1170
GOEDANG TJERITA
goela anget ada soeatoe tjara jang sanget baek boewat membikin koewat badan dalem itoe sa'at jang berbahaja. Tam Swat Yong dapet pengadjaran dari sang ajah jang banjak pengalamannja, maka satelah minoem aer goela dan mengaso sakoetika lamanja, Tam Swat Yong tida begitoe lemah lagi seperti bermoela, laloe ia panggil Kim Ong dateng deket ka pembaringannja. Itoe waktoe baboe soeda bisa boedjoekin Siao Tiap pergi tidoer lagi. Tam Swat Yong lantas toetoerken dengen ringkes apa jang telah terdjadi pada Kim Ong dan itoe baboe, kerna Siao Tiap soeda tidoer lagi. Kamoedian ia pesen pada Kim Ong, nanti kaloe langit soeda terang, salekasnja ia bawa satoe soerat recept boewat membeli obat, sebab ia paham ilmoe mengobatin prihal loeka-loeka, hingga tida perloe minta pertoeloengannja sinshe (thabib). Salaennja itoe, ia kasi mengarti djoega pada Kim Ong, tida perloe berkoewatir, sebab iapoenja loeka tida berbahaja bagi djiwanja, salaennja itoe ia Tam Swat Yong) tida nanti aken soeroe Kim Ong poelang, seperti doeloean ia soeda berboewat, sebab sekarang keadahan soeda berobah, hingga tida perloe lagi soeroe Kim Ong poelang ka kampoengnja.
„Nanti pada sasoedahnja akoe poenja loeka soeda mendjadi baek,” kata sang madjikan prampoewan pada itoe boedjang setia, dengen membawa Siao Tiap akoe aken brangkat pergi ka Houw-gee-san Tjipsian-tjhung, boewat minta pertoeloengannja akoe poenja ajah soepaja ia balesken itoe sakit hati atas kabinasahannja Toaya. Sekarang pada sasoedanja akoe mengadoe djiwa sama See Tjong Pin dan djiwakoe tida binasa, sabagi gantinja tjoema mendapet ini loeka jang tida terlaloe berat, akoe bisa katemoeken ajahkoe dengen moeka terang. Salaennja itoe, orang bisa hargaken poetrinja Tam Tjoe Sian dan istrinja Kim Boen Kiem boekannja boleh diboewat semba-
