TJOE BO KIM SO
1153
ia sama sekali boekannja sengadja maoein djiwanja Kim Boen Kiem, hanja terpaksa lantaran maoe toeloeng djiwanja sendiri, kaloe sadja Kie-boen-kiam Kim Boen Kiem tida terlaloe mendesak padanja nistjaja ia tida nanti goenaken itoe sendjata resia jang sanget lihay. Pendek, semoewa kasalahan boekan ia jang haroes tanggoeng.
Sekarang istrinja Kie-boen-kiam Kim Boen Kiem dateng maoe bikin pembalesan atas kamatiannja sang soewami, itoelah ada soeatoe hal jang memang sapantesnja, di kalangan kang-ouw tentoe hormatken saorang prampoewan jang begitoe gaga, brani hadepken kamatian boewat membales sakit hatinja sang soewami, djangan kata lagi orang-orang di kalangan Boelim jang mengoetamaken kapatoetan dan keadilan. Oleh kerna ia dateng dengen maksoed bikin pembalesan atas kamatian soewaminja, tentoe sadja ia tida maoe berlakoe moerah. hingga kaloe ia terdesek dan tida goenaken liap-hoen-teng boewat lolosken diri dari tangannja Tam Swat Yong, sabaliknja ia sendiri jang bisa binasa. Samentara kaloe ia goenaken liap-hoen-teng, kadjadian Tam Swat Yong binasa lagi di tangannja, itoe waktoe Tjoe-bo-kim-so tida nanti bisa mengampoenin lagi padanja, pertama lantaran ia soeda boenoeh mantoenja, dan sekarang ia boenoeh lagi poetrinja, dengen begitoe, pasti sekali ia aken ngalamken perkara heibat, kena dibinasaken oleh Tjoe-bo-kim-so Tam Tjoe Sian. Inilah djadi serba sala boewat ianja, pergi dateng ia moesti djadi binasa di tangan orang, maka sabisanja ia menahan napsoe amarah dan marendah.
„Kim Tea Naynay, sekarang akoe berada dalem kadoedoekan sabagi kaoe poenja moesoeh," kata ia, „hingga tida baek kaloe akoe terlaloe seselken diri; aken tetapi ini malem akoe tida ada niatan bertempoer, kaloe kaoe tida maoe pergi oendang kaoe poe-