TJOE BO KIM SO
1193
Ah Kwie jang menerangken bahwa ia pergi ka Yangtjioe, dan pesen wanti-wanti pada Ah Kwie soëpaja toeloeng rawatin anaknja. Itoe malem djoega ia dengen membawa pokiamnja menoedjoe ka kota Yangtjioe.
Baek kita tinggalken sabentar doeloe pada ijiehiong-piao Tam Swat Yong jang menempoeh siang dan malem, panas dan hoedjan berdjalan menoedjöe ka kota Yangtjioe. Tjoba kita berpaling pada Tjoebo-kim-so Tam Tjoe Sian sasoedahnja ia mendenger katerangan dari poetrinja dan mendapet taoe prihal kematian mantoenja, walaupoen di moekanja kaliatan ia tida soedi tjampoer dalem ini oeroesan ; tetapi ia sebagi satoe ajah di hatinja tetep menjinta poetrinja jang toenggal ini. Maka maoe tida maoe ia poen haroes tjapein hati boewat óeroes padanja. Tetapi orang jang berilmoe seperti ia itoe soedah tentoe tida gampang sembarangan perliatken rasa hatinja di aer moekanja, apa poela sekarang ia baroe sadja dapetken katerangan tjoema dari satoe fihak.
Koetika Tam Swat Yong masi soeka berdjalan dikalangan Kang-ouw walaupoen ia belon pernah bertemoe moeka dengen Ngo -in-pang-djit See Tjong Pin tetapi ia sering denger jang See Tjong Pin poen ada satoe gie-hiap, dan ia poen belon pernah denger bahwa ia pernah berboewat hal-hal jang tida tjotjoik dengen prikemanoesiahan. Dari itoe hal kematiannja Kim Boen Kiem poen tida bisa didjatoken semoewanja di fihak ianja. Maka itoelah djoega sebabnja ia sengadja soedah kasi liat tampang dingin terhadep poetrinja, inilah djoega sebab -sebabnja jang ia telah pergi di loewar tahoenja ia.
Lo-enghiong Tam Tjoe Sian jang soedah 10 tahoen lebih tida indjek di kalangan Kang-ouw, maka ia sanget hati-hati di dalem perdjalanannja. tapi la poen tida brani memboewang banjak tempo.
