1168
GOEDANG TJERITA
manggil-manggil pada sang madjikan prampoewan, hingga Siao Tiap poen djadi mendoesin lantaran soewara riboet-riboet. Koetika meliat keadahan sang iboe begitoe roepa, laloe ia bangoen menjamperin, dengen mendekem di pinggir sang iboe dan mamegangin tangannja, ia menangis keras dan tiada brentinja memanggil-manggil sang iboe sembari mewek.
Lama djoega Tam Swat Yong djadi sedar dari pangsannja, tjoema sadja keadahannja sanget lemah. Itoe waktoe ia melekin kadoewa matanja dan meliat-liat ka depan, lantaran tangannja dipegangin oleh sang anak, ia tida bisa gerakin tangannja, tetapi iapoenja pikiran terang dan itoe waktoe ia bitjara pada sang baboe.
„Kaoe orang djangan takoet!” kata ia dengen soewara serak dan sember. „Akoe tida nanti aken mati, biar poen akoe mendapet loeka berat. Roepanja lantaran akoe soeda berdjalan sanget djaoeh, telah kahilangan banjak darah, maka sekarang rasanja sanget lemes dan baroesan bisa djadi akoe telah pangsan, kerna badankoe sanget lemah. Boewat sekarang paling perloe akoe moesti mengaso, maka Siao Tiap moesti diboedjoekin soepaja berlaloe dari sini......”
Berkata sampe di sini ia tjelingoekan dengen gerakan lemah, ia dapet liat pada Kim Ong jang di moekanja penoeh dengen tanda-tanda bekas aer mata, berdiri di pinggir pembaringan dengen mamegangin tempat lilin jang lilinnja menjala.
„Kim Ong kaoe ka sini,” kata. Tam Swat Yong dengen soewara lemah.
„Toa Naynay, kaoe poenja loeka bagimana?” menanja Kim Ong dengen soewara sasenggoekan. „Harep kaoe soeka bitjara dengen sabenernja.”
Tam Swat Yong poen mengeloewarken aer mata.
„Kim Ong, djangan takoet,” saoet sang madjikan
