Tjerita-tjerita dari negeri Atjee/SATOE DJAGA ORANG ATJEE JANG DI SERANG OLEH SOLDADOE BOEGIES.

SATOE DJAGA ORANG ATJEE JANG DI SE-
RANG OLEH SOLDADOE BOEGIES.

Kompenie itoe, tempo habis perang di 22 moekim, malam malamnja tjari tempat berhenti (bipak). Satoe satoe orang tjari tempat boewat tidor, soepaja besoq badan koewat lagi akan djalan sini sana, dan bekelahi lagi dengan orang Atjee.

Koeliling bipak, sepi dan dijam sekali; tempo tempo sadja di dengar soewaranja boeroeng serak atawa senapan Atjee. Tempo tempo djoega kalihatan kembang api di atas pohon kelapa akan mengoendjoek djaga djaga dan patroelie patroelie tempatnja bipak.

Sekilwak sekilwak djoega bediri dijam sekali, lihat betoel sadja, dari apa dija orang tahoe, kaloe ngantoek sedikit sadja, tentoe nanti di boenoh orang Atjee jang selamanja ngintip kita orang poenja pos pos.

Tempo kira-kira djam poekoel sebelas malam kelihatan satoe patroelie soldadoe boegis kaloewar dari satoe bipak. Ini soldadoe soldadoe djalan dijam dijam sekali dengan semboeni betoel badannja, djalannja seperti setan. Lantas tida kalihatan lagi, dari apa dija orang masoeq di alang alang. Di sini dija orang djalan merangkang sampej dapat pinggirnja hoetan. Ini patroelie tadinja dapat perintah akan beradang dan tahan moesoh jang maoe datang ka-bipak.

Kerdja ini soesah sekali dan banjak bahajaja, tetapi orang boegies orang brani sekali dan lagi itoe littenan jang ikoet, djoega pinter dan brani sekali.

Satoe djalan belakang lajin, dan tida kedengeran satoe apa. Melajinkan tempo tempo sadja orang berhenti kaloe kedengeran „St" deri littenan. Toenggoe sebentar, lantas madjoe lagi seperti tadi, dengan hati hati dan dijam dijam sekali. Bagitoe roepa kira kira 50 pas lagi sampej di pinggir hoetan, lantas kedengeran seperti tangkej tangkej jang di pata orang. Tentoe ini patroelie dapat di lihat moesoh, barangkali sebentar lagi di toebroek. Sebentar sadja soldadoe soldadoe itoe kepoengi littenannja; senapan sebentar di sedija akan pasang. Lantas kedengeran lagi seperti tadi. Tetapi sekarang orang dapat tahoe jang tadi itoe kalong jang terbang di pohon pohon akan makan boewah boewah. Sekarang dengan tida takoet lagi orang djalan teroes sampej dapat pinggirnja hoetan. Sampej di hoetan, orang tjari dan dapat satoe djalan ketjil, di sebelah mananja orang beradang. Kaloe orang beradang selamanja tempat di pinggir djalan djalan ketjil jang paling bajik di negeri Atjee, dari apa itoe orang Atjee selamanja pakej djalan djalan ketjil ini boewat bawa di kampongnja bekelan atawa barang barang jang dija soedah tjoeri.

Dalam sedikit tempo itoe littenan soedah taroh orang orangnja; sepoeloe orang di moeka, lima orang di belakang. Perentahnja itoe tida boleh pasang kaloe tida di soeroeh. Perentah ini di kasih dengan bisik bisik satoe pada lajin.

Kaloe orang tida tahoe orang tida kira jang di sitoe ada semboeni orang boegies.

Bagitoe roepa orang soedah toenggoe lebeh dari satoe djam, tetapi tida satoe moesoh jang di lihat. Orang Boegies itoe ampir tida sabar lagi. Sekarang ini ada satoe soldadoe Boegies jang djalan semboeni semboeni ka littenannja dan bagini roepa dija bitjara: Littenan, katanja si Batjo, satoe soldadoe lama dari kompenie Boegies, littenan, lagi doewa tiga djam nanti terang dan kita orang misti poelang pertjoema; orang orang Boegies ini soedah soempah teman temannja nanti dija maoe balas orang Atjee ini malam djoega. Littenan tahoe jang kita orang selamanja bengkelahi betoel boewat kompenie dan banjak orang Boegies soedah mati; tjoba littenan kassih permisie madjoe sedikit, di sana di goenoeng nanti kita ketemoe apa kita tjari, dan soenggoe mati, littenan, nanti orang Atjee boleh lihat jang orang boegies tida takoet sama dija.

Bajik, Batjo, katanja littenan itoe. Akoe tahoe, orang Boegies itoe berani sekali dan dija maloe, kaloe nanti dija poelang di bipak sonder ketemoe orang Atjee; nanti, kaloe belom najik matahari, kita orang tentoe soedah balas itoe orang Atjee. Ajo anak anak, madjoe, toewan Allah nanti toeloeng sama kita...

Satoe per satoe dan rapat ini soldadoe soldadoe djalan madjoe; itoe littenan djalan di moeka sekali, di belakangnja itoe littenan ada djalan si Batjo, boewat toeloeng sama dija kaloe ada apa apa. Lama lama orang datang sampej di goenoeng, sampej di sini tida ketemoe satoe apa, tetapi sekarang djalan djadi soesah sekali. Kiri kanan ada lobang lobang dan batoe batoe besar dan akar poehoen. Lama lama, sampej di satoe tempat di mana boleh berhenti sedikit. Di mana djoega di lihat, koeliling tjoema hoetan sadja, dan gelap sekali. Di dalam hoetan sekali, orang lihat terang-terang sedikit. Dari apa bagitoe djahoe, orang tida boleh lihat terang ini dari api roemah djaga atawa dari lentera. Kaloe dari lentera boleh djadi itoe orang toekang tjari ikan, jang pigi ka pinggir lahoet; ini orang selamanja bijasa bawa lentera kaloe tjari ikan. Tetapi orang tida boleh pertjaja; djadi orang maoe periksa doeloe. Djadi bagitoe orang madjoe lagi pelahan pelahan.

Lama lama, dengan banjak soesah, orang sampej di satoe belahan goenoeng. Doewa orang di soeroh periksa doeloe itoe djalan. Ada sepoeloeh miniet, itoe orang koembali sama kabar jang terang itoe datang dari satoe lobang, di mana ada banjak sekali orang Atjee memakej sendjata. Barangkali itoe orang di soeroeh djaga djalanan ini.

Sekarang orang Boegies itoe misti di tahan dari apa terlaloe braninja, maoe bekelahi sadja.

Perentahnja littenan itoe, tida boleh pasang kaloe tida di soeroeh, dan lagi madjoe dijam dijam sekali. Bajonet itoe di periksa doeloe betoel dan patroonzak di taroh di moeka badan; sekarang semoewa ikoet sama littenan itoe. Pelahan pelahan soldadoe soldadoe itoe datang dekatnja moesoeh. Di moekanja goea itoe ada bediri satoe orang. Tangannja satoe sender di batoe, jang lajin tergantoeng di sebelah badan. Ini orang di ngintip betoel doeloe, tetapi dija tidor; sebentar lagi senapannja dan toembaknja di ambil orang Boegies. Soedah bagitoe ini orang Atjee di boenoh oleh orang Boegies sama badeh-badeh. Satoe kali toesoek sadja dija mati, tida kata satoe apa lagi.

Di dalam goea itoe ada tidor kira kira tiga poeloeh orang Atjee; jang satoe pegang klewang, jang lajin pegang senapan atawa toembak. Di dalam goea itoe tjoema ada pelita sadja.

Soldadoe soldadoe itoe masoek satoe per satoe. Matanja mendelik. Baroe semoewa orang soedah masoek lantas kedengeran tongtong di kampong. Barangkali orang kampong itoe kasih tanda kalihatan patroelie bipaq lajin. Orang Atjee itoe meloempat bangoen. „Vuur" di kommandeer littenan; sebentar goea itoe djadi gelap dari asap.

Bingoeng betoel sekarang itoe orang Atjee. Orang Boegies itoe soedah tjaboet badeh badehnja, tida pedoelie klewang, loempat kiri kanan, tikam sadja. Sebab ketjil goea itoe, klewang klewang sering kena batoe sampej pata. Roepanja itoe orang Boegies, dan itoe orang Atjee dengen ramboet dawoel dawoel, wah, seperti setan alas betoel.

Orang Boegies dan orang Atjee sama braninja, tetapi orang Boegis jang menang. Ada sedikit jang kena loeka, tetapi orang loeka ini dijam sadja, tida rasa sakit.