TJOE BO KIM SO
1151
djawab, bila poetoesannja orang banjak akoe jang bersala, terlaloe kedjem dan amat telengas, tida perloe memake tangannja laen orang, di hadepannja itoe achli-achli silat ternama, akoe aken abisken djiwa sendiri. Kim Toa Naynay, akoe jang soeda beroemoer begini toewa, apa jang akoe bilang bisa dipertjaja dan pasti sekali tida aken menjesel diblakang hari. Kim Toa Naynay, akoe poenja tjara memberesken ini bagimana bisa dipake atawa tida? Kaoe sendiri ada tjara laen jang lebih baek, akoe bersedia boewat pasang koeping.”
Tjie-hiong-piao Tam Swat Yong bersenjoem ewa.
„See Losoe, akoe hatoerken banjak trima kasi atas kaoe poenja maksoed jang baek,” kata ia dengen soewara menjindir, „itoe satoe tanda jang kaoe maoe mengalah, boewat mana akoe bersoekoer padamoe sampe di dasarnja hati jang paling dalem. Tjoema sadja ada soeatoe hal jang kaoe haroes mengarti terang, baroesan dengen bernapsoe tida merasa lagi akoe soeda seboet ajahkoe; tetapi kaoe haroes mengarti dengen djelas, sama sekali akoe tida bermaksoed maoe goenaken namanja ajahkoe atawa pengaroehnja boewat bitjara sama kaoe, itoelah ada oeroesan di hari kamoedian, malem ini poenja oeroesan tjoema bisa dioeroes sekarang djoega, kaoe haroes mengarti, poetrinja Tjoe-bo-kim-so Tam Tjoe Sian, istrinja Kie-boen-kiam Kim Boen Kiem, boekannja satoe prampoewan lemah dan tida mempoenja ilmoe kapandean, pengetjoet dan takoet mati, ini waktoe kita boleh tida oesa bitjaraken tentang kabeneran dan kasalahan, tentang keadilan, akoe poenja maksoed kadatengan ka sini tida laen maoe membales sakit hatinja soewamikoe, laen-laen oeroesan akoe tida maoe ambil perdoeli, tida perdoeli soewamikoe bersala dan berlakoe kaliwatan, Kim Boen Kiem ada akoe poenja soewami tertjinta, kaloe ia mati.
