1222
GOEDANG TJERITA
bisa makan berapa banjak oemoer lagi boewat hidoep di doenia ini ?
Tapi djika betoel-betoel terboekti jang ini malem akoe sampe goegoer dalem tanganmoe, itoelah boleh dibilang ada tjoekoep berharga."
.,See Tjong Pin, kita orang bersama-sama ada dari golongan Kang-ouw, sasoewatoe perboewatan haroes dilakoeken dengen lantas dan goembirah, djanganlah kaloewarken lagi perkatahan-perkatahan jg seperti begitoe," berkata Tam Tjoe Sian dengen soewara jg. kerèn, sambil kadoewa matanja terboeka lebih besar dan boender, menandaken jang iapoenja amarah telah sampe pada poentjaknja. Pada itoe koetika Tam Tjoe Sian soedah tida kasiken koetika pada See Tjong Pin boewat bitjara lebih djaoeh; lantas ia pasang bhesinja dengen tegoeh, dan moelain boeka gerakannja.
See Tjong Pin poen itoe sa'at soedah tida bisa berboewat laen. Ia menoleh pada kawan-kawannja, djoega tida bisa diharep ada jang aken mampoe berboewat apa-apa lagi, maka ia tjoema menjaoet; ,,Djikaloe sampe soedah kadjadian begini roepa, baeklah akoe melajanin sadja."
Tam Tjoe Sian telah madjoeken iapoenja ilmoe Ko-yong-twa-kioe-tjioe jang ia telah pahamken lebih dari doewa poeloeh tahoen lamanja; sedeng See Tjong Pin soedah samboet itoe dengen ilmoe Tjai-tjioe-hwat oentoek trima serangannja itoe Lo-Eng-hiong.
Begitoe marika berdoewa beradoe tangan, bisa diliat dengen njata jang oemoernja masing-masing tida berbeda djaoeh, tapi dedekan badannja, jang satoe koeroes kering serta ketjil, dan jang satoe lagi tinggi besar serta gagah. Doewa-doewa poenja ilmoe silat masing-masing ada kebaekan sendiri; tapi kegaiban dari ilmoe Noei-kang jang Tjoe-bo-kim-so telah da-
