Landru/Bagian 11
BAGIAN XI.
Saratoes Frank boeat djiwanja satoe prampoean.
———
Njonja Buisson soeda poetoes djiwa, apa jang sekarang Landru pikirken, jalah kasih laloe itoe mait.
Ini badjingan jang tida kakoerangan akal, tida pikir lama hal itoe, sigra ia naek ka dalem auto, djalanken kandaraän itoe kira-kira satoe kilometer, masoek dalem satoe oetan ketjil, dimana ia laloe brentiken autonja dan ambil satoe schoop dari bawah bok auto, laloe moelai gali lobang sabesar badannja itoe mait. Kerna sedari bebrapa hari ada toeroen banjak oedjan, maka tanah disitoe ada lembek dan gampang sekali digali. Dalem tempo satengah djam Landru soeda bisa gali satoe meter dalemnja. Tanah jang sabelah atas, sengadja ia pisahken soepaja bisa dipake boeat oeroek lagi, dan warnanja nanti djadi saroe dengen tanah jang belon digali. Sasoedanja sadiaken itoe lobang koeboeran, Landru lantas hampirken maitnja njonja Buisson, lempar di tanah, lotjotken tjintjin dan laen-laen perhiasannja, kamoedian telandjangin, pakeannja ia boentel-boentel dan lempar ka dalem auto. la laloe pondong itoe mait dan lemparken ka dalem itoe lobang. Dengen itoe schoop ia laloe oeroek lagi, di atasnja itoe tanah ia sapoe-sapoe, hingga roepanja tida ternjata bekas digali. Kamoedian ia kasi djalan moendoer autonja, sasoedanja sampe di pinggir djalan besar, ia tinggalken itoe auto dan ia sendiri laloe balik kombali ka tempat tadi, perloenja boeat bikin ilang satoe-satoe tapakan kakinja, bagitoe poen bekas djalannja roda auto. Sabagitoe lekas klaar, lantas ia naek kombali ka autonja dan landjoetken perdjalanannja.
Koetika sampe di satoe tempat kira-kira tigapoeloe kilometer dari tempat ia lakoeken itoe kadjahatan, ia lantas boewang itoe schoop ka dalem laoet, lantas djalan menikoeng di satoe djalanan jang menoedjoe ka Biarritz. la tida brenti lagi di ini tempat, hanja djalan teroes ka Hendaye, satoe tempat jang ada djadi tapel watesnja negri Spanje. Itoe waktoe soeda tengah malem, ia lantas sewa satoe kamar di hotel „Eskalduna". Dalem boekoe hotel ia seboet namanja Jean Henry.
Esokan paginja, sasoedanja bersantap, ia laloe beromong-omong dengen pendjaga pintoe hotel.
„Akoe ingin sekali liat tapel wates jang betoel antara Frankrijk dan Spanje," kata itoe Jean Henri tetiron.
Itoe pendjaga pintoe laloe bri katerangan tentang itoe dan pada djam sabelas Landru berangkat ka djembatan „Pont International de la Bidassca" jaitoe djembatan jang menghoeboengi Frankrijk ka provincie Guipuzcao, tanah daerah negri Spanje. la teroesken perdjalanannja sampe di Fuenterrabia, menginep dalem satoe logement. Sembari minoem kopi ia pandang kabagoesannja itoe kota dari atas loteng jang tinggi.
Djaoenja itoe tapel wates sampe di Frankrijk ada kira-kira sariboe kilometer, tapi pada kaesokannja, dengen besarken hati Landru balik kombali ka Parijs.
Koetika berdjalan balik ka ini kota, Landru sengadja liwatken roemah sakit dimana anak lelakinja njonja Buisson ada berobat. Ini anak pada permoelaän tahon 1919 moelai tjari iboenja jang telah ilang dengen terkoenjoeng-koenjoeng. Dan belakangan ini anak dapet kanjatahan bahoea saorang jang pake nama Andre Charcroix ada djadi itoe orang djoega jang pake nama Freminet, Lucien Guillet dan Henri Landru.
Dengen tida merasa kwatir satoe apa Landru laloe masoekin autonja ka dalem ia poenja garage di Neuilly, kamoedian ia beangkat poelang ka roemah istrinja. Pada itoe istri Landru kasih katerangan jang ia soeda kerdja sanget tjape. la telah berkoeliling oeroes dagangannja sampe di provincie Selatan. Di roemahnja itoe ia berdiam dan senantiasa cendjoek roepa jang djengkel. Kaloe istrinja tanja, ia djawab jang ia dapet roegi dari dagangannja.
Di waktoe siang Landru tida brani dateng ka Parijs, sekali poen ia doega Inspecteur Gaffiot soeda brenti tjari padanja, aken tetapi ia kwatir Justitie masih sebar banjak mata-mata boeat intip padanja. Dari sebab itoe ia laloe toelis soerat pada ia poenja sobat, jaitoe Caillard, minta ini toekang tada dateng ka satoe cafe jang letaknja dekat Pont Neuf. Di ini tempat ia serahken milik nja njonja Buisson dan berdjandji hendak kasih soerat kwasa jang soeda diteeken oleh njonja terseboet, dan ia bilang itoe njonja masih ada dalem perdjalanan.
Itoe pendjoealan sigra dibikin, sekali poen Caillard belon liat barangnja.
„Kaloe itoe barang-barang ada harganja akoe nanti kirim itoe oewang ka Neuilly", kata Jules. „Aken tetapi sabelonnja akoe pergi ka Boulevard Ney, lebih doeloe akoe ingin dapet itoe soerat kwasa, soepaja tida satoe manoesia brani larang akoe ambil barang-barangnja njonja terseboet.
„Djangan kwatir, besok tengahari akoe nanti kirim itoe soerat kwasa. Aken tetapi sekarang akoe ada perloe sekali pake oewang, maka kasihkenlah akoe saratoes frank".
Jules Caillard jang soeda dapet banjak oentoeng dari barang. tadahan, tida banjak tjerewet lagi laloe kaloearken doea lembar oewang kertas dari 50 frank, dan Landru satrimanja itoe laloe kasihken kwitantie.
„Kaloe ini oeroesan soeda beres, akoe harep kaoe lekas-lekas berlaloe dari Parijs," kata Caillard. ,Orang tida taoe siapa sekarang ini ada mengintip pada kaoe. Tapi akoe merasa dengen pasti kaoe poenja berdiam di Parijs ada sanget berbahaja, berbahaja boeat kaoe sendiri dan djoega boeat kaoe poenja sobat-sobat.
„Ajo, sobat, djangan bagitoe pengetjoet," kata Landru, „Gaffiot sekarang soeda brenti tjari padakoe. Soerat-soerat kabar tida toelis lagi hal akoe."
„Djangan lekas-lekas pertjaja jang diri kaoe soeda slamat," kata lagi Caillard. „Akoe sendiri taoe sedari kaoe lolos dari tangannja politie, sampe sekarang akoe masih teroes diganggoe oleh politie".
„Tapi sobat, kapan akoe tida dateng di roemah kaoe, tentoe kaoe tida dapet bahaja apa-apa. Belakang hari akoe nanti toelis soerat pada kaoe selaloe dengen pake nama Guillet."
Besokan paginja Landru koendjoengi Jean Boas, toekang tiroe toelisan, dan ia ini lantas sadja toeroet apa jang diseboetken oleh Landru, maka satoe soerat katerangan laloe dibikin dimana ada ditoelis bahoea sakalian harta miliknja njonja Buisson diserahken kapada toean André Charcroix, dan kamoedian harta. itoe didjoeal lebih djaoe pada Jules Caillard, soedagar barang perabotan.
Soerat itoe jang mirip betoel dengen toelisan dan tanda tangannja njonja Buisson laloe diserahken pada Jules Caillard. Doea hari kamoedian Landru trima satoe envelope jang berisi oewang tigaratoes delapanpoeloe lima frank.
Bebrapa hari Landru berdiam dalem roemahnja, melinken malem Landru pergi ka satoe cafe. dimana ada berkoempoel banjak sobat-sobatnja jang terkenal dalem golongan bangsat-bangsat.
Itoe oewang jang tida berdjoembla banjak, sigra djoega dalem sedikit hari soeda moelai soeroet dan Landru moesti pikirken lagi laen daja boeat dapetken korban baroe.
Itoe korban baroe jang Landru soeda adjar kenal bebrapa minggoe sabelonnja ia boenoeh njonja Buisson, adalah njonja djanda Jaume, jang belon brapa lama soeda bertjere dari soeaminja.
Prampoean ini soeda dikasih adjar kenal pada Landru oleh Armand Blaisot, Landru poenja sobat jang ia biasa bertemoe di satoe Cabarett.
Armand Blaisot ada terkenal sebagi satoe antara pendjahat-pendjahat jang paling tjerdik, pentjariannja tida laen dari pada dagangin prampoean-prampoean tjantik pada orang-orang hartawan. Landru jang taoe dari ini kontjo ia bisa dapet banjak pertoeloengan, soeda djadi bersobat baek.
Itoe njonja ada poenja kaeilokan jang djarang sekali terdapet. Tampang moekanja manis, badannja bagoes dan koelitnja haloes. Tambahan lagi ia amat pande berdandan, hingga siapa djoega jang liat padanja, nistjaja aken djadi tergila-gila.
Pada soeatoe malem Armand dateng kasih taoe pada Landru jang itoe prampoean tida ada goenanja boeat ditemenin lebih lama, sebab ia tida ada oewangnja.
„Tadinja akoe kira ia ada poenja oewang simpenan, tapi sekarang akoe dapet taoe sedari soeaminja pergi ka Italie, ia tida ada dikirimin oewang dan djoega tida ada poenja oewang tinggalan. Aken tetapi roepanja ada eilok sekali, boekan ?"
„Ja, tjantik betoel," sahoet Landru.
Landru jang tida pertjaja itoe njonja tida poenja oewang simpenan, sedeng Landru soeda liat jang itoe njonja ada poenja roepa-roepa pakean bagoes, telah sangka Armand maoe pedajaken padanja, maka dengen tida banjak bitjara ia laloe tanja adresnja itoe njonja.
Boeat saksiken sendiri keadaännja itoe njonja, esokannja Landru laloe dateng mengoendjoengi di roemahnja.
Itoe njonja jang ditinggal pergi oleh socaminja soeda djadi gegetoen dengen koendjoengannja Landru, aken tetapi sebagimana pantesnja ia trima kadatengannja Landru dengen manis dan soegoeken thee.
Sedari itoe hari Landru teroes bikin kenalan dengen itoe njonja, dan pada laen waktoenja Landru adjak itoe njonja manis doedoek bersantap dalem satoe restaurant di Avenue de l' Opera. Pada itoe badjingan si njonja manis tjeritaken keadaan dirinja. la toetoerken jang ia soeda ditinggal pergi oleh soeaminja, dan soepaja bisa hidoep pantes, ia moesti berkerdja sebagi toekang pakean.
la terlahir di Nimes pada tahon 1878. Pada oemoer 10 tahon ia dikasih masoek dalem Klooster sampe ia djadi roemadja poctri. la poenja nikahan dengen soeaminja soeda tiada ditrima baek oleh ia poenja kadoea orang toewa, kerna orang toewanja tida bagitoe soeka dengen klakoeannja itoe lelaki jang ia tjintaken. Pertama kali nasehat itoe ia tida perdocliken, dan telah menikah djoega dengen melawan larangannja ia poenja kadoea orang toewa, dan sekarang ia baroe dapet kanjataän bahoca itoe lelaki betoel ada koerang back klakoeannja. la sekarang soeda ditinggal dengen sakoenjoeng-koenjoeng, dan minggatnja itoe soeami ternjata ada berhoeboeng dengen satoe oeroesan tipoe jang membikin politie perloe tjari dan oeber-oeber padanja.
Pada itoe malem jang njonja manis terseboet toetoerken ia poenja hikajat, Landru tjatet dalem ia poenja BOEKOE ITEM:
Bathelemy, metro martin — Nadaud, 30 centimes."
Besokan Landru toelis lagi dalem boekoe tjatetan terseboet:
„Rue de Chine 26, Bathelemy. Parasnja moeda sekali. Oemoer lebih toewa. Eilok dan manis. Idoep terpisah dari soeaminja bebrapa tahon. Ia ada prampoean jang pertjaja keras pada agama Katholiek. Tida maoe bertjere dari soeaminja jang minggat." Namanja itoe njonja tempo-tempo Landru toelis dengen perkataän „Lyanes" jaitoe nama depannja itoe njonja. Itoe perkataän Chine, adalah tempat dimana itoe njonja berkerdja, jaitoe di djalanan Rue de Chine. Bathelemy ada nama jang dibriken pada itoe njonja oleh padri dari gredja Katholiek.
Sasoedanja bikin perhoeboengan bebrapa minggoe lamanja, Landru tida dateng lagi. Itoe wakfoe Landru lagi eret njonja Buisson dan kamoedian boenoe itoe korban dengen ratjoen, tapi dalem soeratnja jang Landru toelis pada itoe njonja manis, ia kasih sebab jang lantaran ada oeroesan dagang maka doca boelan lamanja ia tida dateng mengoendjoengi, sebab kabetoelan masih berdiam di Zwitserland. la toelis lebih djaoe jang ia sekarang soeda balik kombali ka Parijs, maka ia harep itoe njonja nanti soeka dateng bersantap di cafe Rue Gaillon, satoe restaurant jang tida berdjaoehan dengen Drouant.
Itoe oendangan ditrima dengen senang hati oleh si njonja manis, dan pada waktoe jang soeda ditentoeken ia soeda berada di itoe tempat.
Di medja Landru doedoek sedikit djaoe dari itoe njonja. la berboeat bagitoe soepaja dirinja teranggep jang ia kenal baek adat-istiadat. Sembari doedoek bersantap Landru tjeritaken berbagi-bagi hal dan kasih taoe jang ia tida brapa lama lagi hendak bikin perdjalanan ka Amerika dan Hindia.
„Akoe soeda bosen dengen kota Parijs," kata Landru lebih djaoe. „Salah sekali akoe soeda beli itoe villa di Gambais. Lantaran pernanja itoe tempat ada bagoes, djoega letaknja itoe villa ada senaug, maka zonder berpikir ka doea kali, akoe soeda beli itoe villa dengen harga mahal. Di moesin panas kabanjakan akoe berdiam disitoe. Dan sekarang, berhoeboeng dengen niatkoe, maka akoe ingin djoeal itoe villa pada siapa jang hendak beli. Pertama akoe nanti bikin. perdjalanan ka London, dari sana ka Amerika teroes ka Hindia."
Landru memang biasa boeat bitjara besar atawa banggaken kakajaännja jang sama sekali kosong belaka, soepaja dirinja dianggep oleh prampocan pada siapa ia lagi doedoek bitjara, sebagi saorang hartawan jang tida kakoerangan soeatoe apa. Samentara orang prampoean jang diadjak bitjara bagitoe, soeda tentoe nanti tjeritaken djoega keadaan dirinja, dengen tida maloe-maloe seboetken kakajaännja jang ketjil. Maski bagitoe si njonja manis oendjoek jang dirinja ada mempoenjai sedikit pladjaran, hingga boeat toentoet pengidoepannja dengen pantes ia bisa berkerdja dengen gadji tjoekoep.
Landru oendjoek dirinja sebagi saorang jang terkenal dengen nama Lucien Guillet, satoe ingenieur, jang telah terpaksa berangkat dari Brüssel koetika tentara Duitsch menerdjang itoe kota. la kata jang ia ada poenja satoe fabriek di Rijsel dan soekoer djoega sabelonnja ia poemja fabriek djadi antjoer, ia soeda bisa simpen oewang di satoe Bank di Parijs banjakuja satoe perampat millioen frank.
la tjeritaken hal itoe dengen soeara soenggoe-soengoe, tida sekali ada kanjatahan jang ia bitjara kosong. Lakoenja ini badjingan ada bagitoe sopan, tingkanja manis, hingga tida heran kaloe orang prampoean djadi taro hormat padanja, kamoedian djadi tjinta.
Dalem ia poenja boekoe tjatetan Landru toelis lagi:
„Onkost dengen Lyanes. 8 frank 50 boeat satoe santapan."
Besokannja Landru ada toelis lagi :
„Onkost waktoe koendjoengi gredja: Sapoeloe centimes."
Bahoea Landru ada sanget katarik hati pada ini prampoean, itoelah ternjata dari ia poenja koendjoengan jang beroelang-oelang dan banjaknja soerat-soerat jang ia kirim pada itoe njonja. Dalem ia poenja soerat-soerat pertjintaän, tida ada satoe perkataän manis jang ia pikir terlaloe mahal bocat ditoelis, tida ada satoe perkataän hormat jang ia rasa rendahken diri boeat dioetjapken. Kaeilokannja itoe njonja ia poedji satinggi langit, ia vendjoek tjintanja jang tida berkapoetoesan. Saban kali bertemoc Landru tida sia-siaken tempo boeat boedjoek itoe njonja menikah padanja. Tapi ini njonja jang pertjaja dengen satia pada agama Katholiek, soeda tampik lamarannja Landru dan tida maoe bertjere dari soeaminja jang maski poen soeda minggat ka laen negri, tapi ia anggep masih bersatia padanja.
Landru poenja tabeat ada keras, kapan ia ingin satoe prampoean, djikaloe belon dapet ia belon maoe brenti. Bagitoe Landru soeda jakinken dalem hal mengiket hatinja itoe njonja, hingga Landru soeda braniken hati aken anter itoe njonja saban kali dateng ka gredja. Djikaloe itoe njonja sedeng meremken matanja sambil rangkep tangannja dan berdoah pada Allah aken minta kaslamatan atas dirinja, Landru jang toeroet berloetoet di sampingnja njonja, gosok pikirannja tjara bagimana ia bisa boedjoek ini njonja dan rampas miliknja.
Landru poenja anggepan dalem ia poenja kadjahatan ada terlaloc gila. la salamanja pikir, kapan satoe prampoean soeda klaar ia boenoel dan maitnja soeda bersih ia singkirken, nistjaja tida ada satoe manoesia jang brani bilang bahoea ia sasoenggoenja jang boenoch. Laen dari bagitoe, samoca orang politic ia pandang terlaloe bodo, dan tida tjockoep pinter bocat bisa endoes dimana ia socda bakar, pendem dan lempar mait-mait dari ia poenja korban. Sama sekali Landru tida inget bahoea zonder ada bangke dari djiwa jang ia boenoeh, hauja melinken dengen kasaksian-kasaksian dari familie korbannja, ia bisa djoega ditoentoet dan kapan ia tida bisa kasih penjaoetan sebagimana pantesnja, ia tida nanti terloepoet dari toentoetamnja pengadilan.
la pikir politie melinken taoc prampoean anoe soeda ilang dan prampoean ini linjap, tapi kemana linjapnja, tjara begimana ilangnja, siapa jang soeda boenoeh, toch politic tida bisa oendjoek Dan zonder ada boekti jang sah, apakah dirinja bisa ditangkep? Laudru pikir, dengen gampang sekali ia bisa kasih djawaban pada politie, bahoea saban tahon ada ratoesan prampoean jang ilang dengen tida katahoean, dan Landru bisa oendjock djoega boekti-boekti bahoea prampoean jang tadinja disangka ilang ternjata soeda pergi ka laen negri atawa ka doesoen-doesoen jang djave dimana ia meninggal doenia zonder familienja di Parijs dapet taoe. Tapi Landru loepa, sekali poen ia ada poenja banjak alesan dan tangkisan boeat toedoehannja politie, satoe kali roemahnja di gleda dan barang-barang tanda mata dari korbannja terampas oleh politie, ia tida nanti bisa moengkir lagi dari djiretannja wet.
Sekarang kita kombali pada Landru jang sedeng doedoek beromong-omong dengeu itoe njonja manis, tatkala mana Landru djadi dapet taoe bahoea itoe njonja masih ada poenja simpenan oewang kira-kira saratoes frank, barang perabotannja ada kira-kira doearatoes frank.
Esokannja Landru dateng mengoendjoengi lagi ka roemahnja itoe njonja, sebab ia socda ambil poetoesan tetap boeat binasaken djiwanja itoe korban. Maka sasoedanja doedoek beromong-omong sedikit lama ia laloe berkata:
„Djiwa hatikoe jang manis, samoea orang di ini moesin panas masing-masing tjari tempat dingin di oedik-oedikan. Besok pagi akoe hendak berangkat ka akoe poenja villa di Gambais, djikaloe kaoe soeka toeroet, tentoe akoe merasa beroentoeng sekali."
Itoe njonja jang kapingin taoe bagimana matjemnja itoe villa, soeda djadi girang mendenger itoe tawaran.
„Djikaloe akoe bisa tinggal disana, tentoe sekali kaoe poenja villa jang tida dirawat oleh orang prampoean. aken djadi bersih dan bagoes," katanja itoe njonja manis.
Esokannja iaorang soeda berangkat dengen trein menoedjoe ka Houdan. Di hotel du Plat d'Etain marika mampir dan doedoek minoem kopi, kamoedian marika landjoetken perdjalanannja menoedjoc ka villa Hermitage, atawa roemah kamatian.
Landru kirim koffer-koffernja dengen kreta jang berdjalan belakangan, dan koetika iaorang sampe di depan itoe villa, kreta itoe soeda ada menoenggoe di depan pintoe.
Njonja Jaume jang tjantik soeda djadi sanget girang tatkala meliat itoe gedong jang soenji dan bagoes letaknja.
Int. njonja manis sama sekali tida taoe djikaloe ia sedeng di djebak masoek dan bahaja maoet ada sadia aken ambil djiwanja di sembarangan saät. Samentara setan-setan dari korbannja Landru tida ada satoe jang maoe bisikin di koepingnja ini njonja, soepaja sabelon djiwanja ditjaboet oleh Landru, ia bisa melariken diri.
Demikianlah hari berdjalan semingkin tjepet, satoe minggue soeda liwat dengen penoch kaberoentoengan dalem hatinja njonja Jaume. la merasa beroentoeng sebab dapet satoe lelaki jang sasoenggoenja hartawan, sebab sebagitoe lama ia berdiam dalem itoe villa, tida sekali lelaki itoe ada pikirken tjara bagimana ia moesti tjari oewang, hingga kaliatannja itoe lelaki belon perna diserang oleh penjakit kantong kempes. la merasa beroentoeng jang ia sekarang ada tinggal di satoe villa bagoes, dengen ada sadia tjoekoep makanan dan kandaraän auto. la merasa beroentoeng jang tida lama lagi ia aken ikoet soeaminja ini jang hartawan pergi bikin perdjalanan ka Engeland, Amerika dan Hindia. Helaas! njonja Jaume, tida taoe jang ia poenja beroentoeng itoe tjoema doea minggoe, tida taoe bahoea itoe lelaki jang ia tjinta ada satoe algodjo!
Ampatbelas hari berselang sedari njonja Jaume jang tjantik berdiam di villa terseboet, sakoenjoeng-koenjoeng Landru dapet trima satoe telegram jang dikirim oleh Armand Blaisot dan di atas telegram itoe ada ditoelis „PERLOE".
Telegram itoe dikirim dari hotel de Grenoble, dalem telegram ada dibri taoe jang si penoelis minta bitjara pada Landru boeat satoe oeroesan penting dan bisa datengken kaoentoengan besar pada Landru. Tempat boeat bikin itoe pertemoean ada diseboetken namanja satoe cafe pada djam poekoel sembilan malem.
Landru bales kawat aken bri taoe jang ia aken dateng di tempat terseboet pada djam jang ditetepken. Sorenja Landru lantas berangkat ka Parijs dengen tinggalken njonja Jaume sendirian dalem itoe villa.
Di tempat jang dioendjoek Landru katemoe pada Armand Blaisot dan sasoedanja beromong-omong, iaorang laloe berdjalan pergi dan berdiri di pinggiran satoe djalanan jang sepi.
„Begini, sobat," kata Armand jang moelai oendjock apa sebabnja ia oendang Landru lekas dateng ka Parijs. „Akoe ini sedeng hadepken kasoesahan. Kaoe tentoc masih inget, berselang bebrapa boelan jang laloe akoe ada adjar kenal kaoe pada satoe njonja tjantik jang söeaminja,soeda minggat, jaitoe njonja Jaume akoe maksoedkon. Tentoe sekali akoe tida bisa loepaken pada itoe njonja tjantik, kérna akoe taoe sedari itoe waktoe kaoe sering koendjoengi roemahnja. Dia itoe ada. satoe prampoean. . . . . hm! jang bisa datengken bahaja. . . sebab dia ada taoe bebrapa perkara, jang djikaloe ia iseng moeloet tjeritaken pada politie, nistjaja bisa bawa tjiläka besar padakoe dan djoega pada kaoe!"
„Ach! kenapa pada akoe?" tanja Landru.
„Denger doeloe. Lambat laoen kaoe poenja resia djoega nanti dikatahoei olehnja, dan kaloe djadi bagitoe, tentoe kaoe djoega. . . . . . . rasaken sebagimana akoe sekarang ada kwatirken." „Dan kaoe pikir maoe bikin apa padanja?" tanja Landru jang moelai mengarti kahendakannja orang.
„la moesti disingkirken dari doenia. Apa kaoe sanggoep kerdjaken itoe? Tapi kaoe moesti berlakoe hati-hati djangan sampe dapet di endoes oleh politie. . . . . ."
Landru gojang kapalanja, bikin kaberatan dan seboetken bahaja besar jang bisa menimpah pada perboeatan demikian.
„Ada tarohannja. Tjoekoep banjak. Limariboe frank jang kane lantas bisa trima dari akoe sabagitoe lekas kaoe bisa oendjoek jang itoe njonja soeda kaoe boenoeh!"
Landru diam bebrapa saat seperti orang berpikir, tapi sabetoelnja ia sendiri poen memang soeda sadia itoe niatan aken boenoeh njonja terseboet, melinken sekarang ia sengadja poera-poera sangsi, soepaja Armand maoe naekin harga tarohannja.
„Apa kaoe brani bajar doea kali dari djoembla jang kaoe seboetken tadi?" lanja Landru dengen bernapsoe.
„Baek, Sapoeloe riboe frank!" sahoet Armand.
Perdjandjian lantas dimoefakatken dan Landru djadi girang, sebab tida lama lagi ia aken djadi kaja dengen oewang darah sapoeloe riboe frank!