1166
GOEDANG TJERITA
lamanja, Kim Ong merasa koewatir kaloe ada orang ketok pintoe, kaloe ia berdiam di blakang, tentoe tida bisa kadengeran djika ada orang ketok pintoe.
„Kaoe djangan katakoetan,“ kata ia pada itoe baboe, „takoet tida ada goenanja! Kaloe menoeroetakoe poenja pemandangan, madjikan prampoewan pergi ka fabriek tenoen Hin-liong, banjakan tjilakanja dari pada selamat, sekarang akoe maoe pergi ka sana boewat mendapet taoe keadahan jang sabenernja, apabila soeda bisa dapet taoe keadahan sabetoelnja, akoe bisa lega pikiran, djangan seperti sekarang bisa bikin orang djadi iboek dan poesing satengah mati; apabila tjilakanja bener-bener ia soeda binasa di tangannja moesoeh, akoe poen bisa rawat iapoenja mait, madjikan prampoewan idoepnja begitoe poenja keras adat-tabeatnja, pada sasoedanja ia mati tida boleh diperlakoeken sembarangan oleh laen orang.“
Sahabisnja berkata begitoe, Kim Ong lantas pergi ka loewar dengan tersipoe-sipoe, kabetoelan sasampenja di loewar ia dapet denger ada orang ketok pintoe dengen barang keras dan antep. Itoe waktoe Kim Ong soeda nekat dan tida seperti biasanja penakoet.
„Kaoe orang tida perloe menggedor pintoe !“ berseroeh ia. „Di sini masi ada doewa satengah djiwa, apa ini djoega kaoe orang maoe binasaken sekalian?“
„Kim Ong kaoe djangan mengatjo-belo, ini akoe jang poelang!“ kata satoe soewara prampoewan dari sabélah loewar.
Kim Ong djadi sanget girang, sebab ia kenalin soewara orang jang mengetok pintoe, boekan laen dari iapoenja madjikan prampoewan, dengen tida merasa ia berseroeh sabagi orang jang bersoerak, boeroe-boeroe ia boekaken pintoe dengen terpentang lebar. Itoe waktoe Tam Swat Yong dengen limboeng masoek ka dalem.
