Pembalesannja Kawanan Liangsan/Bagian ka ampat/Bab 2
II
Pergi serepin kabar, katemoe sobat lama. Kota Piankeng didjaga sakeras kerasnja.
Waktoe matahari moelai terbit, Lie Eng lantas komendir barisannja balik kombali ka oetan Hongtjioepo, dimana ia prenta soldadoenja masak nasi, sedeng Tja Tjin lantas poelang ka roemanja aken benah-benahken barang jang boeat dibawa ka goenoeng.
Tapi sabelon barisan itoe berangkat, koenjoeng-koenjoeng ada terkabar, keadahan di kota Radja ada sanget berbahaja.
„Kaloe keadahan ada begitoe roepa, kita-orang tida boleh tinggal diam,” kata Lie Eng: „kerna kita semoea ada rahajat dari Taysong, maka haroeslah sabagi rahajat dari ini negri, kita moesti tjari taoe."
Soedara-soedaranja pada membenerken itoe omongan.
Dengen berpaling pada Tee Tjong, Lie Eng berkata poela:
„Akoe kira baek Teeheng sadja jang pergi serepin, kerna kaoe memang ada saorang jang soeka djalan."
Jo Liem jang ada di sitoe lantas menjataken soeka boeat toeroet bersama-sama, permintahan mana ditrima oleh itoe Twako dengen girang hati.
Sigra djoega Lie Eng ambili oewang boeat ongkosnja marika berdjalan, kamoediean angkat tenda aken poelang kombali ka lemmatjwan bersama-sama Tja Tjin, dengen terikoet djoega oleh Kit Hoe dan Tong Goe-tji.
Berangkatnja Lie Eng biarlah kita tinggalken doeloe, dan mari menjoesoel djalannja Tee Tjong berdoea Jo Liem.
Dengen menggoenaken ilmoenja, tida selang lama Tee Tjong berdoea Jo Liem telah sampe di bilangan kota Tongking, jang kira-kira sapoeloe li djaoenja dari kota Radja. Di sapandjang djalan ada kaliatan banjak alat sendjata dan bendera-bendera, anak negri soeda banjak jang pinda ka laen tempat.
Tee Tjong bersama kawannja berdjalan teroes. Itoe waktoe matahari telah moelai silem.
Sigra djoega marika dapet liat satee gredja, jang tertoelis Tjenghikoen.
„Kerna tempat lagi hoeroe-hara begini, „kata Tee Tjong:” akoe kira waroeng-waroeng dan roema penginepan djoega pada toetoep. Maka lebi baek kita bermalem di itoe gredja sadja.“
Jo Liem menoeroet-sadja, maka kadoeanja itoe laloe menghamperi, tapi depan dan di pertengahan, tida ada kaliatan satoe hweshio.
Tee Tjong lantas berdjalan masoek, sasampenja di blakang ia katemoe satoe hweshio pintjang jang lagi menjapoe. Maka Tee Tjong laloe menanja padanja: kenapa gredja begini besar, tjoema ada satoe hweshio sadja jang tinggalin, manatah lagi laen-laen padri kawannja.
Itoe hweshio pintjang lantas kasi taoe, berhoeboeng dengen penjerangannja pasoekan Kim jang amat keras, dengen lakoeken djoega banjak perboeatan-perboeatan kedjem pada rahajat negri, seperti merampas dan memperkosa orang poenja anak istri, maka goeroenja dengen bebrapa kawan soeda maboer ka laen tempat, kerna koeatir nanti dianiaja oleh soldadoe Kimkok jang boewas itoe.
„Tapi kaoe mengapa tida lari?“ menanja Tee Tjong.
„Oh, boeat dirikoe, biarlah akoe serahken sadja nasib pada Toehan Jang Maha Koeasa“, saoetnja padri itoe.
Tee Tjong lantas kasi taoe maksoednja, bahoewa ia berdoea hendak noempang menginep, dengen minta dibagi sedikit beras boeat masak, jang esok ia nanti ganti harganja. — Tapi si hwestio lantas kasi taoe, boeat menginep, itoelah ia tida ada kaberatan. Tapi beras sasoenggoenja tida ada. Kamoedian ia toendjoeki pada satoe doesoen jang pernahnja tida sabrapa djaoe dari ini tempat, di sitoe brangkali ada orang jang poenja beras boeat diminta bagi.
Kamoedian Jo Liem berangkat ka tempat jang dioendjoek, jang satelah sampe tempat itoe ada kaliatan sepi sadja. Dalem itoe doesoen ada bebrapa roema, sedeng satoe antaranja ada kadengeran soeara orang mengomong.
Itoe roema ada bagoes dan resik. Di pelatarannja ada toemboe bebrapa poehoen bamboe dan Siong. Dengen tindakan pelahan Jo Liem menghamperi dan liat depannja ada tergantoeng satoe kere, dimana ada kaliatan asep pendoepahan jang mengeboel.
Jo Liem tida brani lantas masoek, hanja sabagi membri tanda kadatengannja, ia lantas berbatoek brapa kali, dan ampir berbareng itoe kaliatan satoe anak ketjil jang ramboetnja terkonde di kiri kanan, kaloear dari itoe roema dan menanja siapa namanja tetamoe jang dateng, dan apa maksoednja.
Jo Liem lantas membri taoe bahoewa ia dari gredja Tjenghikoan, nama Jo Liem dan dateng ka mari hendak minta dibagi sedikit beras boeat masak. „Oh, sajang sekali Tongdjin baroe kaloear,“ kata itoe anak: „akoe tida brani lantjang.“
Jo Liem tida memaksa, hanja lantas berlaloe sambil berkata:
„Tjari beras begini soesa. Apa kita moesti liwatken sadja tempo satoe malem dengen peroet kalaparan?“
Sahabisnja kata begitoe ia berdiri sakoetika lama dengen pikiran bingoeng. Tapi koenjoeng-koenjoeng dari djoeroesan Koelon rimba ada kaliatan saorang lelaki jang roepanja seperti pemboeroe, dengen teriring oleh satoe anak ketjil jang baroe kaloear dari itoe oetan, sambil mametik kembang-kembang, sedeng di tangannja ada menengteng sapasang boeroeng Kioe jang baroe dapet ditangkep.
Waktoe meliat pada Jo Liem, orang itoe lantas mengawasi dan kamoedian berseroeh dengen soeara girang:
„Hola! kiranja kaoe, Joheng! Soenggoe akoe tida kira sekali kaoe bisa sampe ka mari!“
Jo Liem jang lagi bengong djadi amat kaget dan hatinja boekan patoet poenja girang, satelah kenalin bahoewa orang jang treaki padanja itoe boekan laen dari Yan Tjeng, satoe sobat lama jang sakean waktoe tida bertemoe.
Kadoea orang ini lantas djalanken kahormatan, sambil beromong-omong Jan Tjeng adjak ka roemanja, jaitoe tempat dimana baroesan Jo Liem dateng minta beli beras.
Sabelonnja berdoedoek, Jo Liem laloe kasi taoe maksoed kadatengannja, dan sekarang Tee Tjong ada di gredja Tjenghikoan, menoenggoe padanja.
„Kaloe begitoe, baeklah kaoe panggil dan adjak ka mari,“ kata Jan Tjeng:“ sedeng akoe di sini nanti sadiaken makanan.“
Jo Liem memanggoet dan berlaloe.
Waktoe ia sampe, Tee Tjong lantas menanja, kenapa soedara ini pergi begitoe lama, dan manatah berasnja jang dibeli.
„Beras tida oesah beli,“ saoet Jo Liem sambil bajar kombali itoe tempat jang tadi si hweshio pintjang kasi ia pindjem: “di sana ada satoe soedara jang lagi menoenggoe dan nanti sadiaken kita-orang makanan.“
Sahabisnja kata begitoe ia ambil kombali boengkoesannja dan lantas adjak Tee Tjong berangkat ka itoe doesoen
Tee Tjong jang masi belon dikasi taoe, siapa adanja itoe soedara, lantas menanja. Tapi Jo Liem tida maoe seboet, hanja soeroe djalan sadja lekasan, sabentar djoega nanti katemoe.
Tee Tjong djadi heran dan mendoega-doega dalem hati. Ia poen tida maoe menanja lagi, hanja berdjalan sadja satjepet-tjepetnja. Di pertengahan itoe roema soeda kaliatan sinar api jang terpasang, kerna tatkala itoe hari poen moelai malem.
Waktoe sampe, Jo Liem lantas masoek, dimana Jan Tjeng kaloear menjamboet.
Girangnja Tee Tjong boekannja maen, satelah dapet liat siapa adanja itoe toean roema. Satoe pada laen lantas djalanken kahormatan dan sasoedanja berdoedoek, Jan Tjeng berkata:
„Soenggoe akoe merasa girang sekali, jang ini hari bisa bertemoe pada Djiwi Hengtiang berdoea. Kabetoelan tadi akoe dapet doea ekor boeroeng Kioe, maka sabentar kita-orang boleh dahar itoe dengen enak.“
Sahabisnja kata begitoe, ia prenta orang-orangnja lekas sadiaken barang hidangan di medja pertengahan loear. Sasoedanja barang santapan itoe teratoer, Jan Tjeng lantas silaken Tee Tjong dan Jo Liem doedoek dahar.
Sembari santap satoe pada laen lantas tjeritaken marika poenja perdjalanan sendiri-sendiri dalem tempo sakean lama jang marika telah berpisa, sampe achirnja berkoempoel pada Lie Eng di goenoeng lemmatjwan, dan kamoedian menoeloeng Tja Tjin di kota Tjongtjioe. Tapi baroe sadja maoe balik ka goenoeng, marika diprente dateng di kota Radja boeat serepin kabar, bagimana keadahannja kota Piankeng jang dikoeroeng oleh tentara Kimkok. Satoe persatoe Tee Tjong teritaken terang, kamoedian tanja pada Jan Tjeng, mengapa ia berdiam sadja dalem ini pedoesoenan jang soenji.
„Sasoedanja brenti dari paperangan di Poeilap,“ saoet Jan Tjeng: „akoe lantas oendoerken diri ka ini padoesoenan, soepaja tida oesah terlaloe tjape hati lagi sabagimana jang sakean lama kita-orang telah rasaken.“
„Ah, tjoba kaloe Tongdjin Louw Tioen-gie soeka toeroet nasehatkoe, pastilah ia tida aken djadi binasa,“ kata Jan Tjeng lebi djaoe: „kamatiannja membikin akoe tinggal, dalem roemanja madjikan baroe, jaitoe: Tongdjin poenja soedara misan, tapi ada masoek she Louw djoega dan di kota Radja orang seboet padanja Louw Djihoangwe, dengen memboeka djoega satoe waroeng, dan ini doesoen ada kapoenjahannja. Tapi sabagimana baroesan akoe telah bilang, lantaran soeka pada kasoenjian, maka akoe minta tinggal di sini, permintahan mana telah diloeloesken, hingga satiap hari akoe bisa senangken hati dengen memana boeroeng, tanem sajoer dan djalan- djalan, jang djaoe dari kadjengkelan.“
„Itoelah bener senang sekali,“ kata Jo Liem.
„Apa salama berdiam di sini, Janheng tida perhatiken bagimana keadahan di kota Radja ?“ menanja Tee Tjong.
„Ja, ada djoega, tapi sedikit,“ djawabnja. Lebi djaoe Jan Tieng tjeritaken, bagimana keadahan di kota Radja ada djelek sekali, kerna angkatan perangnja Kimkok jang mengepoeng kota Piankeng, ada berdiriken pasanggrahan di lembah Tobokong. Keizer jang baroe bertachta ada amat lemah dan tida mempoenjai kapandean, sedeng keadahan mantrinja ia tida bisa liat mana jang djoedjoer, satia atawa dorna.
Pang Gian Tjaysiang jang maoe bikin perdamian, oleh Baginda tida dipertjaja, sedeng Pengpouw Silong Lie Kong, satoe mantri jang mempoenjai kapandean tinggi dan mempoenjai pengartian Boen dan Boe, telah dilepas djabatannja, dan boeat moendoerken tentara Kimkok, baginda maoe serahken bilangan Samtien dengen sakalian daerahnja, bersama sadjoembla oewang. Hal ini soeda katjadian, dimana lantas dikaloearken atoeran boeat ambil miliknja rahajat negri, dan orang-orang jang hartawan moesti lantas serahken sabagian kakajahannja boeat goena negri menjoembang moesoe.
Lantaran itoe djoega, kata Jan Tjeng lebi djaoe, maka Louw Djihoangwe djadi meninggal doenia lantaran terlaloe kesel hati. Atoerannja pamerenta jang maoe ambil miliknja rahajat dengen paksa, betoel-betoel ada terlaloe tida adil. Tentang halnja Tja Tjin ditangkep, lantaran tida soeka serahken sabagian besar dari kakajahannja itoe poen ia ada denger, jang kamoedian dapet ditoeloeng oleh sakalian Hengtiang di lemmatjwan.
„Oleh kerna keadahan jang begitoe roepa, maski kota Piankeng didjaga dengen tegoe,“ kata Jan Tjeng sabagi penoetoepnja: „kabarnja lantaran mantri-mantri besar maoe djoega dibikin perdamian, maka Lo Tjiong, Tiauw Peng-tiong dan jang laen-laen, tida diperkenanken boeat kaloear perang.“
Jo Liem dan Tee Tjong tida bisa berkata apa-apa.
„Tapi kaoe, Djiwi Hengtiang,“ kata poela itoe toean roema, sasoedanja berdiam sakoetika lama: „akoe kira pertjoema pergi ka itoe tempat, kerna djangan kata orang, maski poen aer akoe kira tida bisa melas. Maka dari kaoe pergi ka sana dengen memboewang tempo pertjoema, ada lebi baek kaloe kaoe tinggal sadja doeloe di sini boeat meliat gelagat, kerna bila itoe kota terpoekoel petja, ini tempat djoega ada dalem bahaja dan akoe tentoe tida berdiam salama-lamanja di sini.“
„Kaloe begitoe, apa tida baek kaloe kaoe ikoet sadja pada kita-orang ka lemmatjwan ?“ kata Jo Liem: „kerna pergi ka tempat jang tida katentoean, akoe kira ada lebi baek kaloe Janheng berkoempoel pada sakalian Hengtiang ?“ „Begitoe poen boleh,“ saoet Jan Tjeng: „tapi baeklah kita liat gelagatnja doeloe, bagimana kadjadian jang bakal dateng.“
Tee Tjong berdoea djadi girang dan merasa satoedjoe dengen bitjaranja ini sobat lama. Begitoelah ia orang bitjara-bitjara lebi djaoe sampe hari mendjadi malem.
Maksoednja boeat pergi ka kota Radja tida mendjadi, kerna sekarang marika menanti sadja kabar dari ini doesoen.
Apatah jang terdjadi di kota Radja?
Itoelah ada ditoetoerken sabagi berikoet:
Pada soeatoe pagi, sabagimana biasa Baginda Keizer Song Kim Tjong doedoek di singgasananja, dengen terhadir oleh sakalianmantri-mantri besar dan ketjil, dari berbagi-bagi golongan, Parasnja itoe djoengdjoengan ada amat doeka, maka dengen soeara sember baginda menanja pada mantri-mantrinja: marika ada mempoenja daja apatah jang baek boeat toelak serangannja tentara Kim jang sekarang lagi sedeng menjerang di sagala pendjoeroe, dengen amat seroehnja.
„Tjobalah keng sakalian kasi denger daja oepaja itoe,“ kata baginda achirnja.
Lie Pang-gian, satoe minister jang berdiri di samping lantas madjoe mengadep dan berkata: „Kerna angkatan perang Kimtiauw ada begitoe keras menjerangnja, dan soeda poekoel petja tana Hopak dan Hotong, hingga pengaroenja poen djadi tersiar betoel. Sekarang poenja ampat kota soeda terkoeroeng rapet, hingga kabraniannja pasoekan Samkoen djadi linjap sama sekali. Kaloe keadahan moesoe ada begitoe roepa, kita paksa aken melawan, adalah saoepama telor diadoe dengen batoe goenong. Maka daja samengga-mengganja paling baek boeat samantara waktoe toeankoe berangkat sadja ka kota Siangyang, boeat singkiri diri dari tadjemnja toembak dan golok, kaloe kamoedian bala bantoean soeda dateng, baroelah madjoe bergerakaken reboel kombali tempat-tempat jang soeda terambil moesoe.“
Sabelonnja baginda menjaoet, satoe mantri besar lantas madjoe sambil berkata dengen soeara sedikit keras:
„Djangan! djangan toeankoe berlakoe. Kendati moesoe menjerang bagimana keras djoega, troesa koeatir, sebab ini kota poenja tembok benteng ada amat tegoe dan terdjaga dengen santausa, hingga tida gampang-gampang nanti terpetja. Maka daja jang oetama jalah sekarang lekas siapken tentara dan tamba pendjagahan, soepaja hatinja anak negri djadi lebi tetep. Dan dalem waktoe begitoe kita boleh bernanti datengnja bala penoeloeng. Tapi kaloe toeankoe kaloear kota dengen tinggalken astana, sedeng moesoe dapet taoe dan mengedjer, bagimanatah nanti djadinja ?“
Baginda awasken ini mantri jang berkata blakangan kiranja dia itoe ada Pengpouw Silong Lie Kong.
„Keng rasa, siapa jang boleh diangkat djadi panglima boeat moendoerken moesoe?“ tanja baginda kamoedian.
Lie Kong lantas njataken pikirannja, jaitoe Tjiong Soe touw, Tiauw Kouw dan Tjong Tek, marika itoe katanja ada sampe tjakep diangkat ka dalem itoe djabatan, boeat mengoeroes perkara perang. Sedeng oeroesan di dalem baek diserahken pada mantri besar, boeat sama-sama imbangi keadahan dengen meliat gelagat. Kaloe keadahannja moesoe soeda djadi lelah, baroe geraken soldadoe boeat menjerang, dengen begitoe, satoe kamenangan bisa diharep aken terdapet, sedeng karadjahan tinggal tetep dalem kasantausahan.
„Begitoelah adanja hamba poenja pikiran,“ kata Lie Kong sabagi penoetoepnja: „maka harep toeankoe soeka perhatiken betoel.“
Baginda merasa satoedjoe dengen pikirannja ini mantri, maka dengen girang baginda laloe menanja: „Kaloe djabatan panglima besar diserahken pada Tjiong Soe-touw, boeat oeroesan di dalem kota kami rasa haroes diserahken dalem Keng poenja tangan ?“
Lie Kong memanggoet, ia berdjandji nanti lakoeken kawadjibannja dengen setia.
Baginda lantas angkat Lie Kong ka dalem djabatan Siangsi Joesin, boeat oeroes keadahan di dalem kota.
Lie Kong lantas berloetoet hatoerken trima kasi.
Baroe sadja Lie Kong bangoen, Lie Peng-gian laloe madjoe dan berkata:
„Lie Kong ada satoe anak sakolahan jang masi idjo, maka pendapetannja jang telah ditoetoerken baroesan, djanganlah dengen gampang-gampang toeankoe toeroet sadja. Tjiong Soe-touw betoel ada sampe gaga, tapi oesianja soeda terlaloe teea, hingga tida bisa dibriken itoe djabatan jang amat penting. Hamba poen tida sangkal jang Tjiong Soe-touw ada tjakep, tapi orang jang beroesia mendeketi delapanpoeloe taon, brangkali tida nanti bisa lakoeken kawadjiban sebagi kapala perang. Apapoela hatinja soldadoe soeda djadi rontok, maka kaloe kota Radja satoe kali soeda petja, pasti amat soeker boeat didiriken poela.“
Lebi djaoe minister ini oendjoek bagimana Thay Ong doeloe pinda ka Tjitjioe, sampe achirnja bisa diriken dynastie Tjioe jang toeroen menoeroen hingga delapanratoes anam oeloe toedjoe taon lamanja. Maka dengen oendjoek ini, ia minta baginda soeka perhatiken dan djangan sampe djadi menjesel dikamoedian hari.
Keizer Song Kim Tjong ada saorang moeda jang belon lama doedoek di tachta, sedeng pikirannja poen tida tetep, tida mengenal sifatnja mantri jang baek atawa djahat, pinter atawa bodo. Sagala apa jang dikata, kabanjakan tida dipikir mateng lagi. Bagitoelah satelah denger perkatahannja Lie Pang-gian. lantas sadja disatoedjoe.
„Sasoenggoenja keng poenja perkatahan ada lebi bener, kaloe tertimbang dengen voorstelnja Lie Kong.“ kata baginda: „kaloe begitoe, baeklah kami toeroet boeat pinda ka kota Siangyang.“
Sigra djoega prenta boeat itoe laloe dikaloearken, hingga dalem samantara waktoe, anam poenja Koeihoei djadi repot benahken barang-barang boeat pinda dan berkoempoel di satoe tempat dimana kreta-kreta telah menoenggoe dengen terdjaga oleh barisan Gilimkoen.
Lie Kong jang denger ini kabar, djadi amat kaget dan boeroe-boeroe katemoeken baginda jang lagi maoe berangkat bersamasa Koeihoei-koeihoeinja. Ini mantri jang satia laloe berloetoet di hadepan kreta karadjahan dengen bertjoetjoeran aer mata berkata:
„Toeankoe toch taoe, jang antero pasoekan poenja Liokkoen masi ada mempoenjai ajah boenda, anak istri dan koelawarga dalem ini kota. Djadi maski bagimana keras djoega moesoe menjerang, pastilah itoe anam pasoekan poenja soldadoe nanti mendjaga dan melindoengi dengen soenggoe hati, boleh diharep marika nanti berlakoe mati-matian mendjaga tegoe. Tapi kaloe toeankoe paksa djoega boeat berangkat, dan sasampenja di tenga djalan pasoekan moesoe mengedjar dan balatentara pada boebar, siapatah jang nanti menganter dan melindoengken toeankoe poenja badan mas ? — Inilah harep baginda soeka pikir biar betoel."
Sahabisnja kata begitoe, Lie Kong laloe berdiri. Dan sabelonnja Sri Makota kaloearken perkatahan, ia berpaling pada itoe sakalian bala tentara pengiring Keizer dan berkata dengen soeara njaring:
„Semoea balatentara jang sekarang ada berkoempoel di ini tempat dan jang aken menganter pada baginda, menjaoetlah atas akoe poenja pertanjahan: apa kaoe berame soeka tinggal mendjaga kota, atawa lebi soeka ikoet pinda?“
„Lebi soeka tinggal mendjaga dengen mati-matian!“ berseroeh itoe semoea soldadoe dengen bernapsoe.
Mendenger itoe perkatahan, baginda djadi tersedar. Sigra djoega prenta boeat berangkat pinda dioeroengken. Satelah semoea soldadoe denger, jang ini kapindahan tida djadi, marika itoe laloe berseroeh:
„Banswe! Banbanswe !“
Beriboe-riboe anak negri-jang djoega ada berkoempoel di sitoe, satelah denger baginda oeroengken niatannja, djadi amat girang, antara mana kaliatan sarombongan student-student madjoe ka hadepan baginda, dan satoe antaranja sambil berloetoet, berkata dengen soeara njaring:
„Taytjouw Hongte waktoe maoe tetepken merk Taysongtiauw, soeda malang melintang di ini doenia, sapoe bersi sagala kakaloetan dan djadiken ampatratoes kota-kota residentie, jang boeat itoe maski boekan sedikit menampak kasoekeran, tapi dengen gaga dan hati tetep, achirnja sampe djoega itoe tjita-tjita jang terkandoeng. Sedeng Taytjong jang ka bawah, toeroen menoeroen samboet karadjahan dengen siarken prikabedjikan, kawelasan dan boedi besar pada anak negri dengen saloewas-loewasnja, pegang pamerentahan dengen adil, oendjoek kamoerahan dan katjintahan pada rahajat, hingga mendapet berkahnja Allah. Berbareng itoe pengasilan negri kaloear tida poetoes-poetoesnja, hingga rahajat berada dalem slamet dan santausa, hingga saratus limapoeloe taon poenja pamerentahan.“
„Tapi dalem waktoe jang blakangan, sadari Ong An-sek meroba peratoeran lama dengen jang baroe, keadahan doenia djadi beroba, laksana diloekain,“ kata poela itoe orang moeda, jang meneroesken perkatahannja: sekarang hal-hal jang paling menjakiti hati jalah Sianghong (Keizer Kietjong, djadi Keizer Song Kim-tjong poenja ajahanda) soeda terlaloe pertjaja pada kawanan siauwdjin, dengen kasi kakoeasahan saloewas-loewasnja, hingga oeroesan negri tida dioeroes sabagimana moestinja, dan lantaran itoe keadahan negri djadi sabagi tana gempahi atawa genteng rontok. Tjoa Keng anak dan ajah telah pangkoe djabatan Tjaysiang lebi doeapoeloe taon lamanja, boekan bikin banjak kabaekan pada negri, hanja timboelken kaonaran dan banjak kadjahatan pada anak negri, hingga mengasi lantaran boeat orang-orang bidjaksana djaoeken diri dari golongan pamerentaban hal ini soenggoe ada amat mengipiranken pada Sri Djoengdjoengan.“
„Djoega itoe mantri-mantri besar seperti Ko Kioe, Tong Koan, Ong Hoe dan Nio Soe-seng, ada orang-orang jang samatjam Tjoa Keng anak dan ajah, jang salaloe permaenken kakoeasahan di kalanagan pamerentahan dan membikin goerem tjahajanja karadjahan, kata poela itoe student lebi djaoe, jang samingkin lama soeranja kadengeran samingkin njaring, tapi djoega tida koerang sengitnja: „Toeankoe jang baroe sadja naek ka atas singgasana, sapantesnja haroes deketi diri pada orang-orang pande dan bidjaksana, dan persetan pada itoe sagala kawanan dorna, jang tjoema pande sadja bermoeka-moeka Boeat bikin keadahan negri djadi baek kombali, haroeslah toeankoe djatoken hoekoeman berat pada itoe semoea mantri-mantri dorna. Kasatoe boeat kabaekannja negri, kadoea melinjapken panasaran rahajat, katiga menggirangken antero barisan poenja tentara. Maka kaloe soeda begitoe, bisa diharep sagala apa jang tadinja tida baek, aken djadi baek kombali sabagimana sadiakala. Negri mendjadi mahmoer, sedeng pasoekan Kim zonder ditempoer nanti moendoer senidirinja“
Banjak orang jang denger bitjaranja ini orang moeda, pada mengalem dalem hati, bahoewa inilah ada saorang djoedjoer dan brani, jang boeat kebeneran tida takoet aken bertentangan pada siapa djoega.
Siapatah orang jang bitjara itoe ?
Ia itoe boekan laen dari Tan Tong, sala satoe sastrawan pande jang berhati keras dan satia. Tan Tong ada mengarti banjak prihal peladjaran Khongtijoe dan Bengtjoe, terlebi poela soemangetnja besar dan moelia. Boeat kabaekannja negri dan rahajat, ia tida takoet bentoer orang-orang tinggi dan besar, jang maski ada mempoenjai pengaroe bagimana djoega.
Itoe hari satelah denger Keizer oeroengken kapindahannja, hatinja djadi amat girang dan sigra ia panggil bebrapa temen-temennja, djoega anak sakolahan, aken mengadep ka hadepannja Keizer boeat membri taoe apa jang dirasa dalem hatinja, sabagimana di sebla atas pembatja telah liat.
Baginda satelah denger perkatahannja Tan Tong, laloe berkata:
"Sasoenggoenja ini perkatahan ada bener sekali, maski kami berada di Tangkiong, toch kami taoe djoega siapa adanja mantri-mantri jang membikin roesak oeroesan negri. Tapi sebab kami baroe naek di atas tachta, maka kami tida boleh terlaloe boeroe-boeroe meroba apa jang Thaysianghong telah adaken, kerna perobahan itoe koeatir membikin loeka hatinja. Apa jang keng oendjoek baroesan, kami perhatiken betoel. Maka biarlah saoendoernja tentara Kim, kami nanti djatoken hoekoeman pada siapa-siapa jang berdosa, menoeroet kadosahannja masing-nasing, sedeng sekarang xawanan dorna itoe kami singkiri doeloe ka tempat djaoe." Sahabisnja kata begitoe Keizer laloe kaloearken firman, prenta pengadilan Kay-hong-hoe-ie oeroes perkaranja itoe kawanan dorna, boeat diboewang ka tempat djaoe.
Tan Tong dengen bebrapa kawannja laloe mengoetjap banjak trima kasi, kamoedian moendoer.
Baginda bersama pengiringnja laloe balik kombali ka astana. Baginda poenja bini-bini moeda, pada balik ka masing-masing poenja astana, sedeng soldadoe mendjaga itoe kota sakeras-kerasnja dengen soenggoe hati.