1152
GOEDANG TJERITA
akoe tida bisa tinggal idoep sendirian. Dari sebab sekarang ia binasa di tangannja moesoe, akoe jang mendjadi istrinja berlaloe dan meninggalken kota Yangtjioe. akoe tida poenja moeka boewat bertemoe orang! Orang she See, akoe dateng di sini tida maoe lama-lama, hanja maoe adjar kenal sama kaoe poenja sendjata resia, Ngo-in-pang-djit liap-hoen-teng jang sanget lihay !"
Berkata sampe di sini dengen tida berlakoe soengkan lagi ia tjaboet kaloewar pedangnja dari saroeng dan tjekel dalem tangannja. Itoe waktoe Ngo-inpang-djit See Tjong Pin djadi serba sala, doeloean ia sama sekali tida taoe bahoewa istrinja Kie-boen-kiam Kim Boen Kiem asal dari mana, ia tjoema taoe sadja ia paham ilmoe silat dan boekan prampoewan biasa seperti kabanjakan, sekarang baroe ia dapet taoe bahoewa ia ada poetrinja Tjoe-bo-kim-so Kim-sie-souw Tam Tjoe Sian, dengen lantas ia djadi sanget terprandjat. Biar poen Tam Swat Yong soeda bilang ia boekannja maoe mengandel sama nama ajahnja jang besar, tetapi diam-diam ia anggep Tam Swat Yong dengen sengadja kasi taoe bahoewa dirinja ada poetrinja Tjoe-bo-kim-so jang sanget dimaloein orang. See Tjong Pin sekali poen dengen mengandel sama itoe sendjata resia mendjagoin di kalangan kang-ouw dalem banjak taon; tetapi dengen sasoenggoenja ia tida sembarangan goenaken itoe, djikaloe boekannja sanget terpaksa, apabila soeda tida ada lagi laen djalan boewat toeloeng djiwanja dari kabinasahan. Kaloe di-itoeng dalem saoemoer idoepnja ia baroe goenaken tiga kali. Aken tetapi Tjoe-bo-kim-so Kim-sie-souw Tam Tjoe Sian, sasoenggoenja boekan orang jang boleh diboewat permaenan, sekarang ia soeda boenoeh mati mantoenja, soeda tentoe boekan, perkara jang bisa diberesken begitoe Sadja, beroentoeng ia berada di fihak bener,
