Boe Beng Hiap Kek/Bab 6
VI.
Mengoendang orang pande.
Tjeng Sian Hweeshio sama sekali tida mendoega, jang ia dengen gampang sadja dibikin tergoeling oleh itoe tetamoe malem ; pada sabelonnja ia bisa bergerak apa-apa, dengen satoe tioepan sadja ia soeda dikedja kadjoengkel, ja, kadjoengkel sebagi djoega satoe anak-anakan kertas, sebagimana katanja Boe Beng Hiap Kek. Itoelah sasoenggoenja ada katerlaloean sekali, dan bisa dimengarti bagimana itoe kapala goendoel poenja kagoesaran dan maloe. Di hadepan begitoe banjak orang, ia diperlakoeken sebagi djoega satoe anak ketjil jang tida berdaja, sedeng ia soeda sombongin diri maoe menangkep pada itoe hiapkek. Tadinja Tjeng Sian jang tersoeroeng oleh pengrasajan goesar, berniat maoe mengedjer pada itoe tetamoe malem, dan aken mengadoe djiwa dengen tida ambil perdoeli lagi kakoeatan dari kadoea fihak, hanja ia ingin matiin pada Boe Beng Hiap Kek atawa ia sendiri jang dibinasaken. Tapi itoe hiapkek jang paham ilmoe pedang resia, soeda berlaloe sebagi djoega satoe kilat, jang sakedjapan mata sadja lantes linjap dari pemandangan mata. Apatah jang ia bisa berboeat, salaennja membanting-banting kaki dengen sengit!
Oleh kerna ia tida berboeat satoe apa, sasoedanja berlompat bangoen dari tempat dimana ia djato Tjeng Sian berlompat toeroen ka atas itoe lataran, dan boeat menoetoep iapoenja pengrasahan maloe, ia menjamperin pada Hee Pat jang itoe waktoe djoestroe diobatin loekanja oleh Tjhio Goan Beng.
,,Oh, toako, sekarang akoe poenja diri soeda abis perkara !" kata itoe orang loeka dengen soeara sedih tertjampoer mendongkol. „Boekan sadja akoe poenja toelang kaki kanan soeda mendjadi remoek malah akoe poenja kadoea tangan soeda seperti loempoe dan tida bisa digoenaken lagi."
Tjeng Sian lantes preksa keadahan kakinja Hee Pat jang loeka, kamoedian preksa djoega kadoea lengannja Achirnja ia djadi begitoe sengit dan berseroeh sakeras-kerasnja: „Oh! Boe Beng Hiap Kek, jang terkoetoek! kita poenja permoesoehan djadi samingkin dalem dan heibat. Akoe bersoempa jang akoe aken berdaja sabisa-bisanja boeat binasaken pada kaoe, kaloe sadja akoe poenja maksoed masih belon kasampean, akoe tida nanti brenti berdaja."
Kamoedian ia berpaling pada itoe orang loeka dan berkata lagi dengen soeara jang lebih haloes : „Soetee, kaoe poenja kaki lantaran toelangnja soeda mendjadi remoek, tentoe bakal mendjadi tjatjat dalem saoemoer hidoep; tapi kaoe poenja kadoea lengan, sekali poen akoe masih belon taoe pasti telah dibikin loempoe dengen ilmoe apa, tapi akoe kasi kaoe pikiran boeat djangan lantes poetoes harepan. Besok pagi-pagi akoe maoe brangkat pergi ka Hoet-nia boeat mengoendang akoe poenja soesiok, Tie Tjong Siansoe, jang bertapa di atas itoe goenoeng, dalem gredja Kong-hoei-sie."
Itoe waktoe ada dateng satoe oppas, menjamperin pada Tjeng Sian Hweeshio.
,,Toasoehoe, akoe poenja toaloya minta kaoe soeka masoek ka pertengahan dalem," kata itoe oppas pada Tjeng Sian, „kerna ia maoe bitjara dalem satoe oeroesan jang sanget penting."
Tieng Sian manggoetken kapalanja dan dengen tida berkata satoe apa ia mengikoetin pada itoe oppas masoek ka pertengahan dalem, dimana ia liat tikoan dari Ankhee djoestroe berdoedoek di satoe korsi dengen moeka poatjet dan sakoedjoer badan bergoemeteran.
,,Wah, tjilaka besar!" berseroeh itoe ambtenaar bangpak sabegitoe lekas ia meliat pada Tjeng Sian, „ampir sadja akoe poenja kapala kasi slamat tinggal sama akoe poenja badan ; tapi itoe tjap kabesaran soeda didapetken kombali."
Tjeng Sian merasa heran sekali mendenger itoe omongan.
„Toaloya bilang kapala ampir poetoes ! kata ia; „tapi tjara bagimana ? Sedeng itoe tjap kabesaran siapa jang soeda dapetken kombali dan tjara bagimana ?"
„Dengerlah akoe poenja tjerita," kata itoe tikoan dengen soeara jang masih menggeter lantaran iapoenja pengrasahan takoet masih belon ilang, „baroesan pada sabelonnja kadengeran soeara riboet-riboet di sabelah loear, djoestroe akoe lagi enak poeles dalem akoe poenja kamar, mendadak akoe rasaken di leherkoe ada apa-apa jang dingin seperti ijs, hingga akoe djadi terkedjoet mendoesin dan boeroe-boeroe bangoen sembari meliat ka djoeroesan akoe poenja bantal jang baroesan akoe tidoerin...... dan dengen terkedjoet akoe liat di sitoe ada terletak satoe golok pendek jang mengkilap, sedeng di deketnja ada menggletak akoe poenja ramboet dan koentjir jang soeda poetoes seperti bekas ditjoekoerin."
Berkata sampe disini itoe tikoan lantes melepasken iapoenja topi jang dipake, ternjata iapoenja kapala soeda goendoel seperti tales dikoepas ; malah koetika Tjeng Sian awasin terlebih terliti, ternjata itoe tikoan poenja halis dan boeloe mata poen soeda bresih tida keliatan barang salembar ! Itoe tikoan poen seperti taoe orang poenja maksoed, sembari mengoesoet-ngoesoet halisnja ia djadi bergidik.
„Akoe poenja kaget di itoe waktoe boekannja kapalang," kata lagi ia, meneroesken iapoenja pembitjarahan tadi, „dan dengen tida merasa lagi akoe oesoet-oesoet akoe poenja kapala, jang ternjata soeda mendjadi goendoel seperti djoega kaoe poenja kapala. Baroe sadja akoe maoe berseroeh memanggil orang, mendadak akoe rasaken satoe tangan membekem moeloetkoe, sedeng dileherkoe kombali ada menempel barang jang dingin seperti ijs. „Diam, djangan bertreak, kaloe sadja kaoe masih sajang kaoe poenja djiwa," kata satoe soeara jang tida dikenai. ,,Akoe dateng ka sini boeat kasi poeiang kaoe poenja tjap kabesaran, sekalian akoe maoe-kasi inget djoega bahoea kaoe djangan sekali-kali brani berkontjo pada Tjeng Sian Hweeshio dan kawan -kawannja boeat menangkep padakoe. Satoe kali ini, akoe poenja pembrian inget ada jang pengabisan kali, sebab kaloe sadja kaoe brani membantah, dengen lantes akoe tjopotin kaoe poenja kapala. Sebagi boekti boeat mengoendjoek akoe poenja kalihayan, dengen zonder kaoe poenja taoe akoe soeda bisa tjoekoerin kaoe poenja ramboet sampe mendjadi goendoel. Itoe waktoe, kaloe sadja akoe maoe, dengen gampang sadja akoe bisa koetoengin kaoe poenja leher,"
„Akoe mendengerin itoe orang poenja omongan dengen badan bergoemeteran, sedikit poen tida brani berdaja boeat melawan. Tatkala ia brenti bitjara, ia lepasken tangannja jang membekem akoe poenja moeloet dan moendoer satoe tindak ka blakang. Akoe melirik sama oedjoeng mata boeat meliat pada itoe orang tang akoe soeda denger iapoenja soeara dan pembitjarahan, dan ternjata ada itoe Boe Beng Hiap Kek jang sakoedjoer badannja memake pakean nngkes serba item, toeboenja sedikit tinggi dan langsing, sedeng iapoenja kapala di kekoedoengin oleh satoe kekoedoeng soetra item, jang dilobangin di bagian kadoea matanja dan betoelan idoeng ; dari itoe kadoea lobang mata, akoe liat ada kaloear sapasang sorot mata jang tadjemnja seperti piso dan begitoe berkoeasa, hingga akoe djadi bergidik dengen zonder merasa.
,,He, tikoan, kaoe moesti berdjandji jang kaoe tida aken berkontjo lagi sama Tjeng Sian Hweeshio dan kawan-kawannja," kata lagi Boe Beng Hiap Kek, „sebab akoe poenja peringetan satoe kali ini ada boeat pengabisan kalinja. Kaoe tentoe soeda taoe akoe poenja lihay dan selamanja aken pegang tegoe akoe poenja omongan. Sekarang akoe kasi kaoe liat lagi akoe poenja kakoeasahan, soepaja kaoe taoe bahoea akoe tida boleh diboeat permaenan." Sahabisnja berkata begitoe, dari iapoenja moeloet melajang kaloear satoe barang boender jang berwarna merah-darah, kamoedian dengen lantes terpoeter-poeter di sakoelilingnja akoe poenja kapala, hingga akoe djadi bergidik lantaran kadinginan, dan meremken kadoea mata dengen tida brani bergerak lantaran silo dan takoet.
„Tatkala akoe rasaken itoe sinar merah dan hawa dingin soeda linjap, dengen perlahan akoe tjoba melekin akoe poenja mata sedikit, ternjata itoe sinar merah memang soeda tida ada, kamoedian akoe melirik ka depan pembaringan, itoe tetamoe malem poen soeda tida keliatan lagi. Achirnja akoe braniken hati boeat menengok dan tjelingoekan meliat ka segala djoeroesan, tapi itoe hiapkek soenggoe-soenggoe tida ada dalem itoe kamar. Dengen tida disengadja akoe liat di atas sprei ada banjak ramboet pendek jang berhamboeran sana-sini, bermoela akoe tida mengarti itoe ada ramboet apa ; tapi blakangan satoe pikiran masoek ka dalem akoe poenja kapala, dan dengen tida merasa lagi akoe oesoet-oesoet akoe poenja halis, ternjata doea doeanja soeda bresih, malah blakangan akoe oesoet-oesoet akoe poenja boeloe mata tida katinggalan barang salembar! Itoe masih belon sabrapa, klamboenja akoe poenja pembaringan sainggan akoe poenja kapala di waktoe akoe lagi berdoedoek di atas itoe randjang, semoeanja soeda mendjadi antjoer terpoetoes doea dan bertoempoek di atas djoebin ! Tjobalah kaoe pikir, apatah itoe hiapkek poenja pedang tida sanget lihay dan begitoe poenja tadjem ? sebab dengen zonder mengenaken, akoe poenja halis boeloe mata dan klamboe — tjoema kena anginnja sadja, semoeanja soeda mendjadi poetoes!"
Berkata sampe disini kombali sakoedjoer badannja itoe tikoan djadi bergoemeteran, sebagi djoega saorang jang lagi kadinginan.
„Abis sekarang toaloya maoe berboeat bagimana? menanja Tjeng Sian dengen pengrasahan tida enak.
„Berboeat bagimana !" berseroeh itoe ambtenaar gedjos, „soeda tentoe sadja akoe moesti toeroet iapoenja kahendakan, sebab akoe masih sajang akoe poenja kapala ! Inilah djoega sebabnja maka akoe panggil kaoe dateng ka sini, perloenja boeat mengasi taoe jang moelai dari besok malem, kaoe orang djangan dateng lagi ka sini, sebab akoe tida maoe bermoesoehan lagi sama itoe hiapkek jang begitoe lihay. Pendek biar poen akoe boleh dipetjat dari akoe poenja djabatan, akoe tida maoe oeroes lagi perkara pemboenoehannja The Tay Hou, jang memangnja bersalah. Ja, akoe lebih soeka brenti djadi ambtenaar dari pada akoe poenja kapala djadi poetoes."
Tjeng Sian pikir, tida oesah heran djika itoe tikoan djadi begitoe katakoetan, kerna iapoenja kadoedoekan memang sanget berbahaja. Maka ia poen tida brani memaksa soepaja itoe tikoan bekerdja sama-sama teroes dalem ini perkara menangkep pada Boe Beng Hiap Kek. Pertama ia sendiri merasa tida ada itoe kamampoean boeat melindoengin djiwanja itoe tikoan, kadoea ia taoe bahoea ini waktoe pikirannja itoe tikoan djoestroe kaloet dan sanget katakoetan, hingga sama sekali tida bisa diadjak berdami dengen beres. Maka ia berkata sadja ; „Toaloya sekarang djoestroe kaget dan bingoeng, akoe poen tida bisa dapetken djalan boeat menghiboer. Nanti sadja laen hari kita bitjaraken lagi ini oeroesan, bila toaloya soeda mendjadi lebih sabar."
„Tida, tida, sama seki tida perloe," berseroeh itoe tikoan. „Kaloe akoe soeda bersedia boeat trima dipetjat, apatah lagi jang akoe moesti pikir? Dalem ini perkara paling berat akoe bakal dipetjat dengen tida hormat dari akoe poenja djabatan ; akoe masih ingin hidoep lebih lama dalem ini doenia, maka akoe lebih soeka tida mamegang pangkat, asal sadja kapalakoe tida koetoeng !"
Tadinja Tjeng Sian ada pikiran boeat mengasi taoe jang ia hendak pergi mengoendang pada iapoenja soesiok, Tie Tjong Siansoe ; tapi lantaran meliat itoe tikoan begitoe goegoep dan katakoetan, ia rasa biarpoen dikasi taoe djoega sama sekali tida ada goenanja. Laloe ia membri hormat dan berpamitan kaloear dari itoe pertengahan, menoedjoe ka itoe kamar, dimana, ia biasa berkoempoel sama iapoenja kadoea „saderek". Sesampenja ia liat Hee Pat djoestroe rebah di atas pembaringan dengen tida brentinja merintih-rintih ; sekarang Tjeng Sian baroe inget, baroesan lantaran kagoesarannja, ia soeda meloepaken kasi obat pada iapoenja soedara angkat boeat ilangken rasa sakit, maka ia lantes kaloearken satoe botol ketjil, dalen mana ada berisi bebrapa banjak pil-pil warna item sabesarnja telor tjetjek. Ia toewang tiga boetir dan minta Tjhio Goan Beng toewangin satjangkir aer thee, kamoedian soeroe Hee Pat telen itoe tiga boetir pil dengen itoe aer thee. Dengen perlahan Hee Pat poenja rintihan djadi koerangan, dan achir-achir ia mendjadi poeles.
Tjeng Sian sapandjang itoe waktoe tida bitjars apa apa , kerna ialagi berpikir dengen keras. Ia pikirken prihal itoe tetamoe malem jang maboer dain mengilang ka djaeroesan barat, apatah ia itoe tinggal di soeatoe tempat daiemf itoe djoeroesan? Kaloe betoel Boe Beng Hiap Kek tinggal di itoe djoeroesan, tida soesah boeat ia tjari sampe katemoe tapi kaloe soeda katemoe, apatah ia sanggoep bertanding padanja? Djangan kata Boe Beng Hiap Kek tida paham ilmoe pedang resia, sedeng ia itoe poenja ilmoe silat sadja, ia rasaken terpaoetnja terlaloe djaoeh, hal mana soeda berboekti dengen itoe hal jang baroesan terdjadi satoe kali kena ditioep sadja, ia lantes kadjoengkel seperti salembar daon kering disapoe angin toefan.
Achirnja ia ambil poetoesan lebih baek ia menoenggoe doeloe sampe ia soeda bisa oendang iapoenja soesiok, sebab kaloe sekarang ia pergi mentjari, taro kata bisa dikatemoeken djoega, sama sekali ia tida bisa berboeat satoe apa. Salaennja itoe, masih belon tentoe jang Boe Beng Hiap Kek poenja tempat tinggal di djoeroesan barat, sebab siapa taoe kaloe ia sengadja djalan ka itoe djoeroesan, tapi kamoedian balik lagi ka laen djoeroesan, soepaja orang tida bisa taoe dimana tapoenja tempat tinggal.
Di pagi jang brikoetnja, sabelonnja langit mendjadi terang, Hee Pat dengen tergotong dalem satoe djoli dibawa poelang ka Thay-swee-tjhung, dengen diiringken oleh Tjeng Sian Hweeshio dan Tjhio Goan Beng. Oleh kerna Tjeng Sian Hweeshio ingin salekas-lekasnja bertemoe sama iapoenja soesiok di Hoet-nia, jang letaknja doearatoes lie lebih dari Tjoantjioe, maka pada sasoedanja ia menjoetji moeka dan toekaran pakean boeat bikin perdjalanan serta mengisi peroet sampe kenjang, ia lantes brangkat ka Hoet-nia, dengen mamesen pada Tjhio Goan Beng soepaja merawalin dengen betoel pada Hee Pat.
Di tengah perdjalannan tida ada terdjadi apa-apa jang penting, dan pada soeatoe hari Tjeng Sian Hweeshio soeda sampe di Hoet nia dan mengadep pada iapoenja soesiok, Tie Tjong Siansoe, dalem gredja Kong-hoeisie. Dengen bertjoetjoeran aer mata ia toetoerken apa jang soeda terdjadi atas dirinja The Tay Hou, blakangan atas dirinja sendiri dan Hee Pat, kamoedian dengen terang ia toetoerken keadahannja Boe Beng Hiap Kek jang ilmoe kapandeannja ada begitoe tinggi, tapi sama sekali tida bisa ketaoean dari tjabang mana dan orang berasal dari mana. Tie Tjong Siansoe mendenger itoe omongan dengen saban-saban keroetken halisnja, dan koetika tjoetjoe moeridnja menoetoer sampe di achirnja, ia lantes berpikir sakoetika lamanja.
„Nama Boe Beng Hiap Kek sama sekali belon perna kadengeran di kalangan kang-ouw," kata ia, „sedeng orang-orang jang mempoenjai ilmoe kapandean begitoe tinggi, di ini waktoe tjoema ada tiga tjabang, jaitoe tjabang Siao Lim Sie, tjabang Boe Tong San dan tjabang Boe Ie San; sebagimana kaoe taoe, tjabang Boe Ie berada dalem kita poenja provincie Hokkian, dan kaloe itoe Boe Beng Hiap Kek bisa bitjara dialect kita poenja provincie dengen baek dan tida pelo, apa tida bisa djadi ia berasal dari tjabang Boe Ie? Sedeng orang jang sekarang mendjadi kapala dari tjabang Boe Ie, jalah Tiat Kwan Lodjin, sekali poen orang tida taoe betoel dimana letaknja tempat pertapahannja itoe kapala tjabang Boe Ie, tapi didoega moesti di antara itoe goenoeng Boe Ie jang besar dan tinggi. „Tjoema sadja Tiat Kwan Lodjin oemoernja soeda toewa, kabarnja tida koerang dari toedjoe atawa delapanpoeloeh taon, dan pada sasoedanja ia bersama Kim-leng Hiap So dan laen-laennja membasmi Liong Houw Hwee, dalem bebrapa taon ini tida kadengeran kabar tjeritanja. Sedeng itoe Boe Beng Hiap Kek kaioe menoeroet sebagimana kaoe poenja tjerita, akoe rasa tentoe boekannja Tiat Kwan Lodjin atawa poen Kimieng Hiap So, jang semoeanja soeda beroemoer toewa. Di antara moerid-moeridnja Tiat Kwan Lodjin, akoe denger tjoema Kam Eng Boe saorang sadja, jang ilmoe kapandeannja sanget tinggi. Tapi ia itoe poen, sadari membasmi perkoempoelan Liong Houw Hwee, sampe sekarang tida kadengeran kabar tjeritanja. Lagian akoe tida bisa pertjaja djika Kam Eng Boe ada mempoenjai ilmoe kpandean jang sebagimana kaoe telah tjeritaken."
„Djadinja, kaloe menoeroet soesiok poenja pendapetan, Boe Beng Hiap Kek ada orang dari tjabang mana?" menanja Tjeng Sian Hweeshio.
„Pada sabelonnja akoe bisa liat sendiri gerakannja itoe orang, akoe belon bisa pastiken ia dari tjabang mana. Tapi, kaloe menoeroet apa jang kaoe tjeritaken, akoe koeatir jang akoe sendiri poen boekannja itoe orang poenja tandingan. Maka lebih baek kaoe moesti minta djoega pertoeloengannja kaoe poenja goeroe."
Tjeng Sian Hweeshio djadi sanget djengkel dan bingoeng koetika mendenger iapoenja soesiok djoega merasa tida oengkoelan boeat bertanding sama Boe Beng Hiap Kek ; sedeng iapoenja goeroe, Hian Tjong Siansoe. Salah satoe djago dari Siao Lim Sie jang terkenal, sadari lama soeda oesir moeridnja itoe, jang berkalakoean djahat. Malah pada waktoe Hian Tjong Siansoe mengoesir pada Tjeng Sian, ia mengantjem bahoea djikaloe sang moerid brani melakoeken pemboenoehan nistjaja ia aken kasi hoekoeman boenoeh dengen zonder ampoen lagi. Soeda ampir lima taon lamanja Tjeng Sian tida brani katemoeken goeroenja, dan selamanja itoe, sekali poen ia iakoeken banjak sekali perampokan, tapi selamanja ia belon perna melakoeken penoempahan darah, kerna ia sanget takoet goeroenja poenja hoekoeman. Sekarang mendenger soesioknja mengasi advies soeroe ia pergi minta pertoeloengannja iapoenja goeroe, tjara bagimana ia ada itoe kabranian boeat melakoeken hal itoe?
Tjeng Sian pikir, iapoenja soesiok tabeatnja tida begitoe pegang keras kabedjikan sebagimana iapoenja goeroe, salaennja itoe, adatnja poen sanget brangasan dan tida boleh kena denger omongan tida enrak sedikit sadja, dengen lantes ia bisa djadi naek darah dan „mata gelap," maka ia pikir lebih baek ia obor sedikit soepaja soesioknja djadi moerka, kamoedian ia bisa goenaken boeat tandingin pada Boe Beng Hiap Kek. Maka itoe waktoe dengen sengadja ia golengken kepala sembari oendjoek roman seperti orang jang nialoe dan djengkel, dan achirnja mengelah napas pandjang.
„Oh, soenggoe tida salah omongannja itoe Boe Beng Hiap Kek," kata ia dengen soeara djengkel dan sedih dibikin-bikin, „sebab ia bilang djangan kata baroe akoe, satoe tjetjere jang tida ada harganja, biarpoen akoe poenja goeroe atawa poen akoe poenja soepek dan soesiok, ia nanti bikin kadjoengkel dengen sama gampangnja sebagimana akoe sendiri. Ia roepanja taoe djoega bahoea akoe berasal dari tjabang Siao Lim Sie, maka ia bilang orang-orang dari tjabang Siao Lim Sie moesti bertoendoek padanja, tida perdoeli kapala tjabangnja djoega, ia nanti petjoendangin dengen tida terlaloe soesa." ,,Ach, masa ia brani oetjapken itoe matjem omongan tekeboer?" kata Tie Tjong Siansoe dengen tida begitoe maoe pertjaja, tapi tida oeroeng hatinja merasa koerang enak, jang mana bisa kentara dari iapoenja iagoe bitjara jang seperti orang goesar sedikit.
„Ai, soesiok, boekan begitoe sadja," kata lagi Tjeng Sian dengen soeara soenggoe-soenggoe dan bikin moekanja djadi keren, „koetika akoe bilang bahoea akoe maoe lantes mengoendang pada soesiok boeat tandingin padanja, dengen lantes ia tertawa bergelakgelak, kamoedian ia mengaloearken satoe soeara dari idoeng dan berkata: „Kaoe poenja soesiok, itoe kalde goendoei (maaf soesiok, kaloe akoe toeroetin ia itoe poenja oetjapan) bekas perampok, jang doeloean soeda kena dilabrak setengah mampoes oieh San Soei Tjindjin dari tjabang Boetong! hahaha! sekarang djoega soeroe ia dateng ka sini, akoe nanti bikin ia mengglisahan sebagi djoega doeloe ia soeda rasaken koetika di labrak oieh San Soei Tjindjin, hingga mintaminta ampoen sembari berioetoet dan meratap. . . . "
„Toetoep kaoe poenja moeloet djangan landjoetken itoe omongan!" memotong Tie Tjong Siansoe sebagi satoe kawa goenoeng api jang mendadak meletoes
„Akoe tida maoe pertjaja kaioe Boe Beng Hiap Kek brani oetjapken itoe matjem perkata'an jang begitoe menista padakoe. Tentoelah kaoe sendiri sadja poenja karangan, kerna itoe oeroesan jang soeda berselang ampir sapoeloeh taon, tida banjak orang jang taoe. Djangan maen gila sama akoe, kaloe sadja kaoe berdjoesta, nistjaja kaoe sendiri jang bakal rasaken akoe poenja tangan!"
„Al, soesiok, masalah akoe begitoe brani maenmaen sama saorang perna toewa!" kata lagi Tjeng Sian dengen bikin soewaranja seperti orang berdoeka. „Kaloe boekannja iapoenja omongan jang begitoe menista pada soesiok djoega, akoe tida nanti perioeken dateng mentjari soesiok disini. Salaennja itoe, akoe sendiri merasa panas sekali ia soeda begitoe pandang rendah pada tjabang Siao Lim Sie, jang sedari ratoesan taon soeda ternama besar dan sänget di maioein orang, maka kaloe sadja satoe kali ini kita tinggal diam sadja, dan tida bikin pembelahan boeat namanja Siao Lim Sie, akoe koewatir salandjoetnja orang tida aken pandang lagi pada orang-orang dari kita poenja tjabang."
Tie Tjong Siansoe, itoe waktoe soeda beroemoer limapoeloeh taon lebih, dan boleh dibilang ada saorang jang soeda toewa dan soeda deket pada lobang koeboer, tapi ternjata iapoenja adat jang keras masih sadja belon djadi ilang, satelah mendengar omongannja Tjeng Sian jang dioetjapken begitoe soenggoe-soenggoe, ia kiraken dengen sabetoelnja Boe Beng Hiap Kek soeda menghina iapoenja diri begitoe roepa, maka dengen iantes ia berlompat bangoen dari iapoenja tempat doedoek sembari berseroeh dengen keras; „Binatang! Boe Beng Hiap Kek brani menghina padakoe begitoe roepa! sekali poen akoe sama sekali tida kenal padanja! Oleh kerna ia soeda begitoe pandang enteng padakoe, biar poen akoe poenja badan boleh djadi antjoer leboer, akoe moesti katemoeken djoega padanja, dan getjek iapoenja badan sampe mendjadi gepeng!"
Tjeng Sian Hweeshio djadi girang sekali koetika meliat iapoenja oboran soeda berhasil, tapi lantaran kaloe ia oendjoek kagirangannja, tentoe bisa membikin iapoenja soesiok djadi berbalik tjoeriga lagi, maka ia tjoema oendjoek moeka girang jang tertjampoer sedih, kamoedian ia mengelah napas lagi. „Ja, beroentoeng sekali tjabang Siao Lim Sie djika soesiok inaoe belaken," kata ia; „tapi akoe koeatir soesiok kaloe soeda bertemoe sama Boe Beng Hiap Kek nanti kena dilagoein dan berbalik djadi lembek, sebab akoe taoe betoel jang ia pande sekali bitjara, maka boekannja tida bisa djadi djika ia soeda kateter oleh soesiok ia aken poeter balik iapoenja bitjara jang doeloean, hingga soesiok aken berlakoe moerah dan melepasken lagi padanja."
„Oh, itoelah kaoe djangan koeatir," kata Tie Tjong Siansoe, „akoe nanti labrak ia dengen tida mengenal kasian, perioenja boeat pegang tegoe namanja tjabang Siao Lim Sie jang ia soeda begitoe lantjang brani nistaken."
„Tapi akoe rasa paling baek soesiok djangan maoe banjak bitjara prihal oeroesan tjabang kita jang ia nistaken, pada sabelonnja soesiok bisa tangkep padanja, hanja kaloe ia soeda dapet diringkoes baroelah soesiok tanjaken hal itoe."
„Begitoe poen baek," kata Tie Tjong Siansoe. Ini meloeloe ada akalnja Tjeng Sian jang koeatir iapoenja tipoe dan kadjoestahan kataoean, maka ia ingin sabisanja soepaja iapoenja soesiok djangan bitjara terlaloe banjak pada Boe Beng Hiap Kek. sebab kaloe itoe tetamoe maiem soeda dapet ditangkep, biarpoen iapoenja soesiok maoe melepasken djoega tida bisa, sebab bakal dipasraken pada tikoan.