Landru/Bagian 12
BAGIAN XII.
Mait jang terpendem.
———
Besokan paginja djam sabelas, Landru adjak Armand Blaisot ka Cafe de l'Opera, dimana sembari doedoek minoem Vermouth iaorang bitjaraken poela itoe perkara pemboenoehan.
„Itoe oeroesan jang samalem kita bitjaraken, akoe sanggoep bikin beres," kata Landru dengen soeara sabar. „Apa kaoe masih inget doeloe akoe ada poenja perkara dengen Caudiac, kita poenja sobat kentel ?"
„Dengen itoe Markies?" bales tanja Armand. „Dia itoe belon berselang brapa lama soeda dioeber-oeber oleh politie dan dengen banjak soesa baroe bisa lepasken dirinja. Itoe perkara telah terdjadi di Marseille, dimana ia soeda dapet kasoesahan lantaran perboeatannja satoe prampoean."
„Oh! itoe lelakon akoe taoe abis," kata lagi Landru dengen mesem. „Akoe inilah jang soeda oendjoeki ia djalan, hingga ia bisa menjampeken maksoednja bagian jang pantas. Apa jang adalah hal kaoe jang bagitoe Apakah sebabnja ?"
„Sebabnja, akoe tida bisa tjeritaken pada kaoe, sobat." kata lagi Armand. „Boeat tjeritaken itoe moesti pake banjak tempo. Tapi kaoe tentoe mengarti djikaloe akoe bilang jang akoe tida bisa dapet rasa santousa djikaloe itoe prampoean belon disingkirken dari doenia, sebagi djoega kaoe koetika njonja Cuchet masih hidoep. Apakah kaoe masih inget hal itoe? Tentoelah itoe prampoean, kaloe ia masih hidoep, nanti tjeritaken banjak pada politie tentang kaoe poenja resia-resia jang kasoedahannja aken membawa tjilaka pada kaoe. Hal begini djoega aken terdjadi padakoe kapan njonja Jaume masi ada di doenia."
Boeat itoe akoe soeda dapet sekarang akoe masih pikirken, katakoetan sama njonja Jaume.
„Kaloe kaoe anggep perloe sanget aken itoe njonja disingkirken." kata lagi Landru, ,akoe poen bisa trima itoe pakerdjaän. Melinken ada satoe hal jang soeker, jalah kaoe ingin liat boektinja jang itoe njonja soeda terboenoeh. Begimana akoe bisa kasih nendjoek iroe boekti. Zonder kaoe liat itoe boekti tentoe kaoe tida maoe bajar oepahan jang kaoe djandjiken kamaren!"
„Tentoe sadja," kata lagi Armand.
„Kaloe bagitoe kaoe ingin bikin perdjandjian begimana?" tanja Landru.
Sakian lamanja itoe doea orang tida berkata-kata.
Achirnja Landru berkata lagi:
„Ini hari ada hari Rebo. Saptoe malem djam doea akoe toenggoe kaoe poenja kadatengan dioetan Fontainebleau deket Parquere de Montigny. Djoemahat malem kaoe boleh pergi ka Hotel de la Renaissance di Marlotte. Malemnja kaoe pergi ka oetan terseboet dengen liwati George aux Loups, achirnja kaoe nanti sampe di satoe simpangan. Disitoelah kaoe toenggoe kadatengankoe, dan disitoe kaoe nanti dapet boekti sebagimana jang kaoe ingin."
„Baek, akoe toenggoe disitoe. Aken tetapi lebih baek akoe berkandaran speda dari pada djalan kaki."
„Bagoes, sebab dengen bagitoe djadi kaoe bisa lekas maboer." kata lagi Landru. „Tapi djangan loepa itoe waktoe kaoe soeda moesti sadiaken oewang."
„Tentoe akoe tida loepaken itoe.
Dengen bagitoe marika berdoea soeda poetoes pembitjarahan, masing-masing moefakat dengen itoe perdjandjian, laloe kadoeanja berdjalan poelang, masing-masing poeter otak boeat selesehken itoe pakerdja'an.
Landru sekarang mengarti kenapa Armand maoe kalocarken sadjoembla oewang jang bagitoe besar boeat linjapken njonja Jaume dari doenia.
Itoe njonja tjantik tentoe ada taoe perkara apa-apa jang penting berhoeboeng dengen pakerdjaännja Armand jang kotor. Landru taoe Armand poen ada satoe badjingan dan pemboenoeh jang oeloeng. Maka boekan satoe perkara jang tida boleh djadi kaloe Armand ada lakoeken satoe perkara boenoeh jang dikatahoei oleh njonja Jaume, hingga Armand dapet rasa kwatir pada itoe njonja.
Landru timbang itoe samoea, tapi sasoedanja berpikir saperampăt djam lamanja ia ambil poetoesan aken teroesken itoe niatan, kerna dengen kerdjaän itoe ia bisa dapet oentoeng padanja doeabelas riboe frank.
Sekarang Landru soeda taoe dengen pasti jang Armand Blaisot, terkenal di Parijs dengen nama Beauville, Cannes, Biarritz dan Aix, soeda lakoeken satoe pemboenoehan, resia mana telah dikatahoei oleh njonja Jaume.
Pada itoe malem djoega Landru balik ka Gambais, dimana njonja Jaume jang tjantik soeda menoenggoeken kadatengannja dengen tida sabar.
Koetika Landru sampe di dalem, ia lantas peloek itoe njonja manis dan hatoerken ia poenja maäf jang ia soeda tinggalken njonja terseboet saorang diri. Sebabnja ia berangkat ka Parijs, ia kata ada berhoeboeng dengen oeroesan dagang jang amat penting.
„Akoe harep, djantoeng hatikoe, jang kaoe tida goesar," kata Landru dengen tida lepasin njonja itoe dari peloekannja. „Ada banjak sekali oeroesan di Parijs jang membikin akoe tida bisa poelang lebih siang."
„Oh! akoe tida goesar, Lucien. Selagi kaoe pergi ka Parijs akoe djalan-djalan dan ada blandja apa-apa," djawabnja njonja Jaume. Kamoedian akoe doedoek menoenggoeken kaoe. Sekarang akoe ada amat girang jang akoe soeda bertemoe poela dengen kaoe."
Malem, koetika marika doedoek bersantap. Landru ada menanja pada diri sendiri, resia apakah jang ini njonja dapet katahoei tentang itoe badjingan Armand Blaisot? Landru tadinja ingin korek itoe resia dari moeloetnja njonja Jaume dengen aloes atawa dengen djalan teroes terang. Aken tetapi sasoedanja menimbang pergi dateng, achiraja Landru oeroengken itoe niatan, lantaran ada lebih banjak meroegiken dirinja dari pada kaoentoengan.
Landru taoe njonja Jaume ada beda dengen prampoean-prampoean laen. Njonja Jaume ada satoe prempoean tjerdik, kaloe ia tanjaken hal itoe dan ini prampoean dapet tebak apa jang Landru niatken, tentoelah pakerdjaännja djadi gagal, oewang tarohan jang besar nanti lolos dan ia bisa dapet soesa.
Esokan paginja, maski poen oedara masih gelap, Landru soeda kaloear dari roemahnja, pada njonja Jaume ia kasih taoe jang ia perloe moesti pergi ka Parijs, sabentar malem ia kombali. Dari pendjaitan Landru ambil satoe goeloeng benang itam, masoeken dalem kantong dan lantas naek autonja.
Sabetoelnja Landru moesti ambil djalan ka Versailles, tapi ia sengadja ambil djalan ka Selatan dan koetika sampe di Etampes, ia brentiken autonja di depan satoe bengkel besi, dari mana ia beli satoe djoekilan dan satoe Schoop.
Dari Etampes ia djalanken autonja liwatin La Ferte ka Fontainableau. Samoea djalanan ada dikenal dengen paham oleh ini badjingan, maka di satoe djalanan ketjil ia menikoeng ka satoe djalanan sepi, dimana ada terletak banjak daon-daon jang baroe rontok dari poehoennja
la soempoetken autonja di blakang poehoen besar, kamoedian ia kaloearken makanannja, jaitoe boterham dan roti jang njonja Jaume sendiri bekelin padanja. Sahabisnja itoe, ia toeroen dari autonja dan pandang keadaan di itoe tempat sakoetika lamanja. Dengen ia poenja schoop, ia moelai singkirken tjabang-tjabang poehoen dan daon-daon jang rontok, kamoedian ia moelai gali satoe lobang dengen ia poenja djoekilan.
Satengah djam lebih ia bekerdja menggali itoe lobang, dan tida brapa lama lagi ia soeda bisa gali itoe lobang doea kaki dalemnja. Sekarang dengen hati-hati ia toetoepin itoe lobang dengen daon-daon kering, lantas ia ambil itoe benang, ikat oedjoengnja di satoe tjabang dekat pada lobang itoe, poeterin itoe benang di sakiternja poehoen jang dekat sitoe, kamoedian oedjoengnja ia oeloer sampe di moeloet gang.
la sengadja berboeat bagitoe, soepaja djikaloe ada orang dateng di tempat terseboet, itoe benang nanti poetoes dan Landru bisa dapet kanjata'an kerdja'annja dapet dikatahoei oleh laen orang.
Satelah seleseh atoer itoe kerdja'an, Landru laloe berangkat balik ka Gambais, sampe di roemahnja pada djam ampat liwat.
Esokan paginja, djadi hari Djoemahat, marika berdoea plesir djalan-djalan ka Houdan dengen berkandaran auto dan atas perminta'annja njonja Jaume, Landru brentiken autonja di depan satoe gredja. Njonja Jaume toeroen dan pergi sembajang di gredja itoe, di'ikoeti oleh Landru jang terpaksa toeroet berloetoet.
Sorenja marika djalan-djalan ka Thionville dan pada malemnja, dengen kasih oendjoek boelan jang bersinar terang, Landru adjakin njonja Jaume djalan-djalan ka Parijs dengen auto jang mana ada ditrima oleh njonja Jaume dengen girang.
Paginja njonja Jaume ada toelis satoe soerat boeat ia poenja soedara, dan Landru masoekin soerat itoe ka dalem kantongnja dengen berdjandji jang ia nanti kirim itoe soerat ka kantoor post, tapi sabetoelnja ia tida kirim itoe soerat, hanja robek-robek dan boewang ka kali.
Itoe malem koetika iaorang doedoek bersantap, sembari peloek dan tjioemin njonja Jaume Landru ada berkata: „Tida lama lagi kitaorang djadi soeami-istri jang sah. Pada itoe waktoe akoe nanti djadi satoe lelaki jang paling beroentoeng dalem doenia. Maski poen dirikoe soeda toewa, aken tetapi lantaran mempoenjai istri sebagi kaoe jang begini poenja tjantik, akoe rasaken dirikoe banjak lebih moeda. Sahabisnja kitaorang menikah, kita nanti bikin perdjalanan ka negri-negri panas dan sasoedanja kenjang plesir, kita nanti balik kombali ka kita poenja Tanah Aer".
„Ja, Lucien," kata njonja Jaume dengen girang. „Djiwa dan badankoe sekarang akoe serahken aken mendjadi kaoe poenja sendiri".
Koetika iaorang berangkat dari itoe roemah, hari soeda djaoe malem. Sasoedanja Landru selimoetin kakinja njonja Jaume jang doedoek di box depan dari itoe auto, dan toetoepi djoega satoe mantel di badannja, Landru lantas djalanken itoe kandaran menoedjoe ka djalanan Parijs. Dengen sabentaran sadja auto itoe soeda liwatken bebrapa desa, achirnja sampe di Etampes, oetan dari Batonceau, dan sasoedanja brenti bebrapa kali di Gazeran, achirnja iaorang sampe di lemba Foret St. Croix, dimana Landru kasih taoe pada njonja Jaume jang autonja ada dapet sedikit karoesakan. Disitoe Landru toeroen betoelin autonja dan tida brapa lama lagi auto itoe soeda bisa teroesken perdjalanannja. Kamoedian iaorang sampe di Chartres, satoe tempat kira-kira limapoeloe kilometer dari kota Parijs dan ada satoe tempat bagoes dimana ada berdiri satoe gredja toewa jang berhikajat, dan bebrapa roemah jang diberdiriken sedari abad jang ka tigabelas.
Sebab soeda berdjalan bebrapa djam, tapi belon djoega sampe di dekat-dekatnja kota Parijs, djadi njonja Jaume kapingin taoe kemana Landru hendak bawa padanja. la laloe tanjaken hal itoe, dan kaloe ia maoe dibawa ka tempat laen, kenapa pertama kali Landru bilang hendak teroes pergi ka Parijs, Landru kasih djawaban :
„Kaoe djangan kwatir, djantoeng hatikoe. Haroes akoe minta maaf lebih doeloe jang akoe tida bilang lagi pada kaoe aken djalan-djalan disini. Besok pagi akoe ada perloe koendjoengi persidangan di Le Mans dan lantaran akoe tida maoe tinggali lagi kaoe sendirian dalem roemah, sedeng letaknja Le Mans ada kira-kira saratoes kilometer dari sini, maka akoe ambil katetepan bawa kaoe bersama-sama. Akoe rasa kaoe tida ada kaberatan ikoet padakoe?"
„Tentoe sadja tida, Lucien," djawab njonja Jaume dengan tertawa. „Akoe salamanja ada sadia aken toeroet kaoe pergi kamana djoega, itoelah kaoe tentoe taoe."
Kita aken tinggal disini satoe djam lamanja," kata lagi Landru. „Kamoedian kita nanti landjoetken perdjalanan lebih djaoe. Kita nanti liwatken Nogent-le-Retrou. Akoe kenal dengen baek samoea djalanan disini."
Dari satoe waroeng minoeman Landru pesen satoe botol anggoer dan bebrapa boterham boeat itoe perdjalanan, sebab ia kata kwatir nanti kalaparan di tengah djalan.
Djam doeabelas iaorang soeda berangkat lagi, tapi sedeng tadi Landru bilang aken liwatken Le Mans, sekarang ia ambil djalan ka djoeroesan Oetara-timoer, balik kombali ka desa Malesherbes, achirnja ia brenti di oetan Fontainebleau.
Djam satengah satoe malem, koetika liwati djaoe dari Malesherbes, Landru minta dikaloearken itoe boterham dan anggoer la brentiken autonja dan ambil itoe botol anggoer, kamoedian toewang satoe glas, kasihken itoe pada njonja Jaume, samentara Landru sendiri ambil itoe botol anggoer jang tadi ia beli di djalanan, laloe minoem dari botolnja. Njonja Jaume kira ia minoem anggoer jang tadi Landru dapet beli dari djalanan, aken tetapi sabetoelnja ia minoem anggoer jang Landru sadiaken dari Gambais.
Njonja Jaume dahar anggoer itoe dengen enak bersama satoe potong roti. „Oedara jang dingin bikin kita poenja peroet lekas lapar," kata Landru.
Koetika marika soeda djalanken lagi autonja belon brapa lama, njonja Jaume soeda kadengeran mengeloèh dan mengglisahan.
Adoeh! Lucien! . . . . . . itoe anggoer . . . . akoe mabok dan „
„Ach! tentoe boekan itoe anggoer, hanja angin. Djangan kwatir," kata Landru. Pegangin sadja akoe. Apa kaoe maoe akoe brentiken ini auto ?"
„Tida, tida, djalan sadja teroes!" kata njonja Jaume dengen pajah, sebab ratjoen jang Landru masoeken dalem itoe botol anggoer dari Gambais, sekarang soeda ngamoek keras dalem peroetnja itoe prampoean.
Adjalnja njonja Jaume soeda dekat sampe, ia bertreak lagi dengen soeara terpoetoes-poetoes :
„Adoeh! akoe tida bisa . . . . . . . napas . . . . . toeloeng kasih akoe aer dingin, Lucien. Ja, Allah. . . akoe . . . ."
Njonja Jaume tida bisa kaloearken satoe perkata'an lagi. ia brontak-brontak lantaran tida bisa tahan moelesnja peroet. Sakoenjoeng-koenjoeng ia lompat dari tempat doedoeknja, dan maski poen Landru dengen sabelah tangannja djambret padanja, toch tida bisa kaboeroe, njonja Jaume soeda lompat kaloear dari auto jang sedeng berdjalan. . . . . . . . . . .
———