1208
GOEDANG TJERITA
terin itoe tembokan dan koetika ia baroe maoe membiloek, tiba-tiba ia kesomplokan dengen Yo Boe-soe jang memang lagi sedeng asik menjelidikin djoega. Ham Siao Tjoan soedah tentoe tida brani tjeritaken prihal apa jang baroesan ia soedah alamin. Dan sebaliknja ia membohong jang ia soedah preksa di belakang itoe roemah dan tida kedapetan apa-apa.
„See Soehoe jang telah memboeroe di bagian depan barangkali ia dapetken apa-apa, marilah kita pergi ka depan boeat meliat," saoet Yo Tiong.
Marika berdoewa djalan menoedjoe ka depan dan Ham Siao Tjoan dengen diam-diam soedah selesei menjaboetken doeri-doeri jang menantjep di badannja.
Sesampenja di depan itoe roemah marika liat See Tjong Pin sedeng berdiri di tengah-tengah grombolan poehoen-poehoen; dan begitoe See Tjong Pin meliat marika mendatengin seraja berkata: „Apa jang kita orang telah alamken ini malem, soenggoeh-soenggoeh sanget mengheranken, Kedatengannja itoe orang soedah tentoe boekan dengen maksoed baek, tapi heran ia tida maoe menoendjoekin romannja, inilah jang membikin djadi soesah dimengarti ! Apakah ia ada dari kalangan Liok Lim sendiri jang soedah sengadja dateng boeat mempermaenken kita. Akoe soedah tinggal di ini Pek-lauw-teng tida sedikit tahoen dan selamanja itoe belon pernah akoe tida menerima pada kawan-kawan jang soedah dateng maski dari tjabang apa poen; tapi djika perboewatan jang seperti begini soedah tentoe tida bisa dipersalahken akoe jang djadi toean roemah."
„Ini matjem manoesia jang telah oempetken kapala dan boentoetnja tida haroes dianggep satoe kawan jang baek," kata Ham Siao Tjoan dengen penasaran, mendongkol dan marah. „Tida perloe kita moesti ladenin padanja, tida ada harganja boewat
