Boe Beng Hiap Kek/Bab 2
II.
Tjeritanja Tan A Toa.
Sesampenja di roemah, masih sadja Tan Kie Hou merasa sanget mendongkol, hingga ia tida maoe bitjara apa-apa, malah pada waktoe disoeroe makan oleh iboenja, ampir sadja nasi jang ia telen tida bisa toeroen dari tenggorokannja; tapi boeat djangan bikin iboenja tjoeriga, sabisa-bisanja ia paksaken makan djoega. Blakangan, sahabisnja makan, laloe ia pergi ka kebon jang letaknja di sabelah blakang roemahnja, kerna iamaoe hiboerken hatinja jang mendongkol. Kabetoelan sekali ia bertemoe sama satoe boedjang jang bernama Tan A Toa dan terkenal dengen nama djoeloekan si toekang kongkouw sebab ia soeka dan pande sekali mengobrol, hingga kawan-kawannja soeka tanggap padanja, djika kabetoelan lagi senggang tida ada pakerdjahan. Tapi orang banjak anggep ia toekang karang tjerita, maka iapoenja omongan ampir tida ada jang boleh dipertjaja.
Itoe toedoehan boleh dibilang ada sabagian jang betoel, tapi djika maoe dibilang Tan A Toa ada toekang bohong, itoelah tida betoel sama sekali. Ia soeka sekali mengobrol segala apa jang tida-tida, tapi boekannja bersifat djahat, hanja tjoema maoe bikin orang tertawa dan senang hati. Lantaran ia soeka sekali bitjara, biar poen ia taoe orang anggep dirinja sebagi pembohong, toch ia tida perdoeli. Tjoema kaloe ia mendongeng sedikitnja tentoe ia maoe lampiasken iapoenja pengrasahan koerang senang jang penoeh di dadanja, oleh kerna itoe djoega, dengen samar ia soeka sindirken dongenganiija pada salah satoe kedjadian jang ia anggep tida pantes atawa poen djahat. Sebab biar poen ia ada satoe boedjang jang koerang terpladjar, tapi hatinja djoedjoer dan adil, selamanja ia sanget tida soeka sama apa-apa jang melanggar keadilan atawa poen djahat. Salaennja itoe ia bisa djoega membatja sedikit, hingga iapoenja pengatahoean ada djaoeh lebih tinggi dari sasamanja; tapi sabaliknja iapoenja sesama pandang enteng padanja, kerna anggep ia sebagi saorang jang koerang sehat pikirannja soeka tjampoer oeroesan (atawa sedikitnja tjampoer moeloet) jang di loear iapoenja kalangan.
Sadari waktoe masih ketjil, Tan Kie Hou merasa sanget soeka pada itoe boedjang jang pande mengobrol; blakangan sasoedanja mendapet didikannja Tan Ko Wie ia moelai mengarti bahoea Tan A Toa boekannja boedjang sembarangan, hanja ada satoe boedjang jang mempoenjai pikiran sehat dan hati jang adil, sekali poen ampir semoea boedjang roemahnja pandang A Toa sebagi saorang jang sedikit koerang beres otaknja. Oleh kerna itoe djoega, ia djadi samingkin soeka pada boedjang itoe.
„He, A Toa, apa kaoe ada mempoenjai dongengan baroe?" menegor Tan Kie Hou. „Sekarang akoe djoestroe sanget mendongkol dan ingin kaoe tjoba hiboerken akoe poenja hati jang pepat."
„Akoe poenja dongengan tida bisa ada poetoesnja; tapi siaoya mengapa siang-siang soeda djadi mendongkol, dan hal apa jang soeda membikin siaoya djadi mendongkol?" kata Tan A Toa.
„Ach, kaloe maoe bitjaraken akoe poenja kamendongkolan, sasoenggoenja bisa membikin akoe djadi meloewap darah; dalem ini doenia sasoenggoenja tida ada keadilan sama sekali."
Sahabisnja berkata begitoe, Tan Kie Hou lantes toetoerken apa jang ia soeda liat koetika dalem perdialanan poelang dari tempat pekoeboeran, dan achirnja ia menambahkan: „Tjoba kaoe pikir, itoe waktoe disitoe boekannja tida ada barang satoe manoesia, malah sebaliknja ada banjak sekali; tapi tida satoe di antaranja jang maoe belaken itoe orang-orang prampoean dari perboeatannja itoe kawanan boeaja darat, apatah itoe tida katerlaloean sekali?"
Tan A Toa mendenger itoe omongan lantes manggoet-manggoetin kapalanja.
„Siaoya sasoenggoenja ada saorang jang berboedi dan mempoenjai keadilan," kata ia ; „tjoema sajang siaoya masih terlaloe moeda. Djika soeda beroemoer dewasa, akoe taoe betoel jang siaoya tentoe aken membelaken pada itoe doea prampoean jang bernasib tjilaka.
Baroesan siaoya minta akoe mendongeng, biarlah sekarang akoe dongengken sadja hikajatnja itoe doea prampoean jang bernasib tjilaka. Itoe gadis ada anak prampoeannja Lie In, toekang waroeng koeweh di kampoeng Lie-kee-tjhung, sedeng itoe prampoean toewa ada iboenja itoe gadis. Lie In pada tiga taon berselang, kabarnja telah memindjem oewang doeapoeloeh tail perak pada The Tay Hou, satoe pendoedoek kampoeng Thay-swee-tjhung, jang terkenal kedjem dan soeka lepas oewang panas. Tay Hou lantaran ada mempoenjai gelaran boekhidjin, dan bikin perhoeboengan sama pembesar negri djadi sanget berpengaroeh dan sanget ditakoetin oleh pendoedoek di dalem bilangan ini district Ankhee. Sabab salaennja ia berpengaroeh di kalangan pembesar, la ada mempoenjai ilmoe kapandean silat, dan bebrapa banjak moerid-moerid, jang sabagian besar terdiri dari bangsa boeaja darat.
Sedeng itoe oetang doeapoeloeh tail perak, jang Lie In pindjem dari The Tay Hou, saban boelan moesti membajar doea tail berikoet penjitjilan poko doea tail, djadi sama sekali ampat tail perak; tapi kaloe satoe boeian sadja tida membajar poko atawa renten, itoe poko dan renten jang tida dibajar, kombali diitoeng renten sapoeloeh procent satoe boelannja. Oleh kerna itoe waktoe Lie In poenja istri djoestroe sakit, dan ia perloe sekali memake oewang boeat membajar thabib dan oewang obat, maka dengen terpaksa ia pindjem itoe oewang jang memake perdjandjian berat. Tiga boelan pertama Lie in bisa membajar poko dan renten dengen betoel, tapi blakangan lantaran iapoenja peroesahan djoeal koeweh-koeweh tida sebrapa kaoentoengannja, ia tjoema bisa membajar rentennja sadja sampe bebrapa boelan lamanja; sateroesnja ia tida bisa membajar sama sekali.
„Oleh kerna soeda doeapoeloeh toedjoe boelan Lie In tida membajar satoe apa kabarnja itoe oetang jang sabetoelnja tjoema tinggal ampatbelas tail perak sadja, sekarang lantaran renten berenten, itoe oetang soeda mendjadi tigaratoes toedjoepoeloeh delapan tail perak. Pada waktoe bermoela, Lie In merasa tida enak, beroelang-oelang ia dateng minta kasiannja The Tay Hou jang roepanja socda mengandoeng niatan djahat, dengen sengadja bilang tida mendjadi apa, kaloe soeda mempoenjai oewang boleh membajar lagi seperti doeloean, hingga Lie in djadi tida terlaloe berkoeatir.
„Tida njana pada saboelan berselang, The Tay Hou poenja satoe orang kapertijajahan, The Hoay Tjiong, dateng ka roemahnja Lie In, menagih itoe toekang waroeng koeweh poenja oetang, jang katanja soeda berdjoemblah tigaratoes ampatpoeloeh doea tail perak lebih, katanja lantaran soeda doeapoeloeh anem boelan tida membajar apa-apa, maka itoe oetang soeda mendjadi sabegitoe banjaknja lantaran renten berenten. Hal itoe soeda membikin Lie In djadi sanget terkedjoet dan ampir sadja djato pangsan. Tapi blakangan The Hoay Tjiong kasi advies pada Lie In boeat kasiken sadja iapoenja gadis pada iapoenja madjikan boeat goendik jang kaampat, boekan sadja itoe oetang aken dibikin loenas sama sekali, hanja bakal dikasiken lagi saratoes tail perak boeat Lie In poenja onkost hari toewa sama istrinja.
,,Lie In minta tempo satoe boelan boeat berpikir. Tiga hari berselang itoe tempo soeda sampe, tapi Lie In dengen tetep menolak kainginannja. The Tay Hou, dengen membilang bahoea lebih soeka ia mati dari pada kasiken iapoenja anak prampoean mendjadi itoe ljnta darat poenja goendik. The Hoay Tjiong berlaloe dari waroengnja Lie In dengen mengantjem. Tida lama kamoedian lantes dateng bebrapa belas moerid-moeridnja The Tay Hou, dengen satjara paksa ia menagih itoe oetang, jang katanja sekarang soeda berdjoemblah tigaratoes toedjoepoeloeh delapan tail, sebab ditambah lagi sapoeloeh procents renten, dalem itoe satoe boelan. Blakangan lantaran Lie In tida bisa membajar, dengen satjara koerangadjar sekali itoe kawanan pendjahat masoek ka dalem roemah, maoe merampas pada Lie Kiauw Tjia, anak prampoeannja Lie In.
„Roepanja itoe perboeatan koerangadjar soeda membikin Lie In djadi sengit sekali, hingga ia meloepaken badannja jang lemah dan oemoernja jang soeda toewa, bikin perlawanan pada itoe kawanan boeaja darat, soeroeannja The Tay Hou, jang soeda tentoe sadja lantes dilabrak kalang-kaboet hingga Lie In mendapet loeka-loeka berat dan djato pangsan. Meliat itoe keadahan, itoe kawanan boeaja darat boeroe-boeroe menjingkir dari waroeng koewehnja Lie In. Apa tjilaka Lie In jang soeda beroesia toewa dan badannja memang tida koeat, sasoedanja menanggoeng sengsara satoe hari satoe malem lamanja, kemaren siang lantes menarik napas jang pengabisan lantaran loeka-loekanja di dalem badan.
„Kemaren djoega istrinja Lie in pergi madjoeken dakwahan pada tikoan dari Ankhee, tapi lantaran jang didakwa ada The Tay Hou, itoe dakwahan lantes ditoelak, malah istrinja Lie In diantjem keras kaloe ia brani bikin pengadoean lebih djaoeh. Roepanja The Tay Hou masih maoein djoega Lie Kiauw Tjia, begitoelah soeda terdjadi perampasan atas dirinja itoe gadis, pada waktoe maitnja Lie In baroe sadja abis dikoeboer, sebab itoe kawanan boeaja jang lakoeken itoe perampasan dan memoekoel pada istrinja Lie In boekan laen dari orang-orangnja The Tay Hou. Oh, siaoya, koetika akoe mendenger, ini oeroesan akoe poenja darah mendidi; tjoema sajang akoe tida mempoenjai ilmoe kapandean silat, dan djoega akoe tjoema ada satoe boedjang jang tida mempoenjai pengaroeh satoe apa, tjoba kaloe akoe mempoenjai pengaroeh atawa poen mempoenjai ilmoe kapandean silat, nistjaja akoe berboeat sabisanja boeat menceloengin pada itoe gadis jang dirampas."
Tan Kie Hou satelah mendenger itoe katerangan, dengen lantes berseroeh keras sembari mengepel-ngepel iapoenja kadoea tangan.
„Oh, apatah dalem ini doenia dengen sasoenggoenja tida ada keadilan!" kata ia. „Apatah di dalem ini district Ankhee tida ada satoe orang jang mempoenjai pengrasahan keadilan, tida ada satoe orang jang mempoenjai kabranian dan kagagahan boeat membela pada itoe orang-orang jang diperlakoeken begitoe sawenang-wenang? Ach, sajang, sajang sekali akoe masih anak-anak, kaloe tida, hm! itoe bangsat The Tay Heu nanti taoe rasa."
„Ja, memang begitoe oemoemnja keadahan di dalem doenia, siaoya," kata Tan A Toa, „orang jang mempoenjai hati, tida mempoenjai itoe tenaga, sabaliknja jang mempoenjai itoe tenaga, tapi hatinja soeda poentoel pengrasahannja ! Kita tjoema bisa meliatin sadja kadjahatan oendjoek pergaroehnja, dan keadilan terpendem di dalem neraka."
„Tapi, apatah istrinja Lie In tida bisa bikin pengadoean pada pembesar jang lebih atas, seperti pada tihoe di Tjoantjice, atawa kaloe di sana masih djoega belon mendapet keadilan, toch masih bisa bikin pengadoean pada soenboe dan tjongtok di Hoktjioe?"
„Ja, itoe memang boleh," saoet Tan A Toa; „tapi segala apa moesti dengen oewang, kaloe tida ada oewang segala apa tida aken bisa berdjalan; sedeng Lie In koetika mati boleh dibilang soeda tida mempoenjai satoe apa, malah onkost boeat merawatin iapoenja mait djoega, kabarnja didapetken dari iapoenja tetangga-tetangga jang berhati dermawan. Dengen begitoe tjara bagimana ia bisa mempoenjai oewang boeat bekal pergi ka kota Tjoantjioe atawa ka iboekota provincie? Akoe rasa boeat iaorang poenja onkost penghidoepan sadja, soeda sanget soeker, djangan kata boeat onkost perkara."
„Oh, kaloe begitoe, dengen sasoenggoenja dalem ini doenia tida ada keadilan," berkata Tan Kie Hou dengen djengkel; „sedeng itoe hiapkek jang tertoelis dalem boekoe-boekoe, semoeanja isepan djempol belaka!"
Tan A Toa tida bisa berkata satoe apa, salaennja mengelah napas pandjang. Sebab ia poen pikir boleh djadi prihal itoe hiapkek jang banjak ditjeritaken dalem boekoe-boekoe, memang djoega tida lebih dari karangannja orang-orang jang pande menoelis, tjiptahannja achli-achli pengarang tjerita sadja!
Itoe sore Tan Kie Hou balik kombali ka iapoenja pergoeroean dengen pengrasahan jang teroes medongkol, hingga ia tida begitoe soeka banjak bitjara, malah di waktoe makan malem, djoega ia makan begitoe sedikit sekali. Itoe semoea keadaän tida terlepas dari perhatiannja iapoenja goeroe, jang bermata tadjem; tapi sabegitoe djaoeh ia tida menanjaken katerangan satoe apa.
Di Waktoe malem, sebagimana biasa ia mejakinken ilmoe pat-twan-kim dengen disaksiken oleh goeroenja, kamoedian ia mejakinken djoega ilmoe ie-kin keng jang baroe sadja bebrapa hari moelai diadjarin oleh goeroenja. Bagi orang-orang jang mengarti ilmoe silat, lantes sadja mengarti bahoea pat-twan-kim dan ie-kin keng semoeanja ada pokonja ilmoe silat; tapi pada iapoenja moerid, Tan Ko Wie selamanja tida mengasi taoe bahoea itoe gerakan badan boeat pokonja ilmoe kapandean silat, hanja bilang sadja boeat kasehatan badan. Oleh kerna itoe djoega, Tan Kie Hou jang belon taoe satoe apa prihal ilmoe silat, tida mengatahoei bahoea goeroenja telah mengadjarin ia poko-pokonja ilmoe kapandean silat. Sasoedanja mejakinken bebrapa gerakan ilmoe ie-kin-keng jang doeloean telah diadjarin, dan ternjata semoeanja soeda sampe baek dan tida ada kasalahannja, Tan Ko Wie tida mengadjarin lagi gerakan jang baroe sebagimana biasanja, hingga membikin sang moerid mendjadi heran. Tapi ia menoenggoe dengen tida berkata satoe apa. Tan Ko Wie mengawasin pada moeridnja sampe bebrapa sa'at lamanja dengen tida berkata satoe apa.
„Moeridkoe," kata ia achir-achir dengen mendadak, ,,sadari kaoe balik poelang ka sini, akoe soeda perhatiken kaoe poenja sikep dan gerakan sabagi djoega saorang jang djoestroe mendongkol; bermoela akoe kiraken kaoe kena digegerin oleh kaoe poenja orang toewa, atawa poen lantaran soeatoe oeroesan jang berhoeboeng dengen roemah tangga; tapi blakangan akoe mendapet kanjatahan bahoea doegahankoe itoe kliroe. Kaoe boekannja merasa mendongkol boeat oeroesan jang berhoeboeng dengen kaoe poenja diri sendiri, hanja mendongkol dalem soeatoe hal jang berhoeboeng dengen laen orang poenja oeroesan. Apatah sekarang kaoe soeka tjtritaken itoe oeroesan padakoe?
Tan Kie Hou dengen tida oesa dioelangken boeat kadoea kali, lantes sadja moelai toetoerken apa jang ia soeda saksiken dengen kadoea mata sendiri, dan djoega penoetoerannja iapoenja boedjang Tan A Toa.
Sapandjang waktoe ia bitjara, kadoea tangannja dikepel dengen keras, sedeng iapoenja soeara dengen perlahan djadi bertamba sengit. Achir-achir saking terlaloe djengkel ia djadi mengoetjoerken aer mata, dan bitjara dengen sasenggoekan. Tan Ko Wie oesap-oesap poendaknja itoe botja sembari menghiboer.
„Kaoe ini sasoenggoenja ada satoe anak jang berhati baek dan soeka sama keadilan," kata ia; „tjoema sajang kaoe poenja oemoer masih terlaloe moeda dan belon mempoenjai kapandean tjoekoep boeat melakoekan pakerdjahannja hiapkek; tapi kaoe djangan djadi djengkel begitoe roepa, jang tjoema aken membikin soesa kaoe poenja badan sendiri sadja. Kaoe haroes tida loepa bahoea Thian selamanja ada sanget adil, kaloe sabegitoe djaoeh iapoenja keadilan masih belon didjalanken, itoelah tentoe lantaran itoe orang-orang jang melakoeken kadjahatan masih belon sampe tempoenja boeat mendjalanken iapoenja hoekoeman. Maka sabar, anak, djangan poetoes harepan, Thian ada sampe adil dati bersifat moerah, kaloe sadja satoe kali Thian djalanken iapoenja keadilan, tida nanti ada satoe manoesia jang mampoe membantah. Sabarlah, anak!"
Tan Kie Hou merasa heran sekali mendenger goeroenja bilang ia „belon mempoenjai kapandean tjoekoep," kapandean apatah jang dimaksoedken? Ilmoe soerat memang tida bisa disangkal masih djaoeh dari tjoekoep, tapi apatah ilmoe soerat bisa menoeloeng ini oeroesan, dimana ada teroendjoek pengaroehnja kaboewasan dan sawenang-wenang? Pasti sekali tida! Abis kapandean apatah jang goeroenja maksoedken? Prihal keadilannja Thian, ia maoe pertjaja memang ada; tapi toch itoe keadilan tjoema baroe bisa didjalanken djika memindjem tangannja manoesia, sebab kaloe maoe dibilang Thian bisa djalanken iapoenja keadilan dengen langsoeng, mengapa ada begitoe banjak kadjahatan jang tida terhoekoem, dan mengapa orang-orang djahat tida semoeanja disamber gledek? Oleh kerna berpikir begitoe, ia anggep sadja bahoea goeroenja tida lebih tjoema menghiboerin sadja iapoenja hati jang djoestroe sanget mendongkol, dan berbareng dengen itoe, maoe kasi mengarti bahoea soeatoe hal jang kita tida ada tjoekoep tenaga boeat melakoeken, biar bagimana djoega tida bisa dipaksa.
Tatkala Tan Kie Hou maoe masoek tidoer, kombali goeroenja berkata: „Maeridkoe, satoe kali lagi akoe oelangken bahoea Thian selamanja adil dan bersifat moerah, dan itoe orang-orang djahat, satoe kali sampe temponja boeat menerima hoekoeman, tida salah lagi Thian aken oendjoek iapoenja keadilan. Oleh kerna sekarang kaoe poenja hati djoestroe sanget mendongkol, biarlah akoe oeroet dan pidjitin kaoe poenja badan, soepaja kaoe poenja pengrasahan mendongkol djadi linjap dan bisa tidoer dengen poeles."
Tan Kie Hou sadari lama tida taoe dioeroetin dan dipidjitin lagi oleh iapoenja goeroe, maka ia merasa sanget heran mengapa goeroenja maoe berboeat begitoe lagi padanja; tapi lantaran selamanja ia tida brani membantah goeroenja poenja prentah, maka ia lantes menoeroet dan kasiken dirinja dioeroet dan dipidjit, hingga dengen tida merasa lagi ia lantas mendjadi poeles dengen njenjak sekali.
Di hari jang berikoetnja, baroe ia bisa djadi mendoesin koetika matahari soeda moelai oendjoek ia poenja sinar di sabelah timoer. Itoelah boleh dibilang ada soeatoe hal jang bertentangan sama iapoenja kabiasahan, jang biasa soeda bangoen sadari djam lima, di waktoe mana ia moelai mejakinken iapoenja gerakan badan dengen ilmoe pat-twan-kim atawa poen ie-kin-keng, hingga ia lantes berlompat bangoen sembari berpaling ka djoeroesan pembaringannja iapoenja goeroe, dan ternjata sang goeroe soeda tida ada di atasnja, malah selimoet dan laen-laennja soeda diberesin lagi sebagimana biasanja djika sang goeroe bangoen dari tidoernja.
Tan Kie Hou boeroe-boeroe kaloear dari kamar boeat menjoetji moeka dan gosok gigi, kamoedian ia balik kombali ka kamarnja beresin iapoenja tempat tidoer. Sasoedanja itoe ia kaloear lagi dari itoe kamar dan pergi ka lapangan roempoet di sabelah blakang, dimana ia menampak goeroenja djoestroe lagi adjak memaen bebrapa temen sekola dengen roepa-roepa pergerakan badan. Tatkala Tan Ko Wie meliat Tan Kie Hou mendatengin, lantes sadja ia berpaling padanja sembari bersenjoem. „Roepanja samalem kaoe tida bisa tidoer dengen senang," kata ia, „makanja begini waktoe baroe bangoen. Baroesan di waktoe bangoen akoe liat kaoe tidoer begitoe poenja njenjak, maka akoe tida tega kasi bangoen pada kaoe, kerna sebagimana baroesan akoe bilang, tentoelah samalem kaoe tida bisa tidoer dengen senang."
Itoe omongan sebaliknja soeda membikin paras moekanja Tan Kie Hou djadi berobah merah seperti kapiting reboes; sebab ia rasaken ia tida lama kamoedian dioeroet dan dipidjit oleh goeroenja, dengen iantes ia djadi tida inget satoe apa lagi, dan ia baroe djadi mendoesin koetika meliat sorotnja matahari jang menemboes masoek ka dalem djendela. la poen merasa heran sekali, tjara bagimana samalem ia soeda tidoer begitoe njenjak sahingga tida inget daratan lagi kerna hal begitoe sesoenggoenja ada sanget loear biasa bagi ianja. Tapi sekarang iapoenja goeroe sebaliknja bilang ia tida bisa tidoer poeles, maka ia merasa dirinja disindir.
„Soenggoe, sinshe, moerid merasa maloe sekali mengapa samalem akoe soeda tidoer seperti satoe bangke," kata ia dengen teroes-terang, „akoe tjoema baroe bisa mendoesin koetika baroesan meliat sorotnja matahari jang menemboes masoek ka dalem djendela."
„Itoelah tida heran," kata Tan Ko Wie „sebab samakin kaoe poenja hati djoestroe sanget mendongkol, maka akoe lantes oeroet dan pidjitin soepaja kaoe poenja sakoedjoer badan mendjadi enak dan seger, kamoedian lantes bisa tidoer dengen poeles. Maka kaloe anak moeda djangan sekali soeka toeroetin napsoe amarah jang sengit, sebab itoe bisa mengganggoe kawarasan badan. Akoe harep sadja kamoedian kaoe bisa merobah kaoe poenja tabeat itoe." Itoe hari, sebagimana biasa, semoea moerid masoek sekola, dan kadoea goeroenja poen mengadjar seperti sari-sari. Baroe sadja lepas sekola tengahari boeat kasi koetika anak-anak jang tida menginap di sitoe poelang makan ka masing-masing poenja roemah, koetika Tan Kie Hou djoestroe memaen di itoe lapangan roempoet, di sabelah blakangnja itoe roemah sekoa, bersama iapoenja beprapa temen jang bajar makan pada sekolahan, mendadak satoe boedjang masoek mengasi taoe bahoea di loear ada saorang jang mengakoe bernama Tan A Toa minta bertemoe sama Tan Kie Hou siaoya boeat satoe oeroesan penting.
Tan Kie Hou djadi sanget terkedjoet koetika mendenger Tan A Toa dateng mentjari padanja, boeroe-boeroe ia berlari-lari kaloear boeat katemoeken boedjang itoe, kerna ia kiraken boleh djadi ajah atawa iboenja mendapet sakit atawa poen maoe memesen ini dan itoe. Tatkala ia bertemoe moeka pada itoe boedjang, dengen lantes Tan Kie Hou mendapet kanjatahan bahoea iapoenja doegahan meleset djaoeh sekali, kerna itoe boedjang oendjoek paras moeka jang berseri-seri dan bersoemanget.
„He, kaoe bikin akoe djadi kaget, A Toa," kata Tan Kie Hou, „sebab tida sari-sarinja kaoe dateng mentjari akoe disini. Ada oeroesan apa sih makanja kaoe djadi begitoe senang dan bergoembira?"
„Oh, kabar senang, kabar girang, siaoya," kata Tan A Toa sembari bersenjoem-senjoem; „tapi disini akoe tida bisa bitjara dengen laloewasa, akoe ingin bitjara di soeatoe tempat jang terpisa sama orang banjak."
„Oh, kaoe ini hari sasoenggoenja aneh sekali," kata Tan Kie Hou; „tapi tida apa, mari ikoet akoe masoek ka dalem, dan kita aken bitjara dalem akoe poenja kamar tidoer. Sebab akoe tidoer bersama akoe poenja goeroe, moerid-moerid dari ini sekola, djika tida ada oeroesan penting iaorang tida ada jang brani dateng ka sana. Tapi moesti lekas, satengah djam kamoedian kitaorang aken doedoek makan di kamar-makan bersama semoea moerid jang bajar makan disini."
„Itoelah sajang, kerna tadinja akoe ingin bitjara banjak sekali", kata Tan A Toa, „tapi tida apa, akoe bisa menoetoer dengen lebih ringkes".
Tan Kie Hou lantes adjak boedjangnja masoek ka dalem dan teroes ka iapoenja kamar tidoer.