Landru/Bagian 17
BAGIAN XVIII.
Landru terdjebak.
————
Kateranggan dari nona Segret bagimana soeda terdjadi koetika soeaminja ditangkep, ada seperti berikoet:
„Sabagitoe lekas akoe abis berdandan, akoe lantas pergi kaloear dan disana akoe menampak satoe perkara jang amat mengantjoerken hati. Akoe poenja Lucien jang tertjinta ada diapit oleh doea politie jang pegang tangan dan poendaknja dengen keras, samentara politie jang katiga sedeng borgol kadoea tangannja.
Dalem akoe poenja goegoep dan terkedjoet, akoe tanja pada itoe orang-orang politie, apa sebabnja iaorang tangkap akoe poenja soeami, aken tetapi marika melinken kasih katerangan jang pendek dan titahken akoe lekas berdandan boeat ikoet marika pergi ka kantoor politie.
Akoe pikir tida ada laen djalan aken dapet taoe kasoedahannja itoe perkara salaennja ikoet ka kantoor politic. Maka akoe lantas ambil topi dan mantel, teroes ikoet naek dalem satoe auto jang didjalanken menoedjoe ka kantoor politie.
Di dalem auto kombali akoe tanja pada sala satoe orang politic itoe, lantaran apa maka akoe poenja soeami ditangkep Boeat ini pertanja'an itoe orang politie berkata dengen mesem sindir:
„Och! njonja, kapan kaoc taoe crang matjem apa adanja ini Landru, nistjaja kaoe tida merasa kasian lagi padanja."
Mendenger bagitoe. akoe djadi seperti patoeng, akoe melinken awasken moeka soeamikoe jang ada poetjat dan koesoet.
„Apatah kaoe soeda berboeat, djantoeng hatikoe?" akoe tanja pada soeamikoe jang doedoek di depan akoe. „Bitjaralah. . . . . . . . akoe minta dengen sanget. . . . . ."
Aken tetapi Landru tinggal diam, tida satoe perkata'an ada kaloear dari moeloetnja, dan ia tinggal tetap tida maoe kasih katerangan sampe perkaranja dipreksa di pengadilan.
Bebrapa saät kamoedian baroe Landru berkata:
„Djangan kwatir, hati djiwakoe. Tida apa-apa. . . . . . ini melinken ada satoe kakliroean."
„Kenapa ?"
Landru tida kasih djawaban lagi. Matanja jang tjelong memandang ka loear, achirnja kitaorang sampe ka tempat jang ditoedjoeken.
Kitaorang sigra masoek ka dalem satoe gedong, sasoedanja liwatken banjak gang achirnja akoe ditinggalken dalem satoe roewangan, samentara soeamikoe orang bawa ka satoe kamar.
Akoe poenja pikiran djadi kalang kaboet. Itoe perkara samoea terdjadi dengen terkoenjoeng-koenjoeng. Akoe masih tetap, pikirken apakah jang Lucien soeda berboeat hingga ia ditangkep dengen tjara jang bagitoe bengis.
Lucien dibawa ka satoe kamar jang tida berdjaoehan dari tempat akoe menoenggoe. Akoe merasa penasaran sekali pada ini kadjadian, maka koetika akoe denger orang moelai bikin pertanja'an-pertanja'an, akoe laloe menindak dengen perlahan ka depan pintoe kamar papreksa'an, disitoe akoe mandek dan tahan napas aken dengeri.
„Sekarang kaoe soeda faoe, Henri Désiré Landru, toedoehan apa ada didjatoken atas diri kaoe. Kaoe ditoedoe soeda boenoel ampat prampoean!" Bagitoe akoe denger pembesar politie berkata.
„Boenoeh ampat prampoean . . . . . . . . .?" akoe berkata pada diri sendiri dan berbareng dengen itoe, akoe poenja kaki djadi lemes, hingga dengen tida bisa tertahan, akoe djato doedoek di djoebin, dan tentoe djoega akoe soeda roeboeh pangsan kapan akoe tida koeaiken hati sendiri.
Sampe djam tiga sore akoe moesti berdiam di kantoornja politie dengen hati amat limboeng, kamoedian akoe dianter poelang oleh doea agent-politie. Sasampenja akoe di roemah, akoe diminta oendjoeki tempat soerat-soeratnja Lucien, tempat simpenan barangnja dan pakeannja. Aken tetapi itoe orang-orang politie tida dapetken apa-apa. Jang didapetken melinken bebrapa soerat jang menoendjoeki Lucien Guillet ada saorang jang terkenal dengen nama Dupont. Kamoedian akoe diadjak kombali oleh itoe doea politie agent balik ka kantoor politie, dimana akoe di'idjinken bertemoe dan bitjara dengen akoe poenja soeami, jang sasoedanja beromong-omong sedikit tempo, lantas kitaorang berpisahan dengen mengasih satoe tjioeman jang paling pengabisan.
Dengen soeara perlahan dan sedih Landru berkata pada akoe:
„Adieu, notre petite table !"
Esokan paginja papreksaän dilandjoetken. Familienja njonja Cuchet, jaitoe toean Freidmann dan bebrapa orang lagi jang djadi familie dari prampoean-prampoean jang terboenoeh oleh Landru, telah dateng djadi saksi dalem perkaranja ini pendjahat. Itoe saksi-saksi samoea kenalken roepanja Landru sebagi itoe pemikat prampoean jang paling pande.
Berselang sapoeloe hari lamanja, orang telah beroentoeng dapetken katerangan dari sana-sini jang menoendjoeki brapa djaoe Landru soeda lakoeken penipoean. pemalsoean dan berbagi-bagi pakerdjaän boesoek jang sanget tida taoe maloe.
Ichtiarnja Landru jang teroetama, adalah pada prampoean-prampoean djanda jang lakinja baroe mati dalem paprangan. Itoe waktoe memang ada banjak sekali prampoean moeda jang lakinja mati di paprangan, hingga semingkin lama di Parijs semingkin banjak njonja-njonja jang soeda djadi djanda dalem oesia moeda. Lelaki lantas ternjata ada kakoerangan, djangan poela djanda-djanda, sekali poen gadis-gadis soesa dapet pasangan jang kabetoelan. Maka djoestroe itoe waktoe jang baek ada digoenaken oleh ini pendjahat aken pelet prampoean-prampoean djanda jang berharta atawa gadis-gadis jang tjantik. Pada marika itoe dengen gampang sekali Landru bikin dirinja ditjinta.
la poenja anak-anak dan istri, salamanja pandang Landru sebagi saorang jang djoedjoer dan satia, tida berboeat perkara-perkara jang melanggar wet dan djoega belon perna alpa kasih oewang pengidoepan jang tjoekoep pada istrinja itoe. Maka iaorang djadi sanget heran dan tida maoe pertjaja koetika politie tangkep dan toedoeh Landru soeda lakoeken bagitoe banjak pemboenoehan. Tapi boekti-boekti semingkin lama semingkin banjak, hingga kasoedahannja, dengen mengoetjoerken banjak aer mata oleh kerna sedih, itoe istri dan anak-anaknja Landru pertjaja djoega jang badjingan itoe ada manoesia jang sanget kedjem, boeas dan temaha.
Landru ditangkep sedari boelan April 1919, aken tetapi papreksaän saban-saban ditoenda lantaran koerang boekti-boekti, samentara Landru sampe di boelan November 1921 teroes disekap dalem pendjara. Hakim Bonin jang lakoeken papreksaän dalem perkaranja ini pendjahat, ada berlakoe terliti sekali, samentara detectief-detectief, demikian poen orang-orang politie ada bekerdja keras aken bikin terang itoe perkara-perkara pemboenoehan.
Politie di Seine-et-Oise saban-saban dapet prenta aken bikin penggledahan di bekas roemahnja Landru di Vernouillet atawa poen di Gambais. Bebrapa kali gledahan itoe tida membri hasil satoe apa, aken tetapi belakangan, koetika soeda katahoean jang Landru ada poenja satoe garage di Neuilly, dimana ini pendjahat ada simpen ia poenja barang-barang simpenan bekas korban-korbannja, lantas djoega hakim moelai dapet djalan aken korek lebih banjak resianja ini pendjahat.
Sedari ditangkep, Landru soeda berobah adatnja. la djadi saorang jang fida soeka omong, kapan ia ditanja, ia salaloe kasih djawaban :
„Akoe tida taoe! Kaoe sendiri jang haroes terangken".
Atawa:
„Kaloe kaoe anggep dimikian, maka akoe boleh tinggal toetoep moeloet!"
Atawa lagi:
„Djangan goesar, toean, apa kaoe bermaksoed hendak bikin boekoe tjerita?"
Pada soeatoe hari hakim Bonin ada madjoeken pertanjaän tentang kamana linjapnja njonja Marchadier.
„Kaoe tanja dimana adanja njonja Marchadier? Itoelah akoe tida taoe. la soeda tinggalken akoe sasoedanja berdiam di Gambais satoe hari lamanja, dan sedari itoe waktoe akoe tida dapet denger satoe apa lagi dari itoe njonja."
Bahoea Landru ada satoe badjingan jang pande sekali kasih djawaban djawaban pada hakim, itoelah ada diakoeh oleh berbagi-bagi correspondent dari roepa-roepa soerat kabar jang dateng menjaksiken saban kali hakim Bonin "preksa perkaranja ini bangsat, Dengen tjara begitoe Henri Désiré Landru soeda maenin hakim sampe tiga tahon lamanja. Sasoeatoe pendoedoek di Parijs ada omongken hikajatnja ini pendjahat, hingga hikajat itoe sampe di saloeroeh doenia, dan samoea bangsa merasa heran bagimana satoe kota Parijs bisa ada poenja satoe pemboenoeh jang sanggoep lakoeken kadjahatan bagitoe banjak zonder siang-siang dapet ditangkep oleh politie.
Papreksaännja politie dilakoeken semingkin giat, saja, Williams le Queux, pengarang dari ini boekoe, beroentoeng soeda bisa toeroet orang-orang politie pergi ka Gambais boeat lakoeken gledahan jang ka bebrapa kali.
Oebin-oebin besar jang ada di kebonnja Landru, telah dibongkar dan disana, di antara aboe-aboe berasal dari dapoer, telah didapetken toelang-toelang, jang atas penjelidikannja Professor Anthony. Doktor Paul dan laen-laen orang berilmoe, dapet diterangken jang toelang-toelang serta aboe itoe ada restant dari tjikalan badannja manoesia.
Ini kasaksian telah ditetapken oleh orang-orang berilmoe jang terseboet, maka itoelah achirnja Landru di hadepken pada pengadilan di Versailles pada tanggal 8 November 1921.
Koetika warta tersiar jang Henri Désiré Landru aken dipreksa, djoemblanja penonton lelaki dan prampoean ada seperti semoet jang mengaloet ka dalem itoe gedong pengadilan jang besar.
Salaen perkaranja Caillax, redacteur dari soerat kabar Figaro jang terboenoeh oleh saorang prampoean, boleh bilang Parijs belon perna mengalamken satoe papreksaän jang bagitoe rame seperti perkaranja ini Henri Landru.
Orang-orang prampoean dari segala deradjat, bebrapa djam lebih doeloe dari papreksaän, soeda bereboet tempat di bangkoe-bangkoe penonton jang disadiaken banjak dalem gedong pengadilan itoe, samentara orang-orang lelaki, soedagar-soedagar dan penggawe-penggawe toko, tinggalken pakerdjaännja boeat menonton itoe papreksaän.
Soenggoe Landru terbitken karamean dalem gedong pengadilan.
Hakim Guilbert jang kapalaken itoe papreksaän.
Boekti-boekti jang tida bisa dibantah lagi ada disadiaken atas medja. Procesverbaal laloe dibatjaken, penoeh dengen toedoehan-toedoehan jang sanget memberatken pada perboeatannja Landru, diberikoetken dengen djoemblanja saksi-saksi jang sanget banjak.
Koetika hakim seboet jang Landru soeda lakoeken pemboenoehan atas dirinja 284 prampoean, Landru tida djadi kaget atawa kwatir, hanja ia tertawa dengen njaring seperti laen-laen penonton.
Papreksaän dilandjoetken sampe tanggal 30 November, sampe pada tanggal mana soerat-soerat pertjintaännja Landru jang dapet dikoempoelken oleh politie dan sekarang bertoempoek sebagi boekit kertas di medjanja hakim, tida koerang djoemblanja dari anem riboe.
Sasoedanja didenger katerangannja saksi-saksi, sigra papreksaän hakim membri poetoesan dengen menjataken jang Landru betoel soeda bersala memboenoeh orang-orang prampoean dengen satoe niatan jang sanget kedjem.
Jury jang doedoek di sabelahnja hakim ada madjoeken permintaän ampoen aken goenanja itoe pendjahat, satoe hal jang sanget mengheranken pada bebrapa penonton.
Hal itoe terdjadi adalah lantaran pandenja pembela dari persakitan, jaitoe Mr. Moro-Gioffari, satoe antara advocaat jang paling terkenal di Europa, aken tetapi pengadilan tetap kasih poetoesan jang Landru moesti dihoekoem mati. Pembelanja Landru tida poetoes harepan,, sasoedanja tida dapet permintaän ampoen dari hakim, ia sigra madjoeken permintaän bagitoe pada pengadilan tinggi, aken tetapi ini pengadilan djoega tolak permintaännja advocaat itoe. Achirnja, lantaran kapoetoesan djalan, ini advocaat sigra mengadep sendiri pada President dari Republiek, minta perantaraännja ini Kapala Pamerentahan Fransch aken briken gratie pada Landru.
President Republiek jang soeda dapet katerangan dari hakim. Guilbert dan laen-laen, telah tolak itoe permintaan.
Samentara Landru sendiri belon poetoes harepan. la tida pertjaja jang dirinja aken dihoekoem mati. Pada soldadoe pendjara jang djaga padanja, ia selaloe bilang: ,,Akoe tida berdosa!" Beriboe-riboe kali perkataän itoe ia oetjapken baek pada pendjaga-pendjaga pendjara, baek. poen pada hakim. la pertjaja betoel jang dirinja tida aken dihoekoem mati. Satoe hari di moeka sabelonnja ini bangsat didjatoken hoehoeman mati, ada dateng toekang tjoekoer di pemboeian, dan sebagimana biasa, ia hendak lakoeken kerdjaännja. Koetika dapet liat pada toekang tjoekoer itoe, Landru berkata:
„Ah! sobat, tjoekoerinlah akoe, dan bikin akoe poenja djenggot bagitoe bagoes, soepaja prampoean jang liat djadi katarik hatinja. . . . . . ."
Pada malemnja, poetoesan hoekoeman mati sigra dikaloearken, tetapi Landru tida dapet taoe hal itoe. Saloeroeh Parijs taoe hal itoe, maka banjak sekali pendoedoek jang hendak menjaksiken itoe hoekoeman, telah pergi ka Versailles.
Di atas randjang dalem kamar pemboeian, dimana melinken dapet penerangan lampoe gas jang ketjil, ada tidoer meringkoek itoe pamikat dan pemboenoeh prampoean.
Djam ampat pagi ia mendoesin dan mengeloeh lantaran tida tahan hawa-oedara jang amat dingin.
Satoe pendjaga jang siang dan malem oeroes kaperloeannja ini pendjahat, lantas berlaloe aken ambilin satoe selimoet, aken tetapi maski poen soeda berslimoet, ini pendjahat jang soeda ampir sampe adjalnja, tida bisa poeles djoega.
Djam anam pagi koerang saperampat, bebrapa hakim dateng dalem kamarnja Landru, samoea berpakean itam. Advocaat-advocaat moelai berpridato sebagimana biasanja, aken tetapi pri- datonja advocaat-advocaat itoe telah dipoetoesken oleh Landru jang berkaia:
„Akoe soeda taoe apa jang kaoe hendak bilang, toean-toean. Maka sekarang tida perloe kaoe landjoetken pridatomoe. Akoe ini ada saorang jang tida berdosa, aken tetapi dengen apa boleh. boeat akoe aken berangkat ka tempat baka dengen gaga. Akoe taoe jang ini boekan ada kaoe poenja kasalahan, maka dari sebab itoe, akoe poen tida aken goesar pada kaoe".
Kamoedian' Landru doedoek dengen gaga, dan satoe toekang tjoekoer hampiri padanja aken ditjoekoeri. ,Djangan kaoe tjoekoer akoe poenja djenggot," kata Landru dan itoe ada djadi Landru poenja permintaän satoe-satoenja.
Satoe glas rum dan sigaret ada disoegoeken padanja boeat pengabisan kali, tapi itoe barang ditampik oleh ini pendjahat dengen lakoe hormat sembari berkata: „Itoe minoeman dan sigaret tida perloe boeat akoe jan aken berangkat ka tempat baka dengen gaga."
Padri-padri poenja oetjapan djoega Landru njataken tida perloe, maka bebrapa minuut kampedian achirnja Landru digiring ka loear dari kamar pendjara.
Soldadoe-soldadoe Cavalerie dengen pedang-pedang terhoenoes ada djaga pintoe gerbangnja pendjara. Satoe meter lebih djaoe ada berbaris lagi satoe pasoekan soldadoe. Samentara satoe pasoekan infanterie dengen senapan-senapan terisi dan bajonnet soeda bebrapa minuut menoenggoe di lapangan sembari mendjaga penonton soepaja tida dateng dekat pada tempat hoekoeman.
Koetika pintoe pendjara di boeka, Landru menindak kaloear dengen gaga. la melinken ada pake satoe tjelana poeti dan kemedja poeti.
Maski poen tave jang ia bakal dihoekoem mati, tapi toch Landru masih tetap berlakoe gaga.
Sakoetika lamanja ia brenti dan hadepken ia poenja advocaat jang laloe peloek Landru aken kasih slamat berpisah sembari berbisik :
„Berlakoelah gaga."
Sahabisnja itoe Landru laloe awasken itoe tempat penabasan kapala. Achiruja dengen tindakan tetap ia hampiri itoe barang jang aken abisken djiwanja.
Zonder dititahken oleh algodjo, Landru pasang lehernja pada bantalan piso dan baroe sadja ia oetjapken: „Akoe aken teroes, tinggal gaga," lantas piso toeroen dengen tjepet ka batang lehernja ini orang berdosa, hingga kapalanja mengglinding djato di dalem krandjang.
Demikianlah adanja hikajat-hikajat dari itoe pemikat dan pemboenoeh prampoean jang paling boeas dan kedjem dalem doenia. Justitie telah tetapken djoemblanja korban-korban jang binasa di tangan Landru tida koerang dari 284 djiwa.
TAMAT.