Boe Beng Hiap Kek/Bab 5
V.
Boe Beng Mian Kek moentjoel boeat kadoea kalinja.
Tjeng Sian Hweeshio kasi segala instructie jang perloe pada oppas-oppas dari itoe kantoor tikoan, jang oleh marika poenja chef telah dipesen boeat menoeroet segala prentahken itoe kapala goendoel.
Baroe sadja djam delapan malem, segala lampoe-lampoe di itoe kantoor soeda dipademken, malah di bagian itoe roemah jang ditinggalin oleh itoe tikoan bersama familienja, ampir tida keliatan sinarnja api, katjogeali di dalem kamar tidoer : tapi pada sabelonnja djam sapoeloeh, itoe semoea soeda dipademken djoega, hingga keadahannja itoe kantoor tikoan, tida berbeda sebagi satoe roemah kosong jang tida ada pendoedoeknja. Tapi lebih doeloe dari itoe, atas adjarannja Tjeng Sian Hweeshio, telah disediaken lantera-lantera maling jang dikasi tinggal menjala tapi ditoetoep rapet dan ditaro di tempat jang berdeketan, soepaja bisa lantes digoenaken bila perloe.
Itoe lantera-lantera maling ada disediaken di dalem kamar tidoernja itoe tikoan, di kamar djaganja oppas-oppas, dan laen-laen penggawe jang perloe moesti membantoein djika ada terdjadi bahaja apa-apa. Sedeng Tjeng Sian Hweeshio, Hee Pat dan Tjhio Goan Beng, semoeanja pada makan minoem dengen senang sadari djam anem, dan itoe makanan dan minoeman, sebagimana soeda didjandjiken, telah disediaken oleh tikoan. Orang tentoe merasa heran, mengapa saorang pertapahan jang seperti Tjeng Sian, makan-minoem seperti orang biasa. Tapi kaloe orang menginget bahoea ia ada satoe perampok jang tida segan menoempahken darah manoesia, lantes orang tida aken merasa heran lagi sama hal itoe.
Baroe sadja tongtong mengasi tanda djam sapoeloeh, Tjeng Sian Hweeshio bersama doea sadereknja lantes moelai berdjalan meronda di sapoeternja itoe kantoor tikoan dengen berpisahan dan masing-masing mendjaga di soeatoe wates jang telah ditetepken, dan kasi denger pertandahan, djika salah satoe fihak mendapet liat bahaja apa-apa tapi ternjata pada malem pertama, teroes sampe pagi tida ada terdjadi apa-apa.
Di pagi jang berikoetnja Tjeng Sian minta bitjara pada tikoan, dan ia kasi voorstel bahoea itoe soerat salebaran boeat mengoendang orang-orang terpladjar pada harian Toanyang, lebih baek dilakoeken pada doea hari kamoedian, djika doea malem lagi, tida ada terdjadi apa-apa, baroelah itoe soerat disalebarken, dan mengirim djoega soerat-soerat oendangan speciaal pada orang-orang terpladjar dalem ini district, teroetama marika jang ditjoerigaken. Salaennja itoe, Tjeng Sian berdjandji boeat menjelidikin nama-namanja itoe orang-orang jang menjoerigaken, dan kamoedian ia aken kasi taoe pada tikoan. Itoe tikoan bangpak menoeroetin sadja segala voorstelnja Tjeng Sian.
Di maleman jang kadoea, sebagimana biasa, di kantoornja tikoan dibikin pendjagahanj tapi ternjata sampe pagi tida ada terdjadi hal apa-apa jang loear biasa. Tjeng Sian dan doea sadereknja moelai mendapet anggepan bahoea itoe tetamoe malem ada orang dari laen tempat, jang kabetoelan djalan meliwat ka sini, dan mendapet taoe itoe oeroesan, lantes toeroen tangan tapi sekarang itoe hiapkek soeda berlaloe ka laen tempat, lantaran meliat tikoan soeda melepasken Lie Kiauw Tjia dari tangannja koelawarga Thee. Kaloe sadja itoe doegahan ada bener, sasoenggoenja ini oeroesan ada banjak lebih soeker dari apa jang lebih doeloe didoega.
Tida njana pada malem katiga, tatkala Hee Pat djoestroe bikin pendjagahan di bagian blakangnja itoe kantoor tikoan, jaitoe bagian jang ditinggalin oleh itoe ambtenaar bersama familienja, mendadak ia dapet liat satoe bajangan item berklebat di atas genteng, tapi lantaran gerakannja itoe bajanwan ada begitoe tjepet, tambahan itoe malem ada begitoe gelap kerna soeda boentoet boelan Siegwee, hingga Hee Pat tida bisa liat terang apa itoe manoesia atawa tjoema satoe koetjing sadja. Ia tida maoe mengasi tanda bahaja pada sabelonnja meliat terang keadahannja perkara. Maka ia tjoema menjoesoel ka atas itoe genteng dengen berlompat naek : tapi sesampenja di atas, ia tida dapet liat satoe apa, katjoeali genteng-genteng jang berbaris dan woewoengan roemah.
,,He, bajangan apa jang akoe liat?“ menggrendeng ia sendirinja. ,.Biar poen betoel ada satoe koetjing, toch tida bisa djadi gerakannja ada begitoe gesit dan dalem sakedjepan mata sadja soeda linjap dari pemandangan. Kaloe kaoe dibilang tida keliatan lantaran gelap tida bisa djadi, kerna akoe poenja mata bisa meliat di tempat gelap, kerna akoe poen terkenal dengen nama djoeloekan si kokokbeloek.”
,,Hahaha! kokokbeloek jang bermata lamoer!" kadengeran satoe orang berkata sembari tertawa di Sabelah blakang.
Hee Pat djadi sanget terkedjoet, dan baroe sadja ia maoe balikin badannja boeat meliat siapa, mendadak ia rasaken bawah kateknja kena ditiam, dan sasa'at itoe djoega ia rasaken sakoedjoer badannja djadi kasemoetan, boekan sadja ia tida bisa balikin badannja malah tangannja jang ia maoe goenaken boeat mengambil sendjata resia, poen tida bisa. la tinggal berdiri seperti satoe patoeng derigen tida bisa berkoetik. Dalem hatinja djadi begitoe kaget dan takoet, kerna ia taoe bahoea itoe orang jang tiam padanja, tentoeiah ada saorang jang ilmoe kapandean silatnja sanget tinggi, sebab boekan sadja gerakannja ada begitoe sebat seperti angin, malah sama sekali tida kadengeran soeara tindakan kakinja. Apa brangkali ini orang ada Boe Beng Hiap Kek jang lagi ditjari?
Berpikir sampe disini, ia lantes mendapet ingetan boeat bertreak sakeras-kerasnja, kerna ia taoe itoe waktoe ia berada di bagian atasnja roemah jang ditinggalin oleh tikoan dan familienja; tapi pada sabelonnja ia bisa berboeat begitoe, roepanja itoe tetamoe malem lebih siang soeda mendoega, sebab Hee Pat rasaken iapoenja oerat leher kombali kena ditiam, hingga iapoehja oerat-oerat lida djadi loempoe dan tida bisa digoenaken, malah iapoenja moeloet poen djadi tinggal menganga teroes dan kapalanja teklok.
„Wah tjilaka betoel !" kata Hee Pat di dalem hati, „ini satoe kali nistjaja akoe binasa di tangannja ini tetamoe malem; tapi biar poen akoe mati djoega, kaloe sadja akoe lebih doeloe soeda bisa meliat iapoenja roman, akoe poenja hati tida djadi penasaran." Tapi ternjata itoe hal jang diinginken oleh itoe pendjahat, dengen lantes bisa kesampean, sebab itoe tetamoe malem dateng ka sabelah depannja, hingga ia bisa menampak saorang jang toeboenja sedikit tinggi, langsing dan kapala brikoet moekanja katoetoepaa sama satoe kekoedoeng soetra item, hingga tjoema tertampak sadja iapoenja kadoea mata jang mentjorot seperti api.
„Orang-orang jang samatjem kaoe orang maoe menangkep padakoe, itoelah tida berbeda sabagi djoega teror maoe melawan tandoek," kadengeran itoe tetamoe maiem berkata. „Sadari kaoe orang bikin pendjagalian di maiem pertama akoe soeda liat pada kaoe orang, tapi sabaiiknja kaoe orang tida bisa liat pada koe! Tapi lantaran akoe tida taoe apa jang mendjadi kaoe orang poenja maksoed, maka akoe tida maoe biKin pergerakan apa-apa. Baroe kemaren malem sadja akoe bisa taoe kaoe orang poenja maksoed, koetika akoe mengintip dan denger kaoe orang bitjara dengen bisik-bisik.
„Hahaha I akoe inilahi itoe Boe Beng Hiap Kek jang kaoe orang lagi selidikin," kata lagi itoe tetamoe malem sambil tertawa enteng, sasoedanja ia merandek sakoetika lamanja. „Baeklah, moelai dari sekarang akoe menjataken perang pada kaoe orang bertiga, sebab akoe tida maoe berlakoe membokong seperti satoe pengetjoet ; sedeng sekarang makanja akoe tiam pada kaoe sampe tida bisa berkoetik dan bitjara, perloenja akoe maoe bitjara sama kaoe dengen laloeasa, soepaja kamoedian kaoe bisa kasi taoe pada kaoe poenja doea kontjo, sebab kaloe boekannja begitoe, nistjaja lebih siang kaoe soeda bikin riboet, hingga akoe tida bisa bitjara dengen djelas. Sekarang kaoe boleh kasi taoe pada Tjeng Sian, biar poen ia ada mempoenjai ijmoe kapandean Hek-see-tjhioe, jang oleh kabanjakan orang dianggep sanget lihay, dan mempoenjai djoega ilmoe kapandean djioe-koet-kang, jang itoe kapala goendoel sendiri anggep tida ada bandingannja, tapi kaloe satoe kali berhadepan sama akoe, iapoenja adjal iantes sampe di achirnja. Djangan kala lagi orang-orang jang mempoenjai ilmoe kapandean seperti kaoe dan Tjhio Goan Beng, satoe kali akoe gerakin akoe poenja djeridji, dengen lantes kaoe orang poenja djiwa melajang. Boeat memboektiken jang akoe boekannja bitjara terkeboer, sekarang djoega akoe tiam bikin kaoe poenja darah bisa berdjalan lagi sebagimana biasa, hingga kaoe aken bisa bergerak menjerang atawa poen melindoengin diri ; tapi kaloe sadja akoe tida bisa bikin kaoe djadi terdjoengkel dalem lima djoeroesan, dengen segala senang hati akoe aken pasrahken diri boeat ditangkep oleh kaoe."
Sahabisnja berkata begitoe, ia lantes djambak ramboetnja Hee Pat diangkat ka atas sampe tiga kali, kamoedian dengen kepelannja ia poekoelin dengen pelahan sakoedjoer badannja Hee Pat. Soenggoe aneh sekali, sabegitoe lekas ramboetnja didjambak sampe katiga kalinja, Hee Pat rasaken badannja djadi begitoe enak dan darahnja moelai bisa berdjalan lagi, dan koetika iapoenja badan dipoekoelin dengen perlahan oleh kepelannja Boe Beng Hiap Kek, lantes sadja ia bisa moeiai gerakin lagi badannja dan mengaloearken satoe dahan napas sebagi djoega orang jang merintih.
Sasoedanja memoekoelin, Boe Beng Hiap Kek lantes moendoer satoe tindak ka blakang sembari mengawasi pada Hee Pat dengen mata seperti kilat, hingga maoe tida maoe itoe pendjahat djadi toendoek dan tida brani meliat pada itoe sorot mata jang sanget tadjem.
„Akoe kasi kaoe tempo sapoeloeh minuut boeat bikin kaoe poenja badan djadi seger kombali," kata Boe Beng Hiap Kek, „kamoedian kaoe boleh lantes moelai menjerang padakoe, dengen atawa zonder kasi alamat lebih doeloe. Akoe selamanja aken menjamboet dengen segala senang hati."
Hee Pat dalem hatinja berpikir : „Ini Boe Beng Hiap Kek sekali poen akoe masih belon taoe bagimana iapoenja ilmoe poekoelan, tapi kaloe diliat dari iapoenja gerakan jang begitoe sebat dan enteng, soeda bisa dipastiken ada djaoeh lebih tinggi dari akoe, malah iapoenja iimoe tiam-hwee-kin ada begitoe lihay, pasti sekali akoe boekannja iapoenja tandingan ; tapi lantaran ia bilang akoe boleh menjerang dengen zonder mengasi taoe lebih doeloe, sedeng ia berdiri begitoe deket sama akoe, saoepamanja akoe goenaken tipoe tendangan tjiong-thian-pauw ka djoeroesannja iapoenja anggota terlarang dengen sakoenjoeng-koenjoeng, akoe rasa biar bagimana djoega ia tida nanti bisa berkelit atawa poen mengegos. Samentara ini akoe mengoempoel doeloe akoe poenja tenaga dan soemanget, kamoedian akoe baroe bergerak dengen mendadak tapi akoe rasa terlebih baek lagi djika akoe adjak ia bitjara, soepaja bisa membikin iapoenja perhatian djadi ketarik ka laen djoeroesan."
Sapandjang itoe waktoe Boe Beng Hiap Kek poenja mata teroes ditoedjoeken pada paras moekanja Hee Pat, dan koetika itoe pendjahat ambil poetoesan jang paling blakang, ia bisa liat di antara itoe pendjahat poenja paras moeka mengoendjoek satoe pengrasahan poeas jang kedjem, sekalipoen Boe Beng Hiap Kek tida bisa taoe apa jang itoe pendjahat pikir, tapi ia mengarti tentoe orang bakal membokong padanja dengen mendadak, hingga diam-diam ia djadi bersenjoem di bawah kekoedoengan moekanja.
„Kaoe ini ada satoe hiapkek," moelai Hee Pat; „jang bekerdja goena keadilan dan djadi pembelanja orang banjak, mengapa berlakoe semboeni, tida maoe mengoendjoek kaoe poenja roman dengen teroes-terang ? Orang jang soeka berlakoe semboeni boekarmja satoe laki-laki dan tida bisa diseboet satoe hiapkek !"
„Hahaha! apa kaoe maoe perdoeli akoe ada satoe laki-laki atawa boekan, satoe hiapkek atawa apa djoega?" kata Boe Beng Hiap Kek sembari tertawa bergelak-gelak. „Harganja akoe poenja diri tida nanti djadi naek atawa toeroen, dengen poedjian atawa poen tjelahan dari manoesia jang seperti kaoe ini. Akoe tida perdoeli priha! nama poedjian jang kosong melongpong, hanja akoe tjoema perloeken sadja apa keadilan soeda didjalanken atawa tida, apa orang-orang boesoek dan djahat soeda bisa ditindes atawa tida. Kaloe sadja sabegitoe djaoeh keadilan soeda bisa di djalanken, orang-orang boesoek dan djahat dapet di tindes, apatah akoe maoe perdoeli prihal dirikoe diseboet laki-laki dan hiapkek atawa boekan ? Akoe tjoema mendjalanken sadja apa jang akoe poenja liangsim soeroe dan rasa baek, tapi boekannja boeat mentjari nama dan poedjian. Hal ini kaoe bisa liat sendiri sama akoe poenja nama pedengan, boekantah berboenji Boe Beng Hiap Kek, satoe hiapkek jang tida ada namanja !"
„Boleh djadi kaoe betoel, tapi terhadep padakoe, itoe' keadahan tida tjotjok," kata Hee Pat. „Sebab kaoe dan akoe bakal bertempoer, nanti pada waktoe kaoe atawa akoe kena kapoekoel dan mendapet loeka berat hingga djiwa bakalan tiwas, toch sedikitnja akoe moesti bisa liat romannja itoe orang jang membinasaken padakoe, atawa sebaliknja siapa adanja itoe orang jang akoe soeda bisa roeboeken."
„Kaoe poenja omongan ada benernja djoega, tapi nanti sadja pada waktoe sasoedanja kaoe maoe poetoes djiwa akoe aken kasi toendjoek romankoe, soepaja kaoe bisa taoe bagimana roepanja itoe orang jang soeda anterken kaoe poenja djiwa pada radja acherat. . ."
Koetika Boe Beng Hiap Kek bitjara sampe disini, koenjoeng-koenjoeng Hee Pat mengangkat sabelah kakinja menendang dengen tipoe tjiong thian pauw ka djoeroesan anggota terlarangnja itoe hiapkek tapi ia itoe sama sekali tida berkelit, hanja pasang iapoenja koeda-koeda dengen berdjongkok sedikit sembari gerakin iapoenja khikang. Oleh kerna Boe Beng Hiap Kek djongkokin sedikit iapoenja badan, maka tendangannja Hee Pat mengenaken iapoenja peroet.
Tapi sabegitoe lekas oedjoeng kakinja itoe pendjahat mengenaken peroetnja Boe Beng Hiap Kek, lantes kadengeran soeara keras sebagi djoega menimpa! pada satoe batoe, berbareng dengen itoe Hee Pat mengaloearken satoe treakan keras lantaran kesakitan sedeng ia poenja badan djadi terpental dari atas itoe genteng roemah djato terbanting ka dalem satoe lataran batoe. Koetika Hee Pat menendang, ia poen ada gerakin iapoenja khikang, sebab ia soeda mendoega bahoea lawanannja boekan bangsa jang boleh diboeat permaenan, dan ia mengharep sadja lantaran diadjak mengemong, pikirannja hiapkek katarik ka laen djoeroesan, hingga ia tida bisa mendjaga itoe serangan jang begitoe mendadak; tapi ternjata ia soeda kliroe. Boekan sadja iapoenja maksoed membokong tida bisa kesampean, malah sebaliknja iapoenja toelang kaki jang menendang mendjadi remoek lantaran kena „keng" atawa tenaga jang menoelak dari dalem badannja Boe Beng Hiap Kek, kerna Hee Pat poenja khikang ada terpaoet djaoeh sekali sama iapoenja lawanan. Biar poen Hee Pat poenja toelang kaki soeda djadi remoek, tapi ia masih bisa gerakin iapoenja khikang di sakoedjoer badannja sembari bikin lempang iapoenja badan, agar djangan sampe kapalanja terbanting ka atas batoe, oleh kerna itoe djoega, sekali poen ia terbanting keras ka moeka itoe lataran batoe, tapi ia tida mendapet loeka apa-apa.
Hee Pat tida bisa berbangkit berdiri kerna toelang kaki kanannja soeda mendjadi remoek, dan koetika ia lagi merintih rintih lantaran kesakitan, seperti salembar daon kering jang djato melajang katioep angin, berlompat toeroen Boe Beng Hiap Kek dan berdiri di hadepannja.
„Sekarang lantaran kaoe poenja kaki soeda remoek toelangnja," kata ia, „soeda tentoe sadja kaoe tida nanti bisa bertempoer sama akoe, dan kaloe akoe maoe, dengen gampang sadja akoe bisa anterken kaoe poenja djiwa ka laen doenia; tapi akoe tida maoe membinasaken satoe moesoeh jang soeda tida berdaja. Maka boeat sekarang akoe ampoenin kaoe poenja djiwa katjwa; tapi oleh kerna kaoe ini ada satoe badjak jang soeda banjak sekali membinasaken orang poenja djiwa di sapandjang soengei Kioe-liongkang, sekali poen kaoe poenja djiwa boleh diampoenin, tapi hoekoeman badan tida bisa dibebasken.
,,Kaoe makanja bisa berboeat djahat dan boeas pada sasama manoesia, meloeloe mengandel sama kaoe poenja kakoeatan badan dan ilmoe kapandean silat ; sekarang kaoe poenja kaki soeda tjatjat, sabelah dan saoemoer kaoe hidoep tida aken bisa digoenaken lagi; tapi itoe belon tjoekoep boeat bikin kaoe tida berdaja, kerna kaoe masih ada mempoenjai doea tangan, dan doeloe Lie Thie Kway jang kakinja pintjang ternjata tida kalah sama orang-orang jang kadoea kakinja masih tinggal oetoe, oleh kerna itoe djoega, kaoe poenja kadoea lengan moesti dibikin loempoe."
Berkata sampe disini, Boe Beng Hiap Kek lantes pidjit oeroet kateknja Hee Pat jang kiri dan kanan dengen bergantian, sabegitoe lekas kena dipidjit, itoe pendjahat rasaken lengannja djadi kasemoetan dan tida bertenaga. Ia mengarti bahoea kadoea lengannja soeda ditiam oerat besarnja jang membikin ia djadi loempoeh boeat saoemoer hidoepnja, dan sekali poen itoe kadoea lengan boekannja sama sekali tida bisa digoenaken, tapi kaloe mengangkat barang jang sedikit berat sadja lantes rasanja sakit dan tida bertenaga. Hal itoe soeda membikin Hee Pat djadi sanget goesar dan sakit hati pada itoe hiapkek, kerna ia pikir biar poen ia masih bisa tinggal hidoep, toch tida berbeda sebagi djoega soeda mati.
Toeloeng ! toeloeng ! lekas tangkep pemboenoeh ! Boe Beng Hiap Kek! pemboenoeh!" berseroeh ia dengen sakeras-kerasnja.
Dalem sedikit saat kamoedian, lantes kadengeran soeara riboet-riboet dan sinarnja obor obor jang menjala dengen terang, mendatengin dari segala djoeroesan ; tapi Boe Beng Hiap Kek tinggal adem, dan dengen sabar ia melirik ka segala djoeroesan. Roepanja ia tida begitoe poesingin pada itoe kawanan oppas jang sama sekali tida mempoenjai goena satoe apa; dan ia tjoema perloe perhatiken sadja pada Tjeng Sian Hweeshio dan Tjhio Goan Beng, jang sedikitnja ada itoe harga boeat diperhatiken.
Dalem sakedjapan mata soeda ada bebrapa poeloeh orang-orang politie jang bersendjata golok thitjio, toja, toembak dan laen-laennja mengoeroeng dari kadjaoehan sembari bertreak-treak. Boe Beng Hiap Kek lantes lontjat naek kombali ka atas genteng, tapi berbareng dengen itoe kadengeran soeara tongtong ketjil jang dipaloe dengen gentjer, dan ampir sasa'at itoe djoega, anak -anak panah jang seperti oedjan lebatnja menjamber ka itoe djoeroesan genteng, dimana Boe Beng Hiap Kek baroe sadja bisa berdiri dengen djedjak. Djika itoe oedjan anak panah datengnja begitoe tjepet dan tida terdoega, tapi gerakannja Boe Beng Hiap Kek ada terlebih tjepet lagi, sabegitoe lekas ia denger soearanja itoe tongtong ketjil jang dipaloe dengen lantes ia soeda tjaboet pedangnja dan poeter di sakoedjoer badannja sebagi djoega titiran, hingga tjoema keliatan sadja satoe goendoekan sinar poetih jang menoetoepin badannja, sedeng sasoeatoe anak panah jang dateng deket pada itoe sinar poetih, semoeanja pada djatoh terpental ka atas genteng, sebagi djoega kena tertahan oleh satoe tameng wadja.
Kira saprapat djam lamanja itoe kawanan oppas dengen dikapalai oleh Tjeng Sian, melepasken anak panah ka djoeroesannja Boe Beng Hiap Kek, tapi tida ada satoe jang bisa mengenaken, dan achirnja persediahan anak panah poen soeda abis, hingga itoe penjerangan tida bisa dilandjoetken. Boe Beng Hiap Kek poen lantes brentiken iapoenja gerakan pedang, dan dalem sakedjapan mata itoe sinar poetih mendadak linjap, dan kombali keliatan ia itoe poenja potongan toeboe jang tinggi langsing, sedeng iapoenja seantero badan tjoema keliatan sadja petahan item, tapi tida bisa tertampak iapoenja moeka bagimana romannja.
„He, kawanan andjing pohtie jang tjoema bisa menjoesahken sadja pada rahajat, berseroeh itoe tetamoe malem, „dan kaoe orang kawanan begal jang kedjam, liat sadja tjonto, kaoe orang poenja kontjo, jang sekarang menggletak di itoe lataran. Kaloe sadja orang jang tida takoet mampoes, boleh naek ka sini dan bertaroeng pada kaoe poenja toaloya, djangan salempang, dengen lekas akoe anterken iapoenja djiwa ka acherat boeat katemoeken Giamkoen."
Itoe tantangan soeda membikin Tjeng Sian Hweeshio djadi sanget panas, ia pesen sedikit perkatahan pada Tjhio Goan Beng, kamoedian ia berseroeh dengen keras ; „Kaoe poenja siansoe sekarang dateng boeat ambil kaoe poenja kapala !" Berbareng dengen itoe ia berlompat naek ka atas itoe genteng ; tapi baroe sadja itoe kapala goendoel bisa berdiri di atas kadoea kakinja. Boe Beng Hiap Kek lantes menioep ka djoeroesannja ia itoe poenja dada, hingga Tjeng Sian rasaken iapoenja dada djadi sesak dan djato tjelentang ka atas genteng dengen terbanting. Boe Beng Hiap Kek lantes tertawa bergelak-gelak.
„Kapala goendoel jang trapoenja kamampoean satoe apa," kata ia achirnja, „toch maoe bertingka oendjoek kakosenan di hadepankoe; tapi baroe sadja akoe tioep dengen lantes kaoe djadi roeboe sebagi satoe anak-anakan kertas. Kaoe poenja toalaya tida ada itoe kasempetan boeat meladenin lebih djaoeh pada kaoe, dan sekarang djoega akoe maoe berlaloe dari sini."
Sahabisnja berkata begitoe, tjoema keliatan sadja satoe sinar merah-darah melajang ka atas oedara laksana satoe paser, dan achirnja djadi linjap ka djoeroesan barat.