TJOE BO KIM SO
1169
prampoewan, „akoe tida djoestaken kaoe. Akoe poenja keadahan tida terlaloe berbahaja dan tida nanti bisa mati. Makanja kaliatan sanget pajah, lantaran terlaloe tjape dan kahilangan banjak darah; tetapi akoe poenja toeboeh sampe koewat boewat menahan semoewa kasengsarahan, kaoe tida perloe koewatir. Lagian akoe tida maoe mati, sebab akoe belon bisa bales kamatiannja Toaya. See Tjong Pin soeda goenaken lagi iapoenja sendjata resia jang berbahaja ― liap-hoen-teng; tetapi lantaran ia soeda diloekaken oleh akoe poenja sala-satoe piao, ia tida bisa malepasken itoe sendjata resia berbahaja dengen telak, inilah sebabnja akoe bisa balik poelang dengen bernjawa. Akoe dapet loeka di poendak kanan dan tida aken membahajaken djiwakoe. Sekarang akoe rasanja sanget aoes, tjoba antjoerin goela doewa mangkok, boewat akoe minoem.”
„Apa kaoe minoem aer goela baek?”
„Hajo, lekasan pergi antjoerin itoe goela, kaoe tida mengarti; akoe lantaran terlaloe banjak mengalirken darah dan terlaloe lelah, kaloe minoem itoe aer goela bisa menambah kakoewatan dan djoega bisa bikin anteng akoe poenja djantoeng jang bakerdja terlaloe keras.”
Kim Ong dengen tida banjak bitjara lagi lantas pergi ka dapoer masak aer panas, satelah berdidih lantas antjoerin doewa mangkok aer goela, kamoedian ia bawa masoek ka dalem kamar. Ternjata Tam Swat Yong satelah minoem itoe aer goela keadahannja rada mendingan. Ia soeroe itoe baboe angkat ia bangoen berdoedoek di pembaringan, dengen pelahan ia minoem itoe doewa mangkok aer goela sampe abis.
Menoeroet ilmoe pengobatan Tionghoa, kaloe saorang mendapet loeka dan kaloewar banjak darah, tida kaboeroe dapetken obat dan sinshe jang bisa mengasi nasehat moėsti makan obat apa, minoem aer
