Pembalesan Kedji/Bab 11
XI.
BESI BRANINJA KATJANTIKAN.
„Apa engga maoe pergi ka toko ini hari ? Sekarang soeda ampir poekoel sapoeloe; samentar poekoel doewa belas soeda djadi tengari lagi.“
„Kamaren doeloe, kamaren goea soeda pergi; sekarang goea pikiran maoe tinggal diam-diam di roemah. Lagi ini hari Minggoe, engga ada kerdjahan apa-apa.“
„Ini minggoe sadja soeda doewa tiga hari entjek engga pergi ka toko; boleh ko begitoe ?“
„Kanapa engga boleh ? Sampe salamanja djoega goea engga pergi, siapa jang brani larang ? Loe taoe, goea toh boekannja koeli !“
„Betoel, tapi apa engga nanti kerdjahan djadi engga beres ?“
„Ah, itoe ada laen orang jang oeroes. Hoaij-wan saban hari dateng, dan kaloe ada dia, kasi goea engga dateng djoega engga djadi kanapa. — Eh, apa loe poenja entjim belon taoe dateng-dateng sadari loe ada di sini.“
„Baroe kamaren dia dateng. Lama djoega dia doedoek-doedoek; dia makan nasi tengari di sini, habis baroe dia poelang.“
„Djadi baroe satoe kali dia dateng ka mari! Habis apa dia kata sama loe ?“
„Ah, engga kata apa-apa : ngomong-ngomong sadja.“ „Habis bagimana loe poenja pikiran sekarang, Soan ? Apa loe masi ada ingetan boeat poelang tinggal sama dia ?“
Soan-nio tida lantas menjaoet. Ia tinggal diam sampe sakean lama dengen toedjoeken matanja kaloear pintoe.
Sabenarnja bagimanatah nona moeda itoe misti djawab itoe pertanjahan ?
Betoel, boeat sekarang ini, kaloe kata poelang lagi ka roemah entjimnja, itoe sama sekali ia soeda tida ada poenja ingetan. Tapi sabaliknja djoega ia belon merasa betah boeat tinggal di itoe roemah bersama-sama Kek-soen.
Boekan sadja sama sekali ia belon ada poenja rasa tjinta pada itoe lelaki satengah toewa, tapi djoega ia sanantiasa masi merasa amat kikoek aken doedoek berdoewa-doewa dengen berdampingan.
Tatkalah denger Kek-soen poenja pertanjahan, Soan-nio lantas merasa, apabilah ia djawab jang sekarang ia tida ada ingetan lagi boeat poelang ka roemah entjimnja, itoe sama djoega ada berarti, jang ia telah merasa lengket sama Kek-soen, dan bagi satoe nona moeda jang belon selang lama masi djadi gadis, Soan-nio belon ada poenja kapandean boeat mengakoeh atawa njataken soeatoe apa jang ada berlawanan dengen pengrasahan hatinja. Itoelah jang mendjadi sebab kaloe ia merasa sarebah salah boeat djawab pertanjahan soeaminja jang soeda ada satengah djompo. Aken tetapi Kek-soen sama sekali tida dapet njataken pengrasahan hatinja ia poenja goela-goela itoe, kerna di itoe waktoe, samantara ia lagi doedoek berdampingan, boleh dibilang ia poenja samanget samoea kenah katarik oleh Soan-nio poenja besi brani katjantikan. Lantaran itoe djoega, koetika ia liat nonanja tinggal berdiam sadja, laloe ia berkata poelah :
„Eh, Soan, apa loe soeka engga djalan-djalan ka empang ?“
„Ngapain pergi ka sitoe ?“
„Enak adja kita senang-senang di sitoe. Dari sini kita soeroe si Moena bawa makanan, Loe belon taoe liat goea poenja empang, baek djoega kita pergi djalan-djalan.“
„Kaloe entjek maoe saia si toeroet sadja, tapi djangan ini hari toh; sekarang soeda ampir tengari; hawanja begini panas sampe maoe meletak rasanja.“
„Goea djoega engga kata maoe pergi sekarang djoega. Kaloe maoe pergi lebi doeloe toh kita misti sediah-sediah doeloe segala barang makanan. Lagi goea nanti tjari taoe doeloe apa dia di Tongkangan maoe pergi engga, sebab loe tentoe engga soeka kaloe misti kasomplokan di sana.“
„Ija, entjek soeda brapa lama engga poelang-poelang ka roemah; apa engga entjim djadi mara sama saia kaloe ia dapet taoe entjek salamanja ada di sini?“ „Ah, itoe loe traoesa takoet, samoea ada goea poenja perkara.“
„Eh, kaloe entjim taoe, habis ia dateng oebrak-abrik di sini ? Baek kaloe lagi ada entjek; kaloe entjek lagi engga ada, bagimana ?“
„Kaga boleh djadi ia brani berboeat begitoe! Kaloe dia brani goea djoega engga nanti takoet boeat oebrak-abrik sama dia.“
„Tapi saia toh jang djadi engga enak kaloe sampe djadi riboet begitoe !“
„Loe traoesa takoet. Engga, dia engga nanti brani berboeat begitoe. Kaloe goea kata engga, engga da.“
Soan-nio berdiam kombali.
Sakali ini Kek-soen lantas dapet njataken jang nonanja poenja moeka ada berobah djadi koerang senang. Djoega ia berdiam sabentaran, kamoedian laloe berkata dengen tarik aer moeka manis:
„Ka mana itoe tjintjin, itoe toesoek konde, itoe gelang, itoe peniti jang goea kasi ? Engga maoe dipakeh-pakeh abis maoe diboeat apa ?“
„Engga maoe pergi ka mana-mana pakeh itoe si maoe apa; ada sadja di dalemtoe.“
„Tjintjinnja sama gelangnja toh boleh pakeh sari-sari.“
„Itoe si gampang. Ini saia djadi kesal. takoet entjim nanti djadi mara sama saia. Ai bagimana ?“
„Ah, goea soeda kata, itoe loe traoesa kwatirin. Engga, biar bagimana djoega dia engga brani apain sama loe.
„Gampanglah kaloe ia soeda djadi mara !“
„Kaloe dia taoe di sini, kita nanti tjari laen roemah.“
„Kaloe laen roemah dia taoe lagi ?“
„Kita nanti pinda lagi ka laen roemah.“
„Do, kaloe sampe djadi begitoe nantinja bagoes amat orang boeat liat-liatan sama kita. Saia engga maoe la begitoe !“
Kek-soen berdiam kombali. Dari aer moekanja ternjata jang ia ada merasa sedikit djengkel. Sasoeda anggoet-anggoetan di krosi gojang sakoetika lamanja, dengen koenjoeng-koenjoeng laloe ia berkata lagi:
„Eh, apa loe maoe pakeh giwang, Soan ? Belon lama satoe orang jang ada oetang toko, engga ada poenja doeit dia soeda kasi sapasang giwang. Intannja si bagoes djoega kaloe diliat.“
„Brapa harga ?“
„Ampat ratoes begitoe.“
„Tjobalah bawa doeloe kasi saia liat.“
„Baeklah nanti besok. — Ai, panas betoel hawanja; soeda poekoel brapa si ni ?“
„Dari tadi belon mandi bagimana engga maoe panas ? Sekarang soeda poekoel sabelas liwat.“
„Apa si Moena soeda timba aer di djembangan ?“
„Soeda dari tadi-tadi.“ „Kaloe begitoe goea maoe mandi ah.“
Sambil kata begitoe Kek-soen lantas berbangkit dan berdjalan teroes ka dalem.
Soan-nio tinggal anggoet-anggoet di pertengahan dengen saorang diri. la poenja pikiran tida enak, jang sadari tadi memang belon dapet dibinasaken oleh Kek-soen, sekarang ini djadi menggoetet samingkin melilit dalem otaknja.
Sasoeda doedoek terpekoer sakoetika lamanja, laloe ia berkata pada diri sendiri dengen soeara plahan:
„Engga salah orang poenja kata: orang engga boleh toeroetin sadja si toewa bangka poenja maoe. Seperti goea sekarang, betoel-betoel sarebah salah! Tjoba la kaloe goea dapet taoe lebi doeloe, jang orang maoe bikin begini sama goea, biar goea boleh djadi mati djoega tentoe engga nanti goea maoe menoeroet. — Sekarang segala toewa bangka jang goea boleh boeat bapa goea misti boeat laki, habis belon taoe bagimana nanti djadinja dengen goea poenja diri. — Ada lagi entjim, enak sadja dia poenja omong!! Dateng-dateng adjarin goea ambil-ambil hatinja si toewa bangka, soepaja dapet disajang. Maksoednja tentoe dia maoe gerembengin sama goea kaloe goea dapet banjak doeit dan mas-intan. Bagoes betoel! Malahan goea samingkin djadi panas sama dia. Engga salah kaloe goea kata. goea poenja diri soeda didjoeal sama si Kek-soen toewa bangka. Sekarang goea engga bedah seperti satoe djobong gelap. . . . . . . . .“
Tatkalah oetjapken itoe perkatahan jang paling blakang, Soan-nio lantas merasa djengah sama dirinja sendiri. la gojang-gojang kakinja seraja memandang pada kasoetnja jang disoelam.
Salagi nona moeda itoe ada dalem itoe kaädahan jang tida enak, sakoenjoeng-koenjoeng satoe laki-laki moeda berdiri di depan pintoe.
Soan-nio tida lantas dapet njataken itoe, kerna samoea soeda terdjadi dengen tida bersoeara barang sedikit.
Anak moeda itoe berdiri tegak dengen mata tida berkesip barang sakedjap.
Boleh djadi sekali sorotnja itoe mata jang tadjem lantas soeda bikin berobah hawa oedara jang mengiterken Soan-nio, hingga achirnja membikin nona moeda itoe dapet pirasat jang ia sedeng dipandang mati-matian, kerna selang bebrapa saät sadja Kek-soen poenja bidadari itoe lantas angkat kapalanja.
Alangkah kagetnja si nona koetika ia dapet liat bagimana getol orang awasin padanja. Sigra djoega ia berbangkit dan maoe melariken diri masoek ka dalem, tapi anak moeda itoe lantas berkata :
„Apa owee poenja baba ada di sini ?“
„Siapa ?“ tanja Soan-nio dengen soeara tida lampias kaloearnja.
„Owee poenja baba, Kek-soen, apa ada di sini ?“ tanja poela itoe anak moeda.
„Lagi mandi; nanti saia bilangin.“
Habis kata begitoe, Soan-nio lantas masoek kadalem, dengen tida menjilahken doedoek lagi pada itoe anak moeda jang masi tinggal berdiri di loear.
Kek-soen, jang koetika itoe sedeng berpakean sasoedanja habis mandi, mendapet denger dengen teges sekali satoe-satoe orang poenja bitjara. Sigra djoega ia kenalken soeara anaknja, hingga dengen tida menanjaken soeatoe apa lagi pada Soan-nio, ia lantas berdjalan kaloear.
„Baba, nona soeroe owee dateng ka mari," kata itoe anak moeda jang masi tinggal berdiri di depan pintoe.
„Tapi loe soeda gedeh toh misti mengarti, Bant-joan," kata Kek-soen dengen soeara koerang senang, „goea engga soeroe loe dateng di sini.“
„Owee djoega tadinja engga maoe adja disoeroe, tapi bagimana: nona saban-saban bikin riboet sadja di roemah. Baeklah baba poelang samentaran.“
„Bilang sama dia: goea engga ambil perdoeli dia poenja mara. Dia maoe mampoes keh biar dia pergi mampoes !“
„Lebi baek baba poelang samentaran, kaloe engga tentoe orang di roemah engga bisa tahan maen dimara-marain sadja sama nona."
„Soeda, loe djangan banjak moeloet di sini ! Bilang sama dia: goea pendeknja engga maoe poelang, dan djangan loe dateng lagi ka mari.“
Sambil kata begitoe Kek-soen lantas gabroekin pintoe.
Ban-tjoan liat begitoe, laloe ia berdjalan poelang.
Sekali poen ajahnja berlakoe begitoe kasar padanja, toch sama sekali ia tida djadi mendongkol, sabagimana biasanja ada terdjadi kaloe ia katemoeken perkara jang samatjem itoe, kerna itoe samoea sekarang telah kenah dihapoesken lebi doeloe oleh satoe pengrasahan jang lebi banjak berkwasa pada hati manoesia.
Ia bertindak, ja, Ban-tjoan berdjalan menoedjoe ka roemahnja, tapi ia poenja soemanget sanantiasa masi tinggal berdiam sadja di Gang Togee.
Kek-soen mara-mara, fapi Ban-tjoan sama sekali tida rasaken orang poenja goesar itoe, begitoe poen sang ajah poenja samoea perkatahan ada didenger olehnja seperti tida, hingga kaloe maoe ditilik dari sini, njatalah orang boleh lantas membenarken, bilah ada laen orang jang hendak membilang : Dalem sakedjap sadja doenia bisa robah orang poenja pikiran, dalem sakedjap sadja doenia bisa bikin orang masoek dalem penghidoepan baroe.
Sasampenja Ban-tjoan di roemah, ia katemoeken iboenja sedeng doedoek di pertengahan roemah dengen moeka asam.
Itoe prampoean satengah toewa, tatkalah dapet liat anaknja poelang, lantas berbangkit dari tempatnja berdoedoek, seraja berkata :
„Bagimana ? — apa loe katemoe bapa loe ?“
„Engga,“
„Djadi loe malaenken katemoe sadja sama djobongnja ?“
„Engga.“
„Dia ka mana ? Apa loe dapet taoe ?“
„Owee engga dapet tjari dia poenja roemah.“
„Moestahil amat engga dapet tjari! Dimana si dia ada ? Brapa besarnja si itoe kampoeng ?“
„Begini : owee dapet denger dari teman-teman dia sewahin roemah boeat bini moedanja di Blandongan. Habis tadi owee tjari satoe-satoe roemah dan tanja orang sana-sini, samoea engga ada jang taoe.“
„Habisnja loe poelang sadja da ka mari ?“
„Ah, itoe si gampang. Nanti plahan-plahan owee tjari taoe, masa ja engga dapet ? Antepin sadja, masa ja pengabisannja engga katemoe djoega ?“
„Apa loe engga tanja-tanja orang di Gang Kampoeng Opak ?“
„Soeda.“
„Habis ?“
„Orang soeda kata engga katemoe.“
„Habis sekarang loe maoe tinggal diam sadja ?" Nanti samentar kaloe owee kaloear, owee serap-serapin lagi.“
„Pengrongrongan samoeanja ! Dia jang pergi enak-enakan, engga inget daratan, tinggal kita jang kwatirin, taoeh dia mampoes di tengah djalan, taoeh ka mana! Kaloe soeda katentoean dia ada di roemah djobongnja, biar, goea si engga pikirin sama sekali; biar dia engga poelang saoemoer hidoep djoega goea engga nanti ambil perdoeli.“
Mendenger iboenja menjomel begitoe, Ban-tjoan djebiken bibirnja di blakangnja itoe orang toewa, kamoedian teroes ia berdjalan masoek.
Samantara njonja Kek-soen kerak-kerok tida brentinja dengen tida erohin sama sekali djoentroengannja ia poenja perkatahan, Ban-tjoan soeda ada di dalem kamar, rebahken dirinja di pembaringan.
Anak moeda itoe sekarang tida ada poenja napsoe boeat pergi ka mana-mana, kerna ia poenja pikiran ada sanget katarik dengen soeatoe hal.
Ka'adahannja di itoe masa adalah amat soesa ditoetoerken dengen perkatahan, hingga kaloe maoe dibilang, malaenken orang jang pernah rasaken seperti Ban-tjoan nanti bisa mengarti terang, bagimana pengrasahannja itoe anak moeda, inilah ada benar sekali.
Sasoeda tjelentang di atas randjang sampe sakean lama, djedjaka itoe berkata pada diri sendiri dengen soeara seperti berbisik:
„Goea tadinja kira tjoema maen-maen sadja koetika denger omongannja si Kai-siok; engga taoenja sama sekali engga ada djoestanja. Sekarang goea djoega brani bilang, orang jang seperti dia engga gampang didapetin bandingannja di ini doenia! Patoetlah si kolot sampe loepa daratan! Dasaran goea poenja oentoeng jang kalah ! Sakean lama goea ngelanglang engga djoega goea katemoe jang begitoe, engga laen segala pedjadjaran jang moekanja engga lebi keh teroktok sengek !. . . . . . . . . . . Tapi nanti ! Apa salahnja kaloe goea djoega toeroet ngadoe biroe ? Si kolot djoega tjoema boeat permaenan sadja !“
Habis kata begitoe Ban-tjoan bersenjoem, kamoedian laloe ia berkata lagi dengen soeara menggrendeng:
„Masa ka mana parannja! Biar bagimana djoega. . . . . . . . . . hahaha !“