Tao Teh King/Bab 55

LV.

KATJOTJOKAN JANG MENGHERANKEN.

1. Saorang jang soedah terlipoet oleh Kabedjikan ada seperti anak baji.
2. Kaladjengking tida mengantoep, binatang boeas tida menerkem, boeroeng boeroeng alas tida nanti mematok padanja.
3. Toelangnja jang masih moeda tida keras, oerat-oeratnja lêmês, tapi pegangannja ada tetep dan pasti.
4. Itoe baji poenja tenaga nafsoe ada besar maski djoega ia tida sedar apa dirinja lelaki atawa prampoean.
5. Maski ia menangis antero hari, soearanja tida bisa serak.
6. Inilah menoendjoekken katjotjokannja iapoenja toeboeh dengen sifatnja Natuur.
7. Pengataoean dari ini matjem katjotjokan itoelah ada Tao jang kekel.
8. Pengataoean dari Tao jang kekel adalah penerangan.
9. Kabiasa'an berlakoe meliwatin wates selaloe membesarin dalem diri manoesia, dan itoe ingetan, jang mengikoeti hawa nafsoe, poen satiap hari djadi bertambah.
10. Kapan itoe hawa nafsoe soedah sampe di poentjak, itoe kabiasa'an dan ingetan poen aken gagal djoega.
11. Inilah ada sikep bertentangan dengen sifatnja Tao.
12. Apa jang bertentangan pada Tao nistjaja aken lekas berachir.

⁂

Soeal saorang jang soedah sampoerna kasoetjiannja ada disamain seperti anak baji itoelah soedah perna dibitjaraken dalem fatsal X ajat 2 di moeka ini, berikoet djoega katerangannja. Sifatnja anak baji ada bersih, terbebas dari sega­la kadosa'an, kerna belon mempoenjai hawa nafsoe, kaserakahan, kabangga'an, tida berfihak, berlakoe satoe roepa terhadep baek dan djahat, bagoes dan djelek, dalem segala apa ia berlakoe serba saderhana, tida mengoendjoek tingka atawa soeara jang dibikin-bikin, hanja hidoepnja menoeroet betoel pada Natuur.

Dalem ini kahidoepan poen orang moesti alamken itoe berbagi-bagi ka'ada'an jang berbeda-beda, moelai dari koetika ia masih baji sampe soedah djadi aki-aki jang lingloeng dan tida berdaja, pada waktoe mana terkadang orang balik kombali ka dalem sifat jang seperti baji. Dan da­lem perdjalanan boeat mentjari kasampoerna'an poen, menoeroet Lao Tze, ada begitoe djoega. Dengen lepasken kainginan pada barang doenia, lempar ka samping segala kapinteran otak dan pengataoean, pandang sama rata pada kabaekan dan kadjahatan.kamoelja'an dan kahina'an, ka­pinteran dan kabodoan, dan sabaginja lagi, aken diganti dengen kasaderhana'an dan tjotjokin diri dengen sifatnja natuur, orang poen tambah lama semingkin mendeketin kombali pada itoe sifat dari anak baji, jang lantaran tida berdosa, djadi tida bisa dapet tjilaka dari ganggoean dan penariknja doenia.

Hal satoe baji terbebas dari antoepannja kaladjengking, enz. boleh diartiken itoe binatang binatang djahat seperti penggoda doenia, tapi boleh djoega dipandang sabagi loekisan sabenernja, sebab ada banjak orang-orang soetji jang bertapa dalem oetan rimba jang soenji dan penoeh binatang boeas tida perna diganggoe atawa dibinasaken. Malah dalem Agama Kristen poen ada diloekisken satoe kapertjaja'an, jang di doenia nanti bakal terdapet satoe djeman dari kaselametan jang dinamain millenium, pada waktoe mana manoesia, jang soedah soetji, bisa hidoep bergaoelan dengen segala binatang boeas zonder diganggoe, dan malah singa-singa tida terkem itoe anak-anak domba jang memaen di sampingnja. Maka apa jang Lao Tze loekisken, hal saorang jang soedah terlipoet oleh Tao dan hidoep seperti baji aken terbebas dari ganggoeannja segala matjem binatang djahat jang berbahaja, itoe poen boleh dipandang sabagi hal jang sasoenggoehnja bisa terdjadi, kerna antara orang-orang jang belon soetji batinnja poen ada terdapet djoega jang bisa djinekin oeler berbisa, adjar binatang-binatang boeas aken toeroet segala prentahnja, dan sabaginja lagi. (Ajat 1 dan 2).

Hal anak baji poenja pegangan ada keras, dan bisa menangis antero hari zonder djadi serak, itoe poen ada hal sawadjarnja, kerna dalem toeboehnja anak baji ada tersedia bibit kakoeatan dan djoega nafsoe besar, tapi tida sengadja digoenaken, hanja terkadang dikaloearken zonder merasa, hingga tida bertentangan dengen sifatnya Natuur. Dan saorang jang mendjalanken Tao, jang berlakoe seperti baji, maski sikepnja lemah lemboet, selaloe ada oendjoek katetepan hati aken hidoep menoeroet Tao, dari mana ia tida bisa kena diboedjoek atawa diandjoerin aken menjimpang. Begitoelah di dalem kalemahannja ada terdapet djoega kakoeatan besar jang tida diampoenjai oleh orang-orang biasa. (Ajat 3-7),

Seperti djoega Buddha poenja Dharma jang kapan dijakinken nanti berächir deugen didapetnja Penerangan, begitoe poen itoe Tao dari Lao Tze kapan soedah dikenal betoel memberi achir saroepa, jaitoe Penerangan jang bersifat kekel, Dan itoe Penerangan adalah pengartian atawa pengataoean tertang sifatnja manoesia, kenapa dan apa sebabnja telah alamken segala kasoekeran dan kadoeka'an. Itoe sebab-sebab teroetama dari lantaran manoesia senantiasa bertambah kabiasaannja aken berlakoe liwat wates, dengen ingetannja terdjedjel padet sama pikiran boeat menoeroeti nafsoe jang satiap hari semingkin membesarin, hingga mendjadi seperti bandjir jang bikin ia kalelep. Ini katerangan poen ada tjotjok sama Buddha poenja Ampat Kabeneran Moelia jang petjahken itoe sebab-sebab dari manoesia poenja kasangsara'an, jang pokoknja ada dari kainginan dan kaserakahan, jaitoe lantaran menoeroeti nafsoe. Maka kalimat „Katjotjokan jang mengheranken" jang dipake dalem ini fatsal boekan tjoemah berärti katjotjokan pada sifatnja Natuur, tapi djoega boleh ditambah lagi dengen katjotjokan antara azas-azas Taoisme dengen Buddhisme ! (Ajat 8,9).

Apa jang bertentangan dengen Tao — apa jang tida tjotjok dengen Wet Kabeneran — moesti berachir dengen kagagalan. Manoesia poenja kabiasa'an aken toeroetin nafsoe satjara liwat wates, maski bermoelah kaliatannja berhatsil, kapan soedah sampe di poentjak moesti mendjadi gagal. Inilah bisa diliat dengen kaka'oetan doenia sekarang ini, jang ada djadi boeah dari manoesia poenja temaha atawa kaserakahan Itoe „kamadjoean " menoeroet aliran Barat, jang bersifat materialistisch dan berdasar alas kapinteran dan katjerdikan otak, memang betoel di satoe waktoe kaliatan memberi hatsil gilang-goemilang jang membikin orang djadi mengiler, hingga banjak bangsa-bangsa Timoer lepasken adat kabiasa'an dan peladjaran dari kake-mojangnja boeat mengedjer kasopanan dan pengataoean Barat. Tapi dari sebab tjaranja itoe kapandean dan kapinteran digoenaken ada bertentangan dengen Tao, maka sasoedahnja banoea Barat alamken kamamoeran dan pegang kakoeasa'an doenia kira satengah abad, marika poenja kasopanan dan pendirian lantes moelai ambrek; di sabelahnja obat-obatan mandjoer, orang bikin djoega gas beratjoen; di sabelahnja pekakas jang berfaedah goena kasenangan dan kaselametan manoesia, ada dibikin djoega alat-alat boeat memboenoeh jang tambah hari semingkin heibat dan berbahaja. Doenia sekarang lagi merosot ka toebir kabintjana'an kerna bangsa-bangsa jang termasoek dalem golongan „sopan" telah goenaken kapandean, katjerdikan dan pengataoeannja teroetama boeat poeasken kaserakahan hati sendiri jang bersifat kouwkati dan tambah lama semingkin besar. Pertjoba'an boeat tjiptaken perdamian doenia, koerangin persendjata'an, memadjoeken economie dan sabaginja, tida nanti berhatsil satjara memoeasken sabagitoe lama itoe tabeat kouwkati belon bisa disingkirken, dan segala kasoekeran dan katjilaka'an jang mengantjem dan menimpah doenia tida bisa linjap sabagitoe lama manoesia belon sanggoep kendaliken hawa nafsoenja dan masih lakoeken teroes perboeatan-perboeatan jang sanget bertentangan dengen Tao. (Ajat 10-12).