TJOE BO KIM SO
1167
„Toa Naynay, kaoe kenapa sempojongan?” menanja Kim Ong dengen penoeh kakoewatiran.
Tetapi Tam Swat Yong tida mendjawab, hanja bertindak masoek ka dalem dengen tjepet. Kim Ong boeroe-boeroe toetoep lagi pintoe dan mengikoetin madjikan prampoewannja masoek ka dalem. Tam Swat Yong masoek ka dalem dan teroes ka dalem kamar sendiri, sasampenja ia lemparken pedangnja dan boewang diri ka atas pembaringan, bisa dibilang ampir dalem sa'at itoe djoega ia djadi pangsan. Itoe waktoe Kim Ong mengikoetin masoek ka dalem kamar. Itoe waktoe djoega lantas dipasang doewa. lilin soepaja keadahan dalem kamar djadi lebih terang. Oleh kerna kaliatannja sang madjikan prampoewan keadahannja berbahaja, Kim Ong tida pikir lagi adat kabiasahan. Itoe baboe ambil sala-satoe tempat lilin jang baroe dipasang, ia bawa itoe lilin diboewat menjoeloehin moekanja sang madjikan prampoewan, jang ia awasin dengen terliti sakoetika lamanja, itoe tempat lilin jang ia lagi pegang djadi bergerak-gerak, sebab tangannja goemeteran. Achirnja itoe tempat lilin terlepas dari tangannja dan djato ka atas djoebin, berbareng dengen itoe ia menangis menggeroeng-geroeng.
Kim Ong hatinja mentjelos, sebab ia doega tentoe sang madjikan prampoewan dapet tjilaka; aken tetapi ia maoe liat dengen mata sendiri, sabetoelnja sang madjikan prampoewan keadahannja bagimana. Ia poengoet itoe tempat lilin dan dipasang lagi. Dengen panerangan lilin ia soeloei moeka dan toeboenja sang madjikan prampoewan, ternjata paras moekanja sanget poetjet dan tida ada barang sedikit warna darah, sedeng di poendak kanannja penoeh sama noda darah. Roepanja sang madjikan prampoewan soeda mendapet loeka jang tida bisa dikata enteng. Itoe waktoe sang baboe tida brentinja me-
