XVI.

KOEI-TJOAN.


„Do ko kita lantasnja teroes-teroesan misti ngodol oewang!"

„Loe si kalah engga djadi kenapa, Koei-tjoan, samentar oewang loe habis, samentar djoega loe boleh poelang minta oewang lagi. Kaloe goea kalah, tentoelah Tjapgomeh goea engga nanti bisa temenin loe djalan-djalan."

„Loe poenja bitjara engga salah, Boen-san, kata satoe anak moeda laen.

„Patoetnja djoega memang, saban taon si Koei-tjoan misti bantoe loe poenja onkost. Kasatoe sebab loe berdoea ada tjinlang, kadoea kaloe loe engga tinggal di sini, tentoe djoega ia engga bisa sering-sering dateng boeat maen mata sama itoe jang di sebrang. Masa ja djadi roegi kaloe sekarang ia toem-plak sama sekali isinja dia poenja dompet boeat bantoe kita berdoewa poenja onkost!"

„Koerang adja ini anak!“ kata Koei-tjoan dengen bersenjoem. „Loe kata goea maen mata sama jang di sebrang? Kaloe loe brani seboet lagi sakali, sedikitnja loe nanti dapet tokkiakan jang kera."

„Betoel, Sek-loei, djangan loe maen kata sembarangan sadja," kata Boen-san, „Kaloe orang denger kan djadi engga baek?"

„Nah ja, djangan kata sembarangan ia djangan kata sembarangan," kata Sek-loei, „Hajo samkiok! Asal sadja loe berdoewa poenja doeit kasi goea kantongin biar gendoet-gendoetan, habis perkara."

Laloe tiga orang itoe mengadoeh oentoengnja diatas baleh, jang ditaroh di depan djendelah dari roemahnja Boen-san, dan achirnja betoel-betoel sadja adalah Sek-loei jang dapet kamenangan.

Koei-tjoan dan Boen-san masing-masing misti bajar satoe roepiah satengah.

Sek-loei tarik itoe oewang ka hadepannja, kamoedian laloe kotjok kartoe, dan kamoedian toempoekin itoe lagi di atas baleh.

Koetika itoe Koei-tjoan lantas berkata:

„Soeda ah brenti, Diam-diam goea soeda djadi kalah doewa belas perak sama ini. Engga enak ah maen samkiok, bikin goea djadi ngantoek sadja; kaloe maen kokman goea soeka djoega, rameh-rameh."

„Hajo maen kokman bertiga!" kata Boen-san. „Goea maoe poelangin adja goea poenja doeit jang soeda kenah dipatik sama si Sek-loei."

„Brapa si loe soeda kalah?" tanja Koei-tjoan.

„Ah, kalahnja si tjoema saperak satengah."

„Soedahlah djangan maen lagi; nah goea gantiin," kata Koei-tjoan, seraja lemparin itoe sadjoemblah oewang pada Boen-san."

„Habis loe maoe apa sekarang, Koei-tjoan?" tanja Sek-loei.

„Kita djalan-djalan, njoh! Kaloe maoe gi lekasan poelang mandi: goea toenggein disini. Sekarang soeda poekoel lima."

„Baeklah," kata Sek-loei, kamoedian lantas ia berlaloe.

Koei-tjoan doedoek-doedoek lagi sama Boen-san seraja omong-omong kabarat-katimoer, dengen tida katentoean jang ditjeritaken.

Plahan-plahan matahari samingkin silam ka Barat, dan achirnja lontjeng mengoetaraken poekoel anam soreh. Koetika itoe Koei-tjoan berkata:

„Gi da loe pergi mandi; samentar si Sek-loei dateng kita lantas pergi djalan-djalan."

„Habis loe engga maoe mandi lagi?"

„Ah, soedalah, kaloe goea poelang doeloe nanti djadi kliwat lama."

„Kaloe loe engga maoe poelang, mandi di sini sadja djoega boleh."

„Engga ada halangan ?"

„Alah engga ada orang tah: goea tjoema tinggal berdoewa sama goea poenja piaraan. Tjoema di sini engga ada kamar mandi seperti di loe poenja roemah; siapa jang maoe mandi dia misti timbah sendiri."

„Begitoenja si engga kanapa."

Sambil kata begitoe Koei-tjoan lantas masoek ka dalem, boekah pakean dan goejoer awaknja dengen timbah aer dari soemoer, samantara Boen-san pasang lampoe dan soeloet pelita di aboe leloehoernja. Habis mandi Koei-tjoan doedoek-doedoek di baleh jang ada di depan roemahnja Boen-san. Ia kaloear-ken satoe tjeroetoe, isap itoe dengen keboelken asapnja ka atas, kamoedian laloe berkata dalem hati:

„Dia bolehnja ka mana djoega si dari tadi bolehnja engga kaliatan mata-idoengnja? Apa meng-kali dia kagetolan maentop?"

Kamoedian laloe ia berbangkit kombali, dan berdjalan moendar-mandir dengen bersoeit, sabagimana biasanja ada diperboeat oleh kabanjakan orang kaloe ada merasa kesal menoenggoeken soea-toe apa.

Samantara itoe dengen koenjoeng-koenjoeng matanja Koei-tjoan dapet meliat satoe moeka manis sekali, jang mengintip di djendelah dari roemah jang pernahnja ada sebrang-menjebrang dengen tempat tinggalnja Boen-san.

„Ai, baroe kaliatan!" kata djedjaka itoe dalem hati, kamoedian laloe berdiri diam, dan menga-wasken dengen tida berkesip.

Jang mengintip itoe ada satoe anak prampoean jang beroesia kira-kira delapan belas tahon.

Maski koelitnja tida poeti, tapi dari aer moekanja, dari idoengnja jang bangir dan dari matanja poenja sorot jang haloes soeda membikin parasnja nona itoe djadi kaliatan amat tjantik.

Di itoe masa boleh dibilang Koei-tjoan soeda toedjoeken matanja dengen sanget mati-matian pada itoe anak prampoean, tapi itoe boekan sadja soeda tida bikin ia ini djadi terkedjoet dan lari minggat, malah sabaliknja soeda kedja ia bales memandang sampe samantara lamanja. Koei-tjoan rasaken hatinja seperti berlompat-lompat, dan dengen tersoeroeng oleh soeatoe ka-edanan jang itoe waktoe ada menjerang amat keras ia poenja pikiran jang sedar, laloe ia kaloearken satoe salampe dari dalem sakoenja, kamoedian lam-beilambeiken itoe sembari bersenjoem.

Anak prampoean itoe poen lantas bermesem, tapi ampir di itoe waktoe djoega laloe ia masoek ka dalem.

Koei-tjoan poenja hati, jang tadinja ada berdebar-debar amat keras, dengen mendadak lantas berobah seperti telah djadi kosong sama sekali. Ia ambil tempat kombali di atas baleh, kamoedian laloe berkata pada diri sendiri dengen soeara menggrendeng:

„Apa ia bakal kaloear lagi, apa engga? Kaloe ia teroes-teroesan djemoer goea di sini, tjilaka amat! Tapi biar bagimana djoega engga boleh djadi salah goea poenja pengliatan: si Bok-hiang djoega soeka sama goea."

Samantara itoe Boen-san kaloear pasang hio di depan pintoe, dan koetika ia ini masoek kombali boeat berdjoempa pada aboe leloehoernja, pintoe dari itoe roemah di sebrang poen lantas diboekah dari dalem, dan itoe anak prampoean jang sedeng di toenggoe-toenggoein oleh Koei-tjoan lantas ka-loear pasang hio dengen mengadep ka djalanan.

Tjoema sakali ini Koei-tjoan tida bisa dapet tempo sama sekali boeat poewasken matanja, kerna begitoe lekas soeda menantjap tiga batang hio, sigra nona itoe menoetoep pintoe kombali.

Perkatahan menggroetoe, jang bagi banjak orang soesa didapetken artinja jang teges, sigralah nanti mengarti itoe, apabilah marika bisa bajangken de-ngen pikiran, bagimana misti adanja Koei-tjoan poenja tingka-lakoe di itoe masa.

Broentoeng djoega salagi djedjaka itoe terdjebloes dalem itoe kaädahan jang amat tida enak, dengen koenjoeng-koenjoeng Sek-loei dateng menoendjoekin roepa, kamoedian Boen-san poen sigra kaloear dengen soeda berpakeh pakehan.

Koei-tjoan berdiam sadja doedoek di atas baleh, hingga doewa temannja lantas menanja dengen berbareng:

„Maoe djalan ka mana?"

„Ka mana enaknja kita pergi?" begitoelah djedjaka itoe bales menanja sasoeda berdiam samantara lamanja.

„Ini hari ada Tjbiagwee tjee-it," kata Sek-loei, „samoea orang Tjina pada engga mendjoewalan, lantaran itoe di mana-mana djoega ada sepi sekali."

„Engga sama kita sewa kahar dan teroes ngider di bilangan sabelah oedik." kata Boen-san, „begi-toe goea kira ada jang paling baek."

„Ja, goea djoega kira begitoe,“ kata Koei-tjoan, kamoedian laloe tiga anak moeda itoe brangkat djalan.

Tapi Koei-tjoan poenja hati di itoe waktoe ada seperti digandoelin batoe, hingga ka mana djoega sang kandaran bawa padanja, toch pengabisannja ia masi merasa koerang senang sadja.

Sasoeda iter-iteran satoe djam lamanja laloe ia adjakin balik kombali, dan samantara Sek-loei lantas pergi poelang, ia sendiri mengikoeti Boen-san sampe ka roemahnja dengen harepan nanti bisa meliat lagi itoe paras tjantik jang tadi soeda mengintip di djendelah.

Tapi itoe roemah di sebrang lebi doeloe soeda mengoentji pintoe, samantara djendelahnja poen soeda tertoetoep rapet; lantaran itoe djadi Koei-tjoan malaenken bisa doedoek sadja di atas baleh dengen hati tida karoean rasanja.

Tatkalah Boen-san kaloear kombali, sasoeda habis boekah pakean, djedjak itoe laloe berkata:

„Ini hari 'kan Tjhiagwee tjee-it?" Heran dia bo-leh siang-siang soeda mengoentji pintoe! Kaloe engga salah dia tentoe lagi kagilaan maentop."

„Orang mahnja sakit; samalem goea poenja piaraan soeda pergi tengokin."

„Kaloe begitoe patoet. Hai, kaloe itoe toewabangka bisa lantas mati, betoel-betoel boeat goea djadi enak sekali."

„Eh-eh, kanapa loe poenja pikiran boleh begitoe djahat ha? Kapan loe soeka sama anaknja, habis loe soempain orang poenja mah mati, bagimana si oeroesannja?"

„Kaloe dia mati, si Bok-hiang djadi tinggal sendirian; gampang sekali goea dapetin, djangan seperti sekarang ada mahaja jang ngandang-ngan-dang."

„Do, enak amat loe poenja omong! Kaloe mah-nja mati loe kira dia engga ada poenja sanak-soedara?"

Koei-tjoan kaloearken tertawa tengal, kamoedian laloe ia berkata poelah:

„Soedalah djangan engga laen memaen sadja! Lantaran loe poenja gara-gara sekarang Sek-loei sampa taoe ini perkara."

„Loe kata goea poenja gara-gara?“

„Memang."

„Goea ada kata apa sama dia?"

„Goea engga taoe, tapi tentoe loe ada omong apa taoeh; engga si sekarang dia boleh taoe ini perkara."

„Orang loe ini poenja tingka-lakoe jang engga oeroes. Kaloe soeda awasin orang pengarasahan bidji mata sampe maoe tjopot; biar orang boeta djoega tentoe nanti lantas bisa mendoegah."

„Ija, hajo adja katain sama goea!"

„Orang engga karoean-karoean loe tempoein goea katanja."

„Soedalah, djangan riboetin segala perkara begi-toean. Engga sama loe bilang sadja teroes-terang: loe bisa engga toeloengin sama goea?"

„Kaloe ada oepanja si kanapa engga boleh?"

„Nah, loe memaen lagi! Goea sekarang maoe ngomong betoel-betoel. -Eh, apa loe bisa tjarihin akal sampe goea bisa dapetin si Bok-hiang? Samingkin goea liat goea bisa dapetin si Bok-hiang? Samingkin goea liat goea djadi samingkin soeka."

„Soeda dari doeloe goea kata, Koei-tjoan: kasian orang poenja anak kaloe loe tjoema maoe boeat maen gila begitoe. Kaloe betoel-betoel loe soeka; soeroe loe poenja nona dateng lamar; keh oewa Boen-hoei si tentoe dia kasi."

„Itoe soeda perkara jang engga boleh djadi!"

„Eh-eh, kenapa engga boleh djadi?“

„Soedalah boeat apa ditjeritaken pandjang; pendeknja engga boleh djadi. Enggga sama loe maoe toeloengin goea, loe soeroe piaraan loe pergi kong-kohin sama dia. Pendeknja goea brani tanggoeng dia engga tampik; orang tadi dia soeda mesem tempo goea gape-gapein sama salampe."

Boen-san tinggal berdiam sadja, hingga Koei-tjoan laloe berkata lagi:

„Kaloe loe bisa toeloengin goea sampe dapet, loe nanti liat jang goea engga nanti loepa loe poe-nja kabaekan."

„Boekannja apa, Koei-tjoan: goea kasian kaloe loe tjoema maoe boeat maen gila sadja begitoe."

„Biar mati, Boen-san, goea engga nanti tinggal satengah djalan sama dia!"

„Bagimana boleh kata engga tinggal satengah djalan; habis kaloe loe dikawinin sama loe poenja nona?"

„Biar goea soeda dikawinin djoega goea soempa jang goea engga nanti boewang satengah djalan sama dia. Siapa jang bisa larang kaloe goea maoe piara teroes? Apa orang engga boleh ada poenja bini doewa?"

„Tapi mahnja tentoe engga maoe kasi kaloe loe maoe boeat bini moeda dia poenja anak. Biar dia miskin djoega dia ada orang baek-baek."

„Makanja djoega goea engga ada ingetan boeat minta dengen teroes-terang sama mahnja. Apa loe engga denger: tadi goea soeda soempa-soempain biar dia lekas mati, soepaja goea lekas-lekas bisa dapetin anaknja."

„Djadi pendeknja loe maoe bawa lari sama dia?"

„Boekan habis bawa lari goea lantas tinggal dia satengah djalan, tapi goea nanti piara teroes."

„Habis kaloe loe soeda dikawinin dan loe poenja bini soeroe lepas, tentoe loe nanti toeroet sadja bini loe poenja moeloet."

„Engga, biar bagimana djoega goea engga nanti siasia sama dia. Bolehlah loe toeloengin, kaloe loe maoe soeroe piaraan loe pergi kongkohin, pen-deknja si goea brani tanggoeng tentoe nanti bisa dapet orang tadi dia soeda mesem-mesem tempo goea gapein sama satangan."

„Lebi baek loe pikir-pikir doeloe, Koei-tjoan, djangan sampe di blakang kali loe bikin orang djadi kepiran."

„Loe boleh liat, Boen-san, kaloe sampe di bla-kang kali goea bikin dia djadi siasia, pendeknja loe boleh ambilin golok belah goea poenja kapala."

„Sabenarnja goea engga abis mengarti, Koei-tjoan; kaloe betoel loe begitoe soeka sama si Bok-hiang, kanapa loe takoet soeroe loe poenja nona lamar sama dia? Biar loe poenja nona engga maoe, pendeknnja kaloe loe maoe djoega, abis boleh kanapa? Loe boleh bilang sadja jang loe engga maoe dikawinin sama laen orang; loe poenja nona tentoe engga bisa kata apa."

„Dari tadi goea soeda bilang: itoe ada perkara jang engga boleh djadi."

„Eh, eh, kanapa engga boleh djadi? Kaloe loe jang minta, oewa Boen-hoei tentoe nanti kasi."

„Begitoenja si betoel, tapi goea poenja enko masi ada brapa banjak jang belon kawin. Laen dari begitoe si Bok-hiang, menoeroet loe poenja kata, ada lebi toewa satoe tahon dari goea; nona goea jang memang ada paling tjerewet perkara begitoean tentoe engga maoe."

„Habis pendeknja bagimana loe poenja maoe, goea soa djadi kapingin taoe lagi! Si Bok-hiang djoega kaloe dia taoe loe tjoema maoe boeat piara-piaraan sadja sama dia tentoe djoega dia tida nanti kapingin sama loe."

„Boleh djadi, tapi loe toh misti soeroe loe poe-nja piaraan kongkohin biar bagoes. Kaloe goea soeda bisa saksak-soeksoek sama dia berdoewa-doewa, itoe pendeknja ada goea poenja perkara sendiri."

„Apa soenggoe-soenggoe loe boleh djadi mati kaloe engga dapetin si Bok-hiang? — ini betoel-betoel goea djadi kapingin taoe."

Koei-tjoan djadi tertawa mendenger Boen-san poenja bitjara, tapi sigra djoega ia berkata:

„Soedalah djangan loe engga laen goda sama goea; pendeknja boleh da loe toeloengin boeat ini sakali poekoel, kaloe betoel loae ada goea poenja teman baek. Loe boleh pertjaja, Boen-san, sampe kapan djoega goea engga nanti loepa loe poenja kabaekan!"

„Habis kaloe goea soeda soeroe goea poenja piaraan pergi kongkohin, habis kenah si Bok-hiang maki-maki sama dia, habis djadi loe maoe katain goea engga baek?"

„Kaloe loe maoe sadja soeroe piaraan loe pergi kongkohin, goea brani tanggoeang engga boleh djadi si Bok-hiang nanti tampik; orang tadi dia soeda mesem-mesem tempo goea gapein dengen salampe!"

„Soedalah goea taoe jang dia soeka sama loe, djangan mentar-mentar loe maen banggain sadja!"

„Boekannja banggain; orang loe kaliatannja seperti engga pertjaja goea poenja moeloet."

Boen-san tinggal berdiam sampe sakean lama, hingga Koei-tjoan djadi berkata poelah:

„Boleh ja, loe toeloengin?"

„Apa boleh boeat, sebab goea takoet nanti djadi dosa kaloe sampe loe mendjadi mati. Gauwkoen, orang poenja anak soeda begini besar!"

Koei-tjoan tertawa sadja mendenger dirinja digoda begitoe.

Doewa orang itoe berdiam lagi sampe sakean lama, kamoedian Boen-san laloe berkata:

„Eh, Koei tjoan, apa loe sekarang ada poenja doeit barang djitjaptoen? Goea perloe pakeh lagi besok boeat teboesin barang-barangnja goea poenja piaraan; goea soeda djandjiin sama dia. Ai, dari ini pasar malem sadja sampe sekarang boekan maen banjaknja goea soeda pakeh doeit."

Koei-tjoan lantas rogo sakoenja, dan kasi itoe oewang jang perloe dipakeh oleh Boen-san. Ka-moedian doewa sobat itoe laloe obrolken lagi matjem-matjem perkara jang tida karoean djoen-troengannja.

Koetika lontjeng mengoetaraken poekoel sapoloe, Koei-tjoan lantas berbangkit, seraja berkata:

„Ai, goea boleh djadi diomelin! Inget, ja, Boen-san!"

Habis membilang begitoe laloe ia berdjalan poelang.

Boen-san berdoedoek lagi sakean lama di atas baleh dengen memeloek loetoet, kamoedian laloe ia berkata saorang diri dengen bersenjoem:

„Ini brapa boelan goea memangnja lagi kliwat empat sama oewang! apa maoe enga ditjari lagi dateng ini perkara; kasi siapa djoega tentoe engga nanti maoe begitoe bodo, tolak redjeki jang dateng sendirinja di depan pintoe."

Ia berbangkit, dan berdjalan moendar-mandir kamoedian laloe ia berkata lagi dalem hati:

„Bake, Koei-tjoan, goea nanti toeloengin loe dengen soenggoe hati, tapi loe dkjoega engga boleh maen enak-enakan sadja, itoe soeda tentoe sekali!“