Landru/Bagian 2

by William Le Queux

BAGIAN II.

Resianja satoe villa

Siapakah taoe kaloe pada malem terseboet dalem itoe villa jang sepi dan saderhana telah terdjadi satoe perkara jang ngeri sekali. Ini resia jang bisa bikin boeloe badan mengkirik, saja aken toetoerken disini, boeat oendjoek brapa djaoe manoesia poenja kakedjeman pada sasamanja manoesia.

Saja rasa ada djadi saja poenja kawadjiban aken toelis ini kadjadian dengen teroes terang, soepaja sakalian kadjahatannja ini orang jang aneh, kedjem dan banjak akal, jang belon brapa lama (1922) soeda dihoekoem mati oleh hakim di Versailles (Frankrijk), terbeber kadjahatanuja itoe pada sekalian doenia.

Njonja Cuchet dan Andre pada maleman jang ia bakal diboenoeh, ada berdiam dalem satoe kamar-makan dan kadoewanja orang itoe masing-masing soeda minoem satoe gelas anggoer madeira jang Landru sendiri boeka dan toewang itoe ka dalem glas, aken tetapi ia sendiri tida minoem, hanja gantiken dengen brendi jang slamet boeat kawarasan badan.

„Besok, akoe hendak pergi ka Parijs bersama Andre, Raymond," kata njonja Cuchet pada Landru, „dan bersama akoe poenja soedara prapoean, akoe hendak pergi beli barang-barang. Kaloe kaoe poen hendak toeroet, baeklah kita-orang brangkat bersama-sama".

„Dengen segala senang hati, djantoeng hasikoe," djawabnja Landru dengen merdoe. „Akoe poen merasa tida beta aken tinggal sendirian dalem ini roemah djikaloe tida berserta kaoe", begitoelah itoe pendjahat soeda samboengin ia poenja perkataän.

Kamoedian dengen manis ia hiboerken hatinja njonja Cuchet dan Andre dengen perkataän seperti:

„Akoe nanti bawa kaoe dan Andre ka Parijs dengen auto, dan nanti malemnja kita aken berdiam dalem roemahnja Friedmann, kaoe poenja soedara prampoean." Itoe kaoentoengan jang tadi ada diseboetken oleh Landru, boeat kaoentoengan mana hingga anak dan iboe bikin pesta minoem anggoer Madeira, boekaniah laen dari satoe kamenangan jang ini badjingan soeda beroentoeng dapetken katjintaännja satoe prampoean laen, jaitoe njonja Labord-Linie, satoe prampoean berasal dari Argentinië, dan ada terkenal sebagi saorang pram­poean jang berharta.

Sekarang kita maoe liat lagi pada njonja Cuchet. Itoe malem Landru soeda beresken antero barang-barangnja njonja Cuchet, hingga semoea barang-barang itoe laloe pinda dalam tangannja Landru, dan ia tiada boleh berlakoe ajal, njonja Cuchet moesti disingkirken sabegitoe lekas sabrapa bisa, soepaja itoe tempat boleh dipake boeat laen laen korban.

Itoe perkataän „menika" njatalah ada satoe sendjata jang bagoes sekali boeat Landru, kerna dengen goenaken itoe perkataän tiada koerang dari doewaratoes prampoean jang kena ditipoe olehnja dan kamoedian dibinasaken dalam tangannja sendiri. Bahoewa Landru sasoenggoenja ada satoe manoesia jang kedjem, itoelah ada ternjata dengen perboeatannja jang sasoedanja binasaken djiwanja ia poenja korban lantes barang-barang perhiasan jang menempel di badannja itoe korban diambil seanteronja.

Sembari oeroet-oeroet ia poenja djenggot jang aloes Landru awasin djalannja lontjeng.

„Apa? Soeda begitoe laat?" kata njonja Cuchet, „Soeda waktoenja boeat kita masoek tidoer. Tetapi akoe rasaken badankoe tiada enak, dan akoe rasa mabok djoega..."

„Akoe djoega begitoe!" kata Andre dengen roepa jang lesoe.

„Itoe anggoer ada lama dan keras", kata Landru pada itoe doewa orang, „tentoe itoelah lantarannja. Itoe ada anggoer jang bagoes sekali."

Aken tetapi sabetoelnja adalah itoe anggoer Landru soeda tjampoerin ratjoen jang dalem tempo satoe djam orang jang minoem itoe moesti brangkat ka tempat baka.

Landru doedoek bersama itoe doewa orang sembari tertawa dan mengomong, samentara matanja itoe pendjahat mengawasin njonja Cuchet dengen tiada berkesip. Banjak prampoean mengakoe pada saja, kapan ia di awasin oleh Landru bagitoe roepa, ia tentoe djadi gemeteran dengen tida dapet taoe apa lantarannja.

— 19 —

Sakoenjoeng-koenjoeng njonja Cuchet dapet satoe firasat tidak baek atas dirinja itoe pendjahat, samentara Landru teroes intjerken matanja dengen tida perdoeliken pada njonja Cuchet.

Tiada lama njonja Cuchet rasaken jang ia aken djatoh pang­san,tapi ia koeatken badannja boeat lawan itoe, dan dengen pikirannja jang masi sehat, ia mendoesin bahoewa itoe lelaki jang ia tjintaken dengen sagenap djiwa dan jang sekarang ini ada pegang ia poenja antero kakajahan, soeda tiada perloe lagi sama dirinja. Tapi itoe waktoe soeda kasep, sebab ratjoen soeda ngamoek keras di saloeroe badannja dan ia tida ada tempo lagi boeat toeloeng dirinja atawa melariken diri dari itoe bahaja.

„Dieu ! badjingan besar !" bertreak, njonja Cuchet dengen soeara keras sembari lontjat dari korsinja, „kaoe soeda ratjoenin akoe !"

Landru njata ada satoe pendjahat oeloeng, kerna perkataännja njonja Cuchet tiada sekali bikin ia djadi bingoeng. Bebrapa orang, jang kabetoelan liwat disitoe, telah denger itoe toedoehan dan boleh djadi djoega soearanja njonja Cuchet dapet didenger oleh orang-orang jang tinggal berdekatan.

Zonder berpikir lebih lama Landru sigra poekoel njoja Cuchet dengen keras, hingga itoe korban djadi roeboe dengen pangsan dan tida bisa oetjapken satoe perkataan apa-apa lagi, malah djoega tiada bisa bergerak poela.

Bagimana soeda terdjadi dengen Andre?

Dia ini soeda meninggal doenia zonder dapet poekoelan lagi dari itoe pendjahat, kerna ratjoen jang kena dimakan olehnja ada tjoekoep banjak boeat bikin ia roeboeh dengen tiada bisa kaloearken satoe perkataan.

Dengen adem Landru awasin ia poenja korban-korban, dan dengen sendirinnja ia berkata:

„Beginilah adanja kaoe poenja lelakon, njonja jang manis ! Kaoe poenja soedara prampoean, Friedmann tentoe aken tanjaken katrangan sama akoe. Akoe tentoe aken bilang jang kaoe telah pergi ka tempat djaoe, oepama bikin perdjalanan ka Amerika dan kaoe poenja anak soeda masoek pada vrijwilliger dari balaten­tara Inggris jang kasohor gaga! Liatlah akoe ada sampe tjerdik boeat kasi djawaban jang manjenangken pada marika."

Sabelonnja Landru lakoeken itoe pemboenoehan, lebih doeloe ia soeda sediaken satoe perkakas membakar di atas dapoer, jang mana aken dipake boeat bakar maitnja itoe iboe dan anak, soepaja bekas-bekas dan ia poenja kadjahatan tiada diketahoei oleh siapa djoega.

Sabagitoe lekas kadoea mait terseboet tiada bergerak lagi, Landru sigra ambilin barang perhiasan jang ada menempel di badannja njonja Cachet dan Andre; peneti dasi jang Andre ada pake soeda dipake oleh itoe badjingan, dan ini barang perhiasan sedari itoe waktoe Landru pake ampir saban hari, hingga sampe waktoe politie tangkep ini pendiahat, itoe barang masih menempel di badannya.

Tiga hari sabelonnja itoe pemboenoehan dilakoeken, Landru ada ambil dari ia poenja garage di Neuilly satoe peti jang terbikin dari kajoe, peti mana ditoetoep dengen schroef amat sampoerna.

Pada njonja Cuchet Landru ada tjeritaken bahoewa dalem itoe peti ia ada simpen boekoe-boekoe, katanja ia baroe dapet beli di Parijs. Ia kata lebih djaoe, bahoea ia aken diriken sendiri satoe kandang andjing jang terbikin dari batoe, maka itoe ia soeda pesen banjak batoe-batoe, jang dalem bebrapa hari lagi aken sampe di roemahnja.

Njonja Cuchet, tida taoe kaloe batoe-batoe jang Landru pesen boekan ada batoe-batoe bata, hanja batoe keras jang biasa dipake boeat dapoer perapian.

Koetika peti jang terseboet diboeka, Landru kaloearken dari Sitoe doewa cylinder besi jang pandjang dan satoe toestel blaaspijp jang biasa dipake boeat lasch wadja.

Api jang berkobar kaloe ditioep oleh ini perkakas bisa kaloearken hawa jang panas sekali, hingga satoe plaat wadja jang keras bisa dibikin lembek seperti mentega.

Itoe perkakas samoeanja Landru bawa ka dapoer, dimana ia soeda pasangin batoe oebin.

Kamoedian ia pergi kaloear dan ambil satoe grobak-ketjil yang penoe dengen pasir dan pasir ini poen ia angkoet ka dapoernja.

Brapa kali Landru kaloear masoek dengen giat dan radjin sekali, hingga di itoe malem djoega pakerdja'annja soeda djadi rampoeng.

Dapoer jang didiriken oleh itoe pendjahat soeda klaar, dan djoestroe itoe malem ada toeroen oedjan besar, sedeng oedara ada gelap. Sedeng bagitoe Landru lakoeken kerdjainnja dengen keras di dapoer.

Koetika samoeanja soeda sedia, Landru lantas bikin pertjobaän dengen ia poenja fornuis dan dari itoe pipa jang bengkok lantas kaloear api pandjang, biroe dan begitoe panas hingga itoe pendjahat tiada bisa boeka teroes matanja zonder pake toetoepan. Dengen itoe perkakas Landru nanti bakar abis ia poenja doea korban, malah boleh dibilang soeda banjak korban jang ia linjapken dengen tjara bagitoe.

Kamoedian Landru ambil satoe katja mata jang biasa dipake oleh satoe toekang lasch wadja. Koetika samoea soeda sadia, dengen sabar Landru menoedjoe ka kamar makan, di mana ada terletak maitnja njonja Cuchet dan Andre. Lampoe gas ada dipasang dengen terang, sebab kaädahan di Vernouillet ada sepi. Di medja ada terletak tjangkir kopi, bebrapa bidji pisang, botol anggoer jang beratjoen, dan doewa glas jang isinja soeda diminoem kering oleh njonja Cuchet dan Andre!

Itoe pakerdjaän jang amat kedjem, sabetoelnja bisa bikin laen orang jang liat djadi bangoen boeloe badannja, aken tetapi Landru sebagi satoe pendjahat jang oeloeng, soeda hadepken itoe pakerdja'an kedjem seperti satoe kerdja'an biasa sadja.

Dengen kalakoean sabar ia ambil itoe botol anggoer dan glas-glas, jang mana samoeanja ia laloe bawa ka dapoer. Sisahnja anggoer beratjoen jang masih ada katinggalan dalem botol, ia laloe boewang ka dalem satoe solokan jang aernja mengalir deres, dan itoe glas-glas ia laloe tjoetji bersih. Kamoedian ia ambil lagi itoe botol dan lemparken ka dalem dapoer perapian jang sedeng berkobar-kobar.

Sasoedanja itoe ia lantas dateng kombali ka dalem kamar makan, dan dengen tida pandang kadoea kali lagi pada parasnja njonja Cuchet, pada siapa ia soeda perna hidoep sebagi soeami istri, Landru lantas telandjangin maitnja itoe njonja, kamoedian ia pondong ka dalem dapoer. Ia laloe taro mait itoe di atas satoe talenan besar dan soepaja sabentar darahnja itoe mait tida moentjrat dan berhampoeran kasana-sini, ia laloe sebarken pasir di sapoeternja itoe talenan. Satoe golok besar jang ia sendiri soeda gosok amat tadjem, ia lantas ambil dari dalem satoe lemari dan dengen ini perkakas tadjem, ia moelai potong-potong maitnja njonja Cuchet seperti orang potong daging sampi boeat dibikin biefstuk, kamoedian itoe potongan-potongan ia lermparken ka dalem perapian jang apinja menjala besar. Hawa dalem kamar djadi bagitoe panas, hingga Landru lantas boeka badjoenja. Djoega njalanja api ada bagitoe silo, hingga sabentar-bentar Landru pedengin matanja dengen tangan, maski mata itoe soeda dipakein katja mata item. Kerna besar dan panasnja itoe api jang ditioep keras oleh blaaspijp, maka dalem tempo sabentaran sadja itoe potongan-potongan daging manoesia soeda djadi aboe, melinken katinggalan toelang-toelangnja sadja, bermoela toelang-toelang itoe djadi poetih, kamoedian item dan beroba djadi poetih lagi lantaran soeda djadi aboe.

Koetika Landru ambil maitnja Andre, itoe dapoer masih teroes menggereng sembari bikin abis sama sekali daging dan toelangnja njonja Cuchet. Seperti soeda kadjadian dengen iboenja, bagitoelah djoega soeda terdjadi dengen maitnja Andre jang dipotong kettjil-ketjil dan dimasoekin ka dalem itoe dapoer perapian.

Samoea barang jang bisa katinggalan sebagi boekti, seperti pakean, sepatoe dan djoega itoe botol jang beratjoen, dilemparken ka dalem itoe dapoer, jang dalem sedikit tempo sadja, lantas abis mendjadi aboe.

Koetika lotjeng mengoetaraken djam poekoel tiga pagi, apinja penerangan gas djadi koerangan, samentara pakerdja'annja Landru poen soeda seleseh, maka lampoe sigra dipademken, bagitoe djoega apinja itoe dapoer, kerna soeda tida ada apa-apa lagi jang moesti dibakar.

Itoe pasir jang doeloe Landru bawa masoek dan soeda djadi, basah dengen darah, laloe dibawa lagi ka loear dan ditjampoerin dengen pasir kering, hingga pasir darah itoe tida kaliatan lagi.

Sahabisnja itoe Landru laloe naek ka atas loteng dari tingkatan pertama, dimana ia laloe koempoelken barang-barang linnen, soerat eigendom, dari njonja Cuchet dan laen-laen barang jang sama sekali ada berdjoembla tiga koffer.

Sebab lelah, kerna soeda lakoeken bagitoe banjak pakerdja'an berat, Landru laloe mengaso boeat samentara waktoe, ia isep satoe seroetoe dan minoem djoega satoe glas anggoer.

Sinarnja matahari di Barat soeda moelai menoendjoeki roepanja, dan soearanja ajam berkroejoek soeda rame kadengeran disapoeternja itoe tempat. Maski bagitoe Landru tida djoega maoe masoek tidoer, pada parasnja ada kaliatan roepa jang tida sabar, kerna ia ada menoenggoeken apa-apa boeat diberesken di itoe djam djoega.

Apakah sabetoelnja jang Landru sedeng pikirken di itoe waktoe? Jalah itoe batoe-batoe dapoer, jang ia masih tinggal teroes toenggoeken soepaja djadi dingin, kerna aboe-aboe jang masih ada di atas itoe perloe sekali lantas disapoe dan diboewang, soepaja tida ada bekas apa-apa bagi ia poenja kadjahatan, Aken tetapi itoe batoe-batoe sama sekali masih kaliatan merah seperti bara, menoendjoeken jang itoe barang masih panas sekali. Maka Landru itoeng paling sedikit ia moesti toenggoe bebrapa djam lagi, sedeng tjoeatja tida lama lagi aken mendjadi siang dan boeat moelai lagi kerdja'annja ia moesti toenggoe doeabelas djam lagi, jaitoe sampe tjoeatja mendjadi gelap kombali.

Djam sembilan liwat, Landru laloe ambil autonja dari ia poenja garage, kasih masoek itoe tiga koffer dalem autonja, bersama-sama dengen itoe satoe perkakas lasch, dan koetika samoea soeda seleseh, ia laloe koentji pintoe-pintoe roemahnja, dan lantas djalanken autonja menoedjoe ka ia poenja garage di Neuilly.

Sasampenja disana ia laloe taro kombali itoe blaaspijp sebagimana biasanja, sedeng itoe koffer ia laloe angkat ka atas loteng roemahnja.

Landru ada satoe orang jang tiada soeka boewang temponja dengen pertjoema, itoe hari djoega doewa antara itoe ampat koffer ia soeda djoeal pada satoe soedagar di Courbevoie, sedeng horlogie mas dari njonja Cuchet ia djoeal pada saorang nama Lepic di St. Denis, jaitoe saorang jang terkenal djadi toekang tada barang tjoerian. Landru soeda seringkali djoeal barang-barang pada ia ini dan Lepic sampe sebegitoe djaoe belon perna tanjaken dari mana Landru dapetken itoe barang-barang berharga.

Djam lima sore Landru soeda poelang ka roemahnja di Vernouillet, dimana samalemnja telah terdjadi perkara jang ngeri sekali.

Kaadahan dalem itoe roemah ada amat soenji.

Itoe dapoer jang terbikin dari batoe sekarang soeda djadi dingin betoel dan zonder boewang tempo lagi Landru moelai bongkar, itoe batoe-batoe dengen hati-hati ia taroh kombali di tempatnja, jaitoe disoesoen seperti kandang andjing. Aboe jang katinggalan dalem itoe fornuis tiada lebih dari tiga gempel tangan banjaknja, maka dengen gampang itoe aboe laloe ia masoekin dalem doewa kantong kertas. Landru soeda goenaken itoe kantong kertas, sebab maoe singkirken samoea tanda-tanda dari ia poenja kedjahatan. Lebih djaoeh kita aken toetoerken, hal itoe di bawah ini.

Itoe batoe-batoe, satoe-satoe ja tjoetji di solokan dan dengen begitoe, aboe-aboe jang menempel disitoe djadi ilang; kamoedian Landru ambil itoe pipa semprong api dan taroh itoe kombali dalem satoe roemah emper jang ada di ia poenja kebon.

Sasoedanja itoe, ia laloe menoedjoe ka kamarnja dan lantas pake ia poenja badjoe-smoking, masoekin itoe doewa kantong kertas dalem kantong badjoenja, kamoedian djalanken autonja ka djoeroesan desa Médan, satoe tempat sepi jang mempoenjai hoeboengan boeat ka Poissy; dan disinilah ada mengalir soengei Seine jang besar.

Tatkala itoe oedara ada gelap, djalanan sanget sepinja, dan di pinggiran tepi kali Landru brentiken autonja, lantas Landru toeroen dan kaloearken itoe doewa kantong kertas dari sakoenja, jang mana ia laloe lemparken dengen keras ka tengahnja soengei terseboet. Landru taoe, bahoewa dalem tempo satoe djam itoe kertas aken djadi lembek dan isinja boejar, hingga blakang kali djika maoe ditjari, politie tiada gampang bisa katemoeken boekti-boekti dari ia poenja kadjahatan.

Jang ini hal tiada sekali menganggoe pada pikirannja, itoelah ada ternjata jang pada satoe satengah djam kamoedian Landru kaliatan ada doedoek mengobrol sama njonja Labord-Linie, ia poenja toendangan jang baroe, dalem roemahnja itoe prampoean di Rue des. Petits-Champs.

Ia ini ada satoe djanda tjantik, jang berselang belon brapa lama Landru ada katemoe di Rue de Rivoli, tatkala mana Landru ada bikin perdjandjian menika, tapi maksoed jang sabetoelnja, jalah Landru berniat aken rampas hartanja itoe prampoean.

Pada itoe hari selagi njonja terseboet hadepken santapan tengahari, kombali Landru kenaiken dirinja sebagi satoe orang jang sasoenggoenja tjinta itoe njonja djanda. Di hadepan itoe njonja, Landru oendjoek adatnja jang sabar, penoe dengen pengrasaan tjinta, serta omong-omongannja ada dengen teroes-terang dan manis. Sasoenggoenja djoega, tiada saorang nanti bisa doega, bahoea ini toean Henri Cuchet (nama baroe jang Landru pake boeat itoe njonja djanda) ada itoe orang djoega jang belon berselang brapa lama soeda ratjoenin satoe prampoean kekasihnja dan satoe anak djedjaka jang tida berdosa.

,,Oh! djantoeng hatikoe! brapa besar akoe poenja rasa tjinta pada kaoe’’ kata Landru dengen soeara merdoe, samentara bibirnja tjioemin dengen bernapsoe pada lengan tangannja itoe njonja djanda. ,,Dan akoe tiada bisa bilang, bagimana kesel rasakoe, lantaran terpaksa moesti biarken kaoe sendirian, aken tetapi dengen lekas, ia lekas sekali, kaoe aken djadi akoe poenja istri jang tertjinta, dan kaloe soeda djadi begitoe, tentoe kita bisa idoep berkoempoel boeat salama-lamanja.

Ini pendjahat, jang ternjata ada lebih berbahaja dari satoe binatang oeler beratjoen, oetjapken lagi perkataännja jang manis begini:

,,Itoelah aken djadi boekti dari akoe poenja impian. Kendati akoe ada dalem perdjalanan boeat akoe poenja perdagangan, toch akoe selaloe inget pada kaoe, djantoeng hati.’’

,,Akoe sekarang melinken maoe tanja’’, kata lagi Landru dengen soeara jang aloes, ,,melinken akoe maoe tanja, apa kaoe sasoenggoenja tjinta padakoe seperti akoe ada tjinta pada kaoe? nona manis!’’

,,Akoe tjinta pada kaoe dan ini akoe brani tetepken dengen soempa apa djoega’’, kata itoe djanda pada Landru. Ia ini ada satoe djanda jang banjak harta, peninggalan dari soeaminja; oemoernja ini djanda ada ampatpoeloeh toedjoe tahon, maka terang sekali djadi boekan badannja itoe njonja jang berharga di matanja Landru, hanja adalah hartanja djanda itoe jang di inginken.

,,Akoe tjinta kaoe, Henri, dengen antero hati dan djiwakoe !’’

,,O, djantoeng hatikoe’’, kata Landru dengen soeara keras, dan girang, sembari pegangin orang poenja tangan dengen koeat dan tjioemin itoe beroelang-oelang, ,,kaloe kita tjinta satoe sama laen, persetan pada laen orang!’’

Itoe prempoean antepin Landru tjioemin tangannja. Ia djatohken badannja di peloekannja Landru, tapi itoelah berarti jang prampoean terseboet soeda serahken nasib dan djiwanja pada itoe algodjo boeat dibinasaken tida brapa lama lagi. Dengen djalan jang tjerdik achirnja Landru soeda dapet katrangan bahoewa ini njonja terkenal dengen nama ,,Brazilie’’ ada poenja oewang contant jang dititipken pada satoe bank banjaknja kira-kira sapoeloeh riboe franc.

Di dalem hati sabetoelnja Landru ada pandang renda pada ini djanda, sebagimana ia biasa pandang bagitoe pada sasoeatoe prempoean jang bikin perhoeboengan dengen dirinja.

Aken tetapi ini pendjahat jang pande, bisa sekali berpoera-poera, bitjara dan boewang tingka, bagitoe pande hingga ratoesan prampoean djadi toendoek padanja.

la poenja perkata’an-perkata’an jang terpilih, ia poenja oetjapan-oetjapan jang merdoe, membikin banjak sekali nona-nona loepa daratan.

Di itoe malem, sasoedanja ilangken tanda-tanda dari pemboenoehan jang ia lakoeken atas dirinja njonja Cuchet dan ia poenja anak, Landru telah beroentoeng boedjoek ia puenja korban jang baroe boeat serahken ia poenja perabotan dan brentiken penjawahan roemah-roemahnja,

,,Akoe ada poenja roemah jang enak di Vernouillet’’, kata Landru, ,,kaoe tentoe merasa heran, nonakoe jang manis, kaloe hal itoe baroe sekarang akoe bitjaraken. Ternjatah hawa oedara disini tiada begitoe baek boeat kaoe, hawa oedara di oedikan dan ka'adahan disitoe jang anteng, tentoe aken bikin ka'adahan kaoe djadi beroba. Marilah kitaorang tinggal sama-sama di Vernouillet. Dalem boelan Juni kita aken kawin. Dagangankoe ada berdjalan bagoes, tentoelah di kamoedjian hari aken djadi lebih baek. Kita aken berdiriken satoe roemah di Parijs dan berdiriken djoega satoe villa. Boeat akoe sendiri roemah di Vernouillet ada tjoekoep besar, tetapi tentoelah aken djadi terlaloe ketjil djikaloe kamoedian disana kita moesti trima koendjoengannja sobat-sobat.’’

Begitoelah njonja Labord-Linie soeda diboedjoek dan ini prampoean, lantaran terlaloe pertjaja, soeda kena masoek dalem djebakannja Landru.

,,Djadi pasti, ja?’’ demikianlah Henri Cuchet menetepken pertanja’annja, ,,besok tengahari akoe aken dateng dengen auto boeat ambil kaoe, ja, djantoeng hati ?’’

Kamoedian marika berdoea djalan-djalan di Place de l' Opera dan kamoedian dari sitoe marika laloe menoedjoe ka Grand Cafe, di tempat mana marika berdiam satengah djam lamanja mendengerin muziek jang merdoe, sahabisnja dari sitoe Landru anterin si djantoeng hati poelang ka roemahnja. Esokan paginja Landru bikin persedian boeat samboet datengnja orang jang aken djadi ia poenja korban. Landru ada beli djoega makanan dan kembang-kembang, soepaja itoe samoea bisa bikin girang hatinja njonja Labord-Linie.

Landru sedeng beresken itoe kembang-kembang di atas medja, bersama itoe makanan jang ia beli, tatkala mana dengen sakoenjoeng-koenjoeng ada kadengeran pintoe roemahnja diketok.

Dengen oering-oeringan Landru pergi kaloear boeat liat, siapatah itoe jang mengetok pintoe.

Di atas tangga roemah ada berdiri satoe orang jang berbadan besar dengen koemis warna item.

Di itoe saät Landru merasa keadaännja ada dalem bahaja; ia tahan napasnja dan berdiri sakoetika lamanja dengen tiada berkata apa-apa.

,,Toean Diard’’, kata itoe orang jang dikenal oleh Landru, ,,Akoe ini ada orang politie dan perloenja akoe dateng disini, jalah boeat bikin bebrapa pertanja'an pada kaoe.’’

—————————