XXIII.

KALOE ORANG DJADI SATOE GADIS JANG TJANTIK. . . . . . .


Lebi doeloe satoe malem sabelon itoe perkara jang ditjeritakan dalem fatsal di atas ini maenin lelakonnja, di Kampoeng Opak djoega ada terdjadi sato perkara jang amat penting.

Salagi Ban-tjoan poewasken hatinja sama Soan-nio, Koei-tjoan ada berdjalan moendar-mandir dengen koerang sabar di blakang roemahnja njonja Boen-hoei.

Saban maliwat di depan pintoe, anak moeda itoe merandak sabentaran, memasang koeping, kamoe-dian laloe mengelah napas seperti lakoenja orang jang amat kesal.

Sasoeda boelak-balok bebrapa belas kali, Koei-tjoan kaliatannja djadi males bertindak lagi. Laloe ie bersender di samping pintoe, dan berkata dengen soear menggrendeng pada diri sendiri:

„Apa mengkali dia kapoelesan? Kaloe begitoe tjilaka betoel goea kenah didjemoer di sini!“

Bitjara itoe lantas djoega didjawab dengen boenjinja tontong jang mengoetaraken poekoel doewa belas malem.

Lagi sakali Koei-tjoan mengelah napas, kamoedian ia tempelken poelah koepingnja di pintoe boeat mendenger, apa masi belon ada soera apa-apa.

Sigra anak moeda itoe djadi bersenjoem, kerna di itoe waktoe djoega dari dalem ada terdenger soeara orang bertindak plahan-plahan, mengamperi pintoe.

„Loe kanapa begitoe lama?" tanja ia denger lagoe jang menjataken kagirangan. „Goea kirain loe kapoelesan. Goea sampe rasanja djengkel toenggoein di sini. Tjoba loe pegang, kaki-tangan goea sampe njam seperti kedebongan."

Pintoe lantas terboekah dari dalem dengen amat plahan, kamoedian terdenger satoe soeara jang berkata dengen bisik-bisik:

„Sttt! kapan djandjinja poekoel doewa belas Kan tadi tongtong baroe boenji? Goea engga salah, tapi siapa jang soeroe loe dateng ka mari sabelon ada awat-awatnja ?"

Dengen hati-hati pintoe sigra dirapetken lagi dari loear.

Koei-tjoan laloe memeloek orang poenja leher dan tjioem orang poenja pipi kiri-kanan, kamoedian ia berkata poelah:

„Sabetoelnja memang loe engga salah. Goea si tadi merasa sarebah engga enak, mangkanja goea engga bisa tahan lebi lama dan lantas dateng ka mari,"

„Goea tadi rasanja kliwat kesal. Sampe poekoel sabelas liwat goea poenja neh baroe tidoer, loe taoe?" Belon sabrapa lama dia poeles goea lantas dapet denger tongtong poekoel doewa belas. Plahan-plahan goea toeroen dan dateng ka mari. Engga taoenja loe soeda lama menoenggoe di sini, hahaha!"

Koei-tjoan lantas mengglepok di batoe tjina, jang ada di depan pintoe, dan laloe ia-berkata lagi:

„Soeda, Bok-hiang, perkara jang soeda biar kita djangan bitjarain lagi."

Sambil bitjara begitoe laloe sa memeloek orang poenja kaki, kamoedian tarik si gadis doedoek di pangkoeannja.

„Loe maoe ada omongan apa?" tanja Bok-hiang kamoedian, sasoeda berdiam sabentaran. „Mana loe poenia mah ? — kapan sampe sekarang belon kaliatan mata-idoengnja.“

Koei-tjoan, memeloek sakeras-kerasnja, seraja menanja dengen bisik-bisik:

„Apa si Djambroet belon bilangin sama loe?"

„Belon, perkara apa?"

„Do, dia bohong ni. Toe-toe dia katawa."

Dengen sasoenggoenja Bok-hiang djadi bersenjoem lantaran meliat laganja ia poenja kekasih, tapi sigra djoega ia berkata dengen soeara tetap:

„Betoel bi Djambroet engga ada kata apa-apa. Perkara apa si?"

Koei-tjoan tida lantas menjaoet. Ia tjioem pipinja si gadis sampe bebrapa kali, samantara tangannja menggrepe ka sana-sini. Kamoedian baroe ia berkata:

„Hajolah, Bok-hiang.”

,,Apa?” tanja si nona dengen lagoe bitjaranja anak-anak.

,,Loe si engga laen maen: apa? —apa? Goea sampe rasanja maoe mati lantaran pikirin loe siang hari malem, tapi loe engga laen maen begitoe sadja.”

,,Loe si engga laen maen katain goea sadja! Ija da loe adja jang inget sama goea; goea si engga taoe boeat pikiran sama loe, tapi engga oeroeng soeda brapa kali goea gadangin boeat samboet loe poenja dateng disini. Kaloe di'inget-inget loe malahan jang engga laen omong kosong dowang. Loe kata loe soeka sama goea, loe kata loe engga maoe kawin sama laen orang, loe kata loe lantas maoe soeroe loe poenja mah dateng lamar, tapi mana? —sampe sekarang belon kaliatan mata-idoengnja. Goea ma betoel; saban loe soeroe bilangin maoe katemoe, goea salamanja perloein begadang boeat samboet loe poenja dateng. Apa loe kira goea poenja mata sekarang engga ngantoek? — tapi lantaran maoe katemoe sama loe saboleh-boleh goea tahanin, sampe sekarang soeda bebalik djadi terang lagi da. Besok barang jang teritoe goea bakal ngelenggoet.”

Samantara kekasihnja bitjara, Koei-tjoan ada maen peloek sadja seperti lakoenja orang jang amat kangan. Sampe sakean lama djedjaka itoe tinggal berdiam sabagi sedeng ada dalem mengimpi. Kamoedian, seraja mengoesap-ngoesap kapalanja si nona, ia berkata poelah:

,,Djangan loe bohong, Bok-hiang! Apa betoel si Djambroet engga ada bilangin satoe apa sama loe?"

,,Biar mati dia engga ada bilang perkara apa-apa. Tadi siang dia dateng, dia malaenkan bilang jang ini malem poekoel doewa belas loe minta katemoe sama goea, Ada apa si?“

Koei-tjoan berdiam lagi sabentaran, kamoedian laloe ia berkata pada diri sendiri dengen soeara mengoebek:

,,Koreang adjar betoel!"

,,Kanapa?"

,,Wati-wanti goea soeda pesan sama dia soeroe blangin sama loe, tapi engga taoenja dia maoe maen gampangin sadja.“

,,Perkara apa si?“

Koei-tjoan berdiam poelah sakean lama, kamoedian berkata dengan soeara lema-lemboet:

,,Goea berkata dengen soeara lema-lemboet:

,,Goea poenja hati siang-hari malem pikirin sadja sama loe, Bok-hiang, engga taoe loe poenja hati bagimana."

,,Goea djoega saban-saban inget sadja samaloe. Loe kata loe maoe soeroe loe poenja mah dateng lamar sama goea, satoe hari goea toenggoein, tapiengga djoega ada kabar-kabarnja. Kaloe goea kata, mengkali loe engga pertiaja, tapi kaloe goea ang djadi lelaki, soeda siang-siang kita berdoewa djadi laki-bini, masa toenggoe sampe sekarang masi maen gelap-gelapan sadja."

,,Kaloe betoel loe tjinta sama goea, loe toeroet toh goea poenja permintahan ini malem." Kamoedian Koei-tjoan tempelken moeloetnja di Bok-hiang poenja koeping, dan bisik-bisik begitoe plahan, hingga tida soeatoe orang laen nanti bisa tjoeri mendenger.

,,Ah, loe si jang boleh djadi engga oeroes adja. Habis loe maoe di mana? Roemah goea begini ketjil, kaloe goea poenja neh bangoen katanja, samoea lantasan boleh djadi tjilaka."

,,Djangan di sini; kita rapetin ini pintoe, habis loe ikoet goea sabentaran ka roemahnja Boea-san. Dari tadi siang samoea goea soeda pesan sama si Djambroet, tjoema koerang adjarnja dia soeda engga bilangin sama loe."

,,Loe gila? Apa loe Kira goea engga maloe kaloe sampe katemoe sama ko Boen-san! Engga ah!"

,,Kaloe loe engga toeroet goea poenja permintahan ini sakali, biar loe kata apa djoega gota engga nanti pertjaja jang loe ada tjinta sama goea. Loe mengkali engga taoe: goea poenja badan sampe rasanja engga goeriangnja lantaran ingetin sadja sama loe, Habis bagimana? — goea poenja nona engga laen lagi ripoein adja goea poenja enko. Soedalah Bok-hiang, kaloe loe engga soeka. toeroet la biar karoeannja; asal goea taoe sadja."

,,Loe si jang heran-heran sadja! Habis kaloe goea maloe bagimana?"

,,Hala kata adja dasaran loe engga maoe! Kita poenja perkara memangnja dia berdoewa soeda taoe; apanja jang diboeat sangkoetan lagi? Laen dari itoe, lagi maoe ka mari goea soeda pesan wanti-wanti sama dia berdoewa! pendeknja loe engga nanti katemoein: sama si Boen-san, baek sama si Djamhroet keh."

Bok-hiang tinggal berdiam sampe sakean lama. Doewa pikiran jang bertentangan keras satoe pada laen ada bergoelak dalem hatinja. Ia merasa kapingin loeloesken sadja orang poenja permintahan, kerna seperti saorang prempoean jang soeda dewasa, ia djoega soeda ada mempoenja itoe api katjintahan, jang samingkin lama djadi samingkin berkwasa, lantaran ia poenja pergaoelan sama Koei-tjoean. Tapi sabagi satoe gadis jang belon ternodah dengen oewatannja doenia, sabaliknja ia djadi merasa sangsi boeat bertindak sampe begitoe djaoe. Itoelah sadja jang soeda mendjadi sebab kaloe ia soeda tinggal membisoe, kerna dengen sasoenggoenja djoega ia tida taoe bagimana misti bri penjaoetan.

Koei-tjoan, jang di waktoe itoe tida iboeki laen dari ia poenja napsoe birahi, tatkalah meliat kekasihnja berlakoe seperti toempang, lantas berkata lagi

,,Bagimana, Bok-hiang, masa sagitoe sadja loe engga boleh toeroet goea poenja permintahan ? Soenggoe mati goea engga nanti siasia sama loe; kaloe sampe loe engga maoe djoega la biar karoeannja."

,,Nanti adja si kanapa!“

,,Ai, masa loe engga ngarti djoega goea poenja omong? Dari tadi siang goea sampe engga kerdja laen dari harep-harep lekas djadi malem kaloe sekarang loe engga maoe toeroet djoega goea poenja permintahan la biar karoeannja.“

Sambil kata begitoe Koei-tjoan adjak si gadis berbangkit, pegang tangannja, kamoedian laloe berkata lagi:

,,Hajolah, Bok-hiang!"

,,Ai goea djadi sarebah soesa," kata gadis itoe dengen moendoer-madjoe. ,,Habis bagimana nanti djadinja?'"

Bagimana apa? Masa sampe begitoe loe masi engga pertjaja goea poenja omong! Biar mati goea engga nanti siasia sama loe."

Kamoedian Koei-tjoan kempit tangannja ia poenja kekasih dan lantas maoe moelahi bertindak, tapi si gadis lantas beratken badannja, rapetken pintoe dengen lebi terliti, kamoedian laloe berkata:

,,Ai, goea djadi sarebah salah laen kali adja si engga boleh ?" „Samentaran sadja, Bok-hiang; goea tanggoeng engga satoe orang nanti dapet taoe; bolehlah toe-roet goea poenja permintahan ini sakali.“

Habis berkata Koei-tjoan lantas bertindak mandjoe.

Si nona di itoe masa seperti soeda tida mem-mempoenja pikiran lagi. Tidakah memang benar djawabannja soewal di ini doenia?-rasa kapingin kaloe ditjampoer dengen rasa sangsi pengabisannja djadi hilang diri sendiri poenja kamaoehan.

Tida salah kaloe maoe dikata, Bok-hiang ada berkwasa atas dirinja sendiri, kerna bilah ia tida maoe, biar poen bagiaman Koei-tjoan tnetoe tida nanti bisa paksa, tapi maoe itoe terkadang-terkadang ada djaoe sekali artinja. Seperti gadis itoe sekarang; sabenarnja boleh dibilang ia tida ada ingetan sama sekali dan tidasoeka boeat landjoetken pertjinta-han sampe begitoe djaoe, tapi toch tida boleh di-kata, ia tida maoe loeloesken kekasihnja poenja permintahan, kerna dalem toeboenja sendiri poen ada berkobar itoe api birahi.

Betoel djoega koetika Koei-tjoan toentoen tangannja adjak berdjalan, bebrapa kali Bok-hiang soeda merandak lantaran seroean hatinja jang moendoer madjoe, tapi toech itoe boekan namanja tida maoe ikoet, kerna tjara demikian achirnja marika berdoewa soeda sampe djoega di depan roemahnja Boen-san.

Tatkalah itoe si nona djadi bergoemeter sedikit, kerna perdjalanan jang sedeng dihadepken olehnja sekarang rada-rada boleh dioempamaken sabagi orang jang maoe brangkat mati.

Orang jang meninggal doenia nanti dapetken perobahan: dari berdjiwa mendjadi mait, samantara ia nanti alamken: dari gadis mendjadi......

Salagi Koei-tjoan maoe gerakin tangannja boeat memboekah pintoe, dengen tida taoe apa sebabnja ia soeda lantas menjegah, kamoedian laloe berkata:

„Habis bagimana nanti djadinja?“

Djedjaka itoe, jang sekarang soeda ampir meloepahken daratan, tida maoe berajal-ajalan lagi. Laloe ia memoeter grendel, dan pintoe, jang me-mangnja tjoema dirapetken sadja, lantas djadi ter-boekah. Kamoedian laloe ia berkata:

„Djangan takoet, Bok-hiang, dia berdoewa semoea ada di blakang, kita engga nanti dapet katemoein. Hajo da!“

„Habis di mana?“ tanja si nona dengen soeara jang menjataken berdebarnja hati, tapi toch ia soeda bertindak djoega masoek ka dalem roemah.

„Kita pegi ka kamar, dia berdoewa sekarang samoea ada di blakang.“

Sambil kata begitoe sigra Koei-tjoan mengoentji pintoe dari dalem.

....................

....................

Dengen koenjoeng-koenjoeng tongtong mengoearaken poekoel doewa malem. Koetika itoe Bok-hiang laloe berkata dengen lagoe bitjaranja orang jang menjesal:

,,Djjangan goea poenja neh soeda dapet taoe ini perkara."

,,Engga boleh djadi, Bok-hiang, djangan takoet, doedoek-doedoek “doeloe di 'sini, samentar goea nanti anterin loe poelang."

,,Kaloe sampe goea poenja neh dapet taoe ini perkara, goea boleh djadi tjilaka. Ai, goea sekarang betoel-betoel djadi sarebah soesa: dengenan besok Tjengbeng!“

Goea tanggoeng engga satoe orang nanti bisa dapet taoe kita poenja resia, loe djangan takoet, Bok-hiang!"

Gadis itoe berdiam sampe sakean lama, kamoedian laloe ia berkata poelah dengen soeara masgoel:

,,Goea sekarang soeda toeroetin loe poenja maoe, Koei-tjoan, goea lebi soeka mati kaloe sampe loe siasia sama goea!"

,,Djangan loe salempang, kaloe goea poenja nona soeda beresin goea poenja enko, tentoe engga tentoe lagi goea nanti mendesar.“

Bok-hiang berdiam kombali. Ia beresken sigang kondehnja jang soeda mendjadi amat koesoet. Kamoedian ia mengoewap, dan satelah itoe laloe ia berkata:

,,Sekarang lebi baek goea poelang tjepat-tjepat; kaloe sampe neh goea kaboeroe mendoesin, samoea nanti djadi engga oeroes.”

Koei-tjoan merasa jang ia tida bisa tahan lagi pada kekasihnja. Laloe ia berbangkit, dan berpakeh pakehan, kamoedian laloe ia pergi ka blakang bilangin Boen san boeat mengoentji pintoe.

Samantara itoe Bok-hiang soeda ada menoenggoe di pertengahan, dan sigra djoega doewa kekasih itoe berlaloe dari itoe roemah, dimana tadi ia orang soeda bertindak masoek dengen hati berketak-ketik.

Sasampenja di roemah sendiri, Bok-hiang lantas menolak pintoe dengen amat plahan, memasang koeping boeat mendenger apa tida ada kadjadian apa-apa, kamoedian laloe berkata dengen soeara bisik-bisik :

,,Sekarang goea maoe tidoer sadjas inget loe poenja perdjandjian!”

,,Kapan goea boleh dateng lagi ka mari?“

,,Liat sadjaj sekarang goea soeda kliwat ngantoek"

Sambil kata begitoe si nona lantas mengoentji pintoe dari dalem.

Koei-tjoan berdiri diam sabentaran dengen bersenjoem, kamoedian ia djoega lantas berlaloe.

XXIV.

DALEM ROEMAH DI TONGKANGAN.


Pada esok harinja, kira-kira poekoel sapoeloe sa-tengah baroe Koei-tjoan bangoen dari tidoer. koetika itoe malaenkan tinggal ia sendirian sadja dalem roemah, kerna iboe-bapanja sadari pagi-pagi soeda pergi ka tandjoeng sama boedjang-boedjang dan soedaranja, samantara ia poenja engko jang paling besar dari malem tida kaliatan mata-itodeng-nja.

Toeroen dari randjang djedjaka itoe lantas mengamperi kamar-mandi; sasoeda goejoe bikin adem ia poenja awak dan kapala, laloe ia isap satoe tjeroetoe, dan doedoek anggoeat-anggoetan di krosi gojang jang ada di pertengahan roemah. S abentar-bentar kalitan djedka itoe bersenjoem sendirian, kamoedian laloe ia berkata dengen soeara tida kadengeran njata;

„Sekarang maoe engga maoe dia misti djadi goea poenja goendik; kaloe engga habis dia maoe djadi apa? engga boleh salah, mahnja misti kasi kaloe dia soeda dapet taoe ini perkara; malahan djoega dia soeda boleh bilang trima kasi koloe goea engga siasia dia poenja anak.“

Ia lepas kapalanja di senderan krosi, dan berdongak liat papan loteng sembari keboelken asap tjeroetoenja ka atas. Sasoeda mengoewap seperti