Kokki Bitja 1864/SEGALA ROEPA KWÉ -KWÉ.
SEGALA ROEPA KWÉ -KWÉ.
――――――
Poeding dari Sagoe.
Masak itoe sagoe baik-baik sama soesoe, kaloe soedah angkat, dan bikin dingin, abis ambil telor barang anam bidji dan adoek-adoek sama soesoe, taroh kaijoe manis haloes, biskwit jang soedah di toemboek haloes, dan goela sedikit; kaloe soedah, taroh di tampatnja dan lantas masak: dia poenja koeah, misti bikin bagimana lain-lain poeding.
Poeding dari Soekoen.
Ambil soekoen, dan abis reboes dahoeloe, kaloe soedah, toemboek haloes seperti oebi, abis ambil telor, dan adoek sama soesoe, dan goela sedikit; abis adoek, masak dalam tjitakannja: dia poenja koeah bagimana lain-lain.
Poeding dari Deeg.
Ambil satoe deeg, dan taroh toedjoe telor, tjoema merahnja sadja, dan satoe sama poetinja: abis taroh mantega jang entjer, kaloe soedah, banting baik-baik, abis taroh di tampatnja, kaloe maoe masak, dan boengkoes sama serbetta, tetapi itoe serbetta dahoeloe misti gosok sama mantega, dan ikat kras, abis masak, dia poenja koeah poenja tjampoeran, telor, anggor, goela, aijer mawar dan kaijoe manis.
Poeding dari Roti.
Ambil satoe roti sama doea-blas telor, tjoema merah-nja sadja, itoe roti misti rendam di soesoe dahoeloe; dan taroh mantega, kenari, kisjmis, goela sedikit, abis taroh di tampatnja, dan lantas bakar: dia poenja koeah ada anggor madera, kaloe trada, anggor asam djoega boleh, telor, goela, aijer mawar, kaijoe manis, mantega dan garam.
Lain roepa
Lain roepa.
Ambil satoe deeg, mantega barang satoe mangkok, sapoeloeh telor, poekoel baik-baik, itoe mantega adoek sama itoe deeg dahoeloe, lantas adoek sama itoe telor jang soedah di poekoel, ambil satoe serbetta gosok mantega, abis taroh itoe deeg jang soedah di adoek, boengkoes baik-baik, lantas reboes sampe matang, sausnja anggor madera, telor ampat atau lima bidji, ambil merahnja sadja, poekoel baik-baik, adoek sama itoe anggor madera, goela dan sedikit aijer mawar, masak adoek-adoek sampe kentel, kaloe soedah kentel, angkat.
Taart Inggris.
Ambil soesoe satoe bottol ketjil, saprapat nasi dan saprapat mantega, anam bidji telor, sedikit aijer mawar, kaijoe manis Wollanda dan goela, abis tjampoer samoea djadi satoe, ini di bikin trada pake koelit.
Taart dari Telor.
Taart dari Kenari.
Ambil satengah pond kenari dan koepas koelitnja, abis paroet sampe haloes, kaloe soedah, siram sama sedikit aijer mawar, kaloe soedah siram, boeka di angin biar kring; abis ambil satoe pond goela jang haloes, dan taroh sedikit kaijoe manis Wollanda, delapan telor ajam tjoema merahnja sadja; dan poeter sama itoe goela sampe djadi poeti, kaloe soedah, ambil itoe poeti telor jang tadi, dan poeter baik-baik sampe djadi sama, kaloe soedah tjampoer itoe merah telor jang tadi sama poetinja, dan poeter lagi sampe djadi rata, abis taroh tepong satoe sendok, baroe taroh dia poenja kenari, dan poeter lagi, kaloe soedah, taroh di tempatnja, baroe toeang itoe kenari, dan abis bakar pelahan-pelahan, sampe matang.
Lain roepa.
Satoe pond kenari, dan doea poeloeh telor (poeti dan merah) satoe pond goela, abis adoek baik-baik, kaloe soedah, taroh di panas, dan djangan lama; dahoeloe adoek itoe telor sama goela, misti adoek sampe poeti sekali, baroe taroh di tampatnja, dan lantas bakar sampe matang.
Taart dari Nanas.
Ambil tiga nanas dan koepas koelitnja, abis pottong ketjil-ketjil, kaloe soedah, taroh dalam satoe serbetta dan saring; dia poenja aijer tjampoer sama anggor asam, dan taroh satoe pond goela, satoe ons kaijoe manis, saprapat pond mantega entjer dan saprapat pond kisjmis.
Lain roepa.
Ambil doea atau tiga nanas tjoetji, koepas biar bresih, tjingtjang-tjingtjang, iris-iris biar haloes, sampe di mana batangnja, batangnja boeang taroh sedikit garam rames boeang aijernja, ambil satoe kwali taroh sedikit aijer sama goela passir, taroh satoe atau doea lembar daon djeroek poeroet, masak sama-sama, kaloe hampir kentel boeang itoe daon djeroek, masokin itoe nanas, adoek-adoek sampe kring angkat, bikin korstnja, satoe pond tepong, anam bidji telor, poekoel baik-baik, ambil mantega satoe mangkok bikin entjer, adoek sama-sama itoe tepong lantas taroh itoe telor, adoek singgan sampe, boleh taroh di piring, lantas taroh itoe nanas di dalamnja, separonja itoe tepong giling tipis-tipis, toetoep di atas itoe nanas, pinggirnja taroh sedikit poeti telor biar dia boleh belengket, bakar taroh api di atas di bawah, sampe soedah koening, (matang) angkat, bikin bagitoe sampe abis.
Room taart.
Ambil kenari, toemboek biar haloes, satoe bottol soesoe taroh goela singgan sampe manisnja, masak, lantas taroh itoe kenari, jang soedah toemboek haloes, lima telor ambil merahnja sadja, sama vanilli, masak sama-sama, adoek baik-baik sampe kentel, korstnja satoe pond tepong, tiga sendok mantega, bikin panas, lantas adoek sama-sama itoe tepong, lantas taroh dalam satoe piring, bikin rata sama itoe piring, taroh itoe soesoe jang soedah masak sama amandel, ambil satoe pan taroh itoe kwé, bakar sama api di atas dan di bawah; kaloe soedah matang angkat, biar tinggal sama piringnja, kaloe maoe makan baroe pottong-pottong.
Kwé Broeder.
Ambil doea deeg, doea poeloeh telor, doea mangkok mantega entjer, kaloe terlaloe entjer, taroh soesoe satoe mangkok satengah, dan doea sendok goela, itoe goela misti bikin kring sama deeg, dan abis taroh di tampatnja dan lantas bakar sampe matang.
Lain roepa.
Satoe pond tepong dan poekoel sama toeak dahoeloe, sampe djadi kentel sekali, dan abis kasih tinggal sampe doea djam biar djadi mangkak, kaloe soedah mangkak, baroe taroh delapan telor, dan misti poekoel baik-baik sekali, abis taroh mantega jang soedah entjer satoe pond, dan poekoel sama-sama itoe tepong, kaloe soedah poekoel sampe rata, taroh kisjmis, kenari, (tetapi itoe misti pottong haloes-haloes dahoeloe), dan manisan djeroek, dan itoe lagi misti di pottong haloes-haloes dahoeloe, baroe tjampoer sama itoe tepong, kaloe soedah taroh dalam tampat masakannja, dan gosok dahoeloe itoe tjitakannja sama mantega; kapan liat jang itoe tepong soedah mangkak, baroe taroh di api, di atas dan di bawah misti pake api, dan kaloe lagi bakar misti kira-kira djangan sampe djadi angoes.
Lain roepa.
Broeder Djagong.
Ambil barang sapoeloeh djogong paroet, kerik sama piso, apa jang tinggal di batang-batangnja boeang, ambil sapoeloeh telor merahnja sadja, poekoel baik-baik, taroh mantega, goela passir haloes, ambil satoe aijakan saring sama sekali biar sampe itoe djagong abis kaloear dia poenja kentel, soedah tinggal ampasnja boeang, ambil satoe pan broeder gosok mantega biar rata, ambil satoe biskwit toemboek haloes siram di mana itoe pan, baroe taroh itoe djagong jang soedah di adoek sama sekali, lantas bakar, taroh barah api di atas di bawah biar rata, sampe dapat baoe-nja, baroe boeka pelahan-pelahan, kaloe soedah matang baroe angkat, hampir dingin kasih kaloear dari pan.
Pul-Wafelen.
Ambil telor poenja merah brapa banjak soeka, sama sedikit toeak dan aijer dingin, djae, pala, kembang pala, mantega jang entjer dan aijer mawar; kaloe soedah, adoek sama-sama dan kasih dia mangkak, abis bakar dalam dia poenja tampat sampe matang.
Kaloe bikin Wafel.
Masak dahoeloe doea mangkok aijer dingin sampe mendidih, kaloe soedah mendidih, taroh satoe sendok mantega, abis ambil doea mangkok tepong, dan kasih masok sama itoe aijer, abis masak baik-baik; kaloe soedah, misti angkat, dan kasih dingin, abis ambil barang delapan bidji telor, dan poekoel poetinja baik-baik, abis tjampoer, dan banting lagi sekali ; kaloe soedah taroh soesoe, dan lagi misti banting sampe djadi lebih kentel dari pannekoek; kaloe soedah taroh di tampatnja dan bakar sampe matang.
Lain roepa.
Ambil satoe pond tepong dan doea-blas telor, lebih dahoeloe misti tjampoer sama toeak sampe djadi kentel , kaloe soedah, misti rames baik-baik, dan abis kasib tinggal sampe doea djam biar djadi mangkak, kaloe soedah mangkak, poekoel sama itoe doea-blas telor, tetapi poetinja djangan boeang, dan abis poekoel sama aijer panas; kaloe soedah poekoel sampe rata, taroh di panas sampe dia djadi mangkak, dan kaloe soedah mangkak, misti lantas taroh di tampatnja dan bakar, dalam doea minuut misti balik, dan dalam doea minuut lagi misti angkat: kaloe liat ada terlaloe tebal, misti tjampoer sedikit aijer klapa, dan adoek baik-baik, sampe djadi lemes roepanja, atau lembekan.
Lain roepa.
Ambil satoe pond mantega dan poekoel baikbaik, sampe djadi poeti sekali, abis taroh tepong bras satengah pond, sama doea-blas telor, dan poekoel lagi, kaloe soedah rata poekoelannja, taroh sedikit soesoe, dan abis misti tjoba bakar dahoeloe, kaloe trada boleh baik tambain lagi sedikit soesoe.
Lain roepa.
Ambil sapoeloeh telor, lima sama poetinja, dan lima poenja merah sadja sama poeti, dan lagi sama satoe deeg, sama lima pond mantega jang soedah di bikin entjer, satoe mangkok soesoe dengan goela sedikit, dan abis bakar di tampatnja sampe matang.
Lain roepa.
Ambil satoe deeg, sapoeloeh atau doea-blas telor, tiga pake sama. poetinja, poekoel baik-baik, adoek sama itoe tepong sama doea poeloeh sendok mantega, taroh sedikit soesoe, sampe boleh di sendok boeat bakar, kaloe soedah matang boleh makan sama kaijoe manis, sama goela haloes.
Lain roepa.
Ambil satoe kwali, doea mangkok aijer, satoe mangkok mantega, masak sampe mendidih, angkat dari api, taroh tepong adoek baik-baik sampe singgan kentel, ambil sapoeloeh telor, poekoel baik-baik, adoek sama-sama itoe tepongnja, kaloe terlaloe kentel, taroh lantas, soesoe singgan sampe boleh di sendok, boeat bukar di pan wapel.
Kwé Soes.
Mantega satoe pond dan aijer dingin satoe pond satengah, tjampoer sama-samma, kaloe soedah, taroh di tampatnja dan masak sampe mendidih, taroh satengah pond tepong, dan angkat dari apinja, misti gojang-gojang sampe djadi sama rata, abis kerdja dingin dahoeloe, kaloe soedah dingin, banting sama sapoeloeh telor, dan abis bakar sama api di atas dan di bawah.
Lain roepa.
Satoe pond satengah mantega, satoe pond tepong dan doea pond aijer dingin, lebih dahoeloe masak itoe mantega sama aijer sampe mendidih betoel, kaloe soedah mendidih, misti lantas taroh itoe tepong, abis bikin dingin; kaloe soedah dingin, rames-rames sama tiga poeloeh lima telor ajam.
Lain roepa.
Satengah pond tepong, doea poeloeh telor, kasih kaloear dia poenja merah dan banting sendiri, dan poetinja lagi bagitoe; satoe pond aijer,satengah pond mantega dan masak sama-sama sampe mendidih betoel, kaloe soedah mendidih, baroe taroh itoe tepong.
Lain roepa.
Ambil satoe kwali bresih atau pantji, satoe mangkok mantega, doea mangkok aijer, masak sampe mendidih, lantas taroh tepong trigoe, adoek-adoek itoe tepong sampe kentel, abis angkat dari api, ambil sapoeloeh atau doea-blas telor, adoek sama-sama, kira sampe boleb sendok, kaloe koerang entjer boleh tambah lagi telor, sampe kira boleh di sendok, ambil tampat ketjil-ketjil (pansoes) gosok sama mantega, ambil satoe pan besar, taroh di bawahnja barah; itoe pan ketjil taroh satengah-satengah, tepong jang soedah di adoek, atoer dimana pan besar ampat atau lima bidji, djangan terlaloe dekat-dekat, sebab dia misti naik, abis toetoep sama itoe toetoepan, baroe taroh barah di atasnja, di atas itoe toetoepnja, di atas di bawah api, djangan terlaloe banjak, kaloe soedah dapat baoenja, pelan-pelan boeka, kaloe soedah matang angkat, lantas taroh dalam satoe bakoel, djangan kena angin dahoeloe, itoe pan ketjilnja taroh lagi dari itoe tepong, bagitoe djoega sampe samoeanja abis, itoe tepong jang soedah di adoek.
Kwé Sumprong.
Ambil satoe mangkok tepong, satoe mangkok telor, satoe mangkok mantega, satoe mangkok soesoe dan satoe mangkok aijer sama sedikit goela, kaijoe manis misti sekira sadja: kaloe soedah, bikin bagimana misti, dan lantas bakar.
Lain roepa.
Satoe pond tepong, saprapat pond kaijoe manis, tetapi dahoeloe misti toemboek haloes, anam telor, saprapat pond mantega jang soedah di bikin entjer, dan satoe mangkok soesoe; itoe tepong, telor dan kaijoe manis tjam- poer sama sekali, dan rames-rames, kaloe soedah taroh mantega, tetapi misti jang entjer, dan lagi taroh aijer panas, abis bakar di sumprong bresih.
Lain roepa.
Satoe pond tepong, lima bidji telor, taroh sedikit areroet, toemboek kaijoe manis, goela, sedikit mantega, aijer klapa, adoek dahoeloe sama itoe tepong baroe taroh sedikit mantega satoe sendok thee sadja, itoe telor poekoel dahoeloe baik-baik, ambil sapottong klapa paroet, taroh satoe mangkok aijer rames baik-baik, ambil santannja, itoe ampasnja taroh lagi doea mangkok aijer rames lagi, taroh di saringan rames boeang ampasnja, taroh lain tampat, itoe santan kentel lantas adoek sama itoe tepong sama sekali, adoek sampe entjer, kaloe koerang entjer pake itoe santan klapa jang kadoea kali di peras, ambil tampat bakaran kwé sumprong gosok mantega, taroh di api, kaloe panas taroh satoe sendok, lantas bakar panas-panas lantas goeloeng; abis taroh lagi lain bagitoe djoega bakar. sampe abis itoe kwé.
Collembijn.
Ambil sapoeloeh telor, dia poenja goela misti timbang sama ini sapoeloeh telor, biar sama bratnja, dan sebagitoe banjaknja misti pake di sini: kaloe soedah timbang itoe goela, taroh dalam lain tampat; itoe telor jang sapoeloeh kasih kaloear lima, dan lagi misti pisain: abis ambil tepong dan timbang sama lima telor poenja brat, abis timbang, taroh dalam satoe tampat, kaloe soedah, ambil itoe sapoeloeh telor poenja poeti dan poekoel dahoeloe, djangan balik kaloe lagi poekoel, misti poekoel bagimana bermoela soedah poekoel, abis poekoel dia poenja koening sampe djadi rata; kaloe soedah rata betoel poekoelannja, baroe kasih masok itoe goela, dan misti poekoel lagi sekali sampe rata; kaloe rasa itoe sapoe ada enteng di tangan, tamba lagi tepong, tetapi misti pelahan-pelahan sadja, dan djangan brenti dari poekoel sama dia, sampe itoe tepong tertjampoer baik-baik sekali, kaloe lagi sekali rasa itoe sapoe nda enteng, baroe boleh brenti; abis ambil tampatnja dan gosokin mantega, kaloe dah lantas bakar: kaloe maoe itoe kwé djadi mengkilap, taroh di dalam satoe tampat jang sama rata, abis gosokin goela di atasnja, dan bakar apinja di atas dan api di bawah.
Lain roepa.
Ambil satoe mangkok besar jang bresih, ambil satoe mangkok thee sama tepong, sutoe mangkok mantega, satoe mangkok telor, satoe mangkok goela passir jang haloes, itoe goela, mantega, telor, jang soedah di taker sama rata, taroh dalam itoe mangkok besar jang bresih, poekoel baik-baik sampe dia naik bagoes, kaloe soedah naik, baroe taroh itoe tepong jang soedah di taker, adoek baik-baik, ambil tampat ketjil-ketjil gosok mantega taroh itoe kwé singang sampe, lantas atoer di nana pan besar, djangan terlaloe dekat-dekat, taroh api di atas di bawah, sampe dapat baoe, baroe boeka, kaloe soedah matang betoel soedah koening baroe angkat.
Kwé Makroon.
Ambil satoe pond kenari abis koepas dia poenja koelit, dan toemboek sama satoe pond goela batoe, tetapi itoe kenari misti njanjah dahoeloe baroe toemboek haloes; kaloe soedah, ambil delapan telor poenja poeti dan poekoel baik-baik sampe kentel, abis adoek itoe goela sama-sama kenarinja: itoe poeti telor jang tadi misti bikin seperti bola, dan taroh kaijoe manis jang soedah di toemboek; kaloe soedah, taroh di tampatnja dan lantas bakar sampe matang, dan misti kira-kira kaloe lagi bakar, djangan sampe itoe djadi angoes, sebab kaloe soedah angoes, trada enak di makan.
Lain roepa.
Satoe pond kenari, sama lima bidji telor ajam, itoe kenari misti bikin haloes sekali, abis taroh lagi lima poeti telor, sama doea pond goela batoe: kaloe itoe kenari soedah haloes, misti tjampoer dan djaiin satoe.
Lain roepa.
Toemboek dahoeloe itoe kenari, baroe timbang satengah pond, dahoeloenja telor tjoema poetinja sadja, dan taroh goela satengah pond, kaloe soedah bakar, dan apinja misti di atas dan di bawah, api jang di bawah, trada misti terlaloe panas, tjoema anget sadja, dan api jang di atas boleh lebih panas.
Lain roepa.
Ambil amandel, koepas dan toemboek baloes, kaijoe manis, goela toemboek haloes, ambil poeti telor barang ampat bidji sadja, poekoel baik-baik, adoek sama-sama itoe kenari, ambil kertas taroh sedikit mantega, abis itoe kwé bikin boemdar atau sendok satoe-satoe taroh di kertas atoer di pan djangan dekat-dekat, taroh api di atas di bawah, bakar sampe dapat baoe, kaloe soedah matang baroe angkat, baroe taroh lagi jang lain dan bakar bagitoe sampe abis.
Pannekoek.
Satoe pond mantega jang baroe sekali, dan poekoel baik baik sampe poeti sekali, kaloe soedah, taroh satengah pond tepong, satengah pond goela, tjengké, kembang pala dan kaijoe manis, tjampoer pala satoe bidji, tjengké sapoeloeh, kembang pala sedikit sadja, baroe tjampoer sama itoe tepong; kaloe soedah, taroh goela, dan adoek baik-baik sama tiga poeloeh atau ampat poetih telor; poekoel itoe poeti telor sendiri sampe kras, baroe boleh tjampoer sama sekali;
kaloe taroh itoe poeti telor, djangan gojang; kaloe soedah taroh poeti telor, ambil sapottong kertas dan itoe kertas misti di gosokin mantega dahoeloe, abis taroh di tampatnja, dan lantas bakar: taroh api di bawah barang anam atau toedjoe pottong barah, dan di atas misti ada banjakan; soedah matang, taroh lagi tepong, dan kaloe bakar kombali sampe matang, abis taroh tepong lagi, dan bagitoe sampe djadi penoeh, dia poenja kaijoe manis doea atau tiga pottong, dia poenja kembang pala misti ada lebih banjak dari tjengké. Lain roepa.
Ambil anam sendok tepong, ampat sendok goela, dan doea-blas telor ajam; abis poekoel sampe djadi seperti deeg, dan berikoet bagitoe: lebih dahoeloe dia poenja soesoe misti di masak.
Lain roepa.
Ambil satoe pond tepong, adoek sama aijer klapa, sampe kentel seperti deeg, anam atau toedjoe telor poekoel baik-baik, adoek sama satoe sendok mantega, adoek sama sekali sama sedikit soesoe, biar adoek dahoeloe baik-baik, kaloe koerang entjer baroe taroh lagi aijer klapa singgan sampe, bakar di pannekoek, itoe pannja gosok sama mantega dahoeloe.
Kwé Adas.
Lain roepa.
Ambil adas manis barang satoe mangkok ketjil, ambil satoe kwali taroh itoe adas, taroh diapi adoek-adoek sampe panas, angkat, toemboek sedikit djangan sampe haloes, satoe mangkok telor, satoe mangkok goela poekoel baik-baik sampe naik, kaloc soedah naik, taroh satoe mangkok tepong adoek baik-baik, lantas taroh di mana piring ketjil-ketjil satengah penoeh sadja, itoe piringuja gosok mantega dahoeloe baroe taroh itoe kwé, taroh barang doea atau tiga di mana pan, taroh api di atas di bawah, bakar sampe inatang, angkat taroh lain bagitoe djoega sampe abis.
Kwé Tjintjin.
Roti pake Soesis.
Satoe deeg sama anam telor, satoe dengan poetinja, dan jang lima tjoema merahnja sadja, satengah mangkok soesoe, dan mantega sekira-kira sampe sadja, dahoeloe bikin entjer, baroe taroh goela sedikit, abis banting baik-baik: kaloe soedah taroh di panas, dan biar sampe mangkak; lagi satoe deeg, satengah kati babi; dan ini babi misti bikin soesis, taroh lada, kaijoe manis, tjengké, pala dan kembang pala, abis goreng itoe soesis; kaloe soedah goreng, taroh di tampat masakan broeder; dan pake api di atas dan di bawah.
Lain roepa.
Ambil satoe deeg tepong atau bikin deeg sendiri satoe pond tepong, adoek sama toeak sampe kentel, kasih tinggal sampe dia naik, ambil satoe kati babi tjingtjang biar haloes, toemboek lada, tjengké, pala, garam singgan sampe, adoek sama itoe babi, bikin satoe-satoe kepel poenja besar, goreng sama gemok babi atau sama minjak klapa sampe samoeanja soedah matang angkat dari minjak taroh di piring, ambil anam atau toedjqe telor merahnja sadja, poekoel baik-baik, ambil satoe mangkok mantega bikin panas, lantas adoek sama itoe deeg, adoek sama-sama itoe telor jang soedah di poekoel, adoek baik-baik biar sampe naik sedikit sampe kontel boeat boengkoes itoe babi, itoe poeti telornja poekoel, ambil sedikit-sedikit itoe tepong, boengkoes-boengkoes itoe babi jaug soedah di goreng, bikin satoe-satoe sampe abis samoeanja, di atasnja gosok sama itoe poeti telor sampe litjin, ambil kertas atau pan ketjil-ketjil jang pandjang, gosok mantega, taroh itoe kwé jang soedah di boengkoes sama babi, ambil satoe pan besar atau itoe kwé tiga atau ampat bidji, taroh djangan terlaloe dekat, taroh api barah di atas di bawah, bakar sampe dapat baoe baroe boeka, kaloe soedah koening, matang angkat, abis tarolh lain lagi sampe abis.
Lain roepa.
Ambil saprapat bottol soesoe sama sedikit goela, masak di barah adoek baik-baik sampe hampir kentel angkat, ambil satoe deeg tepong, anam bidji telor merahnja poekoel baik-baik, satoe mangkok mantega adoek atau rames sama deeg baik-baik, sama itoe soesoe jang soedah di masak, sama itoe merah telor, adoek singgan sampe kentel; ambil satengah kati babi atau daging tjoetji bresih tjingtjang biar haloes, toemboek tjengké, pala, kembang pala, lada, garam haloes, taroh sama itoe babi, doea atau tiga telor adoek sama-sama baik-baik, ambil satoe tatjoe taroh gemok babi atau minjak klapa, bikin itoe daging boendar seperti frekedel besar, gosok sama poeti telor biar litjin, goreng sampe matang sekali angkat dari minjak, taroh di piring, ambil satoe piring dalam gosok mantega taroh separo dari itoe tepong jang soedah di adoek; bikin rata sama djoega itoe piring soedah digoreng, taroh satoe-satoe sendok ketjil, toetoep baik-baik, djangan boleh masok minjak, bikin tiga atau ampat bidji, ambil satoe tatjoe (panggorengan) taroh minjak klapa barang satengah bottol, taroh itoe kwé jang soedah di bikin goreng sampe koering, kaloe soedah koening angkat, taroh lagi lain, bikin bagitoe djoega sampe abis.
Kwé Obat.
Ambil satoe bottol bier, dan masak dalam tampat masakan kwé, abis taroh aijer panas sedikit, sama merah telor barang doea, tjengké doea bidji, pala, kaijoe manis dan goela passir, dan lagi pake roti.
Lain roepa
Satengah pond tepong, satengah pond mantega, satengah pond goela dan satengah pond kenari, dia poenja mantega misti poekoel sampe doea djam, misti pake mantega jang baik, dan misti tjoetji dahoeloe, biar garamnja hilang; itoe kenari misti toemboek sama doea poeti telor; kaloe soedah toenboek itoe kenari, taroh lagi tiga telor sama-sama merabnja, dan tjampoer sama itoe mantega, abis tjampoer, taroh sedikit tepong; abis ambil satoe papan, tetapi itoe papan misti gosokin tepong, djangan sampe melengket; kaloe soedah, pottong-pottong saroeas djari pandjangnja, abis taroh atas telenan; kaloe maoe bakar, ambil satoe telor dan tindis di atas itoe kwé, dan siram lagi atasnja kaijoe manis dan goela.
Ketan Siri Kaija.
Ambil ketau barang satoe batok, dan tjoetji bresih sekali; kaloe soedah bresih, rendam barang satoe djam, abis angkat dan tjoetji bresih kombali, abis koekoes; satengah koekoes angkat, dan ambil aijer santan taroh di dalam itoe ketan, dan kasih tinggal saprapat djam; kaloe soedah liwat saprapat djam, koekoes lagi sekali sampe matang; kaloe soedah matang, misti lantas angkat; ambil telor ajam barang toetjoe bidji dan poekoel poetinja baik-baik, abis poekoel baik-baik, ambil klapa sabelah, abis paroet dan tjampoer sama itoe telor; kaloe soedah, ambil goela arén dan toemboek haloes, taker satoe mangkok thee, dan tjampoer sama itoe telor, abis adoek samoeanja sama-sama; kaloe soedah, tapis sama satoe serbetta, dan dia poenja ampas boleh taroh aijer dan adoek kombali, abis rames, tapis lagi, dan taroh sama itoe telor jang tadi; kaloe soedab, ambil satoe mangkok, dan taroh atas lekkar: abis ambil satoe kwali wadja, dan isi dengan aijer, itoe mangkok kasih masok dalam itoe wadja, abis masak; kaloe lagi masak misti djaga, djangan sampe masok aijer dalam itoe mangkok; kaloe soedah matang, angkat, dan makan sama itoe ketan.
Tapé.
Ambil nasi barang satoe bakoel ketjil, dan boeka di atas satoe tetampah sampe dingin: kaloe soedah dingin, siram ragi di atas itoe nasi, raginja barang doea bidji sadja, kaloe soedah tjampoer baik-baik, baroe taroh di paso, dan toetoep sama daon pisang: abis simpan barang doea hari, baroe boleh makan.
Kwé pastij
Ambil satoe aijam, abis pottong, dan bikin bresih; kaloe soedah, ambil isinja dan tjingtjang haloes-haloes, dan ambil katoembar tjingtjang-tjingtjang lada njanjah giling haloes, dan taroh bawang merah, bawang poeti, kenari, kentjoer sapottong, djae, trasi, koenjit jang soedah di giling haloes, dan abis toemis sama mantega, taroh daon djeroek poeroet; kaloe soedah, goreng sama klapa aijer santan jang kentel sama daon ender, daon bawang, aijer djeroek tipis barang satoe, atau blimbing iris haloes-haloes, dan rames sama garam, abis boeang dia poenja aijer dan tjoetji sama aijer dingin, abis baroe taroh: dan pake lagi laboe poeti pottong haloes-haloes (pupaja dan lobak djoega boleh), tetapi itoe sajoer misti iris-iris haloes duhoeloe, abis misti reboes; kaloe soedah reboes, taroh itoe aijam sama-sana itoe sagoe, dengan goela dan garam sedikit, dan masak sampe kring; abis ambil tepong dan rames sama telor barang anam bidji, tjoema merahnja sadja, dan taroh mantega sama aijer panas sedikit, dan abis goeloeng-goeloeng di papan, tetapi dahoeloe misti bikin dingin, ambil satoe piring, dan masokin itoe piring poenja boendar, abis taroh itoe aijam dan toetoep pinggirnja sama tepong, dan misti gosok sanıa poeti telor, baroe toetoep biar djadi melengket: kaloe soedah, misti goreng, dan ingat, lebih dahoeloe dari toetoep sama dia, misti taroh telor jang soedah di reboes, dan itoe telor misti di belah-belah, satoe pottong satoe kwé.
Kwé Madoe.
Toedjoe telor, tjoema merahnja sadja, lima mangkok tepong, doea mangkok goela jang kring sekali, doea glas madoe, doea-blas bidji tjengké jang soedah di toemboek halves; satoe sendok kaijoe manis haloes, pottong-pottong haloes dan koelit djeroek tjina, abis toenmboek haloes samoeanja, dan adoek baik-baik, kaloe soedah, ambil kertas kasar, tetapi misti gosokin mantega dahoeloe, abis taroh itoe kwé, dan bakar dalam pan, apinja djangan terlaloe kras.
Kwé Koedoes.
Doea pond sama satoe once satengah tepong trigoe; satoe pond sama satoe once satenguh goela passir itam; satengah pond sama satoe once satengah nudoe poeti, satoe once satengah koelit djeroek manis, pottong ketjil-ketjil; dan lagi satoe once satengah koelit djeroek tjina jang kring toemboek haloes, tjengké, pala, kaijoe manis dan potasch, abis adoek sama sekali; itoe goela dan madoe misti masak lebilh dahoeloe, abis kasih dingin baik-baik, dan lantas tampoer sama sekali, abis rames baik-baik, dan giling ampat oedjoeng, abis pottong sama roda kwé, dan bikin seperti kembang; abis kasih tinggal satoe malam, baroe bakar di pan: boleh pake goela djawa, satoe pond sama satoe once mantega dan djangan lebih.
Apem Ceijlon.
Toemboek tepong, dia poenja menir ambil, abis kasih mendidih aijer dahoeloe, kaloe itoe aijer soedah mendidih lepas itoe menir dan adoek baik-baik, abis angkat dan bikin dingin, abis rames sama itoe tepong dan taroh toeak, abis kasih dia mangkak; kaloe soedah mangkak dan maoe bakar, taroh aijer santan poenja kapala sama goela sedikit, kaloe maoe, boleh taroh lontar sama telor brapa soeka, dan lagi garam.
Lain roepa .
Ambil satoe batok bras, itoe bras tjoetji bresih sekali, abis toemboek bikin tepong, aijak ambil aloesnja, ambil satoe klapa paroet taroh aijer satoe mangkok rames sampe kaloear santan kentel, lantas saring di aijakan, ampasnja taroh lagi sedikit aijer, ambil lima telor poekoel baik-baik, adoek sama itoe tepong sama santan kentel, sama sedikit goela passir jang haloes, adoek sama-sama biar sampe kentel jang boleh di sendok, ambil kenari iris tipis-tipis, ambil satoe pan jang besar atau ketjil sama djoega gosok minjak klapa, abis taroh itoe kwé di atas itoe kwé, atoer itoe kenari bakar api barah di atas dan di bawah.
Lain roepa.
Satoe mangkok tepong bras, delapan-blas telor, sambilan sama poetihnja, satoe mangkok thee bras di boeboer, satoe mangkok toeak, tiga sendok mantega entjer, satoe mangkok santan klapa kentel, goela dan garam bagimana rasa sampe; kaloe soedah naik atau mangkak baroe bakar.
Kwé Boloe.
Ambil satoe deeg sama tiga telor, dan rames baik-baik, abis taroh mantega brapa soeka, djangan mantega entjer, dan taroh sedikit goela, abis banting baik-baik; kaloe soedah goeloeng-goeloeng, dan taroh di kertas, abis taroh di panas sampe mangkak, dan bakar di kwé broeder poenja pan, dan taroh api di atas dan di bawah.
Lain roepa.
Satoe pond tepong rames sama telor satoe bidji sama toeak sampe mangkak, abis taroh barang lima atau anam bidji telor, dan banting baik-baik, abis taroh mantega, kaloe terlaloe entjer, misti tambah tepong sampe boleh di goeloeng-goeloeng.
Lain roepa.
Satoe mangkok telor, satoe mangkok goela, poekoel baik-baik sampe naik, taroh satoe mangkok tepong adoek lagi baik-baik, kaloe soedah naik bakar pake api di atas di bawah.
Kwé Jehoedi.
Ambil telor barang ampat poeloeh dan kasih kaloear merahnja, abis poeter itoe merahnja sampe naik, abis taroh kaijoe manis, goela dan mantega jang entjer, tetapi misti banjak taroh kaijoe manis sampe ada rasanja brapa banjak soeka, mantega satoe pond, kaloe soedah ambil sedikit tepong, dan rames sama telor sampe boleh di goeling, abis pottong pandjang-pandjang; kaloe soedah ambil satoe kwali, dan aijer mendidih abis lepas itoe tepong, kaloe soedah matang, angkat dan tjampoer sama itoe telor, dan bakar di kwé, broeder poenja tampat masakan, tetapi misti bakar pelahan-pelahan, dia poenja api djangan terlaloe kras sebab nanti djadi angoes.
Roti dari goela.
Ambil satoe pond goela, delapan bidji telor, abis ambil tepong dan timbang sama rata bratnja sama itoe delapan telor: tetapi misti pake telor banjaknja lima-blas bidji, kasih kaloear itoe telor poenja merah dan poetinja lainin; kaloe soedah, adoek merahnja dalam satoe tampat, kaloe soedah naik, taroh itoe goela, dan poekoel baik-baik; abis taroh itoe tepong dan poekoel baik-baik, kaloe soedah poekoel baik-baik, ambil itoe poeti telor jang tadi, dan poekoel baik-baik sampe djadi naik, dan kaloe soedah naik, tjampoer sama sekali dan adoek baik-baik dan taroh aijer mawar atau aijer kaijoe manis: abis bakar dalam tampat pembakaran kwé broeder atau kwé collembijn.
Bokkerde Koek.
Kaloe pake satoe deeg, misti pake toedjoe telor tjoema merahnja sadja, poetinja taroh dalam satoe tampat dan poekoel baik-baik sampe mendidih, taroh sedikit bawang, soesoe dan mantega jang entjer, abis banting baik-baik sampe naik: tetapi kaloe pake soesoe, kapan lagi banting misti sampe djatoh sapottong-sapottong, baroe brenti dari taroh soesoe dan djangan bikin terlaloe kentel seperti kwé broeder, abis taroh di panas, biar sampe naik; dan abis bakar di tampatnja sendiri.
Bagaimana misti bikin Banket.
Kwé Kuon.
Satoe pond tepong, satoe bottol soesoe, anamblas telor, satoe glas anggor brandi, taroh goela brapa soeka sampe dia ponja rasa manis, abis ambil mantega dan taroh di dalam satoe kwali; tetapi manteganja misti ada banjak sampe ito kwé terendam di dalam mantega, dan goreng itoe kwé sampe garing, kaloe soedah garing, angkat sama dia.
Kwé Soerat
Tepong satoe pond, mantega saprapat pond, sapoeloeh telor, jang anam boeang poetinja; satoe pond goela, kaijoe manis sedikit, tjengké, kembang pala satoe once satengah.
Kwé Lapis
Ambil satoe pond satengah mantega, satoe pond tepong, ampat poeloeh telor, doea pond goela, doea bidji tjengké, gardamoenggoe, lada poeti sadikit, anggor brandi satoe sendok, dan koelit djeroek tjina; ambil kenari dan toemboek haloes, kaijoe manis lagi, dan misti ada banjakan; abis bakar.
Lain roepa.
Ambil satoe pond tepong, tiga poeloeh telor ambil merahnja, poekoel baik-baik sama setengah pond mantega adoek sama-sama itoe tepong, kentelnja singgan boleh di sendok, kaloe soedah di adoek bagi doea, taroh doea tampat, itoe satoe misti taroh boemboe-boemboe, tjengké toedjoe, pala sapottong, kembang pala sapottong, kaijoe manis sapottong, gardamoenggoe doea poeloeh, atau vanille, samoeanja sekali toemboek biar haloes, adoek sama itoe tepong, ambil satoe pan bresih, gosok mantega; taroh itoe tepong jang pake boemboe, doea atau tiga sendok bikin rata boender sama itoe pan tipis sadja, toetoep api di atas di bawah, djangan terlaloe banjak api, kaloe soedah koening, taroh itoe tepong jang trada pake boemboe, lagi tiga atau ampat sendok bikin rata, bakar lagi, kaloe soedah koening taroh jang pake boemboe, lagi tiga atau ampat sendok bikin rata, bakar lagi, kaloe soedah koening taroh jang pake boemboe, tiga atau ampat sendok bakar bagitoe djoega samoeanja sampe abis, kaloe soedah abis samoeanja di atas boleh taroh amandel di pottong-pottong, kisjmis, atoer biar kalihatan bagoes di atas itoe kwé, bakar sampe matang, boleh angkat.
Kwé Bebika .
Lebih dahoeloe ambil bras satoe batok, dan abis bikin bresih, abis tjoetji sama aijer; kaloe soedah, ambil satoe paso sama aijer dingin, dan rendam itoe bras barang satoe malam, soedah liwat satoe malam, angkat dari aijernja, dan bikin kring, ambil satoe loempang, dan toemboek itoe bras jang soedah di rendam dan bikin tepong, itoe tepong misti ada haloes sekali, dan kaloe maoe bikin haloes, misti ambil satoe aijakan dan aijak dahoeloe, abis sekarang misti ambil goela djawa, klapa (atau lontar ataupisang djoega boleh) sabelah; itoe klapa misti paroet dahoeloe (kaloe lontar misti pottong haloes-haloes, dan bagitoe djoega pisang), dan taroh garam sedikit; abis ambil aijer dan taroh sama itoe klapa bikin aijer santan, itoe aijer santan tjampoer sama sekali sama itoe tepong, dan abis adoek baik-baik; kaloe soedah, ambil doea kwali tanah jang ketjil, jang sama besarnja; jang soedah panas, taroh dalamnja daon pisang, abis toeang itoe tepong jang soedah di adoek-adoek; dan taroh di atas itoe tepong jang soedah di masokin dalam itoe kwali, lagi satoe lembar daon pisang, dan di atas ini daon pisang, misti tindis sama lain kwali, jang boleh masok; tetapi itoe kwali jang di atas misti ada barah api jang panas sekali, dan abis bakar, misti garing sedikit: tetapi djangan angoes.
Kwé Bebika Tepong atau Sagoe.
Ambil satoe batok bras bikin tepong, ambil satoe klapa paroet, taroh satoe mangkok aijer rames, ambil setengah taroh di mangkok, ampasnja taroh lagi aijer rames lagi, saring ampasnja boeang, itoe santan adoek sama goela djawa sama tepong adoek biar kentel, ambil satoe kwali, taroh daon pisang taroh itoe kwé, taroh lagi daon pisang di atasnja, ambil lagi satoe kwali tindis di atasnja, taroh api di atas di bawah, bakar sampe dapat baoe boeka, kaloe soedah matang angkat.
Lain roepa.
Ambil tepong bras, ambil satoe klapa paroet, taroh aijer remes sampe kaloear santan kentel, pras ampasnja, taroh lagi sedikit aijer remes, ambil santannja ampasnja boeng, adoek sama sedikit garam sama itoe tepong, ambil satoe kwali, taroh sedikit djinten adoek-adoek sampe panas sekali angkat daei api, toemboek biar haloes sekali asoek sama-sama itoe tepong jang soedah di adoek, ambil satoe kwali taroh daon pisang, taroh itoe kwé, taroh lagi daon pisang atasnja, taroh satoe kwali di atasnja, taroh api di atas di bawah.
Kwé Soemping.
Itoe bras misti bikin bagaimana soedah di bilang kaloe bikin kwé babika; kaloe soedah ambil tepongnja, dan adoek sama aijer taroh goela dan adoek baik-baik, kaloe soedah ambil daon pisang batoe, bikin boengkoes ini kwé; itoe daon misti bikin seperti koekoessan nasi, abis toeang itoe tepong jang soedah di adoek-adoek, dan boengkoes baik -baik, djangan sampe boleh kaloear; ini kwé kaloe maoe masak misti koekoes.
Kwé Mangkok.
Ambil adoek bras dan sama goela, bikin tepong, itoe tepong dan misti pake goela passir; kaloe soedah taroh di mangkok, abis ambil satoe kwali dan taroh aijer, itoe aijer bikin mendidih dahoeloe, kaloe soedah mendidih kasih masok itoe kwé sama-sama mangkoknja, dan masaksampe matang, kaloe soedah matang, angkat dan bikin dingin, abis ambil satoe klapa, dan paroet, kaloe makan misti makan sama klapa jang soedah di paroet.
Kwé Talam.
Kwé Talam djagoeng.
Ambil sapoeloeh atau doea-blas bidji djagoeng, paroet kerik batangnja boeang, ambil satoe klapa paroet, taroh sedikit garam rames ambil santannja, taroh goela djawa singgan sampe manis adoek sama-sama, bakar sampe dapat baoe angkat.
Kwé Poetri Mandi.
Kwé Lambangsari.
Bikin dia poenja tepong dahoeloe, abis bikin aijer santan, dan adoek sama itoe tepong biar kentel, kaloe soedah, boengkoes sama daon pisang, dan dalamnja taroh satoe ataa sabelah pisang radja, kaloe soedah boengkoes, ambil satoe kwali wadja, dan lantas koekoes sampe matang, kaloe soedah matang, misti lantas angkat, dan boleh makan.
Kwé Tjoetjoer.
Satoe batok bras abis bikin tepong, dan taroh aijer, abis adoek sama goela djawa, kaloe soedah ambil satoe penggorengan dan taroh minjak satoe mangkok jang sedang, tetapi misti pake minjak klapa jang baik; kaloe itoe minjak soedah panas, ambil satoe mangkok jang sedang, sendok itoe tepong jang di adoek-adoek tadi, dan toeang atas itoe minjak jang ada di penggorengan, satoe mangkok ketjil djadi satoe kwé tjoetjoer, dan lantas goreng sampe merah.
Kwé Serabi.
Satoe pond bras, satoe djam rendam di aijer, dan taroh di bakoel, kasih tiris aijernja, kapan soedah trada lagi aijer, dan toemboek bikin tepong samoea, sama ampat bidji kemiri, satoe sendok makan nasi kring, dan satoe saprapat pottong dari satoe klapa jang toea, samoeanja misti toemboeksama-sama bras, bikin djadi tepong jang haloes sekali, dan ambil aijer angkat dan tjampoer sampe djadi satoe, bagimana pannekoek poenja tebal, dan bakar di tampat pembakaran kwé serabi, itoe tampat sekali bakar misti taroh mantega entjer, ambil telor poekoel sama soesoe atau santan.
Pastil Ajam.
Ambil satoe ajam jang gemok, tjoetji bresih, kasih kaloear proetnja, kaloe soedah bresih kasih kaloear dagingnja samoeanja sama-sama ati, ampela, tjingtjang sampe haloes, itoe toelang-toelangnja reboes, ambil satoe klapa paroet bagi doea, separo taroh satoe kwali, taroh itoe klapa adoek-adoek sampe koening, di atas api; kaloe soedah koening angkat, lantas toemboek sampe baloes, itoe separo taroh aijer barang satoe mangkok, rames sampe djadi santan kentel, saring boeang ampasnja, boemboenja, djinten, katoembar, lada, koenjit barang tiga iris, kemiri tiga, seré tiga iris, langkowas tiga iris, daon djeroek poeroet doea lembar, samoeanja sama sekali giling biar haloes, taroh lantas itoe klapa jang soedah di toemboek, giling lagi biar lebih haloes, iris bawang poeti tiga sioeng, bawang merah ampat bidji, taroh satoe kwali sama sedikit minjak klapa atau gemok ajam, gareng itoe bawang sampe koening, taroh sapottong ketjil trasi adoek biar haloes, lantas taroh itoe boemboe jang soedah di toemboek, adoek-adoek, lantas taroh sedikit aijer ajam, taroh itoe ajam jang soedah di tjingtjang, toetoep, kaloe hampir matang taroh saijoernja, pollong moeda, di pottong doea, daon ender barang doea atau tiga batang iris-iris, satoe atau doea aardappel iris-iris, taroh sama sekali di itoe ajam jang soedah di tjingtjang, toetoep, hampir matang taroh sajoernja tadi, pollong moeda di pottong doea, daon ender barang doea atau tiga batang iris-iris, satoe atau doea aardappel iris-iris, taroh sama sekali dimana itoe ajam sama sedikit garam, soedah matang taroh santan kentel, adoek-adoek sampe kring, angkat taroh dalam satoe piring, reboes talor barang lima atau anam bidji, kaloe soedah matang pottong-pottong, dalam satoe bikin anam pottong, korstnja satoe pond tepong, satoe sendok mantega, adoek sama sedikit aijer ajam reboes, ambil tiga telor poekoel baik-baik, adoek sama-sama, misti adoek singgan sampe boleh di giling atau bikin tipis, singgan sampe satoe tjitakan mangkok atau piring ketjil, satoe-satoe taroh satoe sendok itoe ajam sama satoe pottong itoe telor, toetoep baik-baik, djangan sampe boleh masok minjak, bikin barang ampat atau lima bidji, ambil tatjoe (penggorengan) taroh minjak klapa burang satengah bottol, goreng itoe kwé bikin bagitoe djoega lagi itoe kwé sampe abis samoeanja itoe tepong dan ajam jang soedah di adoek, kaloe goreng itoe pastil sampe koening sekali baroe angkat.
Lain roepa.
Ambil satoe ajam, tjoetji bresih kalocarin dagingnja tjingtjang-tjingtjang, boemboenja, djinten, katoembar, lada, seré, daon djeroek poeroet, kemiri, koenjit; ambil satoe kwali taroh di api, taroh itoe boemboe-boemboe, adoek-adoek sampe panas sekali angkat, ambil satoe klapa paroet, taroh aijer satoe mangkok, rames sampe kalocar santun kentel, saring, ampasnja taroh lagi satoe mangkok aijer, rames, saring taroh lain tampat ampasnja boeang, itoe boemboenja giling haloes dahocloe, ambil satoe kwali taroh minjak klapa, goreng itoe bawang merah, bawang poeti jang soedah di iris, kaloe soedah koening, taroh itoe boemboe jang soedah di giling adoek-adoek, lantas taroh santan entjer, taroh itoe ajam jang soedah di tjingtjang toetoep sampe matang, kaloe soedah matang, taroh santan kentel dan garam, adoek-adoek sampe kring, kaloe soedah kring angkat taroh di satoe piring, reboes telor barang ampat atan lima bidji, korstnja satoe pond tepong, lima bidji telor merahnja sadja, poekoel baik-baik, satoe mangkok mantega, misti bikin entjer dahoeloe adoek sama-samama itoe tepong dan telor, ambil satoe piring dalam gosok mantega, taroh itoe tepong singgan tipis dan lebar seperti itoe piring dalam, taroh itoe ajam jang soeduh di masak di dalamnja, itoe separo tepong giling tipis dan. toe-toep di atas itoe piring, dimana pinggir itoe kwé taroh sedikit poeti telor boeat bikin blengket, bakar dimana satoe pan, taroh api di atas di bawah, djangan loepa itoe telor jang soedah di reboes dan pottong-pottong di atas itoe daging ajam, baroe toetoep sama tepong tipis, bakar sampe matang, biar tinggal di piringnja sampe maoe matang.
Pastil Oedang kring.
Itoe oedang kring tjoetji, toemboek dahoeloe hoemboenja, djinten, katoembar, lada, taroh satoe kwali di api dan taroh itoe boemboe adoek-adoek, kaloe soedah panas angkat lantas toemboek biar haloes, tjampoer sama itoe oedang kring toemboek sama-sama, iris bawang poeti, bawang merah, ambil satoe kwali taroh sedikit minjak klapa, goreng itoe bawang, kaloe soedah koening taroh itoe oedang adoek-adoek , lantas angkat, djangan locpa taroh garam sedikit; korstnja satoe pond tepong, tiga telor, sedikit mantega adoek baik-haik, singgan boleh di poeloeng-poeloeng, kaloe koerang entjer tambah sedikit aijer panas, singgan sampe boleh di poeloeng , bikin ketjil-ketjil, tipis-tipis, taroh dalamnja itoe oedang jang soedah di goreng, taroh satoe-satoe sendok ketjil, toetoep baik-baik, djangan boleh masok minjak, bikin tiga atau ampat bidji, ambil satoe tatjos (penggorengan) taroh minjak klapa barang satengah bottol, taroh itoe kwé jang soedah di bikin, goreng sampe koening, kaloe soedah koening angkat, taroh lagi lain, bikin bagitoe djoega sampe abis.
Fla Soesoe.
Satoe bottol soesoe, tiga telor, goela singgan manis, sapottong vanilje, aijer mawar, samoeanja adoek baik-baik, ambil satoe pantji jang pake toetoep, taroh itoe socsoe di pantji, toetoep baik-baik, boengkoes sama serbetta, djangan boleh masok aijer, ambil satoe kwali taroh sedikit aijer, taroh itoe pantji di dalamnja dan toetoep, masak; sampe matang angkat.
Lain roepa.
Ambil satoe bottol soesoe sama sedikit atau sapottong ager-ager, taroh aijer mawar, vanilje, tiga bidji telor merahnja, masak sama sekali sama-sama goela samoeanja, sampe hampir kentel, ambil satos mangkok bresih salin, sampe kentel dan dingin baroe boleh pottong-pottong.
Lain roepa.
Ambil satoe klapa paroet, taroh satoe mangkok aijer, rames baik-baik sampe kaloear santan kentel, saring taroh satoe tampat, ampasnja taroh lagi satoe mangkok aijer rames lagi, saring, ampasnja boeang, ambil tiga telor, merahnja, poekoel baik-baik, adoek sama itoe santan, taroh goela singgan sampe manis, taroh sedikit areroet, daon pandan sapottong, daon djeroek poeroet doea lembar, adoek sama sekali, taroh dalam satoe potji jang ada toetoep, toetoep baik-baik, boengkoes sama serbetta, djangan boleh masok aijer, ambil satoe kwali taroh sedikit aijer, taroh itoe pantji atau potji di dalamnja, masak barang satoe djam boleh boeka, lihat kaloe soedah kentel dan soedah matang.
Goela djae tepong Bras.
Ambil sapottong djae, koepas tjoetji bresih, pottong-pottong giling biar haloes, ambil tiga telor poetinja sadja, poekoel baik-baik sampe dia naik, satoe mangkok goela jang haloes, tepongnja sama djoega goela banjaknja, adoek sama sekali baik-baik, lantas poeloeng-poeloeng, bikin kembang-kembang atau pottong-pottong, ambil kertas siram sedikit tepong, atoer djaoh-djaoh, bakar api di atas dan di bawah, sampe matang taroh lagi lain, bakar bagitoe djoega sampe abis.
Lain roepa.
Ambil satoe klapa paroet, goreng sampe koenin djangan pake minjak, kaloe soedah koening toemboek biar haloes sama sapottong ketjil djae, ampat telor poekoel baik-baik, satoe mangkok tepong bras, satoo mangkok goela haloes adoek sama sekali, bikin ketjil-ketjil atau poeloeng, bakar sama djoega itoe lain.
Kwé Kenari.
Ambil barang lima poetoeh kenari atau amandelen, sapoeloeh telor, satoe mangkok goela, adoek baik-baik, taroh satoe mangkok tepong singgan boleh poeloeng atau bikin kembang ketjil-ketjil, bakar pake api di atas dan di bawah.
Kwé Piloes.
Ambil aardappelen, reboes, kaloe soedah matang bikin haloes sama mantega, pake telor barang tiga atau ampat bidji singgan boteh sendok, goreng sama mantega atau minjak klapa.
Kwé Gegodo.
Ambil does atau tiga bidji pisang, bikin haloes sama tepong, pake telor tiga atau ampat bidji, singgan boleh sendok, goreng sama minjak klapa.
Kwé Boegie.
Ambil satoe klapa paroet, satoe batok goela djawa, taroh sedikit aijer, masak taroh daon djeroek poeroet masak sampe kring angkat, tepongnja adoek sama aijer santan, boengkoes satoe-satoe, sama itoe klapa taroh di dalamnja, boengkoes sama daon pisang, reboes djangan sampe masok aijer.
Kwé Sagoe.
Satoe mangkok sagoe aijak biar haloes, satoe mangkok goela haloes, lima bidji telor, poekoel baik-baik sampe naik, kaloe soedah naik, taroh goela, poekoel lagi baik-baik, baroe taroh itoe tepong sagoe, singgan sampe boleh poeloeng-poeloeng atan sendok, atoer di mana kertas-kertas, itoe kertas misti siram dahoeloe sama itoe tepong kring sedikit, baroe atoer itoe kwé djangan terlaloe dekat, lantas bakar, taroh api di atas dan di bawah, sampe matang angkat, taroh lain, sampe abis bagitoe djoega.
Kwé Ondé.
Ambil satoe batok bras ketan, toemboek bikin tepong, kaloe soedah haloes taroh sedikit aijer biar kentel, jang boleh di boengkoes sama-sama itoe goela djawa, itoe tepong taroh dalamnja sapottong goela djawa, taroh satoe kwali sama aijer, taroh itoe tepong jang soedah di boengkoes sama goela barang lima atau anam bidji, kalos ito kwé naik di atas aijer angkat, taroh di mana itoe klapa di paroet, itoe klapa misti di paroet dahoeloe, itoe kwé bikin rata sama itoé klapa, angkat taroh lagi lain di atas itoe klapa sampe samoeanja abis.
Kwé Pofertjes.
Ambil satoe deeg tepong, doea-blas telor, satoe mangkok.mantega, adoek sama sekali, itoe telor poekoel baik-baik merahnja dahoeloe, adoek sama soesoe singgan sampe boleh di bakar, makan sama goela dan kaijoe manis haloes.
Kwé Roos.
Ambil satoe mangkok taroh tepong sedikit, tiga telor, mantega satoe sendok, adoek sama-sama, taroh aijer.klapa sama sedikit soesoe, adoek baik-baik, bikin entjernja sama djoega pannekoek , ambil satoe tatjoe (pengorengan), taroh minjak klapa, taroh api menjala, taroh itoe bakaran kwé roos di dalam minjak, kale soedah panas, tjelep di dalam itoe kwe, lantas angkat, taroh di mana itoe minjak panas lagi, balik sekali angkat, itoe tampat roos masokin lagi dalam itoe minjak panas, kaloe soedah panas tjelep lagi dalam itoe tepong, djangan terlaloe penoeh singgan satengah, sebab kaloe goreng dia misti kaloear dari dia pocnja pan, balik sekali angkat, bikin bagitoe sampe samocanja abis.
Kwé Bidji Salak atau Poetri Mandi.
Ambil tepong ketan, adoek sama santan klapa, poeloeng-poeloeng bikin sedikit tjepper, ambil satoe kwali taroh aijer, taroh daon pandan, kaloe itoe aijer soedah mendidih taroh itoe tepong jang soedah di poeloeng, ambil goela djawa taroh sedikit aijer, masak, hampir kentel taroh itoe kwé jang soedah di reboes, sampe mendidih angkat taroh di basi, siram di atasnja klapa paroet.
Kwé Tjoetjoer.
Ambil satos kwali taroh aijer sama gocla djawa, masak sampe mendidih taroh tepong, adoek-adoek, ambil satoe tatjoe ketjil taroh minjak goreng satoe-satoe sendok sampe matang, taroh lagi satoe sampe abis samoeanja,
Kwé Pisang.
Ambil tepong bras adoek sama santan klapa; pisangnja pottong-pottong boengkoes, sama itoe tepong, lantas boengkoes sama daon pisang, reboes djangan masok aijer.