1180
GOEDANG TJERITA
soedah membinasaken padanja.
Akoe poen sampe mengarti jang akoe boekan ada tandingannja dari See Tjong Pin tetapi akoe ingin bertaroeng padanja sampe di sa'at jang aken memoetoesken siapa jang mati dan idoep.
Maka pada itoe malem djoega dengen tida ajal lagi akoe telah menjerboe masoek ka dalem fabriek tenoen Hin Liong.
Di dalem pertempoeran akoe dengen Ngo-in-pang-djit See Tjong Pin jang telah mendjadi satoe perkelaian mati atawa idoep, sekalipoen akoe telah goenaken Tjie-hiong-piao dan lepasken itoe dengen dahsjat dan sampe bisa bikin loeka padanja, tetapi toch memang dasarnja akoe boekan ada iapoenja tandingan dan ia soedah goenaken satoe kali lagi sendjata resianja jang terlarang dipake di kalangan Kang-ouw terhadepkoe. Memang sasoenggoenja sendjata itoe ada amat lihay dan akoe poen soedah tida bisa menjingkir dari toe serangan jang sanget berbahaja jang mana achirnja telah membikin akoe dapet loeka-loeka sanget berat. Itoe koetika akoe sanget mengharep soepaja ia teroesken serangannja dan abisken sadja djiwakoe. Tetapi, iboe, siapa njana jang itoe toewa bangka roepanja memang tida ada niatan aken ambil djiwakoe, malah sebaliknja — tida taoe ia dapet mengatahoein dari mana akoe poenja asal oesoel. Akoe bisa bilang begitoe oleh kerna itoe masa, dengen setjara sanget sombong dan soeara besar ia telah mengoetjapken perkatahan jang sanget menghina dan bilang: Orang bilang soedah sanget broentoeng soedah bisa boenoeh satoe Kim Boen Kiem, tetapi sasoenggoehnja sekalipoen bisa boenoeh sampe sepoeloeh Kim Boen Kiem poen masih belon teritoeng begitoe berharga dari pada soedah bisa bikin loeka satoe Tjoe-bo-kim-so Tam Tjoe Sian poenja anak prampoewan."
