Landru/Bagian 8

by William Le Queux

BAGIAN VIII.

Boekoe Itemnja Landru

———

Itoe waktoe soeda djam poekoel tiga pagi, sapoeternja gedong Hermitage di Gambais ada soenji, soearanja itoe pintoe jang diketok ada kadengeran njata sekali di antara boenjinja djangkrik dan laen-laen binatang aloes.

Tida ada laen manoesia jang denger itoe soeara ketokan pintoe salaennja Landru sendiri, samentara njonja Collomb jaug terletak di hadepannja soeda djai mait. Kaloe saorang laen jang berdiri di hadepan mait itoe dan dapet denger itoe soeara ketokan pintoe jang tida terdoega, tentoe djoega itoe waktoe ia soeda katakoetan satengah mati, aken tetapi Landru ada satoe badjingan oeloeng jang belon perna merasa keder boeat segala matjem antjeman, katjoeali terkasiap sedikit.

Soearanja bel pintoe berboenji lagi. Landru pikir ia tida boleh tinggal diam sadja aken poera-poera itoe roemah tida orangnja, sebab dari loear orang bisa liat di roewangan dalem ada kaliatan sinarnja lampoe.

Dalem hatinja Landru menanja: Apakah marika ada orang-orang politie. Dan kaloe betoel orang politie, apakah marika soeda liat apa jang soeda kadjadian dalem itoe kamar dan sekarang dateng hendak tangkep padanja?

Dalem hatimja ia mengoetoek, tapi lantas djoega hati itoe djadi tetap kombali. la lantas ambil poetoesan aken samboet datengnja itoe orang, maka sasoedanja beresken pakeannja, lantas ia menoedjoe ka roewangan depan. Pintoe salon dimana maitnja njonja Collomb ada terletak, ia kontji dari loear, kontjinja ia masoeken dalem sakoenja, kamoedian ia hampirken pintoe depan bersadia boeat hadepken apa djoega jang bakal terdjadi.

Sabelonnja pintoe di boeka ia lantas menanja :

„Siapa disana?" Tangannja sabelah ia masoeken dalem kantong tjelana, genggem satoe browning dengen pelornja. la soeda bersadia aken melawan kaloe sahandenja betoel jang dateng ada orang-orang politie.

Dari loear tida ada penjaoetan, melinken soearanja orang berbisik.

Hatinja Landru djadi semingkin keras bertjoeriga.

„Siapa kaoe?" tanja lagi Landru dengen soeara lebih sengit. Kasih djawaban atawa akoe tida nanti boeka ini pintoe."

„Kitaorang kaabisan benzine, toean," sahoet itoe orang di locar. ,,Kaoe ada poenja garage disini, apa kaoe bisa bagi benzine pada kita ?"

Landru mengelah napas legah.

Tapi Landru lantas berpikir lagi, apakah itoe penjaoetan. boekan ada satoe akal boeat bisa dapet masoek ka dalem roemah?

Aken tetapi Landru tida maoe berpikir lama, akal atawa boekan akal ia maoe liat djoega siapa adanja itoe doea orang di loear.

la lantas boeka pintoe, di loear ada berdiri doea toean-toean dengen pake jas pandjang jang tebel.

Toean jang toewa'an kasih katerangan pada Landru, baboea iaorang berkandaran dengen auto dari Maintenon hendak pergi ka Mantes aken ambil satoe tabib goena istrinja, aken tetapi perdjalanannja tida bisa dilandjoetken lantaran sampe di antara Maulette dan Hermitage ia soeda kapoetoesan benzine.

„Perkara jang kitaorang sedeng lakoeken, adalah boeat menoeloeng djiwanja satoe prampoean. Djikaloe kaoe bisa briken kitaorang satoe kaleng benzine, kitaorang tida abisnja njataken soekoer".

Landru dengen tida banjak bitjara lagi laloe toetoep pintoe roemahnja, djalan di depannja itoe doea orang ka garage, laloe kasih pada marika satoe kaleng benzine dengen lakoe jang angkoel. Itoe doea orang oetjapken marika poenja trima kasih dan Landru laloe balik ka roemahnja dengen hati legah sebab pikirannja ia soeda menoeloeng djiwanja satoe prampoean.

la balik kombali ka kamar salon di mana ada terletak ia poenja korban, angkat itoe mait dan panggoel ka loear. Ia lempar itoe korban di atas toempoekan batoe sabelah podjokan kiri dari ia poenja kebon, dan dengen goenaken ia poenja lentera kantong. ia laloe toetoepin mait itoe dengen bebrapa karoeng toewa dan roempoet-roempoet kering. Sahabisnja itoe ia laloe kontji pintoe dengen hati-hati dan masoekin kontjinja ka dalem kantong. Sahabisnja itoe ia laloe naek ka atas pembaringan, dan dengen sabentaran sadja ia soeda djadi poeles dengen njenjak, djam toedjoe pagi baroe ia mendoesin, lantas ia masak aer dan sedoe kopi, sahabisnja dahar pagi ia laloe berangkat ka Parijs dengen menoempang kreta post.

Samentara njonja Collomb belon diboenoeh, Landru memang soeda ada poenja satoe sobat laen, jaitoe njonja Buisson, tapi persobatannja itoe ia belon maoe iket lebih kekel, sebab masih ada njonja Collomb jang mendjadi halangan, maka koetika njonja Collomb soeda linjap dari doenia, Landru merasa merdika kombali dirinja boeat lakoeken laen lelakon.

Bagimana Landru soeda tarik hatinja njonja Buisson, bisa ternjata dari boenjinja ia poenja soerat jang kita salin di bawah ini menoeroet apa jang orang soeda hadepken di pengadilan:

„Djantoeng hatikoe,"

„Kaoe tentoe soeka maäfken jang sakian lamanja akoe tida menoelis soerat pada kaoe. Berhoeboeng dengen satoe oeroesan dagang akoe soeda moesti berpisah dengen kaoe sampe bagitoe mendadak. Tapi kaoe tentoe pertjaja jang hatikoe senantiasa inget sadja pada kaoe sekali poen ada di laen tempat.

„Sedari berpisah akoe rasaken pengidoepankoe soenji dan soerem, melinken kaoe poenja roepa sadja jang amat manis ada djadi matahari jang sinarken pada pengidoepankoe. Kaoe poenja mesem jang manis dan kaoe poenja tertawa jang merdoe, soenggoe ada djadi akoe poenja muziek jang membikin akoe beroentoeng senantiasa. Satiap hari dan malem akoe pikirken sadja pada kaoe dan ingin tinggalken dengen lantas pada dagangankoe soepaja bisa lekas bertemoe pada kaoe. Ja, kaoe poenja sapasang mata jang bersinar bagitoe bagoes, ada tinggalken bajangannja di hadepankoe.

„Seperti sekarang kaoe soeda taoe begimana besar adanja akoe poenja rasa tjinta, maka timbanglah dengen baek soepaja kitaorang bisa djadi soeami-istri dan idoep kekal boeat salama-lamanja.

„Rebo malem djam anem akoe nanti dateng koendjoengi kaoe, dan akoe harep kaoe ada dalem kasehatan.

„Tertinggal akoe poenja tjinta. — André".

Pada njonja Buisson Landru mengakoe bernama André Charcroix, satoe nama jang bagoes sekali. Njonja Buisson, sebagi djoega soeda terdjadi pada laen-laen prampoean, dalem sedikit tempo sadja soeda djato tjinta pada Landru jang bagitoe pande memboewang tingka, bitjara sebagi orang terpladjar, berlakoe sebagi satoe orang bangsawan. Oleh kerna demikian, tidalah heran kaloe pada malem jang ada diseboetken dalem soeratnja Landru, njonja Buisson ada menoenggoeken kadatengannja itoe lelaki ja g tertjinta dengen hati tida sabar.

Oewangnja njonja Collomb, berikoet soerat-soerat effect bisa diambil oleh Landru dengen gampang sadja, sebab itoe samoea soeda di atoer lebih doeloe sabelonnja njonja terseboet diboenoeh. Aken tetapi maitnja itoe korban masih diiboeki oleh Landru bagimana moesti dikasih laloe.

Datengnja itoe doea orang jang naek auto aken minta benzine ada mendjadi satoe sebab hingga Landru tida brani singkirken maitnja njonja Collomb sebagimana doeloe ia soeda berboeat dengen maitnja njonja Heon jang dibakar, sebab kaloe ia berboeat lagi bagitoe, dan kabetoelan ada orang dateng lagi minta benzine atawa laen-laen pertoeloengan, nistjaja itoe pakerdjaän jang kedjem nanti bisa katahoean.

Aken tetapi Landru poenja pikiran jang diberikoetken dengen segala kakedjeman, soeda dapet poela akal baroe boeat kasih laloe maitnja njonja Collomb dengen tjara jang lebih kedjem dari sebagimana jang ia soeda berboeat dengen maitnja njonja Heon.

Esokan paginja orang ada liat Landru koendjoengi bebrapa toko di Boulevard de Clichy, dimana ia beli satoe piso besar jang biasa dipake oleh toekang-toekang potong heiwan, satoe kampak jang tadjem dan satoe gergadji, sebab perkakas jang doeloe ia pake boeat antjoerken maitnja njonja Heon soeda gompal dan poentoel. Kamoedian ia pergi di toko-toko barang kotoran, beli doea karoeng kotor bekas goela. Dari sitoe ia mampir lagi di satoe toko obat, beli satoe botol aer keras, barang mana santoeanja ia laloe moeatken ka dalem autonja.

Dengen itoe barang-barang tadjem dan berbahaja Landru laloe berangkat dari Parijs dengen liwati Versailles dan St. Cyr ka Houdan. Itoe waktoe langit ada mendoeng, angin ada menioep dengen keras, hawa oedara ada dingin sampe menjerap ka toelang-toelang. Di doesoen Houdan Landru laloe biloek di satoe djalanan ketjil, kamoedian dengen liwati satoe oetan ketjil ia bisa sampe di Gambais dan pada djam lima sore ia soeda sampe di gedong Hermitage.

Itoe waktoe oedara soeda gelap, oedjan jang deres soeda moelai toeroen diberikoetken dengen kilap dan goentoer jang menjamber dengen heibat di ampat pendjoeroe oedara, soearanja menggeterken pada ram-ram katja. Roemahnja Landru jang soenji di dalem gelap goelita, sabentar-bentar disinarken oleh tjahianja kilap, roepanja sebagi iblis-iblis jang bertjanda dengen api.

Koetika Landru masoekin kontjinja pintoe, ia dapet denger dengen teges soeara barang-barang bergerak di dalem roemah, Landru tjaboet kombali itoe kontji dan moendoer bebrapa tindak sembari berpikir apakah setan-setan dari orang jang ia boenoeh lagi semboeni dalem roemah, atawakah bebrapa bangsat lagi goenaken tempo jang soenji aken angkoet ia poenja barang perabotan.

Tapi Landru boekan ada satoe manoesia pengetjoet, djbega ia boekan ada manoesia jang pertjaja tachajoel, maka sasoedanja tetapken hatinja, ia lantas boeka itoe pintoe dengen gaga, tangannja mengepel satoe browning. Setan atawa manoesia, kaloe sadja ia hadepken, ia nanti boenoeh seperti ia biasa boenoeh pada bebrapa poeloe prampoean.

Di samoea ploksok Landru soeloeken, di samoea kamar Landru preksa, dan selagi Landru singkap pe dengan pintoe, sakoenjoeng-koenjoeng ada kadengeran soeara gabroek jang keras sekali, hingga Landru jang taba moesti terkasiap satengah mati. Angin lantas masoek ka dalem roemah dan mengamoek pada kaen-kaen kalamboe dan sakalian perabotan enteng. Kagetnja Landru melinken sabentaran sadja, kerna ia lantas mengarti bahoea soeara jang keras itoe adalah melinken dari pintoe cijendela jang tertioep angin dengen keras.

„Satoe penggodaän" berkata Landru dalem hatinja.

Boeat tabahken kombali hatinja jang soeda dibikin bagitoe kaget oleh berkerdjanja natuur, Landru laloe masoek ka kamar makan, toewang satoe glas cognac dan minoem kering.

Beda dengen di Vernouillet, dimana Landru ada poenja banjak tetangga jang soeka bermoesoeh, adalah di Giambais Landrut mempoenjai banjak sobat di antara pendoedoek kampoeng jang djaoenja bebrapa ratoes depa dari roemahnja. Antaranja adalah Papa Villroy, toekang spatoe, pada siapa Landru soeda briken sapasang spatoe jang masih ada harga. membikin ini orang toewa djadi girang, dan anggep Landru ada saorang baik hati. Djoega Landru ada poenja satoe kenalan njonja Fleury namanja, eigenares dari satoe cafe ketjil di Les Noues, satoe tempat jang djaoenja satoe kilometer dari roemahnja, dan lagi satoe orang doesoen nama Bonnot. Kadang-kadang Landru dateng bergaoel pada marika dengen kaloearken dongengan-dongengan kotjak, hingga tida poen heran kaloe iaorang djadi bagitoe soeka pada Landru dan anggep Landru ada saorang berboedi.

Itoe anggepan memang ada diinginken oleh Landru, soepaja segala perboeatannja jang kedjem tida tersangka oleh itoe orang-orang pedoesoenan jang banjak kali liwat di depan roemahnja.

Tida lama lagi oedjan jang keras moélai brenti. Landru laloe ambil itoe bebrapa perkakas tadjem dari dalem autonja jang ia tinggal di pekarangan loear. Dengen itoe perkakas ia laloe menoedjoe ka roemah batoe jang ada di belakang kebonnja, dimana maitnja njonja Collomb ia soeda lemparken.

Satoe goeloeng kertas jang ia ada bawa lantas ia gelarken di tanah boeat tatakan darah. Kamoedian ia goeloeng tangan badjoenja, tarik tjelananja ka atas, dan dengen penerangannja satoe lentera ketjil, ia lantas moelai berkerdja. Pertama ia angkat maitnja njonja Collomb jang soeda dingin, lemparken di atas itoe kertas jang tadi ia gelarken. la ambil tjintjin dan medalion dari badannja itoe mait dan sasoedanja telandjangin mait itoe, toempoek pakeannja di satoe podjokan boeat dibakar, ia lantas ambil itoe kampak besar. Dengen ini sendjata ia koetoengken lehernja itoe mait, bersama lagi doea lengen tangannja dan doea betis kakinja. Sahabisnja itoe ia toewang itoe aer keras ka dalem satoe paso tanah, lemparken anggota-anggota jang koetoeng itoe ka dalem paso terseboet. Dalem sedikit waktoe sadja itoe samoea badan jang terpisah dari badan, soeda djadi angoes dan tida nanti orang bisa kenalken lagi mait siapa adanja itoe.

Samentara kapala, tangan dan kaki itoe lagi diremdem, Landru moelai dengen kerdja'annja jang laen. la ambil itoe gergadji, koetoengken kaki mait itoe sawates dengkoel, kamoedian sawates paha, pinggang dan dadah. hingga dengen sabentaran eadja mait itoe soeda djadi bebrapa potong. Potongan-potongan itoe lantas ia masoeken dalem itoe karoeng kotor bekas goela, berikoet djoega dengen itoe kapala, kaki dan tangan jang tertjelap dalem aer keras jang sekarang soeda angoes seperti areng itemnja.

Sasoedanja itoe Landru moelai bikin beres segala apa jang bekas dipake. la bikin satoe taboenan, bakar itoe pakean bekas njonja Collomb, bersama itoe kertas jang penoeh dengen darah, bersama djoega pakeannja sendiri.

Sasoedanja samoea tanda-tanda mendjadi bersih dan liat koeliling tempat ada gelap. tida ada kadengeran soeara laen dari boenjinja kodok, Landru laloe panggoel karoeng itoe dan naekin ka dalem autonja. Kamoedian ia balik kombali ka dalem kamar pakean dan lantas berdandan, samoea pintoe ia kontjiken lagi, dan itoe waktoe djoega ia lantas kandarken autonja dengen melintasi sapandjang djalanan sepi menoedjoe ka Evreux.

Oedjan kombali toeroen dengen deres, diberikoetken dengen. angin jang keras, tapi Landru jang tida kenal takoet, djalanken teroes autonja dengen perlahan, sabentar-bentar ia membiloek di pinggiran djoerang jang sempit, tapi Landru ada satoe chauffeur auto jang pande sekali, hingga maski poen auto itoe moesti melaloei djalanan-djalanan djoerang jang sempit dalem gelap goelita, rodanja auto selaloe ambil djalanan betoel. Achirnja ia sampe di kampoeng toekang tangkep ikan, jaitoe boekit jang dipanggil Veulettes, watesnja tepi laoetan jang djoerang.

Pernanja Veulettes ada di tengah-tengah Fécamp dan St. Valery. Auto moesti menandjak di boekit aken teroes ka Les Petites Dalles, dimana ombak-ombak besar dari kanaal Inggris saban-saban memoekoel keras pada wadas-wadas jang ada di sapandjang djalanan besar. Di djalanan paling oedjoeng dari itoe boekit, pinggiran djalanan mana ada berpipisan dengen toebir laoetan, Landru laloe brentiken autonja. Dengen ia poenja lentera kantong, ia soeloeken pada djoerang itoe dan oleh kerna amat gelap, dan djoega dari lantaran kerasnja angin jang menioep, ampir-ampir sadja Landru indjek lobangnja djoerang, di bawah mana ada kadengeran lapat-lapat menamparnja ombak jang besar pada batoe-batoe wadas. Sasoedanja dapet kanjataän di tempat terseboet tida nanti didapetken orang, dan djoega perboeatannja jang kedjem tida diliat oleh manoesia, Landru laloe ambil itoe karoeng jang berisi potongan mait dan lantas lemparken itoe ka dalem djoerang.

Sasoedanja itoe Landru lantas naek kombali ka dalem autonja, teroesken perdjalanannja ka sabelah selatan dengen pengharepan aken bisa sampe di Parijs pada esokan paginja.

Salama bersobatan, Landru taoe njonja Collomb tiada ada poenja sobat-sobat dan familie, maka ia pikir perboeatannja tinggal teroes slamat, sebab tida ada orang jang nanti maoe tjari taoe kemana linjapnja njonja Collomb, katjoeali itoe djedjaka nama Bernard, penggawe dari peroesahan electrisch di Lagny.

Landru taoe lama atawa lekas itoe karoeng berisi potong-potongan badan nanti terdampar ombak ka tepi laoetan dari kampoengnja toekang-toekang tangkep ikan, maka itoelah sebabnja ia sengadja soeda rendem lebih doeloe kapala, tangan dan kakinja mait itoe ka dalem aer keras, soepaja sekali poen orang dapetken itoe karoeng, orang tida nanti kenaiken mait siapa adanja itoe.

Lagi poen koetika maoe lemparken itoe karoeng, Landru soeda sengadja boeka lebih doeloe tali iketannja, maka dengen kerasnja ombak, itoe potong-potongan nanti kaloear dari karoeng dan terpentjar kasana-sini dibawa oleh ikan-ikan besar aken djadi barang hidangannja.

Dalem perdjalanan ka Parijs, oleh kerna tjoeatja ada gelap, Landru soeda djadi kasasar di kampoeng Giscors, di tempat mana dengen badan amat lelah ia mampir dalem hotel Trois Poissons, satoe roemah penginepan jang koeno, dan disitoe ia isi peroetnja jang sanget kalaparan.

Selagi doedoek isep cigaret di kamar roko, iseng-iseng Landru ambil satoe soerat kabar Martin jang terbit pagi, laloe boelakbalik meliat isinja. la djadi katarik dengen satoe toelisan, dan koetika ia batja itoe artikel hatinja ia rasaken berdebar-debar.

Dalem toelisan itoe ada diterangken bahoea toean Freidmann, soeami dari soedaranja njonja Cuchet, lantaran penasaran dengen linjapnja njonja Cuchet dan anaknja lelaki, Andre, soeda kasih katerangan hal itoe pada politie dan sekarang politie di Parijs dengen radjin lagi tjari saorang jang terkenal dengen nama Raymond Diard.

Roepanja Landru, ia poenja sikap dan potongan badan, samoea ada diseboetken dalem itoe toelisan. Lebih djaoe itoe soerat kabar terangken bahoea menoeroet papreksaännja politie, belon berselang bebrapa lama sedari linjapnja itoe doea orang jang bertjilaka, Diard poen soeda maboer dari Vernouillet dengen tida katahoean kamana perginja. Orang ada taro sangkahan bahoea itoe Diard ada satoe nama palsoe dari satoe badjingan jang mengoembara dan jang dengen goenaken banjak nama soeda lakoeken berbagi-bagi kadjahatan dan penipoean

Lebih djaoe dalem itoe soerat kakar ada ditoelis: „Perkara ini ada terbitken banjak omongan di antara pendoedoek kampoeng Vernouillet. Itoe toean Diard soeda tjerita pada familie orang jang linjap bahoea njonja Cuchet bersama anaknja lelaki soeda berangkat ka London aken tetapi atas papreksa'annja detectief dari Scotland Yard, ternjata itoe omongan djoesta adanja. Sampe ini hari tida ada satoe antara iboe dan anak ada dikatemoeken, tida satoe manoesia ada taoe dimana adanja itoe doea orang.

Apa jang menerbitken ketjoeriga'annja orang banjak, dan djoega politie, adalah barang-barang miliknja njonja Cuchet soeda dipoenjiken samoea oleh itoe Diard dan kamoedian soeda ditoekarken dengen oewang. Soeda terang sekali Diard itoe ada satoe penipoe jang dengen goenaken akal hendak kawin, soeda rampas barang orang.

„Ini perkara sabagitoe djaoe masih tinggal gelap, aken tetapi toean Freidmann, familie dari njonja Cuchet jang banjak taoe halnja Diard, soeda dateng pada politie dan kasih katerangan dengen sabenarnja. Politie ada minta bantoeannja orang banjak, soepaja djikaloe ada berdjoempa pada saorang jang roepa dan potongannja sama sebagimana ada ditoelisken di atas soeka lantas kasih kabar pada kantoor politie." Sampe tiga kali Landru batja itoe toelisan dan pengabisannja ia tertawa sendirian. Ini badjingan soeda goenaken bagitoe banjak nama sampe ia sendiri tida bisa inget, kerna saban kali ia pinda ka laen roemah, lantas djoega ia toekar namanja, toekar pangkat pakerdjaännja dan toekar djoega kabiasaännja.

„Raymond Diard soeda maboer." kata Landru dengen sendirinja. „la soeda maboer dengen tida tinggalken bekas dan tida tinggalken bangke. Siapa bisa tangkep Raymond Diard jang tida ada orangnja? Siapa akoe ini sekarang? André Charcroix !" Habis berkata bagitoe pada diri sendiri ia tertawa.

„Tapi . . . . . . setan!" kata lagi Landru dengen soeara tida kadengeran, „itoe soerat kabar soeda terangken roepanja dirikoe. Kaloe politie dapet liat akoe poenja roepa dan bilang akoe ini Raymond Diard, maski akoe sangkal jang dirikoe ada Andre Charcroix, toch achirnja pendjara ada djadi bagiannja akoe poenja tempat disekap! Ha! beroentoeng akoe dapet batja itoe toelisan! Sekarang akoe taoe apa jang lagi dikerdjaken oleh politie di Parijs.

Sekarang akoe soeda sadia aken tangkis kadatengannja politie djikaloe maoe tangkep padakoe." kombali ia tertawa.

„Orang jang taoe paling banjak tentang halkoe, adalah melinken si Freidmann!" kata lagi Landru dalem hatinja. „Tapi ini si djangkoeng koeroes melinken kenal akoe dengen lapat-lapat, ia tida oesah dikwatirken, sebab ia tida nanti bisa bantoe pada politie aken tangkep padakoe."

Sekarang Landru senderken belakangnja pada korsi dan meremken itoe mata jang menjala seperti api. la bersender dengen lajangken pikirannja pada itoe koetika jang ia ada hidoep sebagi soeami-istri dengen njonja Cuchet. la inget inget apakah ini Freidmann ada taoe jang ia ada poenja satoe garage di Neuilly? Kaloe betoel ia taoe, tentoe orang nanti djaga ia poenja kombali kasitoe. Tapi Landru berpikir lagi, kaloe sahandenja politie ada taoe itoe hal, tentoe sekali garage itoe soeda dibeslag.

Sasoedanja berpikir bagitoe, Landru moelai merasa dirinja masih banjak djalan boeat dapet kamerdikaän. Pikirannja jang tadjem, tjerdik, dan tabeatnja jang tida kenal takoet, ada mendjadi lantaran maka ini pendjahat soesa ditangkap.

Maski poen njalinja tida kwatir hadepken segala bahaja, tida oeroeng ini badjingan merasa tida enak aken dikenalken oleh sasoeatoe orang jang dapet batja itoe kabaran dan jang nanti toedoeh dirinja ada itoe orang jang diseboetken dalem soerat kabar Martin.

Oleh kerna demikian, sampe siang terganti malem, baroelah Landru brani balik kombali ka ia poenja garage di Neuilly, dimana ia ada taro soerat-soerat pertjintaän, tjintjin bekas njonja Collomb, dan djoega ramboet palsoe dan bebrapa tjintjin permata bekas kapoenjaännja laen-laen korban. Koetika ia dapetken itoe doos dimana ia ada simpen itoe barang-barang kapoenjaännja ia poenja korban, ini badjingan tertawa oleh kerna girangnja.

Ini badjingan ada poenja satoe kasoekaän jang di blakang hari soeda membikin tjilaka dirinja sendiri. Kasoekaän itoe, jalah menjimpen satoe tanda mata dari soeatoe barang jang disoeka olehnja, bekas ia poenja korban pake. Itoe tanda-tanda mata jang Landru simpen belakang hari soeda djato di tangan politie dan ada djadi boekti-boekti paling sah boeat hoekoem boenoeh pada Landru.

Sasoedanja tinggal satoe malem dalem ia poenja roemah di Neuilly, esokannja Landru laloe berangkat ka roemah istrinja, danla ntas bikin pendek djenggotnja. Koetika istrinja tanja kenapa ia berboeat bagitoe, Landru tjeritaken jang berhoeboeng dengen oeroesan dagang, di perdjalanan saban-saban ia tida bisa rawat djenggotnja dengen betoel. Sabetoelnja djikaloe ia tjoekoer sadja itoe djenggot sama sekali, tentoe ada lebih baek, tapi ini badjingan anggep perkara jang ia kwatirken ada terlaloe ketjil, samentara djenggot itoe besar sekali harganja, kerna itoe djenggotlah djoega jang membikin bagitoe banjak prampoean jang tergila-gila padanja.

Sasoedanja berdandan, Landru laloe naek ka loteng kalima dari satoe gedong di Boulevard de Sabastopel, tida djaoeh dari Rue Turbigo, di tempat mana ia disamboet oleh satoe orang toewa jang kapalanja soeda botak dan oebanan, tapi badannja masih gaga dan besar, orang mana Landru seboetken namanja „Jean".

„Akoe dateng disini boeat minta kaoe poenja pertoeloengan dengen pena, sobatkoe jang baek," kata Landru pada itoe orang toewa. Kaoe haroes boeboehi dalem ini soerat satoe tanda tangan dari satoe prampoean, dan kaoe haroes bikin itoe dengen mirip sekali."

Itoe orang toewa njatalah ada satoe peniroe toelisan jang terkenal pande sekali dan ada lakoeken pakerdjaän bersih atawa kotor boeat maksoed djahat atawa baek, asal sadja ada oepahnja. Tapi ini orang njatalah ada lebih banjak dikenal oleh bangsat-bangsat, penipoe-penipoe dan badjingan-badjingan di Parijs. Sasoeatoe bangsat ada kenal namanja Papa Jean Boas sebagi satoe toekang tiroe tanda tangan dan toelisan.

Papa Jean laloe ambil doea soerat jang Landru sodorken padanja, satoe soerat ada penoeh dengen toelisannja satoe prampoean, samentara laen kertas masih kosong. Landru laloe seboetken apa jang Papa Jean haroes toelis dalem itoe soerat kosong dengen meniroe toelisannja itoe soerat dari satoe prampoean, kamoedian boeboehi tanda tangan mirip seperti apa jang ada dalem itoe tjonto soerat. Sasoedanja memandang pada toelisan dan tanda tangannja njonja Collomb, itoe Jean toewa manggoetken kapalanja sebagi tanda jang ia soeda mengarti.

Dengen tida banjak bitjara Jean moelai menoelis menoeroet sebagimana ada ditoetoerken oleh Landru, kamoedian bikin satoe tanda tangan jang mirip betoel dengen toelisan dan tanda tangannja njonja Collomb almarhoem.

Sasoedanja itoe ia toelis satoe nama dan tempat tinggalnja satoe saksi dan boeboehi tanda tangan dengen pake tanggal tiga boelan di moeka. Sebagi oepahan boeat itoe kerdjahan doea minuut, tapi membawa kaboesoekan ratoesan tahon, Jean laloe trima dari tangannja ini badjingan oewang banjaknja seratoes francs.

Doea djam kamoedian Landru soeda bisa ambil oewang simpenannja njonja Collomb dari satoe Bank dan pada itoe malem djoega ia djoeal antero barang perabotannja itoe njonja jang ada disimpen dalem satoe gedong di Rue Rodier, orang jang membeli barang-barang itoe, jalah si Jules Caillard pada siapa Landru ada kasih liat djoega soerat katerangannja njonja Collomb dengen tanda tangan sedjati, soerat mana sebagimana kita soeda taoe. Landru baroe sadja bikin sama Papa Jean.

Oewang pendapetan dari pendjoewalan barang-barang itoe, bersama oewang jang disimpen di Bank, ada berdjoembla toedjoe riboe delapan ratoes francs, oewang mana sabetoelnja ada terlaloe ketjil boeat ditoekar dengen itoe pakerdjaän berdosa jang sanget kedjem dan kedji. Landru masih sadja merasa sanget tida enak dengen itoe warta dalem soerat kabar Martin, dan sampe pada itoe hari soerat soerat kabar teroes masih oelangken itoe kabaran-kabaran, malah djoega roepanja Landru dinjataken lebih teges lagi. Menoeroet katanja satoe soerat kabar jang paling blakang, politie ada doega Raymond Diard masih tetap berdiam di kota Parijs.

Di matanja Landru djiwa manoesia ada sebagi djiwa tjapoeng, samentara itoe pakerdjaän jari oewang dengen djalan kedji, doerhaka dan kedjem, ia anggep sama sadja seperti laen-laen kerdjaän biasa. Kaloe laen orang berdagang dengen memake kapitaal oewang, Landru melinken pake kapitaal dari pandenja ia poenja bitjara, berpoera-poera dan memboewang tingka sebagi satoe soendel. Samentara laen-laen soedagar roegi millioenan dari speculatie, Landru belon perna roegi. Maka mingkin lama ia djadi semingkin giat dan bernapsoe teroesken pakerdjaännja jang boesoek itoe.

Kaloe satoe korban soeda abis disingkirken dari doenia, Landru moelai tjari poela laen korban, ia moesti dapetken korban itoe di waktoe siang atawa malem, di djalanan atawa di dalem roemah.

Bagitoelah pada soeatoe malem, koetika samoea toko-toko soeda ditoetoep, di djalanan Opera-station Landru ada dapet liat satoe anak prampoean oemoer kira-kira sembilan belas tahon sedeng berdjalan dengen tangannja menengteng satoe koffer tangan, dari roepanja orang bisa liat jang nona itoe sedeng berada dalem soesa.

Landru ikoetin itoe nona masoek ka dalem station, dan koetika itoe nona nack kreta api, Landru poen ikoet naek, ambil tempat jang berhadepan dengen nona itoe.

Landru dapet kanjatahan, nona itoe bersoesah hati lantaran bertjidra dengen orang toewanja atawa dengen toendangannja, maka Landru ada taro harepan besar aken bisa poenjaken nona itoe atawa kaloe oentoengnja bagoes, bersama djoega barang-barang dan oewangnja nona itoe.

Koetika nona itoe toeroen dari kreta api di satoe station jang teritoeng dalem bilangan kota Parijs djoega, Landru poen laloe toeroen dan ikoet kemana itoe nona djalan. Koetika soeda berada berdoea'an di satoe djalanan sepi, Landru laloe moelai adjak itoe nona bitjara.

Ini nona jang idoep sabatang karang dalem kota Parijs jang besar, soeda tjeritaken teroes terang hikajatnja di hadepan Landru. la kasih taoe namanja ada Marie de Layons, doeloe ia ada djadi penggawe dari satoe toko, kamoedian ia djadi kinderjuffrouw (baboe anak ketjil). Kerna ia tida bisa idoep roekoen dengen iboenja, dan baroe ini ia soeda bertjidra lagi pada njonja Collin, jaitoe iboenja, maka ia soeda brenti dari pakerdja'annja, dan sekarang berdjalan koeliling aken tjari tempat mondok dimana sadja sadapetnja.

Koetika soeda dapat katerangan bagitoe, Landru laloe kasih kenal dirinja nama Lucien Guillet, dan sebagi saorang toewa jang baek hati, ia laloe nasehatken pada itoe nona soepaja balik poelang sadja ka roemah iboenja dan bikin abis segala perbantahan. Aken tetapi oleh kerna nona itoe tinggal tetap tida maoe, maka Landru laloe goenaken itoe koetika baek, oendang itoe nona bermalem di roemahnja di Rue de Maubeuge.

Tentoe sadja tawaran itoe ditrima dengen girang hati oleh ini nona, jang kira Landru ada satoe hartawan jang dermawan. Dalem ia poenja BOEKOE ITEM, Landru tjatet namanja itoe nona „Marie de Layons." Satoe-satoe prampoean jang tertjatet dalem boekoe itoe, jalah berarti satoe kamatian. Koetika boekoe terseboet djato di tangan politie sasoedanja Landru ditangkep, disitoe orang dapetken banjak sekali resianja ini pendjahat jang soeda kaniaja dan boenoeh beratoes prampoean.

Itoe malem Landru bawa lelakon sebagi saorang toewa jang dermawan. Ia adjak itoe nona bersantap dalem satoe restaurant, kamoedian adjak itoe nona ka roemahnja.

Besokan paginja ia anterken itoe nona ka roemah iboenja, dan ia sendiri dengen berkandara'an taxi pergi ka Montmartre, koendjoengi cafe „Le Soufflet" pernanja tida djace dari Place Pigalle dimana ia bertemoe pada Caillard dan laen-laen sobatnja. Ini soedagar barang gelap lagi doedoek mongobrol sama doea temennja di satoe medja, doea temennja itoe poen ada orang-orang jang namanja tertjatet dalem boekoe politie sebagi pendjahat-pendjahat.

Landru sigra doedoek bersama-sama iaorang, mengobrol dengen asik sambil minoem cognac. Caillard saban-saban kaloearken omongan jang kotjak, Landru bersama itoe doea kontjo, saban-saban tertawa bergelak-gelak. laorang ada bagitoe asik mengobrol, hingga iaorang tida taoe kaloe satoe detectief jang menjamar ada intjerken roepanja bebrapa poeloe minuut lamanja, kamoedian detectief ini berdjalan panggil kawan-kawannja, masing-masing diatoer djaga pintoe dan djendela soepaja Landru tida bisa melariken diri. Kamoedian kapala detectief itoe dateng di pinggirnja Landru, pegang keras poendaknja ini badjingan.

Landru terkedjoet. . . . . . . .

la nengok, dapet liat satoe orang koeroes berbadan tinggi dan koemis pandjang, dengen mata melotot berkata:

„Raymond Diard. . . . . . pemboenoeh njonja Cuchet dan Andre!"

Landru mengkirik, matanja tjelilatan.

Samoea orang jang doedoek di cafe itoe bersiap bangoen dari tempat doedocknja.

Landru. . . . . . . . . . . . . nekat!