Boe Beng Hiap Kek/Bab 7

by Kwo Lay Yen

VII.

Boe Beng Hiap oendjoek giginja.

---

Bebrapa hari berselang, Tie Tjong Siansoe soeda sampe ka Ankhee bersama Tjeng Sian Hweeshio jang mangoendang padanja. Lebih doeloe Tjeng Sian pergi mengadep pada tikoan, perloenja boeat menanjaken katerangan, apa dalem itoe bebrapa han Boe Beng Hiap Kek ada dateng lagi atawa tida; tapi ternjata sadari itoe malem, kantoornja tikoan tida mendapet ganggoean satoe apa. Malah itoe tjap kabesaran jang dipoelangken oleh itoe tetamoe malem, boekan sadja memangnja barang jang toelen, malah tida diganggoe lagi. Sedeng itoe tikoan dari Ankhee mengambil sikep tetep tida maoe bermoesoehan lagi sama Boe Beng Hiap Kek, kerna iapoenja njali sadari itoe malem ramboet, halis dan boeloe matanja ditjoekoerin oleh pedang resianja itoe tetamoe malem, iapoenja njali soeda mendjadi petjah, sama sekali tida ada itoe kabranian boeat bitjaraken sadja perkara menangkep Boe Beng Hiap Kek.

Tjeng Sian balik poelang ka roemahnja koelawarga The dengen pengrasahan masgoel, boekan sadja ia djengkel lantaran tida bisa mendapet bantoeannja itoe pembesar, tapi kaloe itoe tetamoe malem tida oendjoek roepanja lagi, kamana ia moesU mentjari padanja boeat diadoeken sama iapoenja soesiok, Tie Tjong Siansoe? Sapandjang djalan ia pikirken bagimana akal boeat mentjari taoe tempat kadiamannja itoe hiapkek jang tida maoe menjeboetken namanja sendiri, ia inget kombali prihal itoe hiapkek menjingkirken diri dan kantoornja tikoan ka djoeroesan barat, dan sekarang lantaran tida ada djalan laen, laloe ia ambil poetoesan boeat pergi bikin penjelidikan ka djoeroesan baratnja kantoor tikoan, tida lantes balik poelang ka roemahnja The Tay Hou marhoem.

Tapi koetika ia djalan teroes sampe ka deket tembok kota di itoe djoeroesan, sama sekali ia tida bisa katemoeken soeatoe tempat jang bisa disangka ada mendjadi tempat kadiamannja itoe tetamoe malem. Maka dengen poetoes harepan ia balik poelang ka roemahnja koelawarga The.

Pada Tie Tjong Siansoe ia tjeritaken apa jang ia soeda denger dari kantoor tikoan dan apa jang ia soeda berboeat dengen zonder mendapet hasil jang diingin.

„Kaloe di waktoe siang kita tida bisa tjari katerangan apa-apa," kata Tie Tjong Siansoe, lebih baek kita rnentjari katerangan di waktoe malem, sebab boleh djadi djoega itoe tetamoe malem berglandangan boeat mengintip segala gerakan, maoe poen di fihaknja pembesar, atawa poen di fihaknja kita. Tapi akoe rasi teroetama fihak kita jang sanget diperhatiken, maka amat boleh djadi ia aken dateng ka sini dengen meng­gelap, Sekarang kita atoer begini sadja, akoe menoenggoe di sini bersama Hee Pat, jang penjakitnja niasi belon semboe, dan kaoe bersama Tjhio Goan Beng, pergi mengintip di sapoeternja kantoor tikoan."

„Ja akoe poen rasa begitoe jang paling baek." kata Tjeng Sian Hweeshio; „djika kabetoelan Boe Beng Hiap Kek dateng ka sini, akoe sanget harep soesiok djangan kasi hati padanja, saoepamanja tida bisa ditangkep idoep, tida halangan binasaken sadja iapoenja djiwa."

„Ja, itoe akoe nanti liat bagimana baeknja." „Tapi, apa soesiok soeda preksa loekanja akoe poenja soetee, bagimana apa aken semboeh kombali sebagimana biasa atawa tida?"

Tie Tjong Siansoe golengken kapalanja. „Akoe rasa soesah," kata ia, sebab iapoenja oerat poendak ada bebrapa bagian jang soeda djadi poetoes, biar poen ada obatnja dewa tida nanti bisa menoeloeng; tapi saoepamanja pada waktoe ia baroe kena ditiam dengen lantas akoe bisa preksa loekanja, boleh djadi masih ada harepan boeat dibikin semboeh lagi taro kata tida bisa dibikin semboeh sama sekali, toch tida sampe seperti sekarang, iapoenja kadoea lengan sama sekali tida bisa digoenaken boeat mengangkat barang berat, sedikitnja ia aken masih bisa goenaken kadoea lengannja boeat mamegang sendjata dan bersilat, sekali poen tida bisa sama baeknja seperti doeloe."

„Oh, terkoetoek betoel-betoel, itoe Boe Beng Hiap Kek!" berseroeh Tjeng Sian dengen sanget diengkel dan goesar, „kaloe sadja pada satoe hari akoe bisa tangkep padanja, nistjaja tida ampoen lagi akoe antes iris-iris iapoenja badan, kamoedian ditjingtjang seperti daging perkedel."

Tie Tjong Siansoe tida berkata satoe apa, sebab ia sendiri masih merasa sangsi apa bisa atawa tida menangkap pada itoe tetamoe malem jang sanget lihay. Itoe malem, pada sasoedanja iaorang makan minoem sampe kenjang, sebagimana lebih doeloe soeda dimoepakatin, Tjeng Sian bersama Tjhio Goan Beng pergi mengintip di sapoeternja kantoor tikoan. Iaorang semoeanja memake pakean peranti djalan malem dan membekel sendjata salengkepnja. Sedeng Tie Tjong Siansoe poen di dalemnja memake pakean peranti djalan malem, tapi di loearnja ia memake djoeba orang pertapahan sebagimana biasa. Ia djalan-djalan di sa­ poeternja itoe roemah koelawarga The, boeat meliat kaloe kabetoelan Boe Beng Hiap Kek dateng mengintip kesitoe.

Kita tjoba tengok pada kita poenja kenalan lama, Tan Ko Wie, itoe goeroe dari roemah sekola koelawarga Tan dl Tan-kee-tjhung. Sadari The Tay Hou diboenoeh mati oleh Boe Beng Hiap Kek, Tan Kie Hou sabansaban menjeritaken itoe oeroesan dengen sikep jang merasa girang dan goembirah, malah ia bilang djoega, saoepamanja ia bisa dapetken satoe goeroe silat jang mempoenjai iimoe kapandean seperti itoe tetamoe malem, biar poen ia itoe tinggal di tempat jang riboean lie djaoenja, tida oeroeng ia aken pergi soesoel dan bergoeroe padanja. Itoe omongan dapet didenger djoega oleh iapoenja goeroe, Tan Ko Wie, hingga soeda membikin ia itoe djadi bersenjoem sembari golengken kapala.

Blakangan, koetika itoe tikoan bangpak ramboet, halis dan boeloe matanja kena ditjoekoerin oleh pedang resianja itoe hiapkek, hal mana, sekali poen diresiaken keras oleh itoe ambtenaar gedjos, tapi tida oeroeng tersiar djoega di antara orang banjak. Orang banjak bitjaraken hal itoe dengen bisik-bisik dengen pengrasahan poeas, sebab itoe tikoan poen memang rakoes sama oewang dan soeda menjoesaken pada rahajat, maka tida saorang jang merasa menjesel djika itoe tikoan mengalamken itoe hal jang sanget tida enak.

Achirnja itoe kabar sampe djoega di koepingnja Tan Kre Hou dengen perantarahannja Tan A Toa, jang sengadja dateng mengasi kabar ka itoe roemah sekola.

Blakangan Tan Kie Hou tjeritaken hal itoe pada iapoenja goeroe, Tan Ko Wie, dan di waktoe menjeritaken iapoenja paras moeka begitoe bergoembirah, sedeng kaki tangannja mameta, sebagi djoega ia liat sendiri itoe kadjadian. Achirnja ia menjataken iapoenja sympathie keras pada itoe hiapkek, dengen membilang djika ia sendiri ada mempoenjai itoe matjem ilmoe kapandean, tentoelah ia aken berboeat begitoe djoega, soepaja keadilan bisa berdjaian dan orang-orang boe­soek bisa terhoekoem. Tan Ko Wie mendengerin sembari memperhatiken betoel gerak-gerakannja iapoenja moerid, kamoedian ia berpikir bebrapa sa'at iamanja, dan achir-achir ia berkata: „Akoe liat kaoe ini sanget soeka sama kapandean ilmoe silat, tapi sajang kaoe poenja ajah tjoema mempoenjai kaoe satoe anak, kaioe boekannja begitoe, akoe bisa oendjoekin kaoe satoe djalan boeat dapetken satoe goeroe jang ilmoenja tinggi Tapi, satoe hal jang roepanja kaoe tida taoe, sekail poen kaoe belon perna beladjar ilmoe kapandean silat sama sekali, toch kaoe soeda mejakinken dengen baek poko-pokonja gerakan ilmoe itoe. Apa kaoe taoe pat-twan-kim dan ie-kin keng sekali poen ada samatjem gerakan boeat membikin badan mendjadi sehat, tapi berbareng dengen itoe ada mendjadi djoega poko-pokonja ilmoe silat? Sajang akoe sendiri tida paham ilmoe silat, kaloe boe­ kannja begitoe, nistjaja akoe aken adjarken kaoe itoe matjem ilmoe jang roepanja kaoe soeka sekali."

Tan Kie Hou merasa heran sekali mendenger goeroenja berkata begitoe, tapi blakangan ia berdjingkrak-djingkrak lantaran sanget kagirangan, sebab mendadak ia djadi mendoesin mengapa tida ada anak-anak sapantarannja, atawa poen jang oemoernja banjak lebih toewa, tida bisa tangkep padanja dalem permaenan petak, Salaennja itoe, kaloe ia memaen sama kawan-kawannja, lantaran satoe dan laen sebab hingga djadi bertjektjok dan berklai, selamanja orang tida bisa kena poekoel padanja, sedeng ia sendiri kaloe satoe kali memoekoel. tentoe orang jang dipoekoel djato tergoeling, biar poen selamanja ia tida taoe memoekoel dengen keras, oleh kerna itoe djoega, semoea kawannja merasa sanget takoet boeat mengadoe kepelan sama ianja. Doeloenja ia tjoema anggep sadja lantaran ia bisa bergerak dengen tjepet dan lantaran koedrat, tapi sekarang ia mendoesin bahoea itoe semoea disebabken oleh ilmoe geraken pat-twankim jang ia soeda jakinken sadari lama, dan djoega itoe ilmoe ie-kin-keng jang ia baroe moelai.

Tapi, ia tida bisa mengarti sama sekali mengapa goeroenja tida mejakinken ilmoe silat, sekali poenja soeda paham pat-twan-kim dan ie-kin-keng, ilmoeilmoe jang mendjadi pokonja ilmoe kapandean silat. Laloe ia tanjaken hal itoe pada goeroenja. Tan Ko Wie lantas bersenjoem.

„Doeloenja, di waktoe akoe masih ketjil," kata ia, „akoe poenja keadahan toeboeh tida berbeda sebagimana kaoe, penjakitan dan koeroes kering, malah ampir sadja mati; tapi broentoeng blakarigan ada datengsatoe hweeshio jang minta derma ka roemah ajahkoe, koetika meliat akoe poenja keadahan, laloe ia menjanggoepin boeat membikin semboeh padakoe, dan tjaranja ia membikin semboeh padakoe, tida berbeda sebagimana akoe soeda membikin semboeh pada kaoe. Inilah djoega sebabnja maka akoe djadi paham ilmoe pat-twan-kim dan ie-kin-keng. Tjoema sajang itoe hweeshio tida bisa tinggal lama, pada sasoedanja ia mengadjarin akoe itoe doea matjem ilmoe sampe tamat, dalem tiga boelan lamanja, ia lantas brangkat pergi, tapi soeroe akoe jakinken teroes sampe bebrapa taon lamanja, soepaja mendjadi mateng betoel dan tida aken bisa loepa lagi. Malah ia pesen djoega, paling baek akoe mejakinken teroes di waktoe saban masoek tidoer, atawa saban baroe berbangkit dari pembaringan."

„Tapi, apa itoe goeroe silat jang sinshe kenal, tempat tinggainja djaoeh dari sini? Siapa namanja dan di mana letaknja iapoenja tempat tinggal?" menanja lagi Tan Kie Hou pada goeroenja. „Oleh kerna kaoe tida bisa pergi katemoeken padanja, di sana, sekali poen akoe kasi taoe dimana iapoenja tempat tinggal dan siapa namanja, toch tida ada goenanja, maka lebih baek akoe tida tjeritaken.

Tan Kie Hou sekali poen tida brani menanjaken itoe oeroesan pada goeroenja jang terlebih djaoeh, tapi dalem hatinja merasa sanget penasaran. Maka moelai dari itoe waktoe ia teroes pikirken hal itoe, hingga saban saban ia soeka mengimpi bertemoe sarna itoe goeroe silat jang goeroenja bitjaraken, pada siapa ia beladjar segala matjem ilmoe kapandean silat, dan bahna kagirangan, boekan djarang ia djadi mendoesin dari tidoernja.

Pada maleman Tie Tjong Siansoe bersama Tjeng Sian Hweeshio sampe ka kota Ankhee, hawa oedara sanget panas, kerna soeda di pertengahannja boelan Gogwee, sebagimana biasa, provincie Hokkian jang lebih dekat pada garisannja matahari (eqautor), maka hawanja tida begitoe dingin sebagimana provincie­-provincie di Tiongkok Oetara, dan moelai boelan Oogwee hawanja soeda panas. Lantaran hawa jang begitoe panas, maka Tan Kie Hou tida bisa tidoer poeles dengen njenjak sebagimana biasanja.

Kira-kira djam doeabelas tengah malem, lantaran kaloear keringet banjak, hingga soeda membikin pakeannja djadi lepek, Tan Kie Hou djadi mendoesin dari tidoernja. la goelak-goelik tida bisa poeles lagi, kerna pakeannja basah dan membikin tida enak pada iapoenja badan, laloe ia toeroen dari pembaringannja dan menoekar iapoenja semoea pakean dalem, kamoedian ia memboeka pintoe dengen pelahan dan teroes pergi kaloear kamar boeat berdjaian-djalan di lataran mentjari angin, la djalan-djalan kira-kira satengah djam lamanja, dan oleh kerna itoe waktoe soeda liwat tengah malem, hawa oedara soeda moelai sedjoek, angin haloes dateng menioep moekanja Tan Kie Hou, hingga ia djadi mengantoek dan mengoewao beroelang-oelang. Ia lantes balik masoek lagi ka kamarnja dengen tindakan indap-indap, kamoedian koentjiken lagi pintoe kamar.

Bermoela lantaran meliat di depan pembaringannja iapoenja goeroe ada keliatan sapasang sapatoe pendek, ia kiraken sang goeroe djoestroe tidoer, tapi itoe waktoe dengen tida sengadja ia djalan lebih deket pada randjangnja sang goeroe jang klamboenja tertoetoep, dan oleh kerna itoe klamboe terbikin dari bahan djarang, sekarang ia djadi liat njata bahoea itoe petahan toeboe jang berada di dalem selimoet kapas, jang tadinja ia kiraken ada goeroenja, ternjata tjoema ada satoe bantal sadja, dan baroesan lantaran diliat dari djaoeh dan djoega tida terlaioe diperhatikan, ia tida taoe bahoea goeroenja tida ada di sitoe!

Hal ini membikin Tan Kie Hou djadi sanget heran, roepa-roepa pikiran dateng mengganggoe ka dalem ia­ poenja otak, tapi ia tida bisa dapetken satoe djawaban jang memoeasken prihal ka mana goeroenja soeda pergi di waktoe malem boeta begini? Sebab ia taoe terang bahoea koetika maoe tidoer, ia bersama goe­roenja telah mejakinken ie-kin-keng sampe bebrapa lamanja, malah ia liat djoega goeroenja naek ka pem­baringan boeat tidoer. Salaennja itoe sang goeroe tida ada bitjara maoe pergi kamana-mana. Lagian, tarokata ia maoe pergi djoega, masatah di waktoe malem boeta? Siapatah orangnja jang ia koendjoengin dalem waktoe begitoe?

Oleh kerna ia sama sekali tida bisa mengarti, samingkin pikir samingkin djadi penasaran, samingkin penasa­ran samingkin ia pikirken tida soedanja. Achirnja iapoenja pengrasahan ngantoek djadi ilang sama sekali. Ia djalan boelak-balik dalem iapoenja kamar sembari berpikir teroes, tapi ia tida bisa dapetken satoe djawaban: kamana goeroenja soeda pergi? Apa jang ia berboeat di waktoe malem boeta begini? Siapa itoe orang jang ia koendjoengin? dan sateroesnja. Achir-achir ia dapet satoe pikiran, kaloe sadja ia teroes djalan djalan begitoe, nistjaia kaloe goeroenja poelang, tentoe aken djadi merasa koerang enak perboeatannja dipergokin, sebab makanja ia iakoeken itoe perboeatan dengen semboeni djoega, tentoelah ia tida soeka hal itoe dikatahoei oleh laen orang. Maka ia ambil poetoesan lebih baek baringken dirinja di pembaringan, soepaja goeroenja kaloe poelang tida merasa dirinja soeda dipergokin kaloear di waktoe malem.

Begitoelah ia lantes naek lagi di pembarirgannja dan selipken iapoenja klamboe. Ia pikirken teroes halnja iapoenja goeroe jang kaloear di waktoe malem boeta, lantaran apa ia djadi berklisikan sadja di pembaringannja, tambahan lantaran berpikir banjak, ia rasaken badannja djadi gerah, sedeng hawa di dalem kamar memang ada lebih panas dari di loear, hingga keringetnja djadi mengoetjoer kombali, jang dengen pelahan bikin pakeannja djadi basah lagi.

Perlahan-perlahan sang tempo berdjalan dengen tetep, hingga achirnja kadengeran tongtong dipoekoel tiga kali, keadahan di sapoeternja itoe roemah sekola ada begitoe sepi dan soenji. Tapi iapoenja goeroe masih belon djoega poelang achirnja dengen pelahan, lan­taran katjapean berpikir, ia djadi mengantoek kombali, dan ia lajap-lajap maoe poeles, tiba-tiba ia djadi mendoesin lagi lantaran mendenger soeara bergeretnja djendela jang diboekaken dari sabelah loear. Oleh kerna itoe waktoe ia djoestroe rebahken diri dengen miring ka sabelah loewar, ia bisa meliat ka djoeroesan itoe djendela, dan koetika ia melekin kadoea matanja ia liat goeroenja djoestroe mengoentjiken lagi djendela dengen pelahan, kamoedian lantestaro satoe boentelan ka sabelah bawahnja iapoenja kasoer dan teroes rebahken diri di atas iapoenja pembaringan. Tan Kie Hou memasang koeping dengen tida bersoeara, ternjata goeroenja masih berklisikan dan belon poeles, dan ia sendiri lantaran banjak berpikir, kombali djadi seger dan tida bisa poeles dan sekali poen ia tahan sabrapa bisa toch tida oeroeng ia djadi berklisikan djoega.

Tida lama kamoedian kadengeran soeara tongtong dipoekoel ampat kali, Tan Kie Hou masih belon djoega poeles, begitoe poen iapoenja goeroe. Achir-achir ka­dengeran ajam djago berkroejoek dari kampoengkampoeng jang berdeketan, tiba-tiba keliatan klamboe pembaringannja Tan Ko Wie disingkapken dan ia itoe toeroen dari pembaringannja menjamperin ka depan pembaringannja iapoenja moerid.

„Kie Hou, roepanja kaoe tida bisa tidoer poeles ini malem," kata ia, „hal apatah jang kaoe pikirken?" Tan Kie Hou djadi sanget terkedjoet koetika mendenger itoe pertanjahan jang tida terdoega. Bermoeia ia maoe poera-poera poeles dan kamoedian mendjoesta jang ia tidoer poeles dan tjoema djadi mendoesin kerna dibangoenin oleh iapoenja goeroe; tapi koetika ia berbalik pikir, goeroenja soeda taoe ia tida tidoer poeles, sedeng goeroenja selamanja mengadjar soepaja ia djangan berdjoesta, hanja dalem segala hal moesti bitjara dengen djoedjoer dan teroes terang, maka ia lantas berbangkit dan teroes berloetoet di hadepannja iapoenja goeroe. „Harep sinshe djangan djadi ketjil hati,” kata ia, baroesan moerid lantaran kagerahan dan badjoe lepek, lantas bangoen menoekar pakean dan teroes djalan-djalan di lataran sampe bebrapa lamanja; tatkala moerid balik masoek lagi ka dalem kamar, dengen tida sengadja moerid liat dalem sinshe poenja selimoet boekannja sinshe jang lagi tidoer, hanja satoe bantal. Oleh kerna tida biasanja sinshe soeka kaloear di waktoe malem, maka moerid pikirken itoe hal sampe kapala poesing dan tida bisa tidoer. Tjoema ini hal akoe tetepken dengen soempah, boekannja dengen sengadja akoe mentjari taoe, hanja dengen kabetoelan sadja.

Tan Ko Wie berpikir bebrapa sa'at lamanja, kamoedian ia bersenjoem.

Kaoe ada satoe anak baek dan djoedjoer, tida sia-sia akoe mendidik pada kaoe sabegitoe lamanja,” kata ia;” oleh kerna akoe taoe bahoewa kaoe poenja hati ada djoedjoer dan adil, tida halangannja akoe bitjara teroes terang sama kaoe. Kaloe kaoe maoe taoe, akoe inilah kaoe poenja „pendekar” jang telah menerbitken kagemperan didalem ini kota.”

Itoe hal lebih doeloe akoe soeda mendoega dela­pan sembilan bagian, sinshe,' saoet Tan Kie hou dengen girang, „dan moelai dari ini waktoe, akoe poenja niatan boeat beladjar ilmoe silat aken bisa kasampean. Tapi apatah tida ada halangannja sinshe tjeritaken oeroesan apa lagi jang baroe dilakoeken oleh itoe Boe Beng Hiap Kek, pembelanja keadilan?”

Itoe hal besok kaoe poen aken dapet denger dan kaoe poenja boedjang, Tan A Toa, jang akoe taoe pasti ia aken dateng membawa tjerita lagi pada kaoe, saoet sang goeroe; „maka boeat sekarang tida perloe, ja malah tida baek, akoe menjeritaken sendiri itoe oeroesan.” Tan Kie Hou tida brani mendesek lebih djaoeh.

„Moeridkoe, kaoe tentoe taoe bagimana berbahajania akoe poenja kadoedoekan,” kata lagi Tan Ko Wie, „kaloe sadja orang banjak mendapet taoe bahoea Boe Beng Hiap Kek ada akoe sendiri. Maka akoe harep sadja kaoe tida tjeruaken ini oeroesan, tida perdoeli pada siapa djoega.”

Oh itoe hal sinshe tida perloe pesen lagi, saoet Tan Kie Hou dengen tjepet, „sebab akoe poen tida soeka jang akoe poenja pendekar ditangkep oleh po­litie, hingga tida ada lagi itoe orang jang bisa membelaken keadilan.”

Nah kaloe beghoe, lantaran samalem kaoe Koe­ rang tidoer, mari kita pergi ka lapangan roempoet boeat mejakinken ilmoe ie-kin-keng jang bisa membikin seger badan, soepaja sabentar siang kaoe tida djadi mengantoek.”

Kira pada djam sabelas, Tan A Toa dengen sasoenggoenja telah dateng lagi ka itoe roemah sekola boeat katemoeken tapoenja madjikan ketjil, dan baroe sadja ia bertemoe pada Tan Kie Hou, dengen lantas ia oendjoek paras moekanja jang bersen-sen dan dengen soeara goembirah toetoerken soeatoe kabaran baroe, jang baroe sadja terdjadi samalem.

Wah, siaoya, samalem telah terdjadi perkara jang sanget menggemperken,” kata itoe boedjang, „sebab satoe hweeshio asing, jang katanja bernama Tie Tjong Siansoe, paman goeroenja Tjeng Sian dara angkatnja The Tay Hou jang soeda mati, telah bertempoer dengen seroeh sama Boe Beng Hiap Kek, tapi ternjata itoe kapala goendoel boekan tandingannja itoe hiapkek, sebab ia mendapet loeka-loeka berat, dan achirnja iapoenja djiwa djadi tiwas. Sedeng Tjeng Sian Hweeshio bersama iapoenja satoe kawan, jang bernama Tjhio Goan Beng telah linjap entah kemana perginja. Sekarang tikoan djoestroe repot bikin papreksahan di roemahnja The Tay Hou, sebab hal itoe moelanja terdjadi di itoe roemah, kamoedian iaorang bertempoer keras di satoe lapangan deket satoe gombolan poehoen tjemara, jang deket pintoe kota barat.”

Boeat menggampangken pada pembatja, baeklah kita toetoerken kedjadiannja itoe perkara dengen langsoeng, sebab Tan A Toa jang denger kabar dari loewaran, tentoe sadja tida bisa taoe doedoeknja perkara jang betoel, katjoeali bagian-bagiannja jang paling penting.

Tatkala Tjeng Sian Hweeshio bersama Tjhio Goan Beng mengintip di kantoornja tikoan, ternjata tida benar kaloe dibilang bahoea sadari terdjadinja itoe perkara Hee Pat diloekai oleh Boe Beng Hiap Kek, ini tetamoe malem tida pernah dateng lagi ka itoe kantoor, hanja saban doea tiga malem satoe kali, itoe hiapkek soeka dateng mengintip ka itoe kantoor, perloenja boeat mendapat taoe bagimana itoe tikoan poenja sikep dan gerakan terhadep pada iapoenja oeroesan. Dari kantoornja itoe tikoan ia pergi ka roemahnja The Tay Hou di Thay-swee-tjhung, perloe­nja boeat mengintip gerakannja Tjeng Sian Hweeshio. Maka malemannja itoe kapala goendoel brangkat ka Hoet-nia boeat mengoendang pada Tie Tjong Siansoe, dengen lantas soeda dikatahoei oleh Boe Beng Hiap Kek, kerna ia mengintip di kamarnja Hee Pat jang sakit, siapa bitjaraken itoe oeroesan sama iapoenja soedara angkat jang paling moeda, Tjhio Qoan Beng. Dan itoe malem, sebagimana biasanja, Boe Beng Hiap Kek dateng mengintip lagi, pada sasoedanja berselang lima malem ia tida dateng ka sitoe kerna ia doega tentoelah Tjeng Sian Hweeshio soeda baiik poelang dari Hoet-nia.

Koetika ia Boe Beng Hiap Kek naek di atasan gentengnja kamar djaga, lantes sadja ia denger pembitjarahan bebrapa oppas bersama pendjaga pintoe, jang menjeritaken prihal Tjeng Sian Hweeshio poenja kedatengan tadi siang, dan bagimana iaorang poenja chef poenja djawaban dan sikep terhadep oeroesannja Boe Beng Hiap Kek.

Boe Beng Hiap Kek merasa girang sekali koetika mendenger Tjeng Sian soeda dateng, kerna ia taoe tentoe Tie Tjong Siansoe soeda dateng. Ia soeda lama denger bahoea Tie Tjong Siansoe ada satoe djempolan dari Siao Lim Sie, tapi doeloenja ia pernah mendjadi brandal dan telah dipetjoendangin oleh San Soei Tjindjin dari tjabang Boetong, tatkala Tie Tjong Siansoe melakoeken perampasan pada barang-barangnja satoe ambtenaar besar jang mendjadi sobatnja San Soei Tjindjin. Sedeng dalem waktoe blakangan ini, Tie Tjong Siansoe berlakoe alim dalem iapoenja pertapahan di gredja Kong Hoei Sie, Hoet-nia, tapi kabarnja iapoenja ilmoe kapandean soeda banjak bertambah, kerna dengen soenggoe-soenggoe ia mejakinken lagi ilmoe silat jang ia dapet peladjarken dan tjabang Siao Lim Sie. Kaloe sadja ternjata Tie Tjong Siansoe masih sadja djahat, ia aken binasaken djiwanja, tapi djika betoel ia itoe poenja ilmoe kapandean silat beriamban tinggi, serta bisa diadjak bermoefaketan dalem satoe oeroesan besar, ia aken adjak ia itoe masoek dalem iapoenja persariketan. Kerna iapoenja kadatengan ka kota Ankhee poen ada boeat itoe maksoed.

Boe Beng Hiap Kek lantes berlaloe dari atas gentengnja itoe kamar djaga, menoedjoe ka sabelah dalem, kamoedian ia mendekem di atasnja itoe kantoor tikoan poenja roewangan besar, dimana biasanja soeka digoenaken boeat papreksahan perkara. Belon lama ia men­dekem, lantas ia menampak ada doea bajangan item jang mendatengin dari sabelah loear, kamoedian koetika soeda dateng lebih deket, dengen iantes ia kenalin satoe di antaranja ada Tjeng Sian Hweeshio, sedeng jang satoenja lagi ia tida kenal.

Boe Beng Hiap Kek merogo sakoe badjoenja boeat mengambil batoe Hoei-hong-sek jang ia biasa goenaken sebagi sendjata resia, tapi kabetoelan ia kena raba satoe toempoekan kertas toelis. Ia lantas ambil itoe kertas dan digeoempel goempel seperti satoe bola, kamoedian ia timpoekin ka djoeroesan kapalanja Tjeng Sian jang goendoel. Ternjata itoe bola kertas sekali poen ada begitoe enteng, tapi lantaran ditimpoekin dengen memake ilmoe khikang, dengen santer menjamber ka djoeroesan kapalanja Tjeng Sian. Tjoema sadja Tjeng Sian poenja ilmoe silat memangnja tida bisa di kata rendah, dengen tjepet ia soeda bisa denger gerakannja angin, dan taoe ada sendjata resia jang menjamber ka djoeroesan kapalanja, boeroe-boeroe ia berkelit dan teroes berpaling ka djoeroesan dari mana itoe sendjata resia dateng.

Ia liat di atas gentengnja itoe roewangan besar ada satoe bajangan item jang berdiri, sedeng iapoenja sabelah tangan menggape-gape padanja. Tjeng Sian lantes sadja kenalin bahoea itoelah Boe Beng Hiap Kek! Dengen zonder merasa lagi ia djadi sanget terkedjoet, sekali poen iapoenja kedatengan ada boeat mengintip padanja, tapi ia sama sekali tida menjangka bahoea ia sendiri jang kena di'intip orang lebih doeloe. Kaloe doeloean Tjeng Sian berniat maoe mengadoe djiwa dengen mati-matian pada Boe Beng Hiap Kek, tapi sekarang pada sasoedanja bertemoe, entah sebab apa, ia djadi djerih dan keder.

„Hahaha! kapala goendoel, mari sini ikoet akoe, di sana kita nanti bertempoer sampe seratoes djoeroesan, biar poen kaoe berdoea, akoe tanggoeng dalem tempo jang sanget tjepat akoe soeda bisa bikin kaoe orang menggletak di moeka boemi. Di sini tida baek kita bikin riboet, sebab aken mengganggoe pada toean roemah jang lagi tidoer dengen senang.”

Sahabisnja berkata begitoe, kombali Boe Beng Hiap Kek menggape-gape pada Tjeng Sian dan kawannja, kamoedian ia balikin badannja ka djoeroesan barat dan berlaloe dengen tindakan perlahan. Tjeng Sian Hweeshio djadi bersangsi, apa ia moesti mengikoetin pada itoe tetamoe maiem atawa djangan? Ia tinggal bengong boeat berpikir, mendadak kadengeran lagi soewaranja Boe Beng Hiap Kek jang tertawa geli, kamoedian berkata dengen menjindir: „He, kalde goendoel, kaloe kaoe tida ada itoe kabranian boeat menempoer padakoe, mengapa kaoe tida maoe boeroe-boeroe balik poelang sadja ka kaoe poenja sarang di Tay Kak Sie? Dan sekarang apa perloenja kaoe dateng mengintip ka sini, djika bertemoe sama akoe djadi mengkeret? Hahaha! loetjoe sekali!”

Tjeng Sian Hweeshio merasa panas dan maloe kena disindir begitoe roepa, kaloe tadinja ia tida ada itoe kabranian boeat mengedjer, sekarang ia djadi meloepaken iapoenja takoet, dan teroes mengedjer pada Boe Beng Hiap Kek. Perboeatan mana ditoeroet oleh Tjhio Goan Beng. Ternjata gerakannja itoe tetamoe malem ada sanget tjepet, biar poen Tjeng Sian Hweeshio mengedjer sakeras-kerasnja, tapi kaliatannja dengen enak sadja Boe Beng Hiap Kek bisa tinggalken itoe kapala goendoel menoeroet sebagimana ia soeka; sedeng Tjhio Goan Beng jang mengikoetin di sabelah blakangnja Tjeng Sian, napasnja menge-menge dan sakoedjoer badannja mandi kringet.

Achirnja Boe Beng Hiap Kek berlompat naek ka atas tembok kota, dimana ia menoenggoe sampe Tjeng Sian Hweeshio dateng inenjoesoel. Tida antara lama kamoedian keliatan itoe kapala goendoei soeda sampe, tapi kembali ia bersangsi boeat mengedjer ka atas itoe tembok kota; lebih doeloe ia berpaling ka blakang boeat meliat pada iapoenja kawan, jang ternjata katinggalan djaoeh sekali, dan lama djoega baroe ia itoe bisa sampe ka sitoe dengen napas se­perti kerbo maoe digorok dan djidat berketel-ketel keringet.

„Akoe tida sanggoep mengedjer lebih djaoeh toako,” kata ia, „sebab akoe poenja napas soeda abis.”

Tjeng Sian taoe bahoea Tjhio Goan Beng jang ilmoe silatnja sanget rendah di antara iaorang berlima, baroesan soeda abisken seantero tenaganja boeat mengikoetin, hingga sekarang ia djadi keabisan napas, sebab ia sendiri poen rasanja sanget tjape, kerna baroesan ia soeda kaloearken seantero iapoenja ilmoe kapandean berdjalan malem, tapi toch ternjata Boe Beng Hiap Kek tida bisa dapet disoesoel barang sadjengkal. Tjeng Sian djadi samingkin bingoeng, kerna kaloe ia moesti mengedjer teroes pada Boe Beng Hiap Kek tentoe ia moesti menjoesoel sendirian sadja.

„Hahaha! kaoe merandek, kalde goendoel, apa kaoe merasa djeri?” kadengeran itoe tetamoe ma­lem berkata dari atas tembok kota. „Mari berlompat naek ka sini, kita boleh maen-maen sedikit, dan nanti akoe kasi kaoe berkenalan sama akoe poenja kepelan dan tendangan jang keras.” Tjetig Sian djadi sengit kombali, dengen tida ber­pikir pandjang iagi lantas sadja ia berlompat naek ka atas itoe tembok kota, dan oleh kerna ia kwatir dibokong pada sabelonnja ia bisa berdiri dengen djedjak, sabegitoe lekas iapoenja kadoea kaki mengindjek tem­bok kota, lantas ia goenaken ilmoe hoei-yan-soe-tjo boeat lontjat ka saheiah kiri, sebab Boe Beng Hiap Kek berdiri di sabelah kanannja. Tjoema sadja itoe kakwatiran tida beralesan, sebab Boe Beng Hiap Kek tinggal adem dan memandang pada itoe kapala goendoel sembari bersenjoem sindir.

„Sekarang di atas ini tembok kota jang soenji, kita boleh mengoekoer masing-masing poenja kapandean,” kata Boe Beng Hiap Kek, „malah kaoe poenja kawan jang masih berada di bawah djoega, boleh soeroe ia naek boeat mengroeboetin padakoe, kerna kaloe tjoema kaoe sendiri sadja, akoe kwatir pada sabelonnja sapoeloeh djoeroesan, kaoe soeda djato melosot.”

Itoe omongan jang memandang enteng soeda mem­bikin Tjeng Sian djadi sanget panas dan sengit, maka dengen berseroeh seperti goentoer kerasnja ia menjerang pada Boe Beng Hiap Kek denken goenaken tipoe tjeng-liong-tam djiauw, satoe tipoe dari ie-kin-keng, kaloe tangan kanan jang disodorken ka depan kena ditangkis, dengen lantas tangan kiri menjoesoel; tapi Boe Beng Hiap Kek berlaga seperti orang jang tida mengarti, boekannja ia berkelit, tapi menangkis sama iapoenja tangan kiri (sebab itoe waktoe Tjeng Sian sodorken tangan kanannja). Hal itoe soeda membikin Tjeng Sian djadi sanget girang, koelika dengen tjepet ia sodorken tangan kirinja ka djoeroesan dadanja iapoenja lawanan sembari menarik poelang iapoenja tangan kanan, ia kasi kerdja iapoenja ilmoe kapandean hek-see-tjhioe jang ia sanget andelin. Ilmoe hek-see-tjhioe ada ampir satoe roepa dengen hong-see-tjhioe, samatjem ilmoe jang bisa meloekain pada orang jang mempoenjai ilmoe tiat-po-sam atawa kim-tjiong-to ilmoe jang tida mempan sama barang tadjem; kaloe sadja orang kena diserang oleh itoe poekoelan hek see-ljhioe atawa hong-see-tjhioe, tida ampoen lagi oerat-oerat di dalem toeboehnja mendjadi loeka dan achirnja membawa kamatian. Itoelah bisa dimengarti, sebab saorang jang mempoenjai ilmoe wedoek djoega, toch tida bisa tahan sama itoe matjem poekoelan, apapoela orang jang biasa.

Tapi Boe Bent Hiap Kek memang dengen sengadja maoe taoe Tjeng Sian poenja ilmoe kapandean sampe di mana, koetika ia menangkis Tjeng Sian poenja tipoetjeng-liong-tam-djiauw tangan kanan, lebih siang ia soeda bersedia gerakan brikoelnja jang tida terdoega, koetika meliat Tjeng Sian kaloearken iapoenja ilmoe hek-see-tjhioe, dengen tida berajal lagi ia lantas kasi kerdja iapoenja ilmoe tan-tjiang dengen menggerakin Seantero ambekannja dalem iapoenja toeboeh ka djoeroesan iapoenja tangan kanan boeat menangkis Tjeng Sian poenja Hek-see-tjhioe, sabagitoe lekas iaorang poenja tangan beradoe satoe dengen laen, Tjeng Sian rasaken iapoenja tangan seperti kasemoetan dan meneroes ka iapoenja sakoedjoer badan, hingga tangan kirinja itoe sebagi djoega melengket sama langanja ia­ poenja lawanan dengen tida bisa digerakin lagi.

Tjeng Sian djadi sanget terkedjoet, sabisa-bisanja berdaja boeat menarik poelang iapoenja tangan sem­bari mengaloearken iapoenja kliikang, tapi ternjata sia-sia sadja, sekali poen sampe keringet di djidatnja berketel-ketel. Koenjoeng-koenjoeng kedengeran Boe Beng Hiap Kek berseroeh dengen keras, sasa'at itoe djoega Tjeng Sian terpental melajang ka atas oedara, kamoedian djato terbanting ka moeka boemi dari itoe tembok kota jang tingginja kira-kira doeapoeloeh kaki. Oieh kerna takoet mendapet ioeka, Tjeng Sian gerakin iapoenja seantero kapandean iimoe khikang boeat melindoengin iapoenja toeboeh, agar djangan sampe mendapet ioeka di dalem.

Boe Beng Hiap Kek poen lontjat toeroen mengikoetin, hingga ia djato berbareng sama badannja Tjeng Sian jang terbanting, dengen tida mengasi itoe kapala goendoel koetika boeat berdaja, Boe Beng Hiap Kek lantes tiam oerat iehernja Tjeng Sian, jang itoe waktoe baroe sadja berniat berlompat bangoen, hingga ia terpaksa moesti tinggal reba di moeka boemi dengen tida bisa bergerak lagi.

Boe Beng Hiap Kek berlompat naek lagi ka atas tembok kota, dan sesampenja ia meliat ka djoeroesan depan, ternjata Tjhio Goan Beng jang ketakoetan djoestroe pandjangken kakinja boeat maboer. Boe Beng Hiap Kek kwatir ia pergi poelang mengasi kabar pada Tie Tjong Siansoe, boeroe-boeroe iontjat toeroen dan mengedjer seperti kilat tjepetnja, dalem sedikit sa'at sadja ia soeda bisa soesoel pada Tjhio Ooan Beng, kamoedian tjekel iapoenja batang leher dan dibanting ka moeka boemi. Tjhio Ooan Beng djatoh melosoh sebagi satoe poehoen pisang jang ditebang.

„Ampoen, hiapkek, akoe tjoema mengikoet sadja pada akoe poenja toako,” kata itoe begal pengetjoet, „dalem segala hal akoe tida tjampoer tangan apa-apa. Kasianin akoe poenja djiwa semoet jang tida berharga.”

„Ja, kaoe memang ada satoe manoesia jang trapoenja goena,” kata Boe Beng Hiap Kek; „tapi boeat samentara ini kaoe moesti disingkirken doeioe dari kaoe poenja kontjo, agar djangan mengadoe biroe, nanti djika oeroesan soeda mendjadi beres, akoe aken lepasken pada kaoe.”

Sehabisnja berkata begitoe ia lantas tengteng pada Tjhio Ooan Beng seperti orang menengteng satoe ajam, sesampenja di bawah tembok kota, ia tiam itoe begal poenja bawah katek, hingga ia djatoh doedoek dengen tida bisa bergerak. Boe Beng Hiap Kek kaloearken satoe tambang pandjang; dan oedioengnja di'iketken pada bagian kateknja Tjhio Goan Beng, dan laen oedjoengnja ia pegang dalem tangannja, kamoedian ia berlompat naek lagi ka atas tembok kota. Ia kerek naek Tjhio Goan Beng dan toeroenken lagi ka sabelah loearnja kota, kamoedian ia sendiri lontjat toeroen ka bawah.

Tapi alangkah iapoenja terkedjoet koetika ia tida menampak pada Tjeng Sian, jang baroesan ia tiam dan menggietak di tempat dimana ia djato. Ia tjelingoekan meliat ka segala djoeroesan, tapi tida ter­tampak bajangannja barang satoe manoesia. Ia berpikir sabentaran, kamoedian ia bersoeit dengen meniroe soearanja boeroeng tjoelik-tjoelik, tida antara lama kamoedian kadengeran satoe soeara jang saroepa itoe menjaoetin dari tempat gelap, kamoedian doea bajangan item menjamperin dari sabelah depan.

„Siapa? Kapan matahari dan boelan terbit?” menegor Boe Beng Hiap Kek.

„Kita orang kawan sadjabat dari Tjhe Tjoei (aeridjo); matahari dan boelan dengen lekas aken oendjoek tjahajanja jang gilang-goemilang,” saoet itoe doea orang dengen berbareng.

Tjhe Tjoei djika dirangkepken mendjadi satoe hoeroef Tjeng, merk karadjahan bangsa Boan, sedeng matahari dan boelan djika dirangkepken meroepaken satoe hoeroef Beng, jaitoe merk karadjahan Han jang paling blakang dan diroeboehken oleh itoe bangsa Tartar. Dari iaorang poenja pembitjarahan lantes bisa dikatahoei jang marika itoe ada anggota perkoempoelan penjinta jang maoe meroeboehken bangsa Boan dan mendiriken lagi karadjahan bangsa Han.

„Oh, kiranja kadoea soedara Ong," kata lagi Boe Beng Hiap Kek. „Mana itoe kapala goendoel jang baroesan akoe tinggalken di sini ?”

„Soeda dibawa pergi ka kita poenja tempat semboeni oleh doea kawan kita,” djawab satoe di antaranja. „Abis itoe kapala goendoel maoe dibagimanain?"

„Apa iapoenja oerat soeda ditiam lagi? sebab kaloe kalamahan ia poenja djiwa bisa tiwas.”

„Belon; biar sadja ia mampoes, kaloe tida kaboeroe dibaekin, sebab itoe kapala goendoel kadosahannja sanget banjak, teroetama ia ada mendjadi spionnja bangsa Boan, hingga pantes sekali djika ia dihoekoem mati.”

„Kaloe begitoe tida apa,” kata Boe Beng Hiap Kek, „tadinja akoe ingin mengompes katerangan dari ianja. Apa tida ada kabar apa apa?”

„Apa kaoe belon bertemoe sama kaoe poenja istri ?”

„He kapannja ia dateng ?” menanja Boe Beng Hiap Kek dengen heran. „Tida akoe belon bertemoe sama ianja; sekarang ia ada di mana?”

„Ia pergi mentjari pada kaoe di itoe roemah pergoeroean, heran sekali mengapa tida bertemoe.”

„Nah, kaloe begitoe, bawa djoega ini orang ka kaoe poenja tempat semboeni. Ia tra'poenja kamampoehan jang boleh dimaloein, boleh kerem sadja sampe kita poenja oeroesan beres, kamoedian boleh lepasken padanja. Sekarang akoe maoe pergi mentjari istrikoe.”

Sehabisnja berkata begitoe ia lantas tiam lagi kateknja Tjhio Goan Beng dan tendang blakangnja dengen perlahan, serta angkat iapoenja badan dengen didjambak ramboetnja sampe tiga kali. Dengen perlahan ia bisa bisa bergerak lagi sabagimana biasa, tapi oleh kerna katek dan poendaknja masi teriket, ia pikir tida goenanja boeat merat, sebab taro ia bisa djoega, tida oeroeng bakal katangkep lagi.