Pembalesan Kedji/Bab 24
XXIV.
DALEM ROEMAH DI TONGKANGAN.
Pada esok harinja, kira-kira poekoel sapoeloe sa-tengah baroe Koei-tjoan bangoen dari tidoer. koetika itoe malaenkan tinggal ia sendirian sadja dalem roemah, kerna iboe-bapanja sadari pagi-pagi soeda pergi ka tandjoeng sama boedjang-boedjang dan soedaranja, samantara ia poenja engko jang paling besar dari malem tida kaliatan mata-itodeng-nja.
Toeroen dari randjang djedjaka itoe lantas mengamperi kamar-mandi; sasoeda goejoe bikin adem ia poenja awak dan kapala, laloe ia isap satoe tjeroetoe, dan doedoek anggoeat-anggoetan di krosi gojang jang ada di pertengahan roemah. S abentar-bentar kalitan djedka itoe bersenjoem sendirian, kamoedian laloe ia berkata dengen soeara tida kadengeran njata;
„Sekarang maoe engga maoe dia misti djadi goea poenja goendik; kaloe engga habis dia maoe djadi apa? engga boleh salah, mahnja misti kasi kaloe dia soeda dapet taoe ini perkara; malahan djoega dia soeda boleh bilang trima kasi koloe goea engga siasia dia poenja anak.“
Ia lepas kapalanja di senderan krosi, dan berdongak liat papan loteng sembari keboelken asap tjeroetoenja ka atas. Sasoeda mengoewap seperti tida ada habisnja, laloe ia berkata lagi dengen soeara menggrendang:
,,Sabetoelnja si si Bok-hiang boekannja djelek-djelek orang, sajang djoega kaloe goea engga teroesin piara sama dia. Dimana maoe tjari lagi orang oseperti dia: dari kapala sampe ka oedjoeng kaki engga ada jang boleh ditjelah; baek apanja keh. Tjoema sajang dia kliwat engga taoe diri! Masa baroe sakali sadja lantas maoe tentoein jang goea misti boeat bini toewa sama dia, ha ha ha!"
Ia empos tjeroetoenja bebrapa kali, kamoedian laloe teroesin bitjaranja :
,,Dia kira goea begitoe bodoh! Dia poenja diri sekarang soeda goea jang poenja, kaloe dia maoe bertingkah begini-begitoe, pendeknja dia boleh pergi persetan. Kaloe boeat kawin, sedikitnja djoega goea maoe dapetin lagi satoe anak prawan engga begitoe, goblok amat!"
Habis berkata ia berbangkit, masoek ka dalem dan menggraktak makanan di lemari, kerna koetika itoe soeda ada liwat poekoel sabelas, dan Koei-tjoan rasaken peroetnja ada menggerijoek minta toeloengan.
Betoel tatkalah djedjaka itoe baroe habis bersantap dan maoe berbangkit boeat tjoetji tangan, dengen koenjoeng-koenjoeng Ban-tjoan bertindak masoek, seraja menanja dengen soeara kasoesoe:
,,Nona belon poelang ?“ „Belon,“ djawab Koei-tjoan. „Loe ka mana dari samalem?“
Sang enko tida menjaoet. Laloe ia boekah pa-kean dan pergi mandi, kamoedian ie poen lantas bersantap dengen barang makanan sa'ada-adanja.
Koei-tjoan tida ambil perdoeli lebi djaoe sama klakoeannja ia poenja soedara. Laloe ia berdjalan kaloeara, dan anggoet-anggoetan lagi di krosi jogang.
Sasoeda habis makan, Ban-tjoan masoek dalem kamar tidoernja. Ia rebahken diri di atas pemba-ringan, dan laloe berkata pada diri sendiri:
„Si Soan tentoe digebos ini hari djoega; engga boleh salah; si toewa-bangka tadi kaliatannja soeda djadi begitoe mara. Samentar tentoe dia poelang kamari; habis goea bagimana?“
Ia angkat kapala sabentaran, boewang loeda di tempolong, kamoedian ia troesi bitjaranja dengen soeara menggrendeng:
„Goea djoega salah; tadi goea soeda lawan dia begitoe poewas-poewasan..... Tapi dia si dasarn soeda bikin goea djadi hilap! Sekarang kaloe goea diam-diam di sini toenggoe sampe dia poelang, tentoe djadi riboer besar.....“.
Ia mengelah napas pandjang, toetoepin moeka-nja dengen bantal, dan tinggal membekam tjara begitoe sampe sakean lama.
Dengen koenjoeng-koenjoeng ia bangoen ber-doedoek, dan berkata dalem hati:
„Tapi tentoe ia takoet riboet-riboet di dalem roe-mah; salaennja dia maloe sama diri sendiri, me-mang djoega perkara piara si Soan goea poenja nona amat tida soekahin, dan dia saban-saban maen enga ngakoeh sadja. Paling banjak djoega tentoe dia mendongkol sendirian, dan kaloe goea maen berlaga bodoh sadja, plahan-plahan ini per-kara nanti djadi habis sendirinja.“
Kamoedian ia rebahken diri kombali dan goelak-goelik di pembaringan hingg achirnja ia djato poeles.
Koetika itoe adalah kira-kira poekoel satoe tengahari. Tida berselang lama lagi njonja Kek-soen poelang dari Tandjoeng bersama sakalian rentje-ngannja.
Baroe sadja melangkahi pintoe, sigra djoega ia itoe menanja pada Koei-tjoan, jang sanantiasa masi tinggal anggoet-anggoetan di krosi gojang:
„Habis baba loe makanin obat apa?“
„Dia kenapa?“ tanja anak itoe. „Dari tadi owee belon liat di poelang.“
„Dia engga poelang?“
„Belon, dia kanapa?“
Njonja Kek-soen poenja moeka lantas djadi berobah, kamoedian ia berdjalan masoek sembari menggrendeng dengen soeara mengandoeng amara:
„Tento dia pergi ngeram sama djobongnja. Toewa-bangka engga taoe diri! Pergi ka Tandjoeng katanja sakit, habis teroesnja engga poelang ka roema!“
Koei-tjoan laloe berbangkit dan boentoeti iboenja berdjalan masoek. Kamoedian njonja Kek-soean laloe menanja lagi:
„Loe poenja enko djoega belon poelang?“
„Oeda.“
„Dia ada di mana sekarang?“
„Dia tidoer, owee kira.“
„Anak bapa samoeanja pengrongrongan, dia ka mana samalem engge poelang?“
„Mana owee taoe!“
„Loe djoega ka mana sampe begitoe malem?“ Koei-tjoan menggrendeng sadja, bri penjaoetan jang tida teges, kamoedian laloe ia mendoeloein iboenja berdjalan ka blakang.
Njonja Kek-soen berdjalan moendar-mandir, sembari sabentar-bentar mandorin boedjangnja dengen makian, kerna di itoe masa ia poenja napsoe amara soeda moelahi timboel kombali, aken bisa berdoe-doek dengen sabar.
Demikianlah lontjeng achirnja soeda mengoeta-raken poekoel doewa. Tida berselang lama lagi kaliatan Kek soen bertindak masoek.
Koetika itoe sang istri soeda lantas maoe beset poelah soeranja boeat poewasken hati, apo sabelon ia ini bisa kaloearken satoe perkatahan, sang soeami lebi doeloe soeda menanja dengen soeara mengandoeng amara: „Ka mana si Ban-tjoan, itoe anak jauwsioe?“
„Kanapa?“
„Dia ka mana? Itoe anak jauwsioe engga goeana dikasi hidoep! Kaloe goea belon habisin dia poenja djiwa, betoel-betoel goea masi penasaran!“
„Boekan, dia kanapa?“
„Dia ada dimana sekarang?“
„Loe maoe apain sama dia?“
„Goea maoe habisin dia poenja djiwa, anak janwsioe!“
Sambil kata begitoe, seperti ada dibilangin setan Kek-soean lantas maoe bertindak masoek dalem kamar, dimana Ban-tjoan ada mengeram. Broem-toeng kekasihnja Soan-nio itoe lebi doeloe soeda djadi mendoesin, tatkalah denger soeara bapanja jang memaki amat riboet, dan sabagi di Gang Togee, begitoe poen sekarang lantas ia maenin lagi itoe lelakon mengoempat di kolong randjang, hingga tatkalah Kek-soen masoek ka dalam, tida ia bisa dapetken sang anak poenja bajang-bajangan.
Kaloear dari sitoe soeaminja Soan-nio lantas berdjalan teroes ka blakang. Meliat klakoeannja sang soeami ada begitoe nekat, dengen mendadak njonja Kek-soen poenja amara lantas djadi linjap seperti api disiremin aer mendidih. Dengen diam-diam ia masoek ka dalem kamar, dimana Bantjoan ada mengoempat, kamoedian laloe berkata dengen soeara plahan: „Loe kanapa, anak koerang adjar?“
Mendenger soeara iboenja, sang anak laloe merajap kaloear dari kolong pembaringan, dan laloe mendjawab dengen bisik-bisik:
„Baba si djadi orang terlaloe kliwatan.“
„Boekan, loe kanapa maka dia begitoe mara?“ Ban-tjoan berdiam sabentaran, kamoedian lantas ambil poetoesan boeat djoestaken pada iboenja, kerna ia pikir malaenkan omong bohong jang nanti bisa bikin dirinja tida djadi terlaloe tjilaka. Laloe ia mendjawab:
„Masa owee dia tjemboeroein.“
„Tjemboeroein sama siapa?“
„Masa sama siapa lagi..... sama goendiknja.“
„Bagimana loe poenja laga maka dia boleh djadi tjemboeroean?“
Ban-tjoan berdiam lagi samantara lamanja, dan dalem itoe waktoe jang begitoe sabentaran, seperti ada dibantoein setan sigra otaknja soeda dapet mengoekir satoe tjerita boeat gelapin mata iboenja. Laloe ia berkata dengen soeara ampir tida kadengeran:
„Begini: Owee ngakoeh teroes-terang sadja; samalem owee pergi ka soehian, lantaran teman-teman loloh, pengabisannja owee djadi mabok dan engga bisa poelang ka roemah. Tadi poekoel sabelas begitoe baroe owee bisa mendoesin, owee inget ini hari Tjengbeng, lantas owee djadi karoepoekan. Owee maoe tanja baba ka Tandjoeng mana dia maoe soeroe owee pergi. Owee pergi tentoe dia masi ada ngeram sama goendiknja, dari itoe owee lantas pergi ka sitoe. Owee tanja boedjang, katanja baba dari malem engga ka sitoe, dan betoel owee lagi ngomong baba lantas dateng, lantas dia tjemboeroein, bilang owee maen gila sama dia poenja bini moeda, katanja owee dari malem ada ngeram di sitoe.....“
Ban-trjoan tida bisa habisin bitjarannja, kerna Kek-soen, jang balik dari blakang dengen koenjoeng-koenjoeng dapet denger orang bitjara kasa-koesoek, lantas masoek ka dalem itoe kamar.
„Bangsat! anak jauwsioe! engga goena loe tinggal hidoep!“ berseroe sang ajah itoe dengen soeara nekat, kamoedian laloe ia angkat kapelannja salakoe orang maoe bikin remoek kapalanja kerbo.
Ban-tjoan berkelit, kaloear dari kamar, dan lantas berlari-lari ka blakang. Dengen amat sengit Kek-soen lantas maoe mengedjer, tapi sigra djoega ia poenja istri mengalang di tengah djalan.
Njonja itoe, jang tadi soeda djadi boengkam, sekarang dengen mendadak soeda timboel kombali napsoe amaranja. Ia pertjaja bitjaranja sang anak, dan merasa jang ia poenja soeami ada terlaloe kliwatan. Tidakah sekarang ia soeda mendapet taoe, bahoewa Kek-soen poenja nekat itoe soeda terdjadi boeat oeroesan ia poenja goendik? Itoe sadja soeda sampe tjoekoep boeat bikin daranja djadi mendidih, dan sigra joega ia berkata:
„Loe ini betoel boleh dibilang ada toewa-bangka jang tida taoe diri! Siapa jang soeroe, siapa jang alem soeda dekat maoe mampoes masi maoe piara bini moeda?—habis soeda begitoe maoe tjemboeroein sama anak jang engga karoean? Sakarang loe maoe apain sama dia?“
Kek-soen poenja rasa goesar djadi samingkin bertambah lantaran diperlakoeken begitoe. Ia merasa lehernja seperti ditjekek dan tida sanggoep boeat bitjara pandjang-pandjang membri katrangan. Dengen kasar ia lantas toelak istrinja ka samping, dan maoe teroesin mengedjer pada sang anak, jang di itoe waktoe soeda djadi ai poenja moesoe besar.
Tapi iboenja Ban-tjoan boekanlah ada saorang prampoen jang mempoenja itoe kabiasahan boeat tinggal diam sadja diperboeat demikian, terlebi lagi tidakah oleh kerna sekarang Soan-nio iang telah mendjadi lantaran. Sigra djoega ia tarik tangannja Kek-soen jang kiri, seraja memaki, katanja:
„Do goea djoega loe maoe salambahin tjoema lantaran loe poenja djobong? Lelaki bopan, engga taoe maloe......“
Sabelon njonja itoe bisa poewasken mendongkolnja, tangannja sang soeami jang kanan lebi doeloe soeda dateng menggampar dengen amat seroe, dan lantaran sang istri tida maoe soeda, maka lantas djoega terbit perklahian saling tjeker dan gaplok antara itoe pasangan jang soeda karatan.
Kek-soen, jang samingkin lama djadi samingkin memboeroe napsoe amaranja, membelah dirinja dengen sengit sekali, dan achirnja soeda terdjadi begitoe djaoe, hingga satoe tendangannja telah membikin iboenja Ban-tjoan roeboe ka tanah dengen meloepahken orang.
Tapi djoega katjilakahan itoe soeda tida bisa membikin lelaki itoe djadi tersedar dari nekatnja. Dengen tida ambil perdoeli sama sekali ia tinggalken sadja istrinja jang pangsa, dan lantas berlari-lari ka blakang boeat mengedjar pada Ban-tjoan.
Sang anak koetika itoe soeda tida kataoehan ka mana perginja, samantara samoea boedjang djoega tida kaliatan mata-idoengnja.
Kek-soen treak-treak memaki satjara orang jang soeda djadi gila, dan bebrapa kali djalan meoendar-mandir di Pasar-Ajam, dengen meloepahken jang moekanja soeda djadi babak-beloer lantaran tjakarannja sang istri.
Setelah ia dapet kanjatahan betoel-betoel misti djadi siasia, ajah jang tida broentoeng itoe laloe mengambil topi, kamoedian lantas berlaloe dari roemahnja dengen tida menanjaken lagi bagimana soeda kadjadian lebi djaoe pada istrinja jang pangsan.
Ketika itoe baroe boedjang-boedjang jang tadi pada lari mengoempat, rameh-rameh membantoeken Koei-tjoan, jang sedeng mengolah pada iboenja. Njonja Kek-soen merinti tida poetoesnja, ia rasaken sakoedjoer badannja ada sakit dan merasa amat soesa boeat tarik napas. Memaki ia tida bisa lagi, dan dengen soeara lemah, laloe ia berkata :
,,Goea misti pergi dari ini roemah, kaloe goea lama-lama tinggal di sini, salah-salah, goea boleh djadi mati engga karoean....."
Belon sampe habis iboe itoe berkata-kata, lantas djoega anak-anaknja jang masi ketjil pada menangis sasenggoekan. Djoega Koei-tjoan di itoe waktoe ada merasa sedih di hati dan soeda tida bisa loepoetken boeat toeroet koetjoerken aer mata.
Sin-tjoan, jang merasa masi tjapeh lantaran soeda misti ider-ideran di Tandjoeng, sadari tadi soeda tida tjampoer apa-apa dalem persatoriannja ia poenja orang toewa, tapi sekarang kombali ia misti djadi amat ripoe boeat bedal boedjang panggil sinshe dan sabaginja, kerna soedaranja jang laen-laen malaenken bisa berlakoe seperti patoeng dalem itoe kakaloetan roemah-tangga.
Ban-tjoan, jang tida kataoehan soeda mengilang ka mana, teroes sampe soreh tida katiatan mata-idoengnja.