Boe Beng Hiap Kek/Bab 1

by Kwo Lay Yen

I.

Satoe pergoeroean di kampoengan.

---

Di kampoeng Tjhungtjauw, district Ankhee, afdeeling Tjoantjioe, jang terbawa pada provincie Hokkian, ada satoe roemah sekoia kampoengan, jang meloeloe boeat mengadjar pada anak-anak dari koelawarga Tan, sebab pendoedoek di sitoe poen ampir semoeanja orang siie Tan, malah itoe goeroe sendiri poen memake itoe siie, dan bernama Ko Wie alias Hiong Hoei.

Tan Hiong Hoei atawa Tan Ko Wie menoeroet iapoenja pengakoean berasal dari Tjong-an, dan koetika ia dateng ka Tjhungtjauw oenoernja baroe sadja kira-kira tigapoeloeh taon. Romannja tjakep, potongan badannja langsing, tapi pakeannja sanget saderhana. Itoe waktoe kabetoelan anak toenggalnja Tan Hoe Yoe, salah satoe pendoedoek jang paling hartawan dalem kampoeng terseboet, kena diserang samatjem penjakit aneh, soeda tiga boelan lamanja diobatin oleh berbagibagi thabib dari itoe kampoeng dan djoega dari kota Ankhee, malah ada djoega jang dioendang dari kota Tjoantjioe, tapi semoeanja tida menoeloeng, sabaliknja iapoenja penjakit djadi samingkin keras. Oleh kerna soeda poetoes daja, lantes ditempel bebrapa banjak soerat-soerat plakat di tempat-tempat rameh, dalem mana ada diseboet, barang siapa jang bisa menjemboehken penjakitnja iapoenja poetra, bakal dikasi oepahan doearatoes tail perak.

Sadari itoe soerat-soerat plakat ditempel, boekan sedikit orang-orang jang ingin mendapet keoentoengan terkedjoet maoe mentjoba peroentoengannja, dateng poedjiken diri sabagi orang jang bisa mengobatin penjakitnja itoe anak; tapi Tan Hoe Yoe ada saorang jang mempoenjai banjak pengalaman, maka ia tida maoe gampang-gampang kasiken anaknja diobatin oleh marika itoe, hanja lebih doeloe ia soeroe preksa nadinja iapoenja anak, kamoedian diadjak beroending prihal keadahannja itoe penjakit, ternjata iaorang poenja peroendingan semoeanja mengatjo tida karoean djoentroengannja, taro kata ada bebrapa di antaranja jang mendingan, toch ampir sama sadja dengen peroendingannja thabib-thabib jang doeloean soeda mengobatin. Oleh kerna itoe djoega, tida satoe di antaranja jang ia maoe pake adviesnja.

Tida lama kamoedian dengen satjara kabetoelan Tan Ko Wie dateng ka itoe kampoeng dan dapet denger hal itoe. Lebih doeloe ia pergi mentjari taoe keadahannja Tan Hoe Yoe, jang ternjata tjoema mempoenjai itoe satoe anak lelaki, jang dikasi nama Tan Kie Hou, dan oleh iboe-ajahnja sanget disajang, tida berbeda sabagi djoega satoe moestika. Itoe waktoe Tan Kie Hou djoestroe beroemoer toedjoe taon, dan djoestroe delap dan nakalnja; tapi lantaran iboe-ajahnja tjoema mempoenjai itoe poetra toenggal dalem segala hal terlaloe didjaga hati-hati, tida boleh kena panas atawa dingin sedikit sadja, malah dilarang djoega bertjampoeran memaen sama anak-anak jang laennja. Tan Ko Wie lantes mendoega bebrapa bagian ten­tang penjakitnja itoe anak, dan rasa ia ada itoe kamampoean boeat bikin semboeh penjakitnja anak itoe, laloe ia pergi mengoendjoengin ka roemahnja Tan Hoe Yoe dan menjataken bahoea ia boekannja mengakoe sanggoep mengobatin, tapi ia maoe tjoba-tjoba menoeloeng, brangkali sadja ia bisa; malah ia boekannja mengharep sama itoe oewang oepahan, sebab taro kata ia bisa mengobatin sampe semboeh djoega, ia tida mengharep dapetken oewang oepahan itoe.

Tan Hoe Yoe selamanja belon perna katemoeken saorang jang dateng maoe mengobatin oetjapken omongan seperti Tan Ko Wie, hingga ia merasa sanget heran, dan awasin paras moekanja ia itoe dengen sanget terliti. Ternjata iapoenja roman ada begitoe alim, tingka lakoenja sopan, biar poen pakeannja ada begitoe saderhana. Maka dengen tida bersangsi lagi ia lantes adjak ka kamar anaknja soepaja Tan Ko Wie bisa preksa nadinja Tan Kie Hou.

Tan Ko Wie lantes moelai preksa nadinja itoe anak sembari pandang ia itoe poenja paras moeka, jang ternjata sanget poetjet, bibirnja kering dan matanja tida bertjahja, sedeng iapoenja peroet gendoet dan keras.

Achirnja ia soeda taoe bahoea ini anak penjakitnja lantaran koerang bergerak dan terialoe banjak makan, hingga itoe makanan tida bisa antjoer betoel dalem peroetnja, jang achirnja membikin roesak iapoenja pekakas pentjernahan, boewang aer tida betoel, dan da­lem peroet banjak barang makanan jang mendjadi basi.

„Sedikit banjak akoe soeda taoe djoega poko pe­njakitnja entjek poenja poetra," kata Tan Ko Wie pada sasoedanja abis bikin papreksahan dengen terliti; „tapi boeat membikin akoe poenja pemandangan djadi ter­lebih pasti, akoe rasa lebih baek kita bitjara di loear, soepaja akoe bisa menanjaken lagi bebrapa katerangan jang lebih djelas."

Tan Hoe Yoe manggoetken kapalanja dan oendang Tan Ko Wie berdoedoek dalem satoe kamar boekoe, serta soegoehin tetamoenja satjangkir aer thee panas.

„Pada sabelonnja akoe menanjaken apa-apa,” kata Tan Ko Wie, „akoe maoe menjataken doeloe sedikit pendapetankoe. Entjek poenja poetra, kaloe menoeroet akoe poenja pemandangan , lapoenja poko penjakit lantaran terlaloe disajang, sahingga didjaga terlaloe hati-hati, tapi berbareng dengen itoe ia dikasi makan terlaloe banjak; lantaran did aga terlaloe hati-hati, ia tida bisa bergerak dengen laloewasa, lantaran tida banjak ber­gerak iapoenja pentjernahan tida bisa berdjalan dengen baek, oleh kerna itoe djoega, itoe soedara moeda, tentoelah boewang aernja soesa dan sanget keras . . .”

Baroe sadja Tan Ko Wie bitjara sampe disini, beroelang oelang Tan Hoe Yoe manggoet-manggoetken kapalanja.

„Lohiantit poenja omongan ada bener sekali -— maafken kaloe akoe menjeboet kaoe lohiantit, sebab kita ada satoe she," kata ia : „Prilial terlaloe dikasi banjak makanan, itoe semoea dari sebab iboenja terlaloe sajang padanja; tapi sadari itoe anak djjato sakit sama sekali ia tida bernapsoe makan lagi seperti doeloean, biar poen dengen sengadja ditawarin padanja. Tjoema minoemnja kaloe ditoeroetin boleh dibilang tida ada brentinja, sedeng boewang aernja tetep soesa dan keras sekali, kadang-kadang sampe ampat lima hari baroe boewang kotoran satoe kali. Belon taoe lohiantiti poenja pendapetan moesti diobatin bagimana?”

„Akoe rasa entjek poenja poetra moesti dipasrahken ka dalem akoe poenja rawatan, baroelah bisa mendjadi semboeh,” kata Tan Ko Wie. „Pendek, tida perdoeli makanan, minoeman den pakeannja. semoeannja moesti atas akoe poenja penilikan dan penetepan, djika ini hal entjek bisa pertjajaken padakoe, baroelah akoe sanggoep mengobatin pada ito eade.”

„Tapi apa itoe anak tinggal dirawat dalem ini roemah djoega?”

„Ja; tapi moesti di soeatoe roewangan jang terpisa, dan segala hal moesti menoeroetin akoe potnja atoeran, tida boleh ada satoe orang jang menghalangin atawa toeroet tjan poer taoe. Tjoema dengen ini tjara sadja akoe baroe sanggoep mengobatin, kern dengen begitoe baroelah akoe poenja tjara mengobatin baroe bisa berdjalan dengen baek."

Tan Hoe Yoe berpikir bebrapa sa'at lamanja, tapi roepanja ia tida bisa ambil poetoesan sendiri, sebab ia berkata; „Biarlah ini oeroesan akoe pergi damiken doeloe sama akoe poenja istri."

Lama djoega Tan Hoe Yoe baroe kaloear lagi. „Apa jang lohiantit atoerken kila bisa setoedjoe," kata ia; „tapi apatah akoe dan akoe poenja istri boleh saban-saban dateng menengokin padanja"

„Och, itoelah soeda tentoe sadja tida ada halangan sama sekali, asal sadja sabegitoe djaoeh akoe poenja segala pelatoeran boeat merawat pada itoe ade tida dilanggar. Tjoema haroes diinget betoel-betoel, sabegitoe lekas orang melanggar segala pelatoeran atawa tjara jang akoe tetepken, dengen lantes akoe tinggalken ini roemah — djangan goesar — kerna kaloe akoe poenja atoeran dan tjara tida dipake, pasti sekali itoe ade poenja penjakit akoe tida sanggoep bikin semboeh."

Tan Hoe Yoe lantaran soeda kawalahan boeat bikin semboeh poetranja jang tjoema sabidji mata, maoe tjoba-tjoba djoega pake Tan Ko Wie, sebab ia pikir brangkali sadja bisa mendjadi semboeh. Begitoelah lantes dibresihken satoe roemah samping jang terpisa sama satoe lataran batoe dari Tan Hoe Yoe poenja roemah besar, di sitoe Tan Kie Hou bersama thabibnja dikasi tinggal dengen dilajanin oleh doea boedjang lelaki dan satoe boedak prampoean; tapi itoe boedak prampoean ditoelak oleli Tan Ko wie, dengen msngasi alesan bahoea dilajanin oleh itoe doea boedjang lelaki soeda sampe tjoekoep.

Malem pertama Tan Ko Wie lantes oeroet badannja Tan Kie Hou, jang lantaran kaenakan lantes djadi tidoer poeles sampe pagi baroe mendoesin. Baroe sadjaitoe anak mendoesin, biar poen ia masih lesoe dan teroes mengoelet di atas pembaringan, Tan Ko Wie soeda paksa ia bangoen, tjoetji moeka, kekoemoer, kamoedian memake pakean jang sedikit tebel, dan teroes diadjak djalan-djalan di itoe lataran sampe Sang Batara Soerija oendjoek roepanja di sabelah timoer. Sasoedanja itoe, kombali itoe botja poenja sakoedjoer badan dioeroet oleh Tan Ko Wie, hingga badannja djadi seger dan tida ingin tidoer lagi sebagimana biasanja.

Oleh kerna Tan Ko Wie ada pande sekali mengobrol, ia adjak itoe orang sakit mengobrol ka barat ka timoer, dengan menoeroetin tjaranja anak-anak, hingga si sakit djadi begitoe tertarik dan meloepaken iapoenja penjakit. Sedeng makanan pagi jang dikinmken boeat itoe anak sakit, semoeanja ditoelak oleh Tan Ko Wie, hanja soeroean masakin sadja boeboer bersama kaldoe ajam; tapi di waktoe makan tida boleh lebih dari satoe mangkok-sedeng, biar poen itoe botja menggroetoe maoe makan lebih banjak. Bermoela iboenja Tan Kie Hou maoe tjampoer tangan dalem oeroesan makanan, tapi Tan Ko Wie bilang djika ia poenja pelatoeran dilanggar, dengen lantes ia maoe lepas tangan, hingga itoe iboe jang terlaloe sajang anak djadi mengkeret, kerna baroe satoe maleman dengen lantes sang anak soeda mendjadi seger dan maoe ma­kan, Sedeng tadinja ampir tida maoe makan sama sekali.

Tiga hari teroes meneroes Tan Ko Wie rawat pada itoe anak sakit dengen itoe tjara, sedeng makanannja semoea ditetepken moesti barang barang jang gampang antjoer, tapi tjoekoep kakoeatannja boeat mamiara badan, Tjoema diwatesin dan tida boleh terlaloe banjak.

Tatkala bangoen pagi di hari jang kaampat, itoe anak sakit bilang peroetnja moeles dan pergi boewang aer, dan kotoran jang ia kaloearken ada begitoe banjak, warnanja item dan baoenja sanget boesoek.

Sasoedanja boewang aer kombali Tan Kie Hou disoeroe tidoer dan sakoedjoer badannja dioeroet dan dipidjit, kaloe baroesan sahabisnja boewang kotoran itoe botja rasaken badannja lemas, sekarang lantes djadi berbalik seger dan bersoemanget, malah ia rasaken peroetnja lapar. Tapi iapoenja makanan teroes di watesnja sebagimana jang telah ditentoeken.

Satengah boelan kamoedian itoe botja jang tadinja bermoeka poetjet, bibir kering, peroet gendoet dan tinggal lesoe sadja, sekarang paras moekanja soeda berobah merah, seger, dan peroetnja poen dengen perlahan djadi kempesan. Hal itoe soeda tentoe sadja soeda membikin Tan Hoe Yoe dan istrinja djadi sanget girang, dan boeat membales boedi kabaekannja Tan Ko Wie, toean roemah menjataken jang ia maoe sediaken satoe medja makanan dan minoeman boeat mengoendang pada itoe thabib pinter. Tapi Tan Ko Wie dengen manis menoelak, bahoea sekarang masih belon sampe waktoenja, nanti sadja djika Tan Kie Hou soeda mendjadi semboeh betoel, dengen segala senang hati ia aken trima itoe oendangan. Sateroesnja Tan Ko Wie boekannja adjak itoe anak sakit djalan-djalan di waktoe pagi, hanja adjarin ia gerakin badan dengen menoeroet ilmoe pat-twan-kim, begitoe poen di waktoe sore; sedeng itoe botja poenja badan teroes dioeroet saban maoe tidoer atawa baroe abis bangoen tidoer. Satoe boelan kamoedian Tan Kie Hou soeda djadi bergoembira dan berlompat-lompat lagi sebagimana doeloean, tjoema doeloean itoe kelakoean dilarang oleh iboe dan ajahnja, lantaran dianggep delap dan nakal, tapi sekarang sabaliknja diandjoarin, sebab memang soeda mendjadi kabiasahannja anak-anak jang badannja maoe brangkat besar, selamanja moesti banjak bergerak, dan kaloe dilarang sabaliknja bisa membikin koerang baek bagi toeboenja itoe anak.

Itoe waktoe Tan Hoe Yoe dan istrinja soeda pertjaja betoel bahoea segala pelatoerannja Tan Ko Wie ada betoel dan baek, maka iaorang poen sama sekali tida maoe tjampoer tangan lagi, kerna apatah jang marika inginken, salaennja sang anak lekas mendjadi semboeh dan seger? Sekarang toch soeda berboekti itoe anak samingkin hari djadi samingkin seger dan semboeh dari penjakitnja, malah sadari Tan Kie Hou disoeroe gerakin badan dengen menoeroet ilmoe pat-twan-kim, sabaliknja iapoenja toeboe djadi lebih koeat dan tida takoet hawa dingin atawa poen panas seperti doeloean.

Kira tiga boelan berselang sadari bermoela Tan Kie Hou diobatin dan dirawat oleh Tan Ko Wie, boekan sadja itoe botja djadi semboeh sama sekali dari penjakitnja, malah iapoenja badan djadi lebih sehat dan lebih koeat dari doeloean, sedeng iapoenja ge­rakan ada begitoe sebat dan gesit, soenggoe berbea djaoeh sekali djika maoe dibandingken sama Tan Kie Hou jang doeloean, biar poen pada waktoe ia masih belon sakit.

Pada soeatoe hari Tan Ko Wie dateng minta bitjara sama toean roemah.

„Sekarang itoe ade soeda mendjadi semboeh betoel dari penjakitnja," kata ia, „maka akoe poen maoe ber­pamitan brangkat pergi ka laen tempat. Tjoema sadja biar poen sekarang itoe ade soeda mendjadi semboeh betoel, tapi itoe pelatoeran jang akoe telah tetepken, haroes didjalanken teroes. Pertama makanan tida boleh dikasi terlaloe banjak, tidoer moesti dalem waktoenja jang betoel, kadoea itoe ilmoe gerakin badan pat-twan-kim djoega, moesti dijakinken teroes. Kaloe sadja itoe semoea hal bisa dilakoeken dengen betoel, akoe tanggoeng saoemoer hidoepnja itoe ade tida nanti djato sakit, katjoeali penjakit jang menoelar."

„Oh, djangan begitoe lekas lohiantit berlaloe dari sini, pada sabelonnja akoe bisa membales kaoe poenja boedi," kata Tan Hoe Yoe. „Sekarang biar poen akoe poenja anak penjakitnja soeda semboeh, tapi akoe ma­sih mengharep lohiantit poenja tenaga bantoean. Akoe sekali poen tida bisa taoe lohiantit maoe pergi kamana, tapi djika menoeroet akoe poenja anggepan tida ada halangannja kaloe lohiantit tinggal lebih lama disini. Dari apa jang akoe soeda denger kaoe poenja pembitjarahan, akoe taoe bahoea kaoe ini ada saorang jang terpladjar tinggi dalem ilmoe soerat, dan kabetoelan sekali akoe poenja anak masih belon mempoenjai goeroe boeat beladjar ilmoe soerat maka kaloe sadja lohiantit tida menampik akoe maoe oendang kaoe tinggal teroes disini sabagi goeroenja si Kie Hou, dengen mendapet honorarium saratoes tail perak sa­ban taon; sedeng itoe honararium jang telah didjandjiken pada siapa jang bisa menjemboehken akoe poenja anak, biar poen lohiantit menoelak, akoe paksa maoe kasiken djoega."

Sahabisnja berkala begitoe, ia lantes soeroean satoe boedjangnja pergi ambil doearatoes tail perak pada kassier Tan Ko Wie beroelang-oelang menoelak itoe oepahan, tapi dengen tetep Tan Hoe Yoe minta soepaja ditrima.

Nah, kaloe entjek maoe djoega akoe trima, kata Tan Ko Wie, „baeklah akoe trima djoega; tapi oleh kerna akoe maoe meloeloesken djoega entjek poenja oendangan boeat tinggal mendjadi goeroenja ade disini maka itoe oewang boeat samentara ini akoe masih belon perloe, dan akoe harep sadja soepaja entjek toeloeng simpenin, dan akoe aken ambil djika akoe perloe pake."

Tan Hoe Yoe merasa girang sekali Tan Ko Wie maoe trima iapoenja oendangan boeat mendjadi goeroe, maka ia lantes berkata: „Baeklah, akoe toeloeng simpe­nin itoe oewang, dan kalo lohiantit soeda perloe maoe pake, boleh lantes ambil sadja padakoe. Sedeng itoe tempat pergoeroean boleh tetep sadja di itoe roemah samping jang sekarang."

Di hari jang berikoetnja Tan Hoe Yoe bawa ia­ poenja anak dengen berpakean rapih dateng mengadep pada iapoenja goeroe, dengen bersembahjang pada gambarnja Khongtjoe, Tan Kie Hou membri hormat pada Tan Ko Wie dengen berloetoet dan mendjoera delapan kali. Itoelah tandanja ia mengangkat goeroe pada orang jang dibri hormat.

Tapi itoe kabaran dengen lekas tersiar di Seantero sanak-familienja Tan Hoe Yoe jang besar sekali djoemblanja, maka iaorang rameh-rameh pada dateng ka roemahnja Tan Hoe Yoe minta bertemoe sama itoe goeroe. Sasoedanja iaorang bertemoe pada Tan Ko Wie dan saling menanjaken she, nama dan kampoeng kalahiran, terlebih lagi iaorang merasa soeka pada Tan Ko Wie jang manis boedi dan sopan santoen. Selaennja terpladjar lantaran ia poen she Tan, dan djoega orang kelahiran Hokkian (Tjong-an dalem provincie Hokkian deket tapel wates Kangsay dan (Tjong-an dalem provincie Hokkian deket tapel wates Kangsay dan Tjiatkang), itoelah jang membikin sanak koelawarganja Tan Hoe Yoe merasa soeka, kerna itoe soeda mendjadi kabiasaännja ampir semoea bangsa Tionghoa.

Salah satoe perna soedara misannja Tan Hoe Yoe, jang bernama Tan HoeKoei, madjoeken voorstel soepaja Tan Ko Wie mendjadi goeroe dalem satoe roemah sekola koelawarga Tan, jang itoe waktoe tjoema diwakilin sadja oleh satoe goeroe jang bertitel pwat-kong, bernama Tan Boen Sioe, jang peladjarannja tida terlaloe tinggi. Oleh kerna tida ada lagi laen orang jang dianggep bisa, sedeng Tan Boen Sioe ada mendjadi sanak-familie dari itoe koelawarga Tan, maka ia jang diangkat sebagi wakil-goeroe dalem itoe roemah pergoeroean koelawarga.

Tan Ko Wie beroelang-oelang menoelak dengen alesan bahoea iapoenja ilmoe soerat masih terlaloe ren­dah; tapi sabetoelnja ia tida maoe meroegiken pada Tan Boen Sioe, jang ia taoe memang sanget miskin dan mengandel penghidoepan dari gadji jang ia dapetken dari itoe roemah sekola familie. Blakangan atas voorsteinja Tan Hoe Koei, oleh kerna dalem itoe roemah pergoeroean ada mempoenjai kira-kira ampatpoeloeh moerid lebih, biarlah dibagi mendjadi doea klas, dan klas jang tinggian diadjar oleh Tan Ko Wie, sedeng jang rendahan diadjar oleh Tan Boen Sioe; boeat Tan Ko Wie dikasi salaris doearatoes tail perak dengen mendapet tempat tinggal dan makan vrij; sedeng Tan Boen Sioe tetep mendapet gadji saratoes tail perak sebagimana tadinja.

Oleh kerna perminta'annja Tan Hoei Koei jang begitoe sanget, dan djoega tida mengganggoe pada Tan Boen Sioe sampe kailangan pakerdjaannja, Tan Ko Wie terpaksa trima djoega itoe permintaan; tapi ia minta soepaja Tan Kie Hou moesti teroes mengikoet tinggal sama ianja di itoe roemah pergoeroean, soepaja bisa dikasi peladjaran teroes sebagimana biasa, seka­lian teroesken itoe perjakinan gerakan badan. Hal itoe dengen lantes diloeloesken oleh Tan Hoe Yoe jang soeda pertjaja betoel pada Tan Ko Wie.

Begitoelah moelai dari itoe waktoe. Tan Ko Wie djadi goeroe dalem itoe roemah pergoeroean koelawarga Tan, sedeng Tan Kie Hou tinggal bersama-sama ianja dalem satoe kamar, dan ia tjoema poelang ka roemahnja boeat menengokin iboe dan ajahnja djika itoe roemah sekola kasi vrij di waktoe hari-hari rajah.

Sedeng Tan Boen Sioe jang moelanja merasa me­ngiri, saorang asing bisa mendapet kadoedoekan lebih tinggi dari ianja, tapi blakangan lantaran meliat Tan Ko Wie poenja kalakoean jang manis boedi dan sopansantoen, malah memang djoega ia itoe poenja pela­djaran ada djaoeh lebih tinggi dan loewas dari ianja, maka iapoenja pengrasahan mengiri djadi berbalik taloek dan soeka.

Ampat taon soeda berselang, anak-anak jang menoentoet peladjaran dalem itoe pergoeroean koelawarga Tan soeda banjak jang brangkat besar, sedeng iaorang poenja peladjaran rata-rata banjak bikin kamadjoean, hingga Tan Ko Wie samingkin mendapet orang banjak poenja kapertjajahan. Sedeng Tan Boen Sioe poen telah mendapet banjak pengatahoean dalem iapoenja tjampoer gaoel sama Tan Ko Wie sabegitoe lamanja, hal mana membikin ia itoe djadi merasa beroentoeng sekali atas kadatengannja Tan Ko Wie ka itoe kampoeng. Sedeng Tan Kie Hou poenja badan samingkin lama djadi samingkin sehat, malah keliatannja iapoenja toeboe ada ampir sama dengen anak-anak jang soeda beroemoer ampat atawa limabelas taon, sekali itoe waktoe ia masih belon tjoekoep beroemoer doeabelas taon.

Satoe hal jang paling aneh, kaloe di waktoe itoe anak-anak sekola lagi memaen di antara marika satoeroenja, seperti maen petak, berlompat atawa poen berlomba lari, selamanja Tan Kie Hou sendiri jang paling bagoes dan paling pande. Djika di waktoe maen petak, tida ada satoe anak jang bisa dapet tangkep padanja, tida perdoeli anak-anak jang soeda ber­oemoer lima atawa anembelas taon, sebab kaloe satoe kali ia egosin badannja dengen lantes ia bisa meledjit hingga orang jang maoe menangkep padanja djadi toebroek angin; tapi kaloe ia jang maoe menangkep laen orang, tida perdoeli orang jang bagimana tjepet larinja, dengen bebrapa kali lontjat sadja orang soeda kena terpegang oleh ianja. Oleh kerna itoe djoega, Tan Kie Hou sanget di'indahken oleh iapoenja temen-temen sekola, tida perdoeli besar atawa poen ketjil.

Pada soeatoe hari kabetoelan hari rajah Tjengbeng, roemah pergoeroean ditoetoep satoe hari, Tan Kie Hou poen sadari kemaren sorenja soeda poelang ka roemah orang toewanja, sebab di hari berikoetnja ia maoe toeroet pergi tetjoa ka koeboeran leloehoernja. Di waktoe masih pagi sekali Tan Kie Hou soeda bangoen dan mejakinken iapoenja ilmoe pat-twan-kim dalem iapoenja kamar dengen pentang djendela dan pintoe, soepaja hawa oedara jang bresih bisa masoek.

Kira pada djam delapan Tan Kie Hou lantes mengikoetin iboe dan ajahnja pergi ka koeboerannja iapoenja laloehoer dengen berdoedoek djoli, hal mana sabetoelnja sanget tida disatoedjoei oleh Tan Kie Hou, sebab ia rasaken doedoek di dalem djoli sanget engap dan soeker bergerak. Tapi lantaran kadoea orang toewanja maoe begitoe dengen apa boleh boeat ia menoeroet djoega.

Di waktoe poelangnja ia denger soeara riboet-riboet dibarengin dengen tangisannja orang prampoean. Boeroe-boeroe Tan Kie Hou melongok dari djendela katjanja itoe djoli, ia menampak sakawanan orang le­laki jang romannja seperti boeaja-boeaja darat, djoestroe menjerat pada satoe prampoean moeda jang sakoedjoer badannja memake pakean berkaboeng berat; se­deng satoe prampoean toewa dengen memaki kalangkaboetan dan mendjerit-djerit mengikoetin dari sabelah blakangnja itoe kawanan boeaja. Roepanja salah satoe boeaja lantaran merasa djengkel, lantes poekoel dan tendang pada itoe prampoean toewa jang mengikoetin, hingga roeboe ka moeka boemi.

Tan Kie Hou sekali poen oemoernja masih moeda tapi lantaran soeda ampat taon lebih lamanja ia mendapet didikannja Tan Ko Wie, iapoenja hati djadi sengit dan boeroe-boeroe soeroean toekang djoli toeroenken itoe djoli jang ia doedoekin bersama iboenja; tapi sang iboe lantes menjega dan sabaliknja soeroe toekang djoli berdjalan teroes. Oleh karna takoet pada iboenja, Tan Kie Hou sabisanja menahan ia­ poenja pengrasahan djengkel dengen tida berkata satoe apa.