee-kio, Tam Swat Yong rasaken loekanja tida bisa katahan lagi sakitnja, laloe ia berdoedoek di pinggir djalanan boewat mengaso, ia ambil kantong piao digigit di moeloetnja, soepaja bisa menahan pengrasahan sakit, dengen tabah ia tjaboet kaloewar itoe sendjata resia dari loekanja, satelah itoe pakoe ditjaboet kaloewar, darah dengen lantas mengalir kaloewar. Lebih doeloe ia taro itoe liap-hoen-teng di moeka boemi, kamoedian ngangnahken moeloetnja kaloewarken itoe kantong piao jang ia gigit, dengen satoe salampe ia bikin bresih darah jang mengalir kaloewar dari loekanja, kamoedian itoe loeka dibeberin obat boeboek peranti mengobatin loeka. Rasanja ada begitoe sakit, biar poen ia kretek gigi boewat menahan, tetapi badannja mengeloewarken kringet dingin. Bebrapa kali ia maoe boenoeh diri, soepaja terlepas dari ini kasakitan heibat. Tjoema sadja ia tida tega meninggalken Siao Tiap jang tertjinta. Ia pikir taro kata moesti mati poen lebih baek di roemah sendiri. Maka ia pikir maoe poelang doeloe ka roemah boewat bertemoe satoe kali lagi sama anaknja jang tertjinta.
Ia poengoet itoe sendjata resia — liap-hoen-teng jang meloekaken padanja, dan simpen dalem iapoenja kantong piao, kamoedian ambil iapoenja pedang, paksaken diri boewat berbangkit, tjoema sadja iapoenja tangan kanan soeda tida bisa digoenaken, kerna kaloe digerakin rasanja sanget sakit, saban kali ia bertindak saban kali loekanja merasa sanget sakit. Inilah ada keadahan sanget heibat, pertama
